Artikolu 14 Rapportar dwar skoperturi kbar fuq bażi individwali u konsolidata

Sabiex jirrapportaw informazzjoni dwar skoperturi kbar għal klijenti u gruppi ta’ klijenti konnessi skont l-Artikolu 394 tar-Regolament (UE) Nru 575/2013 fuq bażi individwali u konsolidata, l-istituzzjonijiet għandhom jissottomettu l-informazzjoni kif speċifikat fl-Anness VIII, skont l-istruzzjonijiet fl-Anness IX, bi frekwenza trimestrali.

Sabiex jirrapportaw informazzjoni dwar l-akbar 20 skopertura għal klijenti jew gruppi ta’ klijenti konnessi skont l-Artikolu 394(1) tar-Regolament (UE) Nru 575/2013 fuq bażi konsolidata, l-istituzzjonijiet soġġetti għall-Parti Tlieta, it-Titolu II, il-Kapitolu 3 tar-Regolament (UE) Nru 575/2013 għandhom jissottomettu l-informazzjoni speċifikata fl-Anness VIII, f’konformità mal-istruzzjonijiet fl-Anness IX, bi frekwenza trimestrali.

Sabiex jirrapportaw informazzjoni dwar skoperturi b’valur ikbar minn jew ugwali għal EUR 300 miljun iżda inqas minn 10 % tal-kapital ta’ Grad 1 tal-istituzzjoni skont l-Artikolu 394(1) tar-Regolament (UE) Nru 575/2013 fuq bażi konsolidata, l-istituzzjonijiet għandhom jissottomettu l-informazzjoni speċifikata fl-Anness VIII, f’konformità mal-istruzzjonijiet fl-Anness IX, bi frekwenza trimestrali.

Sabiex jirrapportaw informazzjoni dwar l-akbar 10 skoperturi għall-istituzzjonijiet fuq bażi konsolidata, u dwar l-akbar 10 skoperturi għal entitajiet mhux bankarji li jwettqu attivitajiet bankarji barra mill-qafas regolat fuq bażi konsolidata, f’konformità mal-Artikolu 394(2) tar-Regolament (UE) Nru 575/2013, l-istituzzjonijiet għandhom jissottomettu l-informazzjoni kif speċifikat fl-Anness VIII, f’konformità mal-istruzzjonijiet fl-Anness IX, bi frekwenza trimestrali.