Artikolu 81 Id-dritt li jitressaq ilment ma’ korp ta’ aċċess għal data dwar is-saħħa

1.   Mingħajr preġudizzju għal kwalunkwe rimedju amministrattiv jew ġudizzjarju ieħor, il-persuni fiżiċi u ġuridiċi għandu jkollhom id-dritt li jressqu lment, b’rabta mad-dispożizzjonijiet stabbiliti f’dan il-Kapotolu, individwalment jew, fejn rilevanti, kollettivament, ma’ korp tal-aċċess għad-data dwar is-saħħa, dment li d-drittijiet jew l-interessi tagħhom jiġu affettwati b’mod negattiv.

2.   Il-korp tal-aċċess għad-data dwar is-saħħa li lilha jkun ġie ppreżentat l-ilment għandha tinforma lill-ilmentatur dwar il-progress li jkun sar fl-indirizzar tal-ilment u dwar id-deċiżjoni meħuda fir-rigward tal-ilment.

3.   Il-korpi tal-aċċess għad-data dwar is-saħħa għandhom jipprovdu għodod faċilment aċċessibbli għas-sottomissjoni tal-ilmenti.

4.   Meta l-ilment jikkonċerna d-drittijiet ta’ persuni fiżiċi skont l-Artikolu 71 ta’ dan ir-Regolament, l-ilment għandu jiġi trażmess lill-awtoritajiet kompetenti superviżorji skont ir-Regolament (UE) 2016/679. Iil-korp rilevanti tal-aċċess għad-data dwar is-saħħa għandu jipprovdi l-informazzjoni meħtieġa għad-dispożizzjoni tiegħu lil dik l-awtorità superviżorja skont ir-Regolament (UE) 2016/679 sabiex jiffaċilita l-valutazzjoni u l-investigazzjoni tal-ilment.