Artikolu 19 Riskji ta’ kustodja u ta’ investiment

1.   Operatur ta’ SIPS għandu jżomm l-attiv tiegħu u tal-parteċipanti ma’ entitajiet sorveljati u rregolati (minn hawn ’il quddiem il-“kustodji”) li għandhom prattiki tal-kontabbiltà, proċeduri ta’ kustodja u kontrolli interni li jipproteġu b’mod sħiħ dan l-attiv kontra r-riskju ta’ telf fil-każ ta’ insolvenza, negliġenza, frodi, amministrazzjoni fqira jew żamma tar-rekords inadegwati tal-kustodju jew tas-subkustodju.

2.   Operatur ta’ SIPS għandu jkollu aċċess f’waqtu għall-attiv tiegħu u l-attiv ipprovdut mill-parteċipanti.

3.   Operatur ta’ SIPS għandu jevalwa u jifhem l-iskoperturi tiegħu lejn il-banek kustodji tiegħu, billi jikkunsidra l-ambitu sħiħ tar-relazzjonijiet tiegħu ma’ kull wieħed.

4.   Operatur ta’ SIPS għandu jistabbilixxi l-istrateġija ta’ investiment tiegħu, li għandha tkun konsistenti mal-istrateġija globali tal-ġestjoni tar-riskju u żvelata bis-sħiħ lill-parteċipanti. Huwa għandu jirrevedi l-istrateġija tal-investiment mill-inqas darba fis-sena.

5.   L-investimenti tal-operatur ta’ SIPS taħt l-istrateġija tal-investiment tiegħu għandhom ikunu iggarantiti minn, jew ikunu pretensjonijiet fuq, obbliganti ta’ kwalità tajba ħafna. Operatur ta’ SIPS għandu jiddefinixxi l-kriterji għall-obbliganti ta’ kwalità għolja. L-investimenti ikunu fi strumenti bi kreditu baxx, riskji minimi ta’ kreditu, tas-suq u tal-likwidità.

6.   Il-paragrafi 3 sa 5 m’għandhomx japplikaw għal SIPS tal-Eurosistema.