Artikolu 81 Kooperazzjoni bejn l-FIUs u l-UPPE

1.   Skont l-Artikolu 24 tar-Regolament (UE) 2017/1939, kull FIU għandha mingħajr dewmien żejjed tirrapporta lill-UPPE r-riżultati tal-analiżijiet tagħha u kwalunkwe informazzjoni rilevanti addizzjonali fejn ikun hemm raġunijiet validi biex wieħed jissuspetta li qed jitwettaq jew twettaq ħasil tal-flus u attività kriminali oħra li fir-rigward tagħhom l-UPPE jista’ jeżerċita l-kompetenza tiegħu f’konformità mal-Artikolu 22 u l-Artikolu 25(2) u (3) ta’ dak ir-Regolament.

Sal-10 ta’ Lulju 2026, l-AMLA għandha tiżviluppa, f’konsultazzjoni mal-UPPE, abbozzi ta’ standards tekniċi ta’ implimentazzjoni u tippreżentahom lill-Kummissjoni għall-adozzjoni. Dawk l-abbozzi ta’ standards tekniċi ta’ implimentazzjoni għandhom jispeċifikaw il-format li għandu jintuża mill-FIUs għar-rapportar ta’ informazzjoni lill-UPPE.

Il-Kummissjoni tingħata s-setgħa li tadotta l-istandards tekniċi ta’ implimentazzjoni msemmija fit-tieni subparagrafu ta’ dan il-paragrafu f’konformità mal-Artikolu 53 tar-Regolament (UE) 2024/1620.

2.   L-FIUs għandhom iwieġbu fil-ħin għat-talbiet għal informazzjoni mill-UPPE fir-rigward tal-ħasil tal-flus u attività kriminali oħra kif imsemmija fil-paragrafu 1.

3.   L-FIUs u l-UPPE jistgħu jiskambjaw ir-riżultati ta’ analiżijiet strateġiċi, inkluż tipoloġiji u indikaturi tar-riskju, fejn tali analiżijiet ikunu relatati ma’ ħasil tal-flus u attività kriminali oħra kif imsemmija fil-paragrafu 1.