Artikolu 14 Kooperazzjoni bejn il-fornituri ta’ servizzi ta’ hosting, l-awtoritajiet kompetenti u l-Europol

1.   L-awtoritajiet kompetenti għandhom jiskambjaw informazzjoni, jikkoordinaw u jikkooperaw ma’ xulxin u, fejn xieraq, mal-Europol, fir-rigward ta’ ordnijiet ta’ tneħħija, partikularment biex jevitaw id-duplikazzjoni ta’ sforzi, itejbu l-koordinazzjoni u jevitaw l-interferenza f’investigazzjonijiet fi Stati Membri differenti.

2.   L-awtoritajiet kompetenti tal-Istati Membri għandhom jiskambjaw informazzjoni, jikkoordinaw u jikkooperaw mal-awtoritajiet kompetenti msemmija fil-punti (c) u (d) tal-Artikolu 12(1) fir-rigward ta’ miżuri speċifiċi meħuda taħt l-Artikolu 5 u penali imposti taħt l-Artikolu 18. L-Istati Membri għandhom jiżguraw li l-awtoritajiet kompetenti msemmija fil-punti (c) u (d) tal-Artikolu 12(1) ikollhom fil-pussess tagħhom l-informazzjoni kollha rilevanti.

3.   Għall-finijiet tal-paragrafu 1, l-Istati Membri għandhom jipprevedu mezzi jew mekkaniżmi ta’ komunikazzjoni adatti u siguri biex jiżguraw li l-informazzjoni rilevanti tiġi skambjata b’mod f’waqtu.

4.   Għall-implimentazzjoni effettiva ta’ dan ir-Regolament kif ukoll biex tiġi evitata d-duplikazzjoni ta’ sforzi, l-Istati Membri u l-fornituri ta’ servizzi ta’ hosting jistgħu jużaw għodod dedikati, inklużi dawk stabbiliti mill-Europol, biex jiffaċilitaw b’mod partikolari:

5.   Fejn il-fornituri ta’ servizzi ta’ hosting isiru jafu b’kontenut terroristiku li jinvolvi theddida imminenti għall-ħajja, huma għandhom jinfurmaw minnufih lill-awtoritajiet kompetenti għall-investigazzjoni u l-prosekuzzjoni ta’ reati kriminali fl-Istati Membri kkonċernati. Fejn ma jkunx possibbli li jiġu identifikati l-Istati Membri kkonċernati, il-fornituri ta’ servizzi ta’ hosting għandhom jinnotifikaw lill-punt ta’ kuntatt skont l-Artikolu 12(2) fl-Istat Membru fejn ikollhom l-istabbiliment prinċipali tagħhom jew fejn ir-rappreżentant legali tagħhom jirrisjedi jew ikun stabbilit, u jibagħtu informazzjoni dwar dak il-kontenut terroristiku lill-Europol għal segwitu xieraq.

6.   L-awtoritajiet kompetenti huma mħeġġa jibagħtu kopji tal-ordnijiet ta’ tneħħija lill-Europol biex b’hekk din tkun tista’ tipprovdi rapport annwali li jinkludi analiżi tat-tipi ta’ kontenut terroristiku soġġett għal ordni biex jitneħħa jew biex l-aċċess għalih jiġi diżattivat skont dan ir-Regolament.