Artikolu 34 Aġġustamenti fil-valur addizzjonali

L-istituzzjonijiet għandhom japplikaw ir-rekwiżiti tal-Artikolu 105 għall-assi kollha tagħhom imkejla f'valur ġust meta jikkalkulaw l-ammont tal-fondi proprji tagħhom u għandhom inaqqsu mill-kapital ta' Ekwità Komuni ta' Grad 1 l-ammont ta' kwalunkwe aġġustament fil-valur addizzjonali neċessarju.

B'deroga mill-paragrafu 1, f'ċirkostanzi straordinarji, li l-eżistenza tagħhom għandha tiġi ddeterminata minn opinjoni pprovduta mill-EBA f'konformità mal-paragrafu 3, l-istituzzjonijiet jistgħu jnaqqsu l-aġġustamenti tal-valur addizzjonali totali fil-kalkolu tal-ammont totali li għandu jitnaqqas mill-kapital tal-Grad 1 ta' Ekwità Komuni.

Għall-fini tal-għoti tal-opinjoni msemmija fil-paragrafu 2, l-EBA għandha timmonitorja l-kundizzjonijiet tas-suq sabiex tivvaluta jekk seħħewx ċirkostanzi straordinarji u, jekk ikun hekk, għandha tinnotifika lill-Kummissjoni b’dan minnufih.

L-EBA, b’konsultazzjoni mal-ESMA, għandha tiżviluppa abbozzi ta’ standards tekniċi regolatorji sabiex tispeċifika l-indikaturi u l-kundizzjonijiet li l-EBA ser tuża sabiex tiddetermina ċ-ċirkostanzi straordinarji msemmija fil-paragrafu 2 u sabiex tispeċifika t-tnaqqis tal-aġġustamenti tal-valur addizzjonali aggregati totali msemmija f’dak il-paragrafu.