Artikolu 20 Riskju operattiv

1.   Operatur ta’ SIPS għandu jistabbilixxi qafas robust b’sistemi, politiki, proċeduri u kontrolli xierqa li jidentifikaw, iżommu monitoraġġ u jiġġestixxu r-riskju operattiv.

2.   Operatur ta’ SIPS għandu jirrevedi, jagħmel awditu, u jittestja sistemi, politiki, proċeduri u kontrolli operattivi perjodikament u wara tibdil sinifikanti.

3.   Operatur ta’ SIPS għandu jistabbilixxi livell ta’ servizz u objettivi u politiki ta’ affidabbiltà operattiva ddisinjati biex jakkwistaw dawk l-objettivi. Huwa għandu jirrevedi l-oġġettivi u l-politiki mill-inqas darba fins-sena.

4.   Operatur ta’ SIPS għandu jiżgura li SIPS, f’kull ħin, għandha kapaċità li tittratta żidiet fil-volumi ta’ ħlas li jseħħu minħabba każijiet ta’ stress, u li hija tista’ tikseb l-oġġettivi tal-livell tas-servizz tagħha.

5.   Operatur ta’ SIPS għandu jistabbilixxi politiki ta’ sigurtà fiżika u politiki ta’ teknoloġija tal-informazzjoni u tal-komunikazzjoni (ICT), proċessi u sistemi ta’ politika komprensivi, kif ukoll sistemi ta’ informazjzoni reżiljenti li jidentifikaw, jivvalutaw u jiġġestixxu b’mod adegwat il-vulnerabbiltajiet, it-theddid ta’ inċidenti u r-riskji potenzjali kollha f’ambjent ta’ IT. Huwa għandu jirrevedi l-politiki mill-inqas darba fis-sena.

6.   Operatur ta’ SIPS għandu jistabbilixxi pjan ta’ kontinwità tan-negozju li jindirizza avvennimenti li joħolqu riskju sinifikanti li jisfrattaw l-operazzjonijiet tas-SIPS. Il-pjan għandu jinkludi l-użu ta’ siti sekondarji u jkun iddisinjat biex jiżgura li sistemi ta’ teknoloġija ta’ informazzjoni teknoloġika kritika jistgħu ikomplu l-operazzjonijiet fi żmien sagħtejn ta’ dawk l-avvenimenti. Il-pjan għandu jiġi ddisinjat b’mod li s-SIPS dejjem tista’ tagħmel saldu tal-ħlasijiet dovuti sa tmiem il-jum ta’ negozju li fih seħħ l-isfrattu. L-operatur ta’ SIPS għandu jittestja l-pjan u r-reviżjoni mill-inqas darba fis-sena.

7.   Operatur ta’ SIPS għandu jidentifika parteċipanti kritiċi fuq il-bażi, b’mod partikolari, ta’ volumi u valuri ta’ ħlas u l-impatt potenzjali tagħhom fuq parteċipanti oħra u s-SIPS bħala ħaġa waħda, fl-eventwalità ta’ problema operattiva sinifikanti esperjenzata minn dawn il-parteċipanti.

8.   Operatur ta’ SIPS għandu jidentifika, iżomm monitoraġġ, u jiġġestixxi r-riskji li parteċipanti kritiċi, li mhumiex IFM, u fornituri ta’ servizzi u ta’ utilità jistgħu jimponu fuq l-operazzjonijiet tas-SIPS.

9.   Għall-finijiet ta’ dan l-Artikolu, ir-referenzi għal “riskju” jinkludu r-riskji speċifikati fl-Artikoli 21 u 22.