Artikolu 8 Sodizza legali

1.   Operatur ta’ SIPS għandu jevalwa jekk il-liġi applikabbli fis-sistemi legali rilevanti tipprovdi livell għoli ta’ ċertezza għal u tappoġġja kull aspett materjali tal-attivitajiet tas-SIPS tiegħu.

2.   Operatur ta’ SIPS għandu jistabilixxi regoli u proċeduri tas-SIPS u jidħol f’kuntratti, li huma ċari u konsistenti bil-liġi applikabbli fis-sistemi legali rilevanti kollha.

3.   Operatur ta’ SIPS għandu jkun jista’ jispeċifika l-liġi applikabbli, regoli, proċeduri u kuntratti għall-operat ta’ SIPS lill-awtorità kompetenti, parteċipanti, u, fejn rilevanti, klijenti tal-parteċipanti, b’mod ċar u li jiftiehem.

4.   Operatur ta’ SIPS għandu jieħu miżuri biex jiżgura li r-regoli, il-proċeduri, u l-kuntratti tiegħu jiġu infurzati fis-sistemi legali rilevanti kollha, u li l-azzjonijiet li jieħu taħt dawn ir-regoli, proċeduri u kuntratti ma jiġux annullati, imreġġa’ lura, jew soġġetti għall-perijodi ta’ waqfien.

5.   Operatur ta’ SIPS li jmexxi negozju f’wieħed jew iktar minn sistema ġuridika waħda għandu jidentifika u jimmittiga r-riskji li jirriżultaw minn kwalunke kunflitt ta’ liġijiet potenzjali.

6.   Operatur ta’ SIPS għandu juża l-aħjar sforzi tiegħu biex jiżgura l-identifikazzjoni tas-SIPS taħt id-Direttiva 98/26/KE.