Artikolu 11 Informazzjoni għal fornituri ta’ kontenut

1.   Fejn fornitur ta’ servizzi ta’ hosting ineħħi, jew jiddiżattiva l-aċċess għal, kontenut terroristiku, huwa għandu jagħmel disponibbli lill-fornitur ta’ kontenut informazzjoni dwar tali tneħħija jew diżattivazzjoni.

2.   Fuq talba tal-fornitur ta’ kontenut, il-fornitur ta’ servizzi ta’ hosting għandu jew jinforma lill-fornitur ta’ kontenut dwar ir-raġunijiet għat-tneħħija jew għad-diżattivazzjoni u dwar id-drittijiet tiegħu għall-kontestazzjoni tal-ordni ta’ tneħħija jew jipprovdi lill-fornitur ta’ kontenut kopja tal-ordni ta’ tneħħija.

3.   L-obbligu taħt il-paragrafi 1 u 2 ma għandux japplika fejn l-awtorità kompetenti li toħroġ l-ordni ta’ tneħħija tiddeċiedi li huwa meħtieġ u proporzjonat li ma jkun hemm l-ebda żvelar għal raġunijiet ta’ sigurtà pubblika, bħall-prevenzjoni, l-investigazzjoni, is-sejbien u l-prosekuzzjoni ta’ reati terroristiċi, sakemm ikun meħtieġ, iżda mhux aktar minn sitt ġimgħat minn dik id-deċiżjoni. F’tali każ, il-fornitur ta’ servizzi ta’ hosting ma għandu jiżvela l-ebda informazzjoni dwar it-tneħħija ta’, jew id-diżattivazzjoni ta’ aċċess għal, kontenut terroristiku.

Dik l-awtorità kompetenti tista’ testendi dak il-perijodu b’sitt ġimgħat oħra fejn tali nuqqas ta’ żvelar jibqa’ ġustifikat.