Artikolu 18 Riskju ġenerali ta’ negozju

1.   Operatur ta’ SIPS għandu jistabbilixxi ġestjoni robusta u sistemi ta’ kontroll biex jidentifika, iżomm monitoraġġ, u jiġġestixxi riskji ġenerali ta’ negozju, inkluż telf li jirriżulta minn eżekuzzjoni ta’ livell baxx ta’ strateġija tan-negozju, flussi negattivi ta’ flus kontanti, jew spejjeż mhux mistennija u eċċessivament kbar.

2.   Operatur ta’ SIPS għandu jżomm irkupru vijabbli u, ħlief għas-SIPS tal-Eurosistema, pjan ta’ stralċ ordinat kif meħtieġ skont l-Artikolu 10(4).

3.   Operatur ta’ SIPS għandu jiddetermina, abbażi tal-profil tar-riskju tan-negozju ġenerali u ż-żmien meħtieġ biex jirnexxi rkupru u/jew stralċ ordnat tal-operazzjonijiet u servizzi kritiċi tiegħu, l-ammont ta’ attiv meħtieġ għall-implementazzjoni tal-pjan msemmi fil-paragrafu 2. Dan l-ammont m’għandux ikun inqas minn sitt xhur tal-ispejjeż operattivi kurrenti.

4.   Sabiex jiġi kopert l-ammont msemmi fil-paragrafu 3, operatur ta’ SIPS għandu jkollu attiv nett likwidu ffinanzjat mill-ekwità, pereżempju stokk komuni, riżervi żvelati jew qligħ ieħor miżmum, sabiex ikun jista’ jkompli l-operazzjonijiet u s-servizzi bħala negozju avvjat. Dan l-attiv għandu jiżdied mar-riżorsi miżmuma biex ikopri l-inadempjenza tal-parteċipant jew riskji oħra koperti taħt l-Artikoli 11 u 13. L-ekwità miżmuma taħt standards internazzjonali tal-kapital ibbażati fuq ir-riskju jistgħu jiġu inklużi biex jiġu evitati rekwiżiti tal-kapital doppji.

5.   Attiv imsemmi fil-paragrafu 4 miżmum biex ikopri riskju ġenerali tan-negozju għandu jkun ta’ likwidità suffiċjenti u ta’ kwalità għolja sabiex ikun disponibbli fil-ħin meħtieġ, u għandu jkun ssegregati mill-attiv tal-operatur ta’ SIPS użat għall-operazzjonijiet ta’ kuljum. L-operatur ta’ SIPS għandu jkun jista’ jirrealizza dan l-attivi miżmum biex ikopri r-riskju tan-negozju ġenerali bi ftit effett negattiv, jekk ikun hemm, sabiex ikun jista’ jkompli b’operazzjonijiet u servizzi bħala negozju avvjat jekk ikollu telf tan-negozju ġenerali.

6.   Operatur ta’ SIPS għandu jistabbilixxi pjan kapitali vijabbli sabiex iżid ekwità addizzjonali jekk l-ekwità tiegħu taqa’ viċin jew taħt l-ammont imsemmi fil-paragrafu 3.

7.   Il-paragrafi 3 sa 6 m’għandhomx japplikaw għas-SIPS tal-Eurosistema.