Preamble: 1

(1)

Is-servizzi tas-soċjetà tal-informazzjoni u speċjalment is-servizzi intermedjarji saru parti importanti tal-ekonomija tal-Unjoni u tal-ħajja ta' kuljum taċ-ċittadini tal-Unjoni. Għoxrin sena wara l-adozzjoni tal-qafas legali eżistenti applikabbli għal tali servizzi stabbilit fid-Direttiva 2000/31/KE tal-Parlament Ewropew u tal-Kunsill (4), mudelli u servizzi kummerċjali ġodda u innovattivi, bħal pereżempju networks soċjali online u pjattaformi online li jippermettu lil konsumaturi jikkonkludu kuntratti mill-bogħod ma’ kummerċjanti, ippermettew lill-utenti kummerċjali u l-konsumaturi jipprovdu u jaċċessaw informazzjoni u jinvolvu ruħhom fi tranżazzjonijiet b'modi ġodda. Il-biċċa l-kbira taċ-ċittadini tal-Unjoni issa jużaw dawk is-servizzi kuljum. Madankollu, it-trasformazzjoni diġitali u ż-żieda fl-użu ta' dawk is-servizzi taw lok ukoll għal riskji u sfidi ġodda għal riċevituri individwali tas-servizz rilevanti, għall-kumpaniji u għas-soċjetà kollha kemm hi.

(2)

L-Istati Membri qed jintroduċu aktar u aktar, jew qed jikkunsidraw li jintroduċu, liġijiet nazzjonali dwar il-kwistjonijiet koperti minn dan ir-Regolament, li jimponu, b'mod partikolari, rekwiżiti ta' diliġenza għall-fornituri tas-servizzi intermedjarji fir-rigward tal-mod kif jenħtieġ li jindirizzaw il-kontenut illegali, id-diżinformazzjoni online jew riskji soċjetali oħra. Dawk il-liġijiet nazzjonali diverġenti jaffettwaw b'mod negattiv is-suq intern, li, skont l-Artikolu 26 tat-Trattat dwar il-Funzjonament tal-Unjoni Ewropea (TFUE), huwa żona mingħajr fruntieri interni li tiżgura l-moviment liberu tal-oġġetti u tas-servizzi u l-libertà tal-istabbiliment, filwaqt li tqis in-natura intrinsikament transfruntiera tal-internet, li ġeneralment jintuża biex jiġu fornuti dawk is-servizzi. Il-kondizzjonijiet għall-forniment tas-servizzi intermedjarji fis-suq intern jenħtieġ li jiġu armonizzati biex in-negozji jkollhom aċċess għal swieq u opportunitajiet ġodda biex jisfruttaw il-benefiċċji tas-suq intern, filwaqt li l-konsumaturi u riċevituri oħra tas-servizzi jkollhom għażla akbar. L-utenti kummerċjali, il-konsumaturi u utenti oħra huma kkunsidrati "riċevituri tas-servizz" għall-fini ta' dan ir-Regolament.

(3)

Imġiba responsabbli u diliġenti mill-fornituri tas-servizzi intermedjarji hija essenzjali għal ambjent online sikur, prevedibbli u affidabbli u biex iċ-ċittadini tal-Unjoni u persuni oħra jkunu jistgħu jeżerċitaw id-drittijiet fundamentali tagħhom garantiti fil-Karta tad-Drittijiet Fundamentali tal-Unjoni Ewropea (il-"Karta"), b'mod partikolari l-libertà tal-espressjoni u tal-informazzjoni, il-libertà li wieħed imexxi negozju, id-dritt ta' nondiskriminazzjoni u l-kisba ta' livell għoli ta' protezzjoni tal-konsumatur.

(4)

Għalhekk, biex jiġi salvagwardjat u jittejjeb il-funzjonament tas-suq intern, jenħtieġ li jiġi stabbilit sett immirat ta' regoli obbligatorji fil-livell tal-Unjoni li jkunu uniformi, effettivi u proporzjonati. Dan ir-Regolament jipprevedi l-kondizzjonijiet li skonthom ikunu jistgħu jitfaċċaw u jespandu servizzi diġitali innovattivi fis-suq intern. L-approssimazzjoni tal-miżuri regolatorji nazzjonali fil-livell tal-Unjoni dwar ir-rekwiżiti għall-fornituri tas-servizzi intermedjarji hija meħtieġa biex tiġi evitata u tintemm il-frammentazzjoni tas-suq intern u biex tiġi żgurata ċ-ċertezza tad-dritt, u b'hekk tonqos l-inċertezza għall-iżviluppaturi u titrawwem l-interoperabbiltà. Meta jintużaw rekwiżiti li huma newtrali fir-rigward tat-teknoloġija, jenħtieġ li ma tiġix ostakolata l-innovazzjoni iżda minflok tiġi stimulata.

(5)

Jenħtieġ li dan ir-Regolament japplika għall-fornituri ta' ċerti servizzi tas-soċjetà tal-informazzjoni kif definit fid-Direttiva (UE) 2015/1535 tal-Parlament Ewropew u tal-Kunsill (5), jiġifieri kwalunkwe servizz normalment fornut għal rimunerazzjoni, mill-bogħod, b'mezzi elettroniċi u fuq talba individwali ta' riċevitur. B'mod speċifiku, jenħtieġ li dan ir-Regolament japplika għall-fornituri tas-servizzi intermedjarji, b'mod partikolari s-servizzi intermedjarji li jikkonsistu f'servizzi magħrufa bħala servizzi ta' "sempliċi conduit", "caching" u "hosting", minħabba li t-tkabbir esponenzjali tal-użu li jsir minn dawk is-servizzi, l-aktar għal kwalunkwe skop leġittimu u soċjalment ta' benefiċċju, żied ukoll ir-rwol tagħhom fl-intermedjazzjoni u fid-disseminazzjoni ta' informazzjoni u attivitajiet illegali jew dannużi b'xi mod ieħor.

(6)

Fil-prattika, ċerti fornituri tas-servizzi intermedjarji jintermedjaw fir-rigward ta' servizzi li jistgħu jew ma jistgħux jiġu fornuti b'mezzi elettroniċi, bħal pereżempju servizzi tat-teknoloġija tal-informazzjoni mill-bogħod, servizzi ta' trasport, ta' akkomodazzjoni jew ta' konsenja. Jenħtieġ li dan ir-Regolament japplika biss għas-servizzi intermedjarji u li ma jaffettwax ir-rekwiżiti stabbiliti fil-liġi tal-Unjoni jew fil-liġi nazzjonali relatata mal-prodotti jew mas-servizzi intermedjati permezz tas-servizzi intermedjarji, inkluż f'sitwazzjonijiet fejn is-servizz intermedjarju jikkostitwixxi parti integrali ta' servizz ieħor li mhuwiex servizz intermedjarju kif rikonoxxut fil-każistika tal-Qorti tal-Ġustizzja tal-Unjoni Ewropea.

(7)

Biex tiġi żgurata l-effettività tar-regoli stipulati f'dan ir-Regolament u kondizzjonijiet ekwivalenti ta' kompetizzjoni fis-suq intern, jenħtieġ li dawk ir-regoli japplikaw għall-fornituri tas-servizzi intermedjarji irrispettivament mill-post ta' stabbiliment tagħhom jew fejn jinsabu, diment li joffru servizzi fl-Unjoni, kif evidenzjat minn konnessjoni sostanzjali mal-Unjoni.

(8)

Tali konnessjoni sostanzjali mal-Unjoni jenħtieġ li titqies eżistenti meta l-fornitur tas-servizzi jkollu stabbiliment fl-Unjoni jew, fin-nuqqas ta’ tali stabbiliment, fejn in-numru ta' riċevituri tas-servizz fi Stat Membru wieħed jew aktar jkun sinifikanti skont il-popolazzjoni tagħhom, jew abbażi tal-immirar tal-attivitajiet lejn Stat Membru wieħed jew aktar. L-immirar tal-attivitajiet lejn Stat Membru wieħed jew aktar jista' jiġi determinat abbażi taċ-ċirkostanzi rilevanti kollha, inkluż fatturi bħal pereżempju l-użu ta' lingwa jew munita li ġeneralment jintużaw f'dak l-Istat Membru, jew il-possibbiltà li jiġu ordnati prodotti jew servizzi, jew l-użu ta' dominju rilevanti tal-ogħla livell. L-immirar tal-attivitajiet lejn Stat Membru jista' jiġi determinat ukoll mid-disponibbiltà ta' applikazzjoni fil-ħanut tal-applikazzjonijiet nazzjonali rilevanti, mill-forniment ta' reklamar lokali jew reklamar b’lingwa li tintuża f'dak l-Istat Membru, jew mill-immaniġġjar tar-relazzjonijiet mal-klijenti bħal pereżempju billi jiġi pprovdut servizz tal-klijent b’lingwa li ġeneralment tintuża f'dak l-Istat Membru. Jenħtieġ li tiġi preżunta konnessjoni sostanzjali wkoll meta fornitur tas-servizzi jidderieġi l-attivitajiet tiegħu lejn Stat Membru wieħed jew aktar fit-tifsira tal-Artikolu 17(1), punt (c), tar-Regolament (UE) Nru 1215/2012 tal-Parlament Ewropew u tal-Kunsill (6). B'kuntrast għal dan, sempliċi aċċessibbiltà teknika ta' sit web mill-Unjoni ma tistax, għal dik ir-raġuni biss, titqies bħala stabbiliment ta' konnessjoni sostanzjali mal-Unjoni.

(9)

Dan ir-Regolament jarmonizza bis-sħiħ ir-regoli applikabbli għas-servizzi intermedjarji fis-suq intern bil-għan li jiġi żgurat ambjent online sikur, prevedibbli u affidabbli, filwaqt li jindirizza d-disseminazzjoni ta' kontenut illegali online u r-riskji soċjetali li d-disseminazzjoni tad-diżinformazzjoni jew ta' kontenut ieħor tista' toħloq, u li fi ħdanu d-drittijiet fundamentali minquxa fil-Karta jkunu protetti b'mod effettiv u l-innovazzjoni tiġi ffaċilitata. Għaldaqstant, jenħtieġ li l-Istati Membri la jadottaw u lanqas iżommu rekwiżiti nazzjonali addizzjonali dwar il-kwistjonijiet fil-kamp ta' applikazzjoni ta' dan ir-Regolament, sakemm ma jkunux previsti b'mod espliċitu f'dan ir-Regolament, peress li dan jaffettwa l-applikazzjoni diretta u uniformi tar-regoli kompletament armonizzati applikabbli għall-fornituri ta' servizzi intermedjarji f'konformità mal-objettivi ta' dan ir-Regolament. Dan jenħtieġ li ma jipprekludix il-possibbiltà li tiġi applikata leġiżlazzjoni nazzjonali oħra applikabbli għall-fornituri tas-servizzi intermedjarji, f'konformità mal-liġi tal-Unjoni, inkluża d-Direttiva 2000/31/KE, b'mod partikolari l-Artikolu 3 tagħha, fejn id-dispożizzjonijiet tal-liġi nazzjonali jsegwu objettivi leġittimi oħra ta' interess pubbliku minbarra dawk segwiti minn dan ir-Regolament.

(10)

Dan ir-Regolament jenħtieġ li jkun mingħajr preġudizzju għal atti oħra tal-liġi tal-Unjoni li jirregolaw il-forniment ta' servizzi tas-soċjetà tal-informazzjoni inġenerali, li jirregolaw aspetti oħra tal-forniment ta' servizzi intermedjarji fis-suq intern jew li jispeċifikaw u jikkomplementaw ir-regoli armonizzati stabbiliti f'dan ir-Regolament, bħad-Direttiva 2010/13/UE tal-Parlament Ewropew u tal-Kunsill (7), inklużi d-dispożizzjonijiet fiha dwar pjattaformi ta' video-sharing, ir-Regolament (UE) 2019/1148 (8), (UE) 2019/1150 (9), (UE) 2021/784 (10) u (EU) 2021/1232 (11) tal-Parlament Ewropew u tal-Kunsill u id-Direttiva 2002/58/KE tal-Parlament Ewropew u tal-Kunsill (12) u dispożizzjonijiet ta’ liġi tal-Unjoni stipulati f’Regolament tal-Parlament Ewropew u tal-Kunsill dwar l-Ordnijiet ta' Produzzjoni u ta' Preservazzjoni Ewropej għall-evidenza elettronika f'materji kriminali u f’Direttiva li tistabbilixxi regoli armonizzati dwar il-ħatra ta' rappreżentanti legali għall-finijiet tal-ġbir tal-evidenza fi proċeduri kriminali.

Bl-istess mod, għal raġunijiet ta' ċarezza, dan ir-Regolament jenħtieġ li jkun mingħajr preġudizzju għal-liġi tal-Unjoni dwar il-protezzjoni tal-konsumatur, b'mod partikolari r-Regolamenti (UE) 2017/2394 (13) u (UE) 2019/1020 (14) tal-Parlament Ewropew u tal-Kunsill, id-Direttivi 2001/95/KE (15), 2005/29/KE (16), 2011/83/UE (17) u 2013/11/UE (18) tal-Parlament Ewropew u tal-Kunsill, u d-Direttiva tal-Kunsill 93/13/KEE (19), u dwar il-protezzjoni tad-data personali, b'mod partikolari r-Regolament (UE) 2016/679 tal-Parlament Ewropew u tal-Kunsill (20).

Dan ir-Regolament jenħtieġ li jkun ukoll mingħajr preġudizzju għar-regoli tal-Unjoni dwar id-dritt internazzjonali privat, b'mod partikolari r-regoli li jirrigwardaw il-ġuriżdizzjoni u r-rikonoxximent u l-infurzar tas-sentenzi f'materji ċivili u kummerċjali, bħar-Regolament (UE) 1215/2012, u r-regoli dwar il-liġi applikabbli għall-obbligi kuntrattwali u mhux kuntrattwali. Il-protezzjoni tal-individwi fir-rigward tal-ipproċessar tad-data personali hija regolata biss mir-regoli tal-liġi tal-Unjoni dwar dak is-suġġett, b'mod partikolari r-Regolament (UE) 2016/679 u d-Direttiva 2002/58/KE. Dan ir-Regolament jenħtieġ li jkun ukoll mingħajr preġudizzju għal-liġi tal-Unjoni dwar il-kondizzjonijiet tax-xogħol u għal-liġi tal-Unjoni fil-qasam tal-kooperazzjoni ġudizzjarja f'materji ċivili u kriminali. Madankollu, safejn dawk l-atti legali l-oħra jkollhom l-istess objettivi bħal dawk stabbiliti f'dan ir-Regolament, ir-regoli ta' dan ir-Regolament jenħtieġ li japplikaw fir-rigward ta' kwistjonijiet li mhumiex indirizzati jew li mhumiex indirizzati kompletament minn dawk l-atti legali l-oħra kif ukoll kwistjonijiet li għalihom dawk l-atti legali l-oħra jħallu l-possibbiltà lill-Istati Membri li jadottaw ċerti miżuri fil-livell nazzjonali.

(11)

Jenħtieġ li jiġi ċċarat li dan ir-Regolament huwa mingħajr preġudizzju għal-liġi tal-Unjoni dwar id-drittijiet tal-awtur u drittijiet relatati, inklużi d-Direttivi 2001/29/KE (21), 2004/48/KE (22) u (UE) 2019/790 (23) tal-Parlament Ewropew u tal-Kunsill, li jistabbilixxu regoli u proċeduri speċifiċi li jenħtieġ li ma jiġux affettwati.

(12)

Biex jintlaħaq l-objettiv li jiġi żgurat ambjent online sikur, prevedibbli u affidabbli, għall-finijiet ta' dan ir-Regolament, il-kunċett ta' "kontenut illegali" jenħtieġ li jirrifletti b'mod wiesa' r-regoli eżistenti fl-ambjent offline. B'mod partikolari, il-kunċett ta’ “kontenut illegali” jenħtieġ li jiġi definit b'mod wiesa' biex ikopri l-informazzjoni relatata ma' kontenut, prodotti, servizzi u attivitajiet illegali. B'mod partikolari, jenħtieġ li dak il-kunċett jinftiehem li jirreferi għal informazzjoni, irrispettivament mill-forma tagħha, li skont il-liġi applikabbli tkun minnha nnifisha illegali, bħal pereżempju diskors ta' mibegħda illegali jew kontenut terroristiku u kontenut diskriminatorju illegali, jew li r-regoli applikabbli jagħmlu illegali fid-dawl tal-fatt li tkun relatata ma' attivitajiet illegali. Fost l-eżempji li juru dan hemm il-kondiviżjoni ta' stampi li juru abbuż sesswali tat-tfal, il-kondiviżjoni mhux kunsenswali u illegali ta' stampi privati, l-online stalking, il-bejgħ ta' prodotti mhux konformi jew kontrafatti, il-bejgħ ta' prodotti jew il-forniment ta' servizzi bi ksur tal-liġi dwar il-protezzjoni tal-konsumatur, l-użu mhux awtorizzat ta' materjal protett bid-drittijiet tal-awtur, l-offerta illegali ta' servizzi ta' akkomodazzjoni jew il-bejgħ illegali ta' annimali ħajjin. B'kuntrast għal dan, video ta' xhud ta' reat potenzjali jenħtieġ li ma jitqiesx li jikkostitwixxi kontenut illegali, sempliċement minħabba li juri att illegali, fejn ir-reġistrazzjoni jew id-disseminazzjoni ta' tali video lill-pubbliku ma tkunx illegali skont il-liġi nazzjonali jew tal-Unjoni. F'dan ir-rigward, huwa immaterjali jekk l-illegalità tal-informazzjoni jew tal-attività tirriżultax mil-liġi tal-Unjoni jew mil-liġi nazzjonali li hija f'konformità mal-liġi tal-Unjoni u xi jkunu n-natura jew is-suġġett preċiżi tal-liġi inkwistjoni.

(13)

Meta wieħed iqis il-karatteristiċi partikolari tas-servizzi kkonċernati u l-ħtieġa korrispondenti biex il-fornituri tagħhom ikunu soġġetti għal ċerti obbligi speċifiċi, jeħtieġ issir distinzjoni, fi ħdan il-kategorija usa' tal-fornituri ta' servizzi ta' hosting kif definiti f'dan ir-Regolament, bejn is-subkategoriji tal-pjattaformi online. Il-pjattaformi online, bħal pereżempju n-networks soċjali jew pjattaformi online li jippermettu lil konsumaturi jikkonkludu kuntratti mill-bogħod ma’ kummerċjanti, jenħtieġ li jiġu definiti bħala fornituri ta' servizzi ta' hosting li mhux biss jaħżnu l-informazzjoni pprovduta mir-riċevituri tas-servizz fuq talba tagħhom, iżda li jxerrdu wkoll dik l-informazzjoni lill-pubbliku, fuq talba tar-riċevitur tas-servizz. Madankollu, biex tiġi evitata l-impożizzjoni ta' obbligi wesgħin wisq, il-fornituri ta' servizzi ta' hosting jenħtieġ li ma jitqisux bħala pjattaformi online meta d-disseminazzjoni lill-pubbliku tkun sempliċiment karatteristika minuri u purament anċillari li tkun marbuta intrinsikament ma' servizz ieħor, jew funzjonalità minuri tas-servizz ewlieni, u li, għal raġunijiet tekniċi oġġettivi, dik il-karatteristika jew funzjonalità ma tkunx tista' tintuża mingħajr dak is-servizz l-ieħor jew is-servizz ewlieni, u l-integrazzjoni ta' dik il-karatteristika jew funzjonalità ma tkunx mezz biex tiġi evitata l-applikabbiltà tar-regoli ta' dan ir-Regolament applikabbli għall-pjattaformi online. Pereżempju, it-taqsima tal-kummenti f'gazzetta online tista' tikkostitwixxi karatteristika bħal din, fejn huwa ċar li hija anċillari għas-servizz ewlieni li qed jiġi rrappreżentat mill-pubblikazzjoni tal-aħbarijiet li huma fir-responsabbiltà editorjali tal-pubblikatur. B'kuntrast għal dan, il-ħżin ta' kummenti f'network soċjali jenħtieġ li jitqies bħala servizz ta' pjattaforma online, fejn ikun ċar li mhuwiex karatteristika minuri tas-servizz offrut, anke jekk ikun anċillari għall-pubblikazzjoni tal-posts tar-riċevituri tas-servizz. Għall-finijiet ta' dan ir-Regolament, is-servizzi tal-cloud computing jew tal-web hosting jenħtieġ li ma jitqisux bħala pjattaforma online fejn id-disseminazzjoni ta' informazzjoni speċifika lill-pubbliku tikkostitwixxi karatteristika minuri u anċillari jew funzjonalità minuri ta' tali servizzi.

Barra minn hekk, is-servizzi tal-cloud computing u s-servizzi tal-web hosting, meta jservu bħala infrastruttura, bħas-servizzi tal-ħżin u tal-computing infrastrutturali sottostanti ta' applikazzjoni bbażata fuq l-internet, sit web jew pjattaforma online, jenħtieġ li ma jitqisux fihom infushom bħala disseminazzjoni lill-pubbliku ta' informazzjoni maħżuna jew ipproċessata fuq talba ta' riċevitur tal-applikazzjoni, is-sit web jew il-pjattaforma online li jospitaw.

(14)

Il-kunċett ta' "disseminazzjoni lill-pubbliku", kif użat f'dan ir-Regolament, jenħtieġ li jinkludi t-tqegħid għad-dispożizzjoni ta' informazzjoni lil għadd potenzjalment illimitat ta' persuni, jiġifieri, li l-informazzjoni ssir aċċessibbli faċilment għar-riċevituri tas-servizz inġenerali mingħajr azzjoni ulterjuri mir-riċevitur tas-servizz li jkun qed jipprovdi l-informazzjoni rikjesta, irrispettivament minn jekk dawk il-persuni jaċċessawx effettivament l-informazzjoni inkwistjoni. Għaldaqstant, fejn l-aċċess għall-informazzjoni jkun jeħtieġ reġistrazzjoni jew ammissjoni fi grupp ta' riċevituri tas-servizz, dik l-informazzjoni jenħtieġ li titqies li hija disseminata lill-pubbliku biss fejn ir-riċevituri tas-servizz li jkunu jridu jaċċessaw l-informazzjoni jiġu rreġistrati jew ammessi awtomatikament mingħajr ma jkun hemm persuna li tiddeċiedi jew tagħżel lil min jingħata l-aċċess. Is-servizzi ta' komunikazzjonijiet interpersonali, kif definiti fid-Direttiva (UE) 2018/1972 tal-Parlament Ewropew u tal-Kunsill (24), bħal pereżempju emails jew servizzi ta' trażmissjoni ta' messaġġi privati, jaqgħu barra mill-kamp ta' applikazzjoni tad-definizzjoni tal-pjattaformi online peress li jintużaw għall-komunikazzjoni interpersonali bejn għadd limitat ta' persuni determinat minn min jibgħat il-komunikazzjoni. Madankollu, l-obbligi stipulati f'dan ir-Regolament għall-fornituri ta' pjattaformi online jistgħu japplikaw għal servizzi li jippermettu li l-informazzjoni ssir disponibbli għal għadd potenzjalment illimitat ta' riċevituri, li ma jkunx determinat minn min jibgħat il-komunikazzjoni, pereżempju permezz ta' gruppi pubbliċi jew kanali miftuħa. Jenħtieġ li l-informazzjoni titqies disseminata lill-pubbliku skont it-tifsira ta' dan ir-Regolament biss meta dik d-disseminazzjoni sseħħ fuq talba diretta mir-riċevitur tas-servizz li jkun ipprovda l-informazzjoni.

(15)

Meta xi wħud mis-servizzi fornuti minn fornitur ikunu koperti minn dan ir-Regolament u oħrajn ma jkunux, jew meta s-servizzi fornuti minn fornituri jkunu koperti minn taqsimiet differenti ta' dan ir-Regolament, id-dispożizzjonijiet rilevanti ta' dan ir-Regolament jenħtieġ li japplikaw biss fir-rigward ta' dawk is-servizzi li jaqgħu fil-kamp ta' applikazzjoni tagħhom.

(16)

Iċ-ċertezza tad-dritt prevista mill-qafas orizzontali tal-eżenzjonijiet kundizzjonali mir-responsabbiltà għall-fornituri tas-servizzi intermedjarji, stabbiliti fid-Direttiva 2000/31/KE, ippermettiet li fis-suq intern jitfaċċaw u jespandu bosta servizzi ġodda. Għalhekk jenħtieġ li dak il-qafas jiġi preservat. Madankollu, fid-dawl tad-diverġenzi fit-traspożizzjoni u fl-applikazzjoni tar-regoli rilevanti fil-livell nazzjonali, u għal raġunijiet ta' ċarezza u ta' koerenza, jenħtieġ li dak il-qafas jiġi inkorporat f'dan ir-Regolament. Huwa wkoll meħtieġ li jiġu ċċarati ċerti elementi ta' dak il-qafas, filwaqt li tiġi kkunsidrata l-każistika tal-Qorti tal-Ġustizzja tal-Unjoni Ewropea.

(17)

Jenħtieġ li r-regoli dwar ir-responsabbiltà ta’ servizzi intermedjarji stabbiliti f’dan ir-Regolament jistabbilixxu biss meta l-fornitur tas-servizzi intermedjarji kkonċernat ma jkunx jista' jitqies responsabbli fir-rigward ta' kontenut illegali pprovdut mir-riċevituri tas-servizz. Jenħtieġ li dawk ir-regoli ma jinftehmux li jipprovdu bażi pożittiva biex jiġi stabbilit meta fornitur jista' jitqies responsabbli, għax dan irid jiġi determinat mir-regoli applikabbli tal-liġi tal-Unjoni jew tal-liġi nazzjonali. Barra minn hekk, l-eżenzjonijiet mir-responsabbiltà stabbiliti f'dan ir-Regolament jenħtieġ li japplikaw fir-rigward ta' kwalunkwe tip ta' responsabbiltà ta' kontenut illegali, irrispettivament mis-suġġett jew min-natura preċiżi ta' dawk il-liġijiet.

(18)

L-eżenzjonijiet mir-responsabbiltà stabbiliti f'dan ir-Regolament jenħtieġ li ma japplikawx meta l-fornitur tas-servizzi intermedjarji, minflok ma jillimita ruħu li jipprovdi s-servizzi b'mod newtrali, sempliċiment permezz ta' pproċessar tekniku u awtomatiku tal-informazzjoni pprovduta mir-riċevitur tas-servizz, ikollu rwol attiv tali li jgħarrfu b'dik l-informazzjoni jew jagħtih kontroll fuq dik l-informazzjoni. Għaldaqstant, dawk l-eżenzjonijiet jenħtieġ li ma jkunux disponibbli fir-rigward tar-responsabbiltà relatata mal-informazzjoni pprovduta mhux mir-riċevitur tas-servizz iżda mill-fornitur tas-servizz intermedjarju nnifsu, inkluż meta l-informazzjoni tkun ġiet żviluppata fir-responsabbiltà editorjali ta' dak il-fornitur.

(19)

Fid-dawl tan-natura differenti tal-attivitajiet ta' "sempliċi conduit", "caching" u "hosting" u l-pożizzjoni u l-kapaċitajiet differenti tal-fornituri tas-servizzi inkwistjoni, jeħtieġ issir distinzjoni bejn ir-regoli applikabbli għal dawk l-attivitajiet, minħabba li skont dan ir-Regolament huma soġġetti għal rekwiżiti u kondizzjonijiet differenti u l-kamp ta' applikazzjoni tagħhom huwa differenti, kif interpretat mill-Qorti tal-Ġustizzja tal-Unjoni Ewropea.

(20)

Fejn fornitur tas-servizzi intermedjarji jikkollabora deliberatament ma' riċevitur tas-servizzi biex iwettaq attivitajiet illegali, is-servizzi jenħtieġ li ma jitqiesx li ġie fornut b'mod newtrali u l-fornitur għalhekk jenħtieġ li ma jkunx jista' jibbenefika mill-eżenzjonijiet mir-responsabbiltà previsti f'dan ir-Regolament. Dan jenħtieġ li jkun il-każ, pereżempju, fejn il-fornitur joffri s-servizz tiegħu bl-iskop ewlieni li jiffaċilita attivitajiet illegali, pereżempju billi juri espliċitament li l-iskop tiegħu huwa li jiffaċilita l-attivitajiet illegali jew li s-servizzi tiegħu huma adatti għal dak l-iskop. Jenħtieġ li l-fatt waħdu li servizz joffri trażmissjonijiet kriptati jew kwalunkwe sistema oħra li tagħmel l-identifikazzjoni tal-utent impossibbli ma jikkwalifikax fih innifsu bħala li jiffaċilita l-attivitajiet illegali.

(21)

Fornitur jenħtieġ li jkun jista' jibbenefika mill-eżenzjonijiet mir-responsabbiltà għal servizzi ta' "sempliċi conduit" u ta' "caching" meta dan ma jkun involut bl-ebda mod mal-informazzjoni trażmessa jew aċċessata. Dan jirrikjedi, fost affarijiet oħra, li l-fornitur ma jimmodifikax l-informazzjoni li jittrażmetti jew li jipprovdi aċċess għaliha. Madankollu, dan ir-rekwiżit jenħtieġ li ma jinftihemx li jkopri l-manipulazzjonijiet ta' natura teknika li jsiru matul it-trażmissjoni jew l-aċċess, diment li dawk il-manipulazzjonijiet ma jbiddlux l-integrità tal-informazzjoni trażmessa jew li ngħata aċċess għaliha.

(22)

Sabiex jibbenefika mill-eżenzjoni mir-responsabbiltà għal servizzi ta' hosting, jenħtieġ li l-fornitur, malli effettivament isir jaf jew isir konxju b'xi attivitajiet illegali jew kontenut illegali, jaġixxi mingħajr dewmien biex ineħħi jew jiddiżattiva l-aċċess għal dak il-kontenut. It-tneħħija jew id-diżattivazzjoni tal-aċċess jenħtieġ li jsiru b'rispett tad-drittijiet fundamentali tar-riċevituri tas-servizz, inkluż id-dritt għal-libertà tal-espressjoni u tal-informazzjoni. Il-fornitur jista' jikseb tali għarfien jew konoxxenza effettivi tan-natura illegali tal-kontenut, inter alia, permezz tal-investigazzjonijiet proprji tiegħu, jew permezz tal-avviżi sottomessi lilu minn individwi jew entitajiet f'konformità ma' dan ir-Regolament diment li tali avviżi jkunu preċiżi biżżejjed u sostanzjati b'mod xieraq biex jippermettu li operatur ekonomiku diliġenti jidentifika b'mod raġonevoli, jaċċessa u, fejn xieraq, jaġixxi kontra l-kontenut allegatament illegali. Madankollu, tali għarfien jew konoxxenza effettivi ma jistgħux jitqiesu li nkisbu unikament minħabba l-fatt li l-fornitur huwa konxju, f'sens ġenerali, tal-fatt li s-servizz tiegħu jintuża wkoll sabiex jinħażen kontenut illegali. Barra minn hekk, il-fatt li l-fornitur awtomatikament iżomm indiċi tal-informazzjoni mtella' fuq is-servizz tiegħu, li jkollu funzjoni ta' tiftix jew li jirrakkomanda informazzjoni abbażi tal-profili jew tal-preferenzi tar-riċevituri tas-servizz mhuwiex raġuni suffiċjenti biex jitqies li dak il-fornitur għandu għarfien "speċifiku" tal-attivitajiet illegali mwettqa fuq dik il-pjattaforma jew tal-kontenut illegali maħżun fiha.

(23)

Jenħtieġ li l-eżenzjoni mir-responsabbiltà ma tapplikax fejn ir-riċevitur tas-servizz ikun qed jaġixxi taħt l-awtorità jew il-kontroll tal-fornitur ta' servizz ta' hosting. Pereżempju, fejn il-fornitur ta’ pjattaforma online li tippermetti lill-konsumaturi jikkonkludu kuntratti mill-bogħod mal-kummerċjanti jiddetermina l-prezz tal-oġġetti jew tas-servizzi offruti mill-kummerċjant, jista' jitqies li l-kummerċjant jaġixxi taħt l-awtorità jew il-kontroll ta' dik il-pjattaforma online.

(24)

Sabiex tiġi żgurata l-protezzjoni effettiva tal-konsumaturi meta jinvolvu ruħhom fi tranżazzjonijiet kummerċjali intermedjati online, ċerti fornituri ta' servizzi ta' hosting, jiġifieri, il-pjattaformi online li jippermettu lill-konsumaturi jikkonkludu kuntratti mill-bogħod mal-kummerċjanti, jenħtieġ li ma jkunux jistgħu jibbenefikaw mill-eżenzjoni mir-responsabbiltà għall-fornituri ta' servizzi ta' hosting stabbilita f'dan ir-Regolament, sakemm dawk il-pjattaformi online jippreżentaw l-informazzjoni rilevanti relatata mat-tranżazzjonijiet inkwistjoni b'tali mod li jwassal lill-konsumaturi jemmnu li l-informazzjoni ġiet ipprovduta minn dawk il-pjattaformi online nnifishom jew mill-kummerċjanti li jaġixxu bl-awtorità jew bil-kontroll tagħhom, u dawk il-pjattaformi online b'hekk ikollhom għarfien tal-informazzjoni jew kontroll fuqha, anki jekk fir-realtà dan jista' ma jkunx il-każ. Eżempju ta’ tali mġieba jista’ jkun meta pjattaforma online tonqos milli turi b'mod ċar l-identità tal-kummerċjant, kif meħtieġ minn dan ir-Regolament, meta pjattaforma online ma tipprovdix l-identità jew id-dettalji ta' kuntatt tal-kummerċjant sa wara l-konklużjoni tal-kuntratt konkluż bejn il-kummerċjant u l-konsumatur, jew meta tali pjattaforma online tikkummerċjalizza l-prodott jew is-servizz f'isimha stess minflok fl-isem tal-kummerċjant li jipprovdi dak il-prodott jew servizz. F'dak ir-rigward, jenħtieġ li jiġi determinat oġġettivament, abbażi taċ-ċirkostanzi rilevanti kollha, jekk il-preżentazzjoni tistax twassal lil konsumatur medju li jemmen li l-informazzjoni ġiet provduta mill-pjattaforma online stess jew minn kummerċjanti li jaġixxu taħt il-kontroll tagħha.

(25)

L-eżenzjonijiet mir-responsabbiltà stabbiliti f'dan ir-Regolament jenħtieġ li ma jaffettwawx il-possibbiltà ta' inġunzjonijiet ta' tipi differenti kontra l-fornituri tas-servizzi intermedjarji, anki meta jissodisfaw il-kondizzjonijiet stabbiliti bħala parti minn dawk l-eżenzjonijiet. Tali inġunzjonijiet jistgħu, b'mod partikolari, jikkonsistu f'ordnijiet mill-qrati jew mill-awtoritajiet amministrattivi, maħruġa f'konformità mal-liġi tal-Unjoni, li jkunu jeżiġu t-terminazzjoni jew il-prevenzjoni ta' xi ksur, inkluż it-tneħħija tal-kontenut illegali speċifikat fit-tali ordnijiet, jew id-diżattivazzjoni tal-aċċess għalih.

(26)

Sabiex tinħoloq ċertezza tad-dritt, u biex ma jiġux skoraġġuti l-attivitajiet maħsuba biex jiddetettaw, jidentifikaw u jaġixxu kontra l-kontenut illegali li l-fornituri tal-kategoriji kollha tas-servizzi intermedjarji jwettqu b'mod volontarju, jenħtieġ li jiġi ċċarat li s-sempliċi fatt li l-fornituri jwettqu tali attivitajiet ma jwassalx għan-nuqqas ta' disponibbiltà tal-eżenzjonijiet mir-responsabbiltà stabbiliti f'dan ir-Regolament diment li dawk l-attivitajiet jitwettqu in bona fide u b'mod diliġenti. Il-kondizzjoni li wieħed jaġixxi in bona fide u b'mod diliġenti jenħtieġ li tinkludi li wieħed jaġixxi b'mod oġġettiv, mhux diskriminatorju u proporzjonat, b'kunsiderazzjoni xierqa għad-drittijiet u l-interessi leġittimi tal-partijiet kollha involuti, u l-għoti tas-salvagwardji meħtieġa kontra t-tneħħija mhux ġustifikata ta' kontenut legali, f'konformità mal-objettiv u r-rekwiżiti ta' dan ir-Regolament. Għal dak il-għan, il-fornituri kkonċernati jenħtieġ li, pereżempju, jieħdu miżuri raġonevoli biex jiżguraw li, fejn jintużaw għodod awtomatizzati biex jitwettqu tali attivitajiet, it-teknoloġija rilevanti tkun affidabbli biżżejjed biex tillimita kemm jista' jkun ir-rata ta' żbalji. Barra minn hekk, huwa xieraq li jiġi ċċarat li s-sempliċi fatt li l-fornituri jieħdu miżuri, in bona fide, biex jikkonformaw mar-rekwiżiti tal-liġi tal-Unjoni, inkluż dawk stabbiliti f'dan ir-Regolament fir-rigward tal-implimentazzjoni tat-termini u l-kondizzjonijiet tagħhom, jenħtieġ li ma jwassalx għan-nuqqas ta' disponibbiltà ta' dawk l-eżenzjonijiet mir-responsabbiltà stabbilita f’dan ir-Regolament. Għalhekk, kwalunkwe tali attività u miżura li fornitur speċifiku jaf ikun ħa, jenħtieġ li ma jitqisux meta jiġi determinat jekk il-fornitur jistax jiddependi fuq eżenzjoni mir-responsabbiltà, b'mod partikolari fir-rigward ta' jekk il-fornitur ifornix is-servizzi tiegħu b'mod newtrali u għalhekk jistax jaqa' fil-kamp ta' applikazzjoni tad-dispożizzjoni rilevanti, iżda mingħajr ma din ir-regola timplika li l-fornitur jista' neċessarjament jiddependi fuqha. Jenħtieġ li l-azzjonijiet volontarji ma jintużawx biex jiġu evitati l-obbligi tal-fornituri kollha tas-servizzi intermedjarji fl-ambitu ta' dan ir-Regolament.

(27)

Filwaqt li r-regoli dwar ir-responsabbiltà tal-fornituri ta’ servizzi intermedjarji stabbilita f’dan ir-Regolament jikkonċentraw fuq l-eżenzjoni mir-responsabbiltà tal-fornituri tas-servizzi intermedjarji, huwa importanti li wieħed ifakkar li, minkejja r-rwol ġeneralment importanti li jaqdu tali fornituri, il-problema tal-kontenut u tal-attivitajiet illegali online jenħtieġ li ma tiġix indirizzata billi tingħata attenzjoni biss lir-responsabbiltajiet tagħhom. Fejn ikun possibbli, il-partijiet terzi affettwati mill-kontenut illegali trażmess jew maħżun online jenħtieġ li jippruvaw isolvu l-kunflitti relatati ma' tali kontenut mingħajr ma jinvolvu lill-fornituri tas-servizzi intermedjarji inkwistjoni. Jenħtieġ li r-riċevituri tas-servizzi jinżammu responsabbli, meta jipprevedu hekk ir-regoli applikabbli tal-liġi tal-Unjoni u tal-liġi nazzjonali li jiddeterminaw tali responsabbiltà, għall-kontenut illegali li jipprovdu u li jistgħu jxerrdu lill-pubbliku permezz tas-servizzi intermedjarji. Fejn xieraq, atturi oħrajn, bħal pereżempju l-moderaturi tal-gruppi f'ambjenti online magħluqa, b'mod partikolari fil-każ ta' gruppi kbar, jenħtieġ li jgħinu wkoll biex tiġi evitata d-disseminazzjoni ta' kontenut illegali online, f'konformità mal-liġi applikabbli. Barra minn hekk, fejn ikun meħtieġ li jiġu involuti l-fornituri tas-servizzi tas-soċjetà tal-informazzjoni, inkluż il-fornituri tas-servizzi intermedjarji, kwalunkwe talba jew ordni għal tali involviment jenħtieġ li, bħala regola ġenerali, tiġi diretta lill-fornitur speċifiku li jkollu l-abbiltà teknika u operattiva li jaġixxi kontra elementi speċifiċi tal-kontenut illegali, biex jiġu evitati u minimizzati kwalunkwe effetti negattivi possibbli fuq id-disponibbiltà u l-aċċessibbiltà tal-informazzjoni li mhijiex kontenut illegali.

(28)

Mis-sena 2000 'l hawn, tfaċċaw teknoloġiji ġodda li jtejbu d-disponibbiltà, l-effiċjenza, il-veloċità, l-affidabbiltà, il-kapaċità u s-sigurtà tas-sistemi għat-trażmissjoni, ir-rintraċċabbiltà u l-ħżin tad-data online, u dan wassal għal ekosistema diġitali dejjem aktar kumplessa. F'dan ir-rigward, jenħtieġ li wieħed ifakkar li l-fornituri tas-servizzi li jistabbilixxu u jiffaċilitaw l-arkitettura loġika sottostanti u l-funzjonament tajjeb tal-internet, inkluż il-funzjonijiet awżiljarji tekniċi, jistgħu wkoll jibbenefikaw mill-eżenzjonijiet mir-responsabbiltà stabbiliti f'dan ir-Regolament, diment li s-servizzi tagħhom jikkwalifikaw bħala servizzi ta' "sempliċi conduit", "caching", jew "hosting". Tali servizzi jinkludu, skont il-każ, in-networks ta' żona lokali mingħajr fili, is-servizzi tas-sistema tal-ismijiet ta' dominji (DNS), ir-reġistri ta' ismijiet ta' dominji tal-ogħla livell, ir-reġistraturi, l-awtoritajiet ta' ċertifikazzjoni li joħorġu ċertifikati diġitali, in-networks privati virtwali, il-magni tat-tiftix online, is-servizzi ta' infrastruttura ta' cloud, jew networks tat-twassil tal-kontenut, li jiffaċilitaw, jillokalizzaw jew itejbu l-funzjonijiet ta' fornituri oħra tas-servizzi intermedjarji. B'mod simili, is-servizzi li jintużaw għal skopijiet ta' komunikazzjoni, u l-mezzi tekniċi għat-twassil tagħhom, evolvew b'mod konsiderevoli wkoll, u dan irriżulta f'servizzi online bħal pereżempju l-Vuċi fuq IP, is-servizzi ta' trażmissjoni ta' messaġġi u s-servizzi ta' email ibbażati fuq il-web, fejn il-komunikazzjoni titwassal b'servizzi ta' aċċess għall-internet. Dawk is-servizzi wkoll jistgħu jibbenefikaw mill-eżenzjonijiet mir-responsabbiltà, diment li jikkwalifikaw bħala servizzi ta' "sempliċi conduit", "caching", jew "hosting".

(29)

Is-servizzi intermedjarji jkopru firxa wiesgħa ta' attivitajiet ekonomiċi li jseħħu online u li jiżviluppaw kontinwament biex tiġi pprovduta trażmissjoni ta' informazzjoni rapida, sikura u sigura, u biex jiżguraw il-konvenjenza tal-parteċipanti kollha tal-ekosistema online. Pereżempju, is-servizzi intermedjarji ta' "sempliċi conduit" jinkludu kategoriji ġeneriċi ta' servizzi, bħal punti ta' skambju fuq l-internet, punti tal-aċċess bla fili, networks privati virtwali, servizzi u riżolvaturi tad-DNS, reġistri ta' ismijiet ta' dominji tal-ogħla livell, reġistraturi, awtoritajiet ta' ċertifikazzjoni li joħorġu ċertifikati diġitali, vuċi fuq IP u servizzi oħra ta' komunikazzjoni interpersonali, filwaqt li eżempji ġeneriċi ta' servizzi intermedjarji "caching" jinkludu l-forniment uniku ta' networks tal-konsenja tal-kontenut, proxies inversi jew proxies ta' adattament tal-kontenut. Servizzi bħal dawn huma kruċjali biex tiġi żgurata t-trażmissjoni bla xkiel u effiċjenti tal-informazzjoni mogħtija fuq l-internet. Eżempji ta' "servizzi ta' hosting" jinkludu kategoriji ta' servizzi bħal cloud computing, web hosting, servizzi ta' referenzjar bi ħlas jew servizzi li jippermettu l-kondiviżjoni ta' informazzjoni u kontenut online, inkluż il-ħżin u l-kondiviżjoni ta' fajls. Is-servizzi intermedjarji jistgħu jingħataw waħedhom, bħala parti minn tip ieħor ta' servizz intermedjarju, jew simultanjament ma' servizzi intermedjarji oħra. Jekk servizz speċifiku jikkostitwix sempliċi conduit, caching jew hosting jiddependi unikament fuq il-funzjonalitajiet tekniċi tiegħu, li jistgħu jevolvu maż-żmien, u jenħtieġ li jiġi vvalutat skont il-każ.

(30)

Il-fornituri tas-servizzi intermedjarji jenħtieġ li ma jkunux, la de jure u lanqas de facto, soġġetti għal obbligu ta' monitoraġġ fir-rigward tal-obbligi ta' natura ġenerali. Dan ma jikkonċernax l-obbligi ta' monitoraġġ f’każ speċifiku u, b’mod partikolari, ma jaffettwax l-ordnijiet mill-awtoritajiet nazzjonali f'konformità mal-leġiżlazzjoni nazzjonali, f’konformità mal-liġi tal-Unjoni, kif interpretata mill-Qorti tal-Ġustizzja tal-Unjoni Ewropea, u f’konformità mal-kondizzjonijiet stabbiliti f’dan ir-Regolament. Jenħtieġ li xejn f'dan ir-Regolament ma jiġi interpretat bħala impożizzjoni ta' obbligu ta' monitoraġġ ġenerali jew ta' obbligu ġenerali ta' tiftix attiv tal-fatti, jew bħala obbligu ġenerali biex il-fornituri jieħdu miżuri proattivi fir-rigward tal-kontenut illegali.

(31)

Skont is-sistema legali ta' kull Stat Membru u l-qasam tal-liġi inkwistjoni, l-awtoritajiet ġudizzjarji jew amministrattivi nazzjonali, inklużi l-awtoritajiet tal-infurzar tal-liġi, jistgħu jordnaw lill-fornituri tas-servizzi intermedjarji biex jaġixxu kontra element speċifiku wieħed jew aktar tal-kontenut illegali jew biex jipprovdu ċerta informazzjoni speċifika. Il-liġijiet nazzjonali li abbażi tagħhom jinħarġu tali ordnijiet ivarjaw b'mod konsiderevoli u l-ordnijiet huma indirizzati aktar u aktar f'sitwazzjonijiet transfruntieri. Sabiex jiġi żgurat li dawk l-ordnijiet ikunu jistgħu jiġu rispettati b'mod effettiv u effiċjenti, b'mod partikolari f'kuntest transfruntier, biex l-awtoritajiet pubbliċi kkonċernati jkunu jistgħu jwettqu l-kompiti tagħhom u l-fornituri ma jkunux soġġetti għal piżijiet sproporzjonati, mingħajr ma jiġu affettwati bla bżonn id-drittijiet u l-interessi leġittimi ta' kwalunkwe parti terza, huwa meħtieġ li jiġu stabbiliti ċerti kondizzjonijiet li jenħtieġ li jissodisfaw dawk l-ordnijiet u ċerti rekwiżiti komplementari relatati mal-ipproċessar ta' dawn l-ordnijiet. Konsegwentement, dan ir-Regolament jenħtieġ li jarmonizza biss ċerti kondizzjonijiet minimi speċifiċi li tali ordnijiet jenħtieġ li jissodisfaw sabiex jagħtu lok għall-obbligu tal-fornituri tas-servizzi intermedjarji li jinfurmaw lill-awtoritajiet rilevanti dwar l-effett mogħti lil dawk l-ordnijiet. Għalhekk, dan ir-Regolament ma jipprovdix il-bażi ġuridika għall-ħruġ ta' tali ordnijiet, u lanqas ma jirregola l-kamp ta' applikazzjoni territorjali jew l-infurzar transfruntier tagħhom.

(32)

Il-liġi tal-Unjoni jew nazzjonali applikabbli li abbażi tagħha jinħarġu dawk l-ordnijiet tista' tkun tirrikjedi kondizzjonijiet addizzjonali u jenħtieġ li tkun il-bażi għall-infurzar tal-ordnijiet rispettivi. Fil-każ ta' nuqqas ta' konformità ma' tali ordnijiet, l-Istat Membru emittenti jenħtieġ li jkun jista' jinfurzahom f'konformità mal-liġi nazzjonali tiegħu. Il-liġi nazzjonali applikabbli jenħtieġ li tkun konformi mal-liġi tal-Unjoni, inklużi d-dispożizzjonijiet tal-Karta u tat-TFUE dwar il-libertà tal-istabbiliment u l-libertà tal-provvista ta' servizzi fl-Unjoni, b'mod partikolari fir-rigward tal-logħob tal-azzard u s-servizzi tal-imħatri online. Bl-istess mod, l-applikazzjoni ta' tali liġijiet nazzjonali għall-infurzar tal-ordnijiet rispettivi hija mingħajr preġudizzju għall-atti legali tal-Unjoni jew għall-ftehimiet internazzjonali applikabbli konklużi mill-Unjoni jew mill-Istati Membri dwar ir-rikonoxximent, l-eżekuzzjoni u l-infurzar transfruntiera ta' dawk l-ordnijiet, b'mod partikolari f'materji ċivili u kriminali. Min-naħa l-oħra, l-infurzar tal-obbligu li l-awtoritajiet rilevanti jiġu infurmati dwar l-effett mogħti lil dawk l-ordnijiet, għall-kuntrarju tal-eżekuzzjoni tal-ordni nnifisha, jenħtieġ li jkun soġġett għar-regoli stabbiliti f’ dan ir-Regolament.

(33)

Il-fornitur tas-servizzi intermedjarji jenħtieġ li jinforma lill-awtorità emittenti dwar kwalunkwe segwitu mogħti lil tali ordnijiet mingħajr dewmien żejjed, f'konformità mal-limiti ta' żmien stabbiliti fil-liġi tal-Unjoni jew nazzjonali rilevanti.

(34)

L-awtoritajiet nazzjonali rilevanti jenħtieġ li jkunu jistgħu joħorġu ordnijiet bħal dawn kontra kontenut meqjus illegali jew ordnijiet biex tiġi pprovduta informazzjoni abbażi tal-liġi tal-Unjoni jew il-liġi nazzjonali f'konformità mal-liġi tal-Unjoni, b'mod partikolari l-Karta, u jindirizzawhom lill-fornituri ta' servizzi intermedjarji, inklużi dawk li huma stabbiliti fi Stat Membru ieħor. Madankollu, jenħtieġ li dan ir-Regolament ikun mingħajr preġudizzju għal-liġi tal-Unjoni fil-qasam tal-kooperazzjoni ġudizzjarja f'materji ċivili jew kriminali, inklużi r-Regolament (UE) Nru 1215/2012 u Regolament dwar l-ordnijiet ta' produzzjoni u ta' preservazzjoni Ewropej għall-evidenza elettronika f'materji kriminali, u għal-liġi proċedurali kriminali jew ċivili nazzjonali. Għalhekk, meta dawk il-liġijiet fil-kuntest ta' proċedimenti kriminali jew ċivili, jipprevedu kondizzjonijiet addizzjonali jew inkompatibbli fir-rigward ta' dawk previsti f'dan ir-Regolament fir-rigward tal-ordnijiet għall-azzjoni kontra l-kontenut illegali jew għall-provvista ta' informazzjoni, il-kondizzjonijiet previsti f'dan ir-Regolament jistgħu ma japplikawx jew jistgħu jiġu adattati. B'mod partikolari, l-obbligu fuq il-Koordinatur tas-Servizzi Diġitali mill-Istat Membru tal-awtorità emittenti li jittrażmetti kopja tal-ordnijiet lill-Koordinaturi tas-Servizzi Diġitali l-oħra kollha jista' ma japplikax fil-kuntest ta' proċedimenti kriminali jew jista' jiġi adattat, fejn il-proċeduri kriminali nazzjonali applikabbli jipprevedu dan.

Barra minn hekk, l-obbligu li l-ordnijiet jinkludu dikjarazzjoni tar-raġunijiet li tispjega għaliex l-informazzjoni hija kontenut illegali, jista' jiġi adattat fejn meħtieġ skont il-proċeduri kriminali nazzjonali applikabbli għall-prevenzjoni, l-investigazzjoni, is-sejbien u l-prosekuzzjoni ta' reati kriminali. Fl-aħħar nett, l-obbligu tal-fornituri tas-servizzi intermedjarji li jinfurmaw lir-riċevitur tas-servizz jista' jiġi pospost f'konformità mal-liġi tal-Unjoni jew nazzjonali applikabbli, b'mod partikolari fil-kuntest ta' proċedimenti kriminali, ċivili jew amministrattivi. Barra minn hekk, jenħtieġ li l-ordnijiet jinħarġu f'konformità mar-Regolament (UE) 2016/679 u l-projbizzjoni ta' obbligi ta' monitoraġġ ġenerali tal-informazzjoni jew biex isir tiftix attiv tal-fatti jew taċ-ċirkostanzi li jindikaw attività illegali stabbilita f'dan ir-Regolament. Il-kondizzjonijiet u r-rekwiżiti stabbiliti f'dan ir-Regolament li japplikaw għall-ordnijiet għall-azzjoni kontra l-kontenut illegali huma mingħajr preġudizzju għal atti oħrajn tal-Unjoni li jipprevedu sistemi simili għall-azzjoni kontra tipi speċifiċi ta' kontenut illegali, bħal pereżempju r-Regolament (UE) 2021/784, ir-Regolament (UE) 2019/1020, jew ir-Regolament (UE) 2017/2394 li jikkonferixxi setgħat speċifiċi biex tiġi ordnata l-provvista ta' informazzjoni dwar l-awtoritajiet ta' infurzar tal-liġi dwar il-konsumaturi tal-Istati Membri, filwaqt li l-kondizzjonijiet u r-rekwiżiti li japplikaw għall-ordnijiet biex tiġi pprovduta informazzjoni huma mingħajr preġudizzju għal atti oħra tal-Unjoni li jipprevedu regoli rilevanti simili għal setturi speċifiċi. Dawk il-kondizzjonijiet u r-rekwiżiti jenħtieġ li jkunu mingħajr preġudizzju għar-regoli dwar ir-ritenzjoni u l-preservazzjoni skont il-liġi nazzjonali applikabbli, f'konformità mal-liġi tal-Unjoni u mat-talbiet għall-kunfidenzjalità mill-awtoritajiet tal-infurzar tal-liġi relatati man-nondivulgazzjoni ta' informazzjoni. Il-kondizzjonijiet u r-rekwiżiti għall-ordnijiet biex tittieħed azzjoni kontra l-kontenut illegali skont dan ir-Regolament jenħtieġ li ma jaffettwawx il-possibbiltà li l-Istati Membri jirrikjedu li fornitur tas-servizzi intermedjarji jipprevjeni ksur, f'konformità mal-liġi tal-Unjoni, inkluż dan ir-Regolament, u b'mod partikolari mal-projbizzjoni tal-obbligi ta' monitoraġġ ġenerali.

(35)

Il-kondizzjonijiet u r-rekwiżiti stabbiliti f'dan ir-Regolament jenħtieġ li jiġu ssodisfati sa mhux aktar tard minn meta l-ordni tiġi trażmessa lill-fornitur ikkonċernat. Għaldaqstant, l-ordni tista' tiġi maħruġa b'waħda mil-lingwi uffiċjali tal-awtorità emittenti tal-Istat Membru kkonċernat. Madankollu, fejn dik il-lingwa tkun differenti mil-lingwa ddikjarata mill-fornitur tas-servizzi intermedjarji, jew minn lingwa uffiċjali oħra tal-Istati Membri, miftiehma bejn l-awtorità li toħroġ l-ordni u l-fornitur tas-servizzi intermedjarji, jenħtieġ li mal-ordni tiġi trażmessa traduzzjoni li tal-inqas ikollha l-elementi tal-ordni li jinsabu f'dan ir-Regolament. Meta fornitur ta' servizzi intermedjarji jkun qabel mal-awtoritajiet ta’ Stat Membru li juża lingwa partikolari, jenħtieġ li jitħeġġeġ jaċċetta ordnijiet bl-istess lingwa maħruġa mill-awtoritajiet fi Stati Membri oħra. L-ordnijiet jenħtieġ li jinkludu elementi li jippermettu lid-destinatarju jidentifika l-awtorità emittenti, inklużi d-dettalji ta' kuntatt ta' punt ta' kuntatt fi ħdan dik l-awtorità msemmija, fejn xieraq, u jivverifika l-awtentiċità tal-ordni.

(36)

Il-kamp ta' applikazzjoni territorjali ta' tali ordnijiet għall-azzjoni kontra l-kontenut illegali jenħtieġ li jiġi stabbilit b'mod ċar abbażi tal-liġi tal-Unjoni jew nazzjonali applikabbli li tippermetti l-ħruġ tal-ordni u jenħtieġ li ma jaqbiżx dak li huwa strettament meħtieġ biex jintlaħqu l-objettivi tiegħu. F'dak ir-rigward, l-awtorità ġudizzjarja jew amministrattiva nazzjonali, li tista’ tkun awtorità tal-infurzar tal-liġi, li tkun qed toħroġ l-ordni jenħtieġ li tibbilanċja l-objettiv li l-ordni tipprova tilħaq, f'konformità mal-bażi ġuridika li tippermetti l-ħruġ tagħha, mad-drittijiet u l-interessi leġittimi tal-partijiet terzi kollha li jistgħu jiġu affettwati mill-ordni, b'mod partikolari d-drittijiet fundamentali tagħhom skont il-Karta. B'mod partikolari f'kuntest transfruntier, l-effett tal-ordni jenħtieġ li, fil-prinċipju, ikun limitat għat-territorju tal-Istat Membru emittenti, sakemm l-illegalità tal-kontenut ma tkunx ġejja direttament mil-liġi tal-Unjoni jew l-awtorità emittenti ma tqisx li d-drittijiet inkwistjoni jirrikjedu kamp ta' applikazzjoni territorjali usa', f'konformità mal-liġi tal-Unjoni dik internazzjonali, filwaqt li jitqiesu l-interessi tal-korteżija internazzjonali.

(37)

L-ordnijiet biex tiġi pprovduta informazzjoni li huma regolati minn dan ir-Regolament jikkonċernaw il-produzzjoni ta' informazzjoni speċifika dwar riċevituri individwali tas-servizz intermedjarju kkonċernat, u li huma identifikati f'dawk l-ordnijiet bl-iskop li tiġi determinata l-konformità mir-riċevituri tas-servizz mar-regoli tal-Unjoni jew mar-regoli nazzjonali applikabbli. Tali ordnijiet jenħtieġ li jitolbu informazzjoni li jkollha l-għan li tippermetti l-identifikazzjoni tar-riċevituri tas-servizz ikkonċernat. Għalhekk, l-ordnijiet fir-rigward ta’ informazzjoni fuq grupp ta' riċevituri tas-servizz li mhumiex identifikati b'mod speċifiku, inkluż l-ordnijiet biex tiġi pprovduta informazzjoni aggregata meħtieġa għal skopijiet statistiċi jew għat-tfassil tal-politika abbażi ta' evidenza, mhumiex koperti mir-rekwiżiti ta' dan ir-Regolament dwar l-għoti tal-informazzjoni.

(38)

L-ordnijiet għall-azzjoni kontra l-kontenut illegali u biex tiġi pprovduta l-informazzjoni huma soġġetti għar-regoli li jissalvagwardjaw il-kompetenza tal-Istat Membru fejn ikun stabbilit il-fornitur tas-servizz indirizzat u r-regoli li jistabbilixxu derogi possibbli minn dik il-kompetenza f'ċerti każijiet, stabbiliti fl-Artikolu 3 tad-Direttiva 2000/31/KE, biss jekk jiġu ssodisfati l-kondizzjoni ta' dak l-Artikolu. Peress li l-ordnijiet inkwistjoni huma relatati ma' elementi speċifiċi tal-kontenut u tal-informazzjoni illegali, rispettivament, meta dawn ikunu indirizzati lill-fornituri tas-servizzi intermedjarji stabbiliti fi Stat Membru ieħor, fil-prinċipju, dawn ma jirrestrinġux il-libertà ta' dawk il-fornituri fil-forniment tas-servizzi tagħhom bejn il-fruntieri. Għalhekk, ir-regoli stabbiliti fl-Artikolu 3 tad-Direttiva 2000/31/KE, inkluż dawk li jirrigwardaw il-ħtieġa li jiġu ġustifikati l-miżuri li jidderogaw mill-kompetenza tal-Istat Membru li fih ikun stabbilit il-fornitur tas-servizz, għal ċerti raġunijiet speċifiċi u rigward in-notifika ta' tali miżuri, ma japplikawx fir-rigward ta' dawk l-ordnijiet.

(39)

Ir-rekwiżiti biex tiġi pprovduta informazzjoni dwar mekkaniżmi ta' rimedju disponibbli għall-fornitur tas-servizz intermedjarju u għar-riċevitur tas-servizz li pprovda l-kontenut, jinkludu rekwiżit li tiġi pprovduta informazzjoni dwar mekkaniżmi amministrattivi għat-trattament tal-ilmenti u rimedju ġudizzjarju inkluż appelli kontra ordnijiet maħruġa minn awtoritajiet ġudizzjarji. Barra minn hekk, il-Koordinaturi tas-Servizzi Diġitali jistgħu jiżviluppaw għodod u gwida nazzjonali fir-rigward tal-mekkaniżmi ta' lmenti u ta' rimedju applikabbli fit-territorju rispettiv tagħhom, sabiex jiffaċilitaw l-aċċess għal tali mekkaniżmi mir-riċevituri tas-servizz. Fl-aħħar nett, meta japplikaw dan ir-Regolament, l-Istati Membri jenħtieġ li jirrispettaw id-dritt fundamentali għal rimedju ġudizzjarju effettiv u għal proċess ġust kif previst fl-Artikolu 47 tal-Karta. Għalhekk, jenħtieġ li dan ir-Regolament ma jipprevjenix lill-awtoritajiet ġudizzjarji jew amministrattivi nazzjonali rilevanti milli joħorġu, abbażi tal-liġi tal-Unjoni jew nazzjonali applikabbli, ordni biex jerġa' jiġi stabbilit il-kontenut, fejn tali kontenut ikun konformi mat-termini u l-kondizzjonijiet tal-fornitur tas-servizz intermedjarju, iżda jkun ġie kkunsidrat bi żball bħala illegali minn dak il-fornitur tas-servizz u jkun tneħħa.

(40)

Biex jintlaħqu l-objettivi ta' dan ir-Regolament, u b'mod partikolari biex jittejjeb il-funzjonament tas-suq intern u biex jiġi żgurat ambjent online sikur u trasparenti, huwa meħtieġ li jiġi stabbilit sett ċar, effettiv, prevedibbli u bilanċjat ta' obbligi armonizzati ta' diliġenza dovuta għall-fornituri tas-servizzi intermedjarji. Dawk l-obbligi jenħtieġ li jimmiraw b'mod partikolari l-garanzija ta' objettivi differenti tal-politika pubblika bħal pereżempju s-sikurezza u l-fiduċja tar-riċevituri tas-servizz, inkluż il-konsumaturi, il-minorenni u l-utenti f'riskju partikolari li jkunu soġġetti għal diskors ta' mibegħda, fastidji sesswali jew azzjonijiet diskriminatorji oħra, il-protezzjoni tad-drittijiet fundamentali rilevanti minquxa fil-Karta, l-akkontabbiltà sinifikattiva ta' dawk il-fornituri u l-għoti tas-setgħa lir-riċevituri u lil partijiet affettwati oħrajn, filwaqt li tiġi ffaċilitata s-superviżjoni meħtieġa mill-awtoritajiet kompetenti.

(41)

F'dak ir-rigward, huwa importanti li l-obbligi ta' diliġenza dovuta jiġu adattati għat-tip, għad-daqs u għan-natura tas-servizz intermedjarju kkonċernat. Għalhekk, dan ir-Regolament jistabbilixxi obbligi bażiċi applikabbli għall-fornituri kollha tas-servizzi intermedjarji, kif ukoll obbligi addizzjonali għall-fornituri ta' servizzi ta' hosting u, b'mod aktar speċifiku, għall-fornituri ta’ pjattaformi online u ta’ pjattaformi online kbar ħafna u ta’ magni tat-tiftix online kbar ħafna. Sal-punt li l-fornituri tas-servizzi intermedjarji jaqgħu f'numru ta’ kategoriji differenti fid-dawl tan-natura u tad-daqs tas-servizzi tagħhom, jenħtieġ li dawn jikkonformaw mal-obbligi korrispondenti kollha ta' dan ir-Regolament fir-rigward ta' dawk is-servizzi. Dawk l-obbligi armonizzati ta' diliġenza dovuta, li jenħtieġ li jkunu raġonevoli u mhux arbitrarji, huma meħtieġa biex jiġi indirizzat it-tħassib identifikat ta' politika pubblika, bħal pereżempju s-salvagwardja tal-interessi leġittimi tar-riċevituri tas-servizz, l-indirizzar tal-prattiki illegali u l-protezzjoni tad-drittijiet fundamentali minquxa fil-Karta. L-obbligi ta' diliġenza dovuta huma indipendenti mill-kwistjoni tar-responsabbiltà tal-fornituri ta’ servizzi intermedjarji li jeħtieġ, għalhekk, li jiġu vvalutati separatament.

(42)

Sabiex jiġu ffaċilitati l-komunikazzjonijiet bidirezzjonali bla xkiel u effiċjenti, inkluż, meta jkun xieraq, bir-rikonoxximent tal-wasla ta' tali komunikazzjonijiet, rigward kwistjonijiet koperti minn dan ir-Regolament, il-fornituri tas-servizzi intermedjarji jenħtieġ li jkunu meħtieġa jiddeżinjaw punt uniku ta' kuntatt elettroniku u jippubblikaw u jaġġornaw l-informazzjoni rilevanti relatata ma' dak il-punt ta' kuntatt tagħhom, inkluż il-lingwi li jridu jintużaw f'tali komunikazzjonijiet. Il-punt ta' kuntatt elettroniku jista' jintuża wkoll minn sinjalaturi fdati u minn entitajiet professjonali li għandhom relazzjoni speċifika mal-fornitur tas-servizzi intermedjarji. B'kuntrast għar-rappreżentant legali, il-punt ta' kuntatt elettroniku jenħtieġ li jservi skopijiet operattivi u jenħtieġ li ma jkunx meħtieġ ikollu post fiżiku. Il-fornituri tas-servizzi intermedjarji jistgħu jiddeżinjaw l-istess punt uniku ta' kuntatt għar-rekwiżiti ta' dan ir-Regolament kif ukoll għall-finijiet ta' atti oħra tal-liġi tal-Unjoni. Meta jispeċifikaw il-lingwi ta' komunikazzjoni, il-fornituri tas-servizzi intermedjarji huma mħeġġa jiżguraw li l-lingwi magħżula ma jkunux huma stess ostaklu għall-komunikazzjoni. Fejn meħtieġ, jenħtieġ li jkun possibbli li l-fornituri tas-servizzi intermedjarji u l-awtoritajiet tal-Istati Membri jilħqu ftehim separat dwar il-lingwa tal-komunikazzjoni, jew ifittxu mezzi alternattivi biex jegħlbu l-ostaklu tal-lingwa, inkluż billi jużaw il-mezzi teknoloġiċi jew ir-riżorsi umani interni u esterni kollha disponibbli.

(43)

Il-fornituri tas-servizzi intermedjarji jenħtieġ li jkunu meħtieġa wkoll jaħtru punt uniku ta' kuntatt għar-riċevituri tas-servizzi, li jippermetti komunikazzjoni rapida, diretta u effiċjenti b'mod partikolari b'mezzi faċilment aċċessibbli bħal numru tat-telefon, indirizzi tal-email, formoli ta' kuntatt elettroniku, chatbots jew messaġġi istantanji. Jenħtieġ li jiġi indikat b'mod espliċitu meta riċevitur tas-servizz jikkomunika ma' chatbots. Il-fornituri tas-servizzi intermedjarji jenħtieġ li jippermettu lir-riċevituri tas-servizzi jagħżlu mezzi ta' komunikazzjoni diretta u effiċjenti li ma jiddependux biss minn għodod awtomatizzati. Il-fornituri tas-servizzi intermedjarji jenħtieġ li jagħmlu l-isforzi raġonevoli kollha biex jiggarantixxu li jiġu allokati biżżejjed riżorsi umani u finanzjarji ħalli jiżguraw li din il-komunikazzjoni ssir fil-ħin u b'mod effiċjenti.

(44)

Il-fornituri tas-servizzi intermedjarji li huma stabbiliti f'pajjiż terz li joffru servizzi fl-Unjoni jenħtieġ li jiddeżinjaw rappreżentant legali li jkollu mandat suffiċjenti fl-Unjoni u jipprovdu informazzjoni relatata mar-rappreżentanti legali tagħhom lill-awtoritajiet rilevanti u jagħmluha disponibbli pubblikament. Barra minn hekk, sabiex jikkonformaw ma' dak l-obbligu, tali fornituri tas-servizzi intermedjarji jenħtieġ li jiżguraw li r-rappreżentant legali ddeżinjat ikollu s-setgħat u r-riżorsi meħtieġa biex jikkoopera mal-awtoritajiet rilevanti. Dan jista' jkun il-każ, pereżempju, meta fornitur tas-servizzi intermedjarji jaħtar impriża sussidjarja tal-istess grupp tal-fornitur, jew l-impriża omm tagħha, jekk dik l-impriża sussidjarja jew impriża omm tkun stabbilita fl-Unjoni. Madankollu, jista' ma jkunx il-każ, pereżempju, meta r-rappreżentant legali jkun soġġett għal proċedimenti ta' rikostruzzjoni, falliment jew insolvenza personali jew korporattiva. Dak l-obbligu jenħtieġ li jippermetti li jkun hemm sorveljanza effettiva u, fejn meħtieġ, infurzar ta' dan ir-Regolament b'rabta ma' dawk il-fornituri. Jenħtieġ li jkun possibbli li rappreżentant legali jingħata l-mandat, f'konformità mal-liġi nazzjonali, minn aktar minn fornitur wieħed tas-servizzi intermedjarji. Jenħtieġ li jkun possibbli għar-rappreżentant legali biex jiffunzjona wkoll bħala punt ta' kuntatt, diment li r-rekwiżiti rilevanti ta' dan ir-Regolament jiġu rispettati.

(45)

Filwaqt li l-libertà kuntrattwali tal-fornituri tas-servizzi intermedjarji jenħtieġ li tiġi rispettata fil-prinċipju, huwa xieraq li jiġu stabbiliti ċerti regoli dwar il-kontenut, l-applikazzjoni u l-infurzar tat-termini u l-kondizzjonijiet ta' dawk il-fornituri fl-interessi tat-trasparenza, tal-protezzjoni tar-riċevituri tas-servizz u tal-evitar ta' eżiti inġusti jew arbitrarji. Il-fornituri tas-servizzi intermedjarji jenħtieġ li, fit-termini u l-kondizzjonijiet tagħhom, jindikaw b'mod ċar u jżommu aġġornata l-informazzjoni rigward ir-raġunijiet li abbażi tagħhom jistgħu jirrestrinġu l-forniment tas-servizzi tagħhom. B'mod partikolari, jenħtieġ li jinkludu informazzjoni dwar kwalunkwe politika, proċedura, miżura u għodda użati għall-fini tal-moderazzjoni tal-kontenut, inkluż it-teħid ta' deċiżjonijiet algoritmiċi u r-rieżami uman, kif ukoll ir-regoli ta' proċedura tas-sistema interna tagħhom ta' mmaniġġjar tal-ilmenti. Jenħtieġ li jipprovdu wkoll informazzjoni faċilment aċċessibbli dwar id-dritt li l-użu tas-servizz jiġi tterminat. Il-fornituri tas-servizzi intermedjarji jistgħu jużaw elementi grafiċi fit-termini tas-servizz tagħhom, bħal ikoni jew immaġnijiet, biex juru l-elementi ewlenin tar-rekwiżiti tal-informazzjoni stabbiliti f'dan ir-Regolament. Il-fornituri jenħtieġ li jinfurmaw lir-riċevituri tas-servizz tagħhom b'mezzi xierqa dwar bidliet sinifikanti li jsiru fit-termini u l-kondizzjonijiet, pereżempju meta jimmodifikaw ir-regoli dwar l-informazzjoni li hija permessa fuq is-servizz tagħhom, jew bidliet oħra bħal dawn li jista' jkollhom impatt dirett fuq il-kapaċità tar-riċevituri li jagħmlu użu mis-servizz.

(46)

Il-fornituri tas-servizzi intermedjarji li jkunu primarjament diretti għall-minorenni, pereżempju permezz tad-diżinn jew il-kummerċjalizzazzjoni tas-servizz, jew li jintużaw b'mod predominanti mill-minorenni, jenħtieġ li jagħmlu sforzi partikolari biex jagħmlu l-ispjegazzjoni tat-termini u l-kondizzjonijiet tagħhom tinftiehem faċilment mill-minorenni.

(47)

Meta jfasslu, japplikaw u jinfurzaw dawk ir-restrizzjonijiet, il-fornituri tas-servizzi intermedjarji jenħtieġ li jaġixxu b'mod mhux arbitrarju u mhux diskriminatorju u jqisu d-drittijiet u l-interessi leġittimi tar-riċevituri tas-servizz, inklużi d-drittijiet fundamentali kif minquxa fil-Karta. Pereżempju, jenħtieġ li l-fornituri ta’ pjattaformi online kbar ħafna jqisu b'mod partikolari u kif xieraq il-libertà tal-espressjoni u tal-informazzjoni, inklużi l-libertà u l-pluraliżmu tal-midja. Il-fornituri kollha tas-servizzi intermedjarji jenħtieġ li jqisu debitament ukoll l-istandards internazzjonali rilevanti għall-protezzjoni tad-drittijiet tal-bniedem, bħall-Prinċipji Gwida tan-Nazzjonijiet Uniti dwar in-Negozju u d-Drittijiet tal-Bniedem.

(48)

Minħabba r-rwol speċjali u l-ilħuq tagħhom, huwa xieraq li jiġu imposti rekwiżiti addizzjonali fuq pjattaformi online kbar ħafna u magni tat-tiftix online kbar ħafna rigward l-informazzjoni u t-trasparenza tat-termini u l-kondizzjonijiet tagħhom. Konsegwentement, il-fornituri ta’ pjattaformi online kbar ħafna u tal-magni tat-tiftix online kbar ħafna jenħtieġ li jipprovdu t-termini u l-kondizzjonijiet tagħhom fil-lingwi uffiċjali tal-Istati Membri kollha li fihom joffru s-servizzi tagħhom u jenħtieġ li jipprovdu wkoll lir-riċevituri tas-servizzi sommarju konċiż u li jinqara faċilment tal-elementi ewlenin tat-termini u l-kondizzjonijiet. Tali sommarji jenħtieġ li jidentifikaw l-elementi ewlenin tar-rekwiżiti ta' informazzjoni, inkluża l-possibbiltà ta' esklużjoni faċli mill-klawżoli fakultattivi.

(49)

Biex jiġi żgurat livell xieraq ta' trasparenza u akkontabbiltà, il-fornituri tas-servizzi intermedjarji jenħtieġ li jqiegħdu għad-dispożizzjoni tal-pubbliku rapport annwali f'format li jinqara minn magna, f'konformità mar-rekwiżiti armonizzati ta' dan ir-Regolament, dwar il-moderazzjoni tal-kontenut li jinvolvu ruħhom fih, inkluż il-miżuri meħuda bħala riżultat tal-applikazzjoni u tal-infurzar tat-termini u l-kondizzjonijiet tagħhom. Madankollu, sabiex jiġu evitati piżijiet sproporzjonati, jenħtieġ li dawk l-obbligi ta' rappurtar dwar it-trasparenza ma japplikawx għall-fornituri li huma intrapriżi mikro jew żgħar kif definit fir-Rakkomandazzjoni tal-Kummissjoni 2003/361/KE (25) u li mhumiex pjattaformi online kbar ħafna fit-tifsira ta' dan ir-Regolament.

(50)

Il-fornituri ta' servizzi ta' hosting jaqdu rwol partikolarment importanti fl-indirizzar tal-kontenut illegali online, minħabba li jaħżnu l-informazzjoni pprovduta mir-riċevituri tas-servizzi u fuq talba tagħhom u tipikament jagħtu aċċess għaliha lil riċevituri oħra, xi kultant fuq skala kbira. Huwa importanti li l-fornituri kollha ta' servizzi ta' hosting, irrispettivament mid-daqs tagħhom, jistabbilixxu mekkaniżmi ta' avviż u azzjoni faċilment aċċessibbli u faċli għall-utent li jiffaċilitaw in-notifika ta' elementi speċifiċi ta' informazzjoni, li l-parti notifikanti tqis li huma kontenut illegali, lill-fornitur ta' servizzi ta' hosting ikkonċernat ("avviż"), skont liema dak il-fornitur ikun jista' jiddeċiedi jekk jaqbilx ma' dik il-valutazzjoni u jixtieqx ineħħi jew jiddiżattiva l-aċċess għal dak il-kontenut ("azzjoni"). Tali mekkaniżmi jenħtieġ li jkunu identifikabbli b'mod ċar, lokalizzati qrib l-informazzjoni inkwistjoni u tal-inqas faċli biex jinstabu u jintużaw bħala mekkaniżmi ta' notifika għal kontenut li jikser it-termini u l-kondizzjonijiet tal-fornitur ta' servizzi ta' hosting. Diment li r-rekwiżiti jew l-avviżi jiġu ssodisfati, jenħtieġ li jkun possibbli li l-individwi jew l-entitajiet jinnotifikaw bosta elementi speċifiċi ta' kontenut allegatament illegali permezz ta' avviż wieħed sabiex jiġi żgurat il-funzjonament effettiv tal-mekkaniżmi ta' avviż u azzjoni. Il-mekkaniżmu ta' notifika jenħtieġ li jippermetti, iżda ma jirrikjedix, l-identifikazzjoni tal-individwu jew tal-entità li jkunu qed jissottomettu avviż. Għal xi tipi ta' elementi ta' informazzjoni notifikati, l-identità tal-individwu jew tal-entità li jkunu qed jissottomettu avviż tista' tkun meħtieġa biex jiġi ddeterminat jekk l-informazzjoni inkwistjoni tikkostitwix kontenut illegali, kif allegat. L-obbligu li jiġu stabbiliti mekkaniżmi ta' avviż u azzjoni jenħtieġ li japplika, pereżempju, għas-servizzi tal-ħżin u tal-kondiviżjoni ta' fajls, għas-servizzi ta' web hosting, għas-servers tar-reklamar u l-paste bins, diment li jikkwalifikaw bħala fornituri ta' servizzi ta' hosting koperti minn dan ir-Regolament.

(51)

Filwaqt li titqies il-ħtieġa li jitqiesu kif xieraq id-drittijiet fundamentali ggarantiti mill-Karta tal-partijiet kollha kkonċernati, jenħtieġ li kwalunkwe azzjoni meħuda minn fornitur ta' servizzi ta' hosting wara li jirċievi avviż tkun strettament immirata, fis-sens li jenħtieġ li sservi biex tneħħi jew tiddiżattiva l-aċċess għall-elementi speċifiċi ta' informazzjoni meqjusa li jikkostitwixxu kontenut illegali, mingħajr ma taffettwa indebitament il-libertà tal-espressjoni u tal-informazzjoni tar-riċevituri tas-servizz. Għalhekk, bħala regola ġenerali, jenħtieġ li l-avviżi jiġu diretti lill-fornituri ta' servizzi ta' hosting li jistgħu jkunu raġonevolment mistennija li jkollhom il-kapaċità teknika u operazzjonali li jaġixxu kontra tali elementi speċifiċi. Il-fornituri ta' servizzi ta' hosting li jirċievu avviż li għalih ma jistgħux, għal raġunijiet tekniċi jew operazzjonali, ineħħu l-element speċifiku ta' informazzjoni, jenħtieġ li jinfurmaw lill-persuna jew lill-entità li ssottomettiet l-avviż.

(52)

Ir-regoli dwar dawn il-mekkaniżmi ta' avviż u azzjoni jenħtieġ li jiġu armonizzati fil-livell tal-Unjoni, biex jipprevedu l-ipproċessar fil-ħin, diliġenti u mhux arbitrarju tal-avviżi abbażi ta' regoli li jkunu uniformi, trasparenti u ċari u li jipprevedu salvagwardji robusti biex jipproteġu d-drittijiet u l-interessi leġittimi tal-partijiet kollha affettwati, b'mod partikolari d-drittijiet fundamentali tagħhom garantiti mill-Karta, irrispettivament mill-Istat Membru li fih ikunu stabbiliti jew li fih jirrisjedu dawk il-partijiet u mill-qasam tal-liġi inkwistjoni. Dawk id-drittijiet fundamentali jinkludu iżda mhux limitati għal: għar-riċevituri tas-servizz, id-dritt għal-libertà tal-espressjoni u tal-informazzjoni, id-dritt għar-rispett għall-ħajja privata u għall-ħajja tal-familja, id-dritt għall-protezzjoni tad-data personali, id-dritt ta' nondiskriminazzjoni u d-dritt għal rimedju effettiv; għall-fornituri tas-servizzi, il-libertà li wieħed imexxi negozju, inkluż il-libertà kuntrattwali,; għall-partijiet affettwati mill-kontenut illegali, id-dritt għad-dinjità tal-bniedem, id-drittijiet tat-tfal, id-dritt għall-protezzjoni tal-proprjetà, inkluż il-proprjetà intellettwali u d-dritt ta' nondiskriminazzjoni. Il-fornituri ta' servizzi ta' hosting jenħtieġ li jaġixxu fuq l-avviżi mingħajr dewmien, b'mod partikolari, billi jqisu t-tip ta' kontenut illegali li jkun qed jiġi nnotifikat u l-urġenza li tittieħed azzjoni. Pereżempju, tali fornituri jistgħu jkunu mistennija li jaġixxu mingħajr dewmien meta jkun qed jiġi nnotifikat kontenut allegatament illegali li jinvolvi theddida għall-ħajja jew għas-sikurezza ta' persuni. Il-fornitur ta' servizzi ta' hosting jenħtieġ li jinforma lill-individwu jew lill-entità li tinnotifika l-kontenut speċifiku mingħajr dewmien żejjed wara li jieħu deċiżjoni dwar jekk jaġixxix jew ma jaġixxix fuq l-avviż.

(53)

Jenħtieġ li l-mekkaniżmi ta' avviż u azzjoni jippermettu s-sottomissjoni ta' avviżi li jkunu preċiżi biżżejjed u sostanzjati b'mod adegwat biex il-fornitur ta' servizzi ta' hosting ikkonċernat ikun jista' jieħu deċiżjoni infurmata u diliġenti, kompatibbli mal-libertà tal-espressjoni u tal-informazzjoni, fir-rigward tal-kontenut li għalih jirreferi l-avviż, b'mod partikolari jekk dak il-kontenut għandux jitqies bħala kontenut illegali u għandux jitneħħa jew jekk l-aċċess għalih għandux jiġi diżattivat. Jenħtieġ li dawk il-mekkaniżmi jkunu tali li jiffaċilitaw l-għoti ta' avviżi li jkun fihom spjegazzjoni tar-raġunijiet għaliex l-individwu jew l-entità li jkunu qed jissottomettu avviż iqisu li l-kontenut huwa illegali, u indikazzjoni ċara tal-lok fejn jinsab dak il-kontenut. Meta avviż ikun fih biżżejjed informazzjoni biex fornitur diliġenti ta' servizzi ta' hosting ikun jista' jidentifika, mingħajr eżami legali dettaljat, li jkun ċar li l-kontenut huwa illegali, jenħtieġ li l-avviż jitqies li jwassal għal għarfien jew konoxxenza effettivi tal-illegalità. Ħlief għat-tressiq ta' avviżi relatati ma' reati msemmija fl-Artikoli 3 sa 7 tad-Direttiva 2011/93/UE tal-Parlament Ewropew u tal-Kunsill (26), dawk il-mekkaniżmi jenħtieġ li jitolbu lill-individwu jew lill-entità li jkunu qed jissottomettu avviż biex jiżvelaw l-identità tiegħu, biex jiġi evitat l-użu ħażin.

(54)

Meta fornitur ta' servizzi ta' hosting jiddeċiedi, minħabba li l-informazzjoni pprovduta mir-riċevituri tkun kontenut illegali jew tkun inkompatibbli mat-termini u l-kondizzjonijiet tiegħu, li jneħħi, jew li jiddiżattiva l-aċċess għal, l-informazzjoni pprovduta minn riċevitur tas-servizz jew inkella li jirrestrinġi l-viżibbiltà jew il-monetizzazzjoni tagħha, pereżempju wara li jkun wasallu avviż jew meta jaġixxi b'inizjattiva proprja, inkluż esklużivament b'mezzi awtomatiċi, dak il-fornitur jenħtieġ li jinforma lir-riċevitur b'mod ċar u li jinftiehem faċilment bid-deċiżjoni tiegħu, ir-raġunijiet għad-deċiżjoni tiegħu u l-possibbiltajiet ta' rimedju disponibbli biex ir-riċevitur ikun jista' jikkontesta d-deċiżjoni, fid-dawl tal-konsegwenzi negattivi li tali deċiżjonijiet jista' jkollhom għar-riċevitur, inkluż fir-rigward tal-eżerċizzju tad-dritt fundamentali tiegħu għal-libertà tal-espressjoni. Dak l-obbligu jenħtieġ li japplika irrispettivament mir-raġunijiet għad-deċiżjoni, b'mod partikolari jekk l-azzjoni tkunx ittieħdet minħabba li l-informazzjoni nnotifikata titqies bħala kontenut illegali jew inkompatibbli mat-termini u l-kondizzjonijiet applikabbli. Fejn id-deċiżjoni tkun ittieħdet wara li jkun wasal avviż, jenħtieġ li l-fornitur ta' servizzi ta' hosting jiżvela biss l-identità tal-persuna jew tal-entità li ssottomettiet l-avviż lir-riċevitur tas-servizz fejn din l-informazzjoni tkun meħtieġa biex tiġi identifikata l-illegalità tal-kontenut, bħal f'każijiet ta' ksur tad-drittijiet tal-proprjetà intellettwali.

(55)

Ir-restrizzjoni tal-viżibbiltà tista' tikkonsisti fl-iżgradar fis-sistemi ta' klassifikazzjoni jew ta' rakkomandazzjoni, kif ukoll fil-limitazzjoni tal-aċċessibbiltà minn wieħed jew aktar mir-riċevituri tas-servizz jew l-imblukkar tal-utent minn komunità online mingħajr ma l-utent ikun jaf biha ("shadow banning"). Il-monetizzazzjoni permezz tad-dħul mir-reklamar ta' informazzjoni ipprovduta mir-riċevitur tas-servizz tista' tiġi ristretta billi jiġi sospiż jew terminat il-pagament monetarju jew id-dħul assoċjat ma' dik l-informazzjoni. Madankollu, jenħtieġ li l-obbligu li tiġi pprovduta dikjarazzjoni tar-raġunijiet ma japplikax fir-rigward ta' kontenut kummerċjali qarrieqi ta' volum għoli mxerred permezz ta' manipulazzjoni intenzjonata tas-servizz, b'mod partikolari l-użu mhux awtentiku tas-servizz bħall-użu ta' bots jew kontijiet foloz jew użi qarrieqa oħra tas-servizz. Irrispettivament minn possibbiltajiet oħra biex tiġi kkontestata d-deċiżjoni tal-fornitur ta' servizzi ta' hosting, ir-riċevitur tas-servizz jenħtieġ li jkollu dejjem dritt għal rimedju effettiv quddiem qorti f'konformità mal-liġi nazzjonali.

(56)

F'ċerti każijiet, fornitur ta' servizzi ta' hosting jista' jsir konxju, pereżempju permezz ta' avviż minn parti notifikanti jew permezz tal-miżuri volontarji tiegħu stess, ta' informazzjoni relatata ma' ċerta attività ta' riċevituri tas-servizz, bħall-provvista ta' ċerti tipi ta' kontenut illegali, li tiġġustifika b'mod raġonevoli, meta jiġu kkunsidrati ċ-ċirkostanzi rilevanti kollha li jkun konxju tagħhom il-fornitur ta' servizzi ta' hosting, is-suspett li dak ir-riċevitur seta' wettaq, jista' jkun li qed iwettaq jew aktarx se jwettaq reat kriminali li jinvolvi theddida għall-ħajja jew għas-sikurezza ta' persuna jew persuni, bħar-reati speċifikati fid-Direttiva 2011/36/UE tal-Parlament Ewropew u tal-Kunsill (27), fid-Direttiva 2011/93/UE jew fid-Direttiva (UE) 2017/541 tal-Parlament Ewropew u tal-Kunsill (28). Pereżempju, elementi speċifiċi ta' kontenut jistgħu jagħtu lok għal suspett ta' theddida għall-pubbliku, bħall-inċitament għat-terroriżmu skont it-tifsira tal-Artikolu 21 tad-Direttiva (UE) 2017/541. F'każijiet bħal dawn, il-fornitur ta' servizzi ta' hosting jenħtieġ li jinforma mingħajr dewmien lill-awtoritajiet kompetenti tal-infurzar tal-liġi dwar tali suspett. Il-fornitur ta' servizzi ta' hosting jenħtieġ li jipprovdi l-informazzjoni rilevanti kollha disponibbli għalih, inkluż, fejn rilevanti, il-kontenut inkwistjoni u, jekk disponibbli, il-ħin meta l-kontenut ġie ppubblikat, inkluż iż-żona ta' ħin iddeżinjata, spjegazzjoni tas-suspett tiegħu u l-informazzjoni meħtieġa biex jinsab u jiġi identifikat ir-riċevitur rilevanti tas-servizz. Dan ir-Regolament ma jipprevedix il-bażi ġuridika għat-tfassil ta' profili tar-riċevituri tas-servizzi bil-ħsieb li l-fornituri ta' servizzi ta' hosting jkunu jistgħu jidentifikaw r-reati kriminali. Jenħtieġ li l-fornituri ta' servizzi ta' hosting jirrispettaw ukoll regoli applikabbli oħra tal-liġi tal-Unjoni jew tal-liġi nazzjonali għall-protezzjoni tad-drittijiet u tal-libertajiet tal-individwi meta jinfurmaw lill-awtoritajiet tal-infurzar tal-liġi.

(57)

Biex jiġu evitati piżijiet sproporzjonati, l-obbligi addizzjonali imposti skont dan ir-Regolament fuq il-fornituri ta’ pjattaformi online, inklużi l-pjattaformi li jippermettu lill-konsumaturi jikkonkludu kuntratti mill-bogħod ma' kummerċjanti, jenħtieġ li ma japplikawx għall-fornituri li jikkwalifikaw bħala intrapriżi mikro u żgħar kif definit fir-Rakkomandazzjoni 2003/361/KE. Għall-istess raġuni, dawk l-obbligi addizzjonali jenħtieġ li ma japplikawx ukoll għall-fornituri ta’ pjattaformi online li preċedentement jkunu kkwalifikaw bħala intrapriżi mikro jew żgħar matul perjodu ta’ 12-il xahar wara li jkunu tilfu dak l-istatus. Jenħtieġ li tali fornituri ma jiġux esklużi mill-obbligu li jipprovdu informazzjoni dwar ir-riċevituri attivi medji fix-xahar tas-servizz fuq talba tal-Koordinatur tas-Servizzi Diġitali tal-istabbiliment jew tal-Kummissjoni. Madankollu, meta jitqies li l-pjattaformi online kbar ħafna jew il-magni tat-tiftix online kbar ħafna għandhom ilħuq akbar u impatt akbar fuq kif ir-riċevituri tas-servizz jiksbu informazzjoni u jikkomunikaw online, jenħtieġ li tali fornituri ma jibbenefikawx minn dik l-esklużjoni, irrispettivament minn jekk jikkwalifikawx jew ikkwalifikawx reċentement bħala intrapriżi mikro jew żgħar. Ir-regoli dwar il-konsolidazzjoni stipulati fir-Rakkomandazzjoni 2003/361/KE jgħinu biex jiġi żgurat li tiġi evitata kwalunkwe evażjoni ta' dawk l-obbligi addizzjonali. Xejn f'dan ir-Regolament ma jipprekludi lill-fornituri ta’ pjattaformi online li huma koperti minn dik l-esklużjoni milli jistabbilixxu, b'mod volontarju, sistema li tikkonforma ma' wieħed minn dawk l-obbligi jew aktar minn wieħed.

(58)

Ir-riċevituri tas-servizzi jenħtieġ li jkunu jistgħu jikkontestaw b'mod faċli u effettiv ċerti deċiżjonijiet tal-fornituri ta’ pjattaformi online li jikkonċernaw l-illegalità tal-kontenut jew l-inkompatibbiltà tiegħu mat-termini u l-kondizzjonijiet li jaffettwawhom b'mod negattiv. Għalhekk, il-fornituri ta’ pjattaformi online jenħtieġ li jiġu rikjesti li jipprevedu sistemi interni għall-immaniġġjar tal-ilmenti, li jissodisfaw ċerti kondizzjonijiet biex jiġi żgurat li s-sistemi jkunu aċċessibbli faċilment u jwasslu għal eżiti rapidi, mhux diskriminatorji, mhux arbitrarji u ġusti, u jkunu soġġetti għal rieżami mill-bniedem meta jintużaw mezzi awtomatizzati. Tali sistemi jenħtieġ li jippermettu lir-riċevituri kollha tas-servizz iressqu lment u jenħtieġ li ma jistabbilux rekwiżiti formali, bħal riferiment għal dispożizzjonijiet legali speċifiċi u rilevanti jew jelaboraw spjegazzjonijiet legali. Ir-riċevituri tas-servizz li ssottomettew avviż permezz tal-mekkaniżmu ta' avviż u azzjoni previst f'dan ir-Regolament jew permezz tal-mekkaniżmu ta' notifika għall-kontenut li jikser it-termini u l-kondizzjonijiet tal-fornitur ta’ pjattaformi online jenħtieġ li jkunu intitolati jużaw il-mekkaniżmu tal-ilmenti biex jikkontestaw id-deċiżjoni tal-fornitur ta’ pjattaformi online dwar l-avviżi tagħhom, inkluż meta jqisu li l-azzjoni meħuda minn dak il-fornitur ma kinitx adegwata. Jenħtieġ li l-possibbiltà li jitressaq ilment għat-treġġigħ lura tad-deċiżjonijiet ikkontestati tkun disponibbli għal mill-inqas sitt xhur, li jiġu kkalkulati mill-mument li fih il-fornitur ta’ pjattaformi online informa lir-riċevitur tas-servizz bid-deċiżjoni.

(59)

Barra minn hekk, jenħtieġ li tiġi prevista l-possibbiltà ta' involviment, in bona fide, fis-soluzzjoni tat-tilwim barra mill-qorti ta' tali tilwim, inkluż dak it-tilwim li ma jistax jissolva b'mod sodisfaċenti permezz tas-sistemi interni għall-immaniġġjar tal-ilmenti, minn korpi ċċertifikati li għandhom l-indipendenza meħtieġa, il-mezzi u l-għarfien espert biex iwettqu l-attivitajiet tagħhom b'mod ġust, rapidu u kosteffettiv. L-indipendenza tal-korpi għas-soluzzjoni tat-tilwim barra mill-qorti jenħtieġ li tiġi żgurata wkoll fil-livell tal-persuni fiżiċi inkarigati mis-soluzzjoni tat-tilwim, inkluż permezz ta' regoli dwar il-kunflitt ta' interess. Jenħtieġ li t-tariffi imposti mill-korpi għas-soluzzjoni tat-tilwim barra mill-qorti ikunu raġonevoli, aċċessibbli, attraenti, irħas għall-konsumaturi u proporzjonati, u vvalutati fuq bażi ta' każ b'każ. Meta korp għas-soluzzjoni tat-tilwim barra mill-qorti jkun iċċertifikat mill-Koordinatur tas-Servizzi Diġitali kompetenti, dik iċ-ċertifikazzjoni jenħtieġ li tkun valida fl-Istati Membri kollha. Il-fornituri ta’ pjattaformi online jenħtieġ li jkunu jistgħu jirrifjutaw li jinvolvu ruħhom fi proċeduri ta' soluzzjoni tat-tilwim barra mill-qorti skont dan ir-Regolament, meta l-istess tilwima, b'mod partikolari fir-rigward tal-informazzjoni kkonċernata u r-raġunijiet għat-teħid tad-deċiżjoni kkontestata, l-effetti tad-deċiżjoni u r-raġunijiet mogħtija għall-kontestazzjoni tad-deċiżjoni, tkun diġà ġiet solvuta minn, jew tkun diġà soġġetta għal, proċedura li tkun għaddejja quddiem il-qorti kompetenti jew quddiem korp kompetenti ieħor għas-soluzzjoni tat-tilwim barra mill-qorti. Ir-riċevituri tas-servizz jenħtieġ li jkunu jistgħu jagħżlu bejn il-mekkaniżmu intern tal-ilmenti, soluzzjoni tat-tilwim barra mill-qorti u l-possibbiltà li jibdew, fi kwalunkwe stadju, proċedimenti ġudizzjarji. Peress li l-eżitu tal-proċedura għas-soluzzjoni tat-tilwim barra mill-qorti mhuwiex vinkolanti, jenħtieġ li l-partijiet ma jitwaqqfux milli jibdew proċedimenti ġudizzjarji fir-rigward tal-istess tilwima. Il-possibbiltajiet biex jiġu kkontestati d-deċiżjonijiet tal-fornituri ta’ pjattaformi online maħluqa b'dan il-mod jenħtieġ li ma jaffettwaw bl-ebda mod, il-possibbiltà li wieħed ifittex rimedju ġudizzjarju f'konformità mal-liġijiet tal-Istat Membru kkonċernat, u għalhekk jenħtieġ li ma jaffettwawx l-eżerċizzju tad-dritt għal rimedju ġudizzjarju effettiv skont l-Artikolu 47 tal-Karta. Id-dispożizzjonijiet f'dan ir-Regolament dwar is-soluzzjoni tat-tilwim barra mill-qorti jenħtieġ li ma jirrikjedux li l-Istati Membri jistabbilixxu tali korpi għas-soluzzjoni tat-tilwim barra mill-qorti.

(60)

Għat-tilwim kuntrattwali bejn il-konsumaturi u n-negozji fuq ix-xiri ta' oġġetti jew servizzi, id-Direttiva 2013/11/UE tiżgura li l-konsumaturi tal-Unjoni u n-negozji fl-Unjoni jkollhom aċċess għal entitajiet ta' soluzzjoni alternattiva għat-tilwim iċċertifikati għall-kwalità. F'dan ir-rigward, jenħtieġ li jiġi ċċarat li r-regoli ta' dan ir-Regolament dwar is-soluzzjoni tat-tilwim barra mill-qorti huma mingħajr preġudizzju għal dik id-Direttiva, inkluż id-dritt tal-konsumaturi skont dik id-Direttiva li jirtiraw mill-proċedura fi kwalunkwe stadju jekk ma jkunux sodisfatti bil-prestazzjoni jew bit-tħaddim tal-proċedura.

(61)

Tista' tittieħed azzjoni aktar rapida u b'mod aktar affidabbli kontra l-kontenut illegali meta l-fornituri ta’ pjattaformi online jieħdu l-miżuri meħtieġa biex jiżguraw li l-avviżi sottomessi minn sinjalaturi fdati, li jaġixxu fil-qasam deżinjat tal-għarfien espert tagħhom, permezz tal-mekkaniżmi ta' avviż u azzjoni rikjesti minn dan ir-Regolament ikunu trattati bi prijorità, mingħajr preġudizzju għar-rekwiżit li jiġu pproċessati l-avviżi kollha sottomessi permezz ta' dawk il-mekkaniżmi u tittieħed deċiżjoni dwarhom fil-ħin u b'mod diliġenti u mhux arbitrarju. Tali status ta' sinjalatur fdat jenħtieġ li jingħata mill-Koordinatur tas-Servizzi Diġitali tal-Istat Membru li fih l-applikant ikun stabbilit u jenħtieġ li jiġi rikonoxxut mill-fornituri kollha tal-pjattaformi online fil-kamp ta' applikazzjoni ta' dan ir-Regolament. Tali status ta' sinjalatur fdat jenħtieġ li jingħata biss lill-entitajiet, u mhux lill-individwi, li juru, fost affarijiet oħrajn, li għandhom għarfien espert u kompetenza partikolari fl-indirizzar tal-kontenut illegali u li jaħdmu b'mod diliġenti, preċiż u oġġettiv. Tali entitajiet jistgħu jkunu pubbliċi fin-natura tagħhom, bħal pereżempju, għall-kontenut terroristiku, l-unitajiet ta' indikazzjoni ta' kontenut fuq l-internet tal-awtoritajiet nazzjonali tal-infurzar tal-liġi jew tal-Aġenzija tal-Unjoni Ewropea għall-Kooperazzjoni fl-Infurzar tal-Liġi ("Europol") jew jistgħu jkunu organizzazzjonijiet mhux governattivi u korpi privati jew semi-pubbliċi bħall-organizzazzjonijiet parti min-network ta' hotlines INHOPE għar-rappurtar tal-materjal ta' abbuż sesswali tat-tfal u l-organizzazzjonijiet impenjati biex jinnotifikaw espressjonijiet razzisti u ksenofobiċi online. Biex jiġi evitat li jitnaqqas il-valur miżjud ta' tali mekkaniżmu, l-għadd globali ta' sinjalaturi fdati mogħti f'konformità ma' dan ir-Regolament jenħtieġ li jkun limitat. B'mod partikolari, l-assoċjazzjonijiet tal-industrija li jirrappreżentaw l-interessi tal-membri tagħhom huma inkoraġġuti japplikaw għall-istatus ta' sinjalaturi fdati, mingħajr preġudizzju għad-dritt ta' entitajiet privati jew individwi li jidħlu fi ftehimiet bilaterali mal-fornituri ta’ pjattaformi online.

(62)

Jenħtieġ li s-sinjalaturi fdati jippubblikaw rapporti li jinftiehmu faċilment u dettaljati dwar l-avviżi sottomessi f'konformità ma' dan ir-Regolament. Jenħtieġ li dawk ir-rapporti jindikaw informazzjoni bħall-għadd ta' avviżi kategorizzati mill-fornitur ta' servizzi ta' hosting, it-tip ta' kontenut innotifikat, u l-azzjoni meħuda mill-fornitur. Minħabba li s-sinjalaturi fdati jkunu wrew għarfien espert u kompetenza, l-ipproċessar ta' avviżi sottomessi minn sinjalaturi fdati jista' jkun mistenni li jkun inqas ta' piż u għalhekk jieħu inqas ħin meta mqabbel mal-avviżi sottomessi minn riċevituri oħra tas-servizz. Madankollu, iż-żmien medju li jittieħed għall-ipproċessar xorta jista' jvarja skont fatturi oħra inkluż it-tip ta' kontenut illegali, il-kwalità tal-avviżi, u l-proċeduri tekniċi proprji fis-seħħ għas-sottomissjoni ta' tali avviżi.

Pereżempju, filwaqt li l-Kodiċi ta' kondotta dwar il-ġlieda kontra d-diskors ta' mibegħda illegalionline tal-2016 jistabbilixxi parametru referenzjarju għall-kumpaniji parteċipanti fir-rigward taż-żmien meħtieġ biex jiġu pproċessati notifiki validi għat-tneħħija ta' diskors ta' mibegħda illegali, tipi oħra ta' kontenut illegali jistgħu jiġu pproċessati f'perjodi ta' żmien konsiderevolment differenti, skont il-fatti u ċ-ċirkostanzi speċifiċi u t-tipi ta' kontenut illegali inkwistjoni. Sabiex jiġu evitati abbużi tal-istatus ta' sinjalaturi fdati, jenħtieġ li jkun possibbli li tali status jiġi sospiż meta Koordinatur tas-Servizz Diġitali tal-istabbiliment ikun fetaħ investigazzjoni bbażata għal raġunijiet leġittimi. Ir-regoli ta' dan ir-Regolament dwar is-sinjalaturi fdati jenħtieġ li ma jinftehmux li jipprevjenu lill-fornituri ta’ pjattaformi online milli jagħtu trattament simili għall-avviżi sottomessi minn entitajiet jew individwi li ma jkunux ingħataw status ta' sinjalaturi fdati skont dan ir-Regolament, milli jikkooperaw b'mod ieħor ma' entitajiet oħrajn, f'konformità mal-liġi applikabbli, inkluż dan ir-Regolament u r-Regolament (UE) 2016/794 tal-Parlament Ewropew u tal-Kunsill (29). Jenħtieġ li r-regoli ta' dan ir-Regolament ma jipprevjenux lill-fornituri ta’ pjattaformi online milli jagħmlu użu minn tali sinjalatur fdat jew mekkaniżmi simili biex jieħdu azzjoni rapida u affidabbli kontra kontenut li jkun inkompatibbli mat-termini u l-kondizzjonijiet tagħhom, b'mod partikolari kontra kontenut li jkun ta' ħsara għal riċevituri vulnerabbli tas-servizz, bħall-minorenni.

(63)

L-użu ħażin tal-pjattaformi online billi jiġi pprovdut b'mod frekwenti kontenut manifestament illegali jew billi jiġu sottomessi b'mod frekwenti avviżi jew ilmenti manifestament infondati permezz tal-mekkaniżmi u tas-sistemi, rispettivament, stabbiliti skont dan ir-Regolament jimmina l-fiduċja u jagħmel ħsara lid-drittijiet u lill-interessi leġittimi tal-partijiet ikkonċernati. Għalhekk, hemm il-ħtieġa li jiġu stabbiliti salvagwardji xierqa, proporzjonati u effettivi kontra tali użu ħażin, li jeħtieġ li jirrispettaw id-drittijiet u l-interessi leġittimi tal-partijiet kollha involuti, inklużi d-drittijiet u l-libertajiet fundamentali applikabbli kif minquxa fil-Karta, b'mod partikolari l-libertà tal-espressjoni. L-informazzjoni jenħtieġ li titqies bħala kontenut manifestament illegali u l-avviżi u l-ilmenti jenħtieġ li jitqiesu manifestament infondati meta jkun evidenti għal persuna mhux esperta, mingħajr l-ebda analiżi sostantiva, li l-kontenut huwa illegali jew, rispettivament, li l-avviżi jew l-ilmenti huma infondati.

(64)

F'ċerti kondizzjonijiet, il-fornituri ta’ pjattaformi online jenħtieġ li jissospendu temporanjament l-attivitajiet rilevanti tagħhom fir-rigward tal-persuna involuta f'imġiba abbużiva. Dan huwa mingħajr preġudizzju għal-libertà tal-fornituri ta’ pjattaformi online biex jiddeterminaw it-termini u l-kondizzjonijiet tagħhom u jistabbilixxu miżuri aktar stretti fil-każ ta' kontenut manifestament illegali relatat ma' reati serji, bħal materjal ta' abbuż sesswali tat-tfal. Għal raġunijiet ta' trasparenza, jenħtieġ li din il-possibbiltà tiġi stabbilita, b'mod ċar u b'dettall suffiċjenti, fit-termini u l-kondizzjonijiet tal-pjattaformi online. Jenħtieġ li r-rimedju jkun dejjem miftuħ għad-deċiżjonijiet meħuda f'dan ir-rigward mill-fornituri ta’ pjattaformi online u jenħtieġ li dawn ikunu soġġetti għal sorveljanza mill-Koordinatur tas-Servizzi Diġitali kompetenti. Il-fornituri ta’ pjattaformi online jenħtieġ li jibagħtu twissija bikrija qabel ma jiddeċiedu dwar is-sospensjoni, li jenħtieġ li tinkludi r-raġunijiet għas-sospensjoni possibbli u l-mezzi ta' rimedju kontra d-deċiżjoni tal-fornituri ta’ pjattaforma online. Meta jiddeċiedu dwar is-sospensjoni, il-fornituri ta’ pjattaformi online jenħtieġ li jibagħtu d-dikjarazzjoni tar-raġunijiet f'konformità mar-regoli f'dan ir-Regolament. Jenħtieġ li r-regoli ta' dan ir-Regolament dwar l-użu ħażin ma jipprevjenux lill-fornituri ta’ pjattaformi online milli jieħdu miżuri oħra biex jindirizzaw il-provvista ta' kontenut illegali mir-riċevituri tas-servizz tagħhom jew użu ħażin ieħor tas-servizzi tagħhom, inkluż permezz tal-ksur tat-termini u l-kondizzjonijiet tagħhom, f'konformità mal-liġi tal-Unjoni u mal-liġi nazzjonali applikabbli. Dawk ir-regoli huma mingħajr preġudizzju għal kwalunkwe possibbiltà li l-persuni involuti fl-użu ħażin jinżammu responsabbli, inkluż għad-danni, prevista fil-liġi tal-Unjoni jew fil-liġi nazzjonali.

(65)

Fid-dawl tar-responsabbiltajiet u tal-obbligi partikolari tal-fornituri ta’ pjattaformi online, jenħtieġ li dawn ikunu soġġetti għal obbligi ta' rappurtar dwar it-trasparenza, li japplikaw minbarra l-obbligi ta' rappurtar dwar it-trasparenza applikabbli għall-fornituri kollha tas-servizzi intermedjarji skont dan ir-Regolament. Għall-finijiet li jiġi determinat jekk il-pjattaformi online u l-magni tat-tiftix online jistgħux ikunu pjattaformi online kbar ħafna jew magni tat-tiftix online kbar ħafna, rispettivament, li huma soġġetti għal ċerti obbligi addizzjonali skont dan ir-Regolament, jenħtieġ li l-obbligi ta' rappurtar dwar it-trasparenza għall-pjattaformi online u l-magni tat-tiftix online jinkludu ċerti obbligi relatati mal-pubblikazzjoni u mal-komunikazzjoni tal-informazzjoni dwar il-medja ta' kull xahar ta' riċevituri tas-servizz attivi fl-Unjoni.

(66)

Sabiex tiġi żgurata t-trasparenza u jkun jista' jsir skrutinju tad-deċiżjonijiet ta' moderazzjoni tal-kontenut tal-fornituri ta’ pjattaformi online u jiġi mmonitorjat it-tixrid ta' kontenut illegali online, jenħtieġ li l-Kummissjoni żżomm u tippubblika bażi tad-data li jkun fiha d-deċiżjonijiet u d-dikjarazzjonijiet tar-raġunijiet tal-fornituri ta’ pjattaformi online meta dawn ineħħu jew jirrestrinġu b'mod ieħor id-disponibbiltà tal-informazzjoni u l-aċċess għaliha. Sabiex iżommu l-bażi tad-data aġġornata kontinwament, il-fornituri ta’ pjattaformi online jenħtieġ li jissottomettu, f'format standard, id-deċiżjonijiet u d-dikjarazzjoni tar-raġunijiet mingħajr dewmien żejjed wara li tkun ittieħdet deċiżjoni, biex jippermettu aġġornamenti f'ħin reali, meta teknikament possibbli, u b'mod proporzjonat għall-mezzi tal-pjattaforma online inkwistjoni. Jenħtieġ li l-bażi tad-data strutturata tippermetti l-aċċess għall-informazzjoni rilevanti u t-tfittxijiet għaliha, b'mod partikolari fir-rigward tat-tip ta' kontenut allegatament illegali inkwistjoni.

(67)

Id-dark patterns fuq l-interfaċċi online ta' pjattaformi online huma prattiki li materjalment jgħawġu jew ifixklu, b’mod intenzjonali jew effettivament, il-kapaċità tar-riċevituri tas-servizz li jagħmlu għażliet jew deċiżjonijiet awtonomi u infurmati. Dawk il-prattiki jistgħu jintużaw biex jikkonvinċu lir-riċevituri tas-servizz jadottaw imġiba mhux mixtieqa jew deċiżjonijiet mhux mixtieqa li jkollhom konsegwenzi negattivi għalihom. Il-fornituri tal-pjattaformi online, għalhekk, jenħtieġ li jkunu pprojbiti milli jqarrqu bir-riċevituri tas-servizz, jew iħajruhom, u milli jgħawġu jew ifixklu l-awtonomija, it-teħid ta' deċiżjonijiet, jew l-għażla tar-riċevituri tas-servizz permezz tal-istruttura, id-diżinn jew il-funzjonalitajiet ta' interfaċċa online jew parti minnha. Dan jenħtieġ li jinkludi, iżda ma jkunx limitat għal, għażliet ta' diżinn ta' sfruttament biex ir-riċevitur jiġi ddireġut lejn azzjonijiet li jkunu ta' benefiċċju għall-fornitur ta’ pjattaformi online, iżda li jistgħu ma jkunux fl-interess tar-riċevituri, li jippreżentaw għażliet b'mod mhux newtrali, bħall-għoti ta' aktar prominenza lil ċerti għażliet permezz ta' komponenti viżivi, udittivi jew oħrajn, meta r-riċevitur tas-servizz jintalab jieħu deċiżjoni.

Jenħtieġ li jinkludi wkoll il-fatt li riċevitur tas-servizz jintalab ripetutament biex jagħmel għażla meta tali għażla tkun diġà saret, li l-proċedura ta' kanċellazzjoni ta' servizz tkun ferm aktar ikkumplikata milli dik ta' reġistrazzjoni, jew li ċerti għażliet ikunu aktar diffiċli jew jieħdu aktar ħin minn oħrajn, il-fatt li jkun diffiċli b'mod mhux raġonevoli li jitwaqqaf ix-xiri jew li wieħed joħroġ minn pjattaforma online partikolari, li l-konsumaturi jkunu jistgħu jikkonkludu kuntratti mill-bogħod ma' kummerċjanti, u li r-riċevituri tas-servizz jiġu mqarrqa billi jiġu mħajra jieħdu deċiżjonijiet dwar tranżazzjonijiet, jew b'settings prestabbiliti li jkunu diffiċli ħafna biex jinbidlu, u b'hekk jippreġudikaw b'mod mhux raġonevoli t-teħid ta' deċiżjonijiet tar-riċevitur tas-servizz, b'mod li jgħawweġ u jfixkel l-awtonomija, it-teħid ta' deċiżjonijiet u l-għażla tagħhom. Madankollu, jenħtieġ li r-regoli li jipprevjenu d-dark patterns ma jinftehmux bħala li jipprevjenu lill-fornituri milli jinteraġixxu direttament mar-riċevitur ta-servizz u joffrulhom servizzi ġodda jew addizzjonali. Il-prattiki leġittimi, pereżempju fir-reklamar, li jkunu konformi mal-liġi tal-Unjoni jenħtieġ li fihom infushom ma jitqisux bħala li jikkostitwixxu dark patterns. Dawk ir-regoli dwar id-dark patterns jenħtieġ li jiġu interpretati bħala li jkopru prattiki pprojbiti li jaqgħu fil-kamp ta' applikazzjoni ta' dan ir-Regolament sal-punt li dawk il-prattiki ma jkunux diġà koperti mid-Direttiva 2005/29/KE jew mir-Regolament (UE) 2016/679.

(68)

Ir-reklamar online għandu rwol importanti fl-ambjent online, inkluż b'rabta mal-forniment tal-pjattaformi online, fejn il-forniment tas-servizz kultant, kompletament jew parzjalment, jiġi rimunerat direttament jew indirettament, permezz tad-dħul mir-reklamar. Ir-reklamar online jista' jikkontribwixxi għal riskji sinifikanti, li jvarjaw minn reklami li jkunu fihom innifshom kontenut illegali, għal reklamar li jikkontribwixxi għal inċentivi finanzjarji għall-pubblikazzjoni jew għall-amplifikazzjoni ta' kontenut u attivitajiet online illegali jew dannużi b'mod ieħor, jew il-preżentazzjoni diskriminatorja ta' reklamar b'impatt fuq it-trattament u l-opportunitajiet indaqs taċ-ċittadini. Minbarra r-rekwiżiti li jirriżultaw mill-Artikolu 6 tad-Direttiva 2000/31/KE, jenħtieġ li l-fornituri ta’ pjattaformi online jiġu rikjesti li jiżguraw li r-riċevituri tas-servizz ikollhom ċerta informazzjoni individwalizzata meħtieġa biex jifhmu meta u f'isem min qed jiġi ppreżentat ir-reklam. Jenħtieġ li jiżguraw li l-informazzjoni tkun prominenti, inkluż permezz ta' marki viżivi jew awdjo standardizzati, identifikabbli b'mod ċar u mhux ambigwu għar-riċevitur medju tas-servizz, u jenħtieġ li tiġi adattata għan-natura tal-interfaċċa online tas-servizz individwali. Barra minn hekk, ir-riċevituri tas-servizz jenħtieġ li jkollhom informazzjoni direttament aċċessibbli mill-interfaċċa online fejn ir-reklam ikun ippreżentat, dwar il-parametri ewlenin użati biex jiġi determinat li reklam speċifiku huwa ppreżentat lilhom, filwaqt li jiġu pprovduti spjegazzjonijiet sinifikattivi tal-loġika użata għal dak il-għan, inkluż meta din tkun ibbażata fuq it-tfassil tal-profili.

Tali spjegazzjonijiet jenħtieġ li jinkludu informazzjoni dwar il-metodu użat għall-preżentazzjoni tar-reklam – pereżempju jekk huwiex kuntestwali jew tip ieħor ta' reklamar – u, fejn applikabbli, il-kriterji ewlenin tat-tfassil ta' profili użati; jenħtieġ li jinfurmaw ukoll lir-riċevitur dwar kwalunkwe mezz disponibbli għalih biex ibiddel tali kriterji. Ir-rekwiżiti ta' dan ir-Regolament dwar il-provvista ta' informazzjoni relatata mar-reklamar huma mingħajr preġudizzju għall-applikazzjoni tad-dispożizzjonijiet rilevanti tar-Regolament (UE) 2016/679, b'mod partikolari dawk li jirrigwardaw id-dritt ta' oġġezzjoni, it-teħid individwali awtomatizzat ta' deċiżjonijiet, inkluż it-tfassil ta' profili u speċifikament il-ħtieġa li jinkiseb kunsens tas-soġġett tad-data qabel l-ipproċessar tad-data personali għar-reklamar immirat. B'mod simili, dan ir-Regolament huwa mingħajr preġudizzju għad-dispożizzjonijiet stabbiliti fid-Direttiva 2002/58/KE b'mod partikolari dawk li jirrigwardaw il-ħżin tal-informazzjoni fit-tagħmir terminali u l-aċċess għall-informazzjoni maħżuna hemmhekk. Fl-aħħar nett, dan ir-Regolament jikkomplementa l-applikazzjoni tad-Direttiva 2010/13/UE li timponi miżuri li jippermettu lill-utenti jiddikjaraw komunikazzjonijiet kummerċjali awdjoviżivi f'filmati maħluqa mill-utenti. Jikkomplementa wkoll l-obbligi għall-kummerċjanti rigward id-divulgazzjoni ta' komunikazzjonijiet kummerċjali li jirriżultaw mid-Direttiva 2005/29/KE.

(69)

Meta r-riċevituri tas-servizz jiġu ppreżentati b'reklami bbażati fuq tekniki mmirati ottimizzati biex jaqblu mal-interessi tagħhom u potenzjalment jappellaw għall-vulnerabbiltajiet tagħhom, dan jista' jkollu effetti negattivi partikolarment serji. F'ċerti każijiet, it-tekniki manipulattivi jista' jkollhom impatt negattiv fuq gruppi sħaħ u jamplifikaw il-ħsara għas-soċjetà, pereżempju billi jikkontribwixxu għal kampanji ta' diżinformazzjoni jew billi jiddiskriminaw kontra ċerti gruppi. Il-pjattaformi online huma ambjenti partikolarment sensittivi għal prattiki bħal dawn u għandhom riskju ogħla għas-soċjetà. Konsegwentement, il-fornituri ta’ pjattaformi online jenħtieġ li ma jippreżentawx reklami bbażati fuq it-tfassil ta' profili kif definit fl-Artikolu 4, punt (4), tar-Regolament (UE) 2016/679, bl-użu ta' kategoriji speċjali ta' data personali imsemmija fl-Artikolu 9(1) ta’ dak ir-Regolament, inkluż bl-użu ta' kategoriji ta' tfassil ta' profili bbażati fuq dawk il-kategoriji speċjali. Din il-projbizzjoni hija mingħajr preġudizzju għall-obbligi applikabbli għall-fornituri ta’ pjattaformi online jew għal kwalunkwe fornitur ta' servizz jew reklamatur ieħor involut fid-disseminazzjoni tar-reklami skont il-liġi tal-Unjoni dwar il-protezzjoni tad-data personali.

(70)

Parti ewlenija tan-negozju tal-pjattaforma online hija l-mod li bih l-informazzjoni tiġi prijoritizzata u ppreżentata fuq l-interfaċċa online tagħha biex jiġi ffaċilitat u ottimizzat l-aċċess għall-informazzjoni għar-riċevituri tas-servizz. Dan isir, pereżempju, billi l-informazzjoni tiġi ssuġġerita, klassifikata u prijoritizzata b'mod algoritmiku, u ssir distinzjoni fit-test jew f'rappreżentazzjonijiet viżivi oħra, jew billi l-informazzjoni pprovduta mir-riċevituri tiġi organizzata b'xi mod ieħor. Tali sistemi ta' rakkomandazzjoni jista' jkollhom impatt sinifikanti fuq il-kapaċità tar-riċevituri li jiksbu informazzjoni u jinteraġixxu mal-informazzjoni online, inkluż biex jiffaċilitaw it-tiftix ta' informazzjoni rilevanti għar-riċevituri tas-servizz u jikkontribwixxu għal esperjenza mtejba tal-utent. Jaqdu wkoll rwol importanti fl-amplifikazzjoni ta' ċerti messaġġi, fid-disseminazzjoni virali tal-informazzjoni u fl-istimolu tal-imġiba online. Konsegwentement, jenħtieġ li l-pjattaformi online jiżguraw b'mod konsistenti li r-riċevituri tas-servizz tagħhom jiġu infurmati kif xieraq dwar kif is-sistemi ta' rakkomandazzjoni jkollhom impatt fuq il-mod kif tintwera l-informazzjoni, u jistgħu jinfluwenzaw kif l-informazzjoni tiġi ppreżentata lilhom. Jenħtieġ li jippreżentaw b'mod ċar il-parametri għat-tali sistemi ta' rakkomandazzjoni b'mod li jinftiehem faċilment biex jiżguraw li r-riċevituri tas-servizz jifhmu kif tiġi prijoritizzata l-informazzjoni għalihom. Dawk il-parametri jenħtieġ li jinkludu mill-inqas l-aktar kriterji importanti fid-determinazzjoni tal-informazzjoni ssuġġerita lir-riċevitur tas-servizz u r-raġunijiet għall-importanza rispettiva tagħhom, inkluż meta l-informazzjoni tingħata prijorità abbażi tat-tfassil ta' profili u l-imġiba online tagħhom.

(71)

Il-protezzjoni tal-minorenni hija objettiv ta' politika importanti tal-Unjoni. Pjattaforma online tista' titqies bħala aċċessibbli għall-minorenni meta t-termini u l-kondizzjonijiet tagħha jippermettu lill-minorenni jużaw is-servizz, meta s-servizz tagħha jkun dirett lejn il-minorenni jew jintuża b'mod predominanti minnhom, jew meta l-fornitur ikun konxju b'xi mod ieħor li wħud mir-riċevituri tas-servizz tiegħu jkunu minorenni, pereżempju minħabba li diġà jipproċessa data personali tar-riċevitur tas-servizz tiegħu li tiżvela l-età tagħhom għal skopijiet oħra. Il-fornituri ta’ pjattaformi online użati mill-minorenni jenħtieġ li jieħdu miżuri xierqa u proporzjonati biex jipproteġu lill-minorenni, pereżempju billi jiddiżinjaw l-interfaċċi online tagħhom jew partijiet minnhom bl-ogħla livell ta' privatezza, sikurezza u sigurtà għall-minorenni b'mod awtomatiku meta xieraq jew billi jadottaw standards għall-protezzjoni tal-minorenni, jew billi jipparteċipaw f'kodiċijiet ta' kondotta għall-protezzjoni tal-minorenni. Jenħtieġ li jikkunsidraw l-aħjar prattiki u l-gwida disponibbli, bħal dik ipprovduta mill-komunikazzjoni tal-Kummissjoni dwar Deċennju Diġitali għat-tfal u ż-żgħażagħ: l-istrateġija Ewropea l-ġdida għal internet aħjar għat-tfal (BIK+). Il-fornituri ta’ pjattaformi online jenħtieġ li ma jippreżentawx reklami bbażati fuq it-tfassil ta' profili bl-użu ta' data personali tar-riċevitur tas-servizz meta jkunu konxji b'ċertezza raġonevoli li r-riċevitur tas-servizz ikun minorenni. F'konformità mar-Regolament (UE) 2016/679, b'mod partikolari l-prinċipju tal-minimizzazzjoni tad-data kif previst fl-Artikolu 5(1), punt (c), tiegħu, jenħtieġ li din il-projbizzjoni ma twassalx lill-fornitur ta’ pjattaforma online biex iżomm, jakkwista jew jipproċessa aktar data personali milli diġà jkollu sabiex jivvaluta jekk ir-riċevitur tas-servizz huwiex minorenni. Għaldaqstant, dan l-obbligu jenħtieġ li ma jinċentivax lill-fornituri ta’ pjattaformi online biex jiġbru l-età tar-riċevitur tas-servizz qabel l-użu tagħhom. Jenħtieġ li jkun mingħajr preġudizzju għal-liġi tal-Unjoni dwar il-protezzjoni tad-data personali.

(72)

Biex jikkontribwixxu għal ambjent online sikur, affidabbli u trasparenti għall-konsumaturi, kif ukoll għal partijiet interessati oħra bħal pereżempju il-kummerċjanti kompetituri u d-detenturi tad-drittijiet ta' proprjetà intellettwali, u biex jiskoraġġixxu lill-kummerċjanti milli jbigħu prodotti jew servizzi bi ksur tar-regoli applikabbli, jenħtieġ li l-pjattaformi online li jippermettu lill-konsumaturi jikkonkludu kuntratti mill-bogħod ma’ kummerċjanti jiżguraw li tali kummerċjanti jkunu traċċabbli. Għalhekk jenħtieġ li l-kummerċjant jiġi rikjest li jipprovdi ċerta informazzjoni essenzjali lill-fornituri tal-pjattaformi online li jippermettu lill-konsumaturi jikkonkludu kuntratti mill-bogħod ma’ kummerċjanti, inkluż biex jippromwovu messaġġi dwar prodotti jew biex joffru prodotti. Jenħtieġ li dak ir-rekwiżit ikun applikabbli għall-kummerċjanti li jippromwovu messaġġi dwar prodotti jew servizzi f'isem id-ditti, abbażi ta' ftehimiet sottostanti. Jenħtieġ li dawk il-fornituri ta’ pjattaformi online jaħżnu l-informazzjoni kollha b'mod sigur għad-durata tar-relazzjoni kuntrattwali tagħhom mal-kummerċjant u 6 xhur wara dan, biex ikun jista' jitressaq kwalunkwe azzjoni kontra l-kummerċjant jew biex l-ordnijiet relatati mal-kummerċjant ikunu jistgħu jiġu rispettati.

Dan l-obbligu huwa meħtieġ u proporzjonat, biex l-informazzjoni tkun tista' tiġi aċċessata, f'konformità mal-liġi applikabbli, inkluż dwar il-protezzjoni tad-data personali, mill-awtoritajiet pubbliċi u mill-partijiet privati b'interess leġittimu, inkluż permezz tal-ordnijiet li tiġi pprovduta informazzjoni msemmijin f'dan ir-Regolament. Dan l-obbligu ma jaffettwax l-obbligi potenzjali biex ċertu kontenut jiġi ppreservat għal perjodi itwal ta' żmien, abbażi ta' liġijiet oħra tal-Unjoni jew nazzjonali, f'konformità mal-liġi tal-Unjoni. Mingħajr preġudizzju għad-definizzjoni prevista f'dan ir-Regolament, kwalunkwe kummerċjant, irrispettivament minn jekk huwiex persuna fiżika jew ġuridika, identifikat abbażi tal-Artikolu 6a(1), punt (b), tad-Direttiva 2011/83/UE u l-Artikolu 7(4), punt (f), tad-Direttiva 2005/29/KE jenħtieġ li jkun traċċabbli meta joffri prodott jew servizz permezz ta' pjattaforma online. Id-Direttiva 2000/31/KE tobbliga lill-fornituri kollha tas-servizzi tas-soċjetà tal-informazzjoni biex jagħmlu aċċessibbli b'mod faċli, dirett u permanenti għar-riċevituri tas-servizz u l-awtoritajiet kompetenti ċerta informazzjoni li tippermetti l-identifikazzjoni tal-fornituri kollha. Ir-rekwiżiti ta' traċċabbiltà għall-fornituri tal-pjattaformi online li jippermettu lill-konsumaturi jikkonkludu kuntratti mill-bogħod ma’ kummerċjanti stabbiliti f'dan ir-Regolament ma jaffettwawx l-applikazzjoni tad-Direttiva tal-Kunsill (UE) 2021/514 (30), li ssegwi objettivi leġittimi oħra ta' interess pubbliku.

(73)

Biex tiġi żgurata applikazzjoni effiċjenti u xierqa ta' dak l-obbligu, mingħajr ma jiġu imposti piżijiet sproporzjonati, jenħtieġ li l-fornituri ta’ pjattaformi online li jippermettu lill-konsumaturi jikkonkludu kuntratti mill-bogħod ma' kummerċjanti jagħmlu l-almu tagħhom biex jivvalutaw l-affidabbiltà tal-informazzjoni pprovduta mill-kummerċjanti kkonċernati, b'mod partikolari billi jużaw bażijiet tad-data online u interfaċċi online uffiċjali disponibbli b'mod liberu, bħal pereżempju r-reġistri kummerċjali nazzjonali u s-Sistema ta' Skambju ta' Informazzjoni dwar il-VAT, jew billi jitolbu lill-kummerċjanti kkonċernati jipprovdu dokumenti ġustifikattivi affidabbli, bħal kopji ta' dokumenti ta' identità, rendikonti tal-kontijiet ta' pagament iċċertifikati, ċertifikati tal-kumpanija u ċertifikati tar-reġistru kummerċjali. Jistgħu wkoll jużaw sorsi oħra, disponibbli għall-użu mill-bogħod, li joffru livell simili ta' affidabbiltà bl-iskop li jikkonformaw ma' dan l-obbligu. Madankollu, jenħtieġ li l-fornituri ta’ pjattaformi online kkonċernati ma jiġux rikjesti li jinvolvu ruħhom f'eżerċizzji online ta' tiftix tal-fatti eċċessivi jew għaljin jew li jwettqu verifiki sproporzjonati fuq il-post. Lanqas ma jenħtieġ li l-fornituri, li jkunu għamlu ħilithom kif rikjest minn dan ir-Regolament, jinftiehmu li qed jiggarantixxu l-affidabbiltà tal-informazzjoni lejn il-konsumaturi jew lejn partijiet interessati oħra.

(74)

Jenħtieġ ukoll li l-fornituri ta’ pjattaformi online li jippermettu lill-konsumaturi jikkonkludu kuntratti mill-bogħod ma' kummerċjanti jiddiżinjaw u jorganizzaw l-interfaċċa online tagħhom b'mod li jippermetti lill-kummerċjanti jikkonformaw mal-obbligi tagħhom skont il-liġi tal-Unjoni rilevanti, b'mod partikolari r-rekwiżiti stabbiliti fl-Artikoli 6 u 8 tad-Direttiva 2011/83/UE, fl-Artikolu 7 tad-Direttiva 2005/29/KE, fl-Artikoli 5 u 6 tad-Direttiva 2000/31/KE u fl-Artikolu 3 tad-Direttiva 98/6/KE tal-Parlament Ewropew u tal-Kunsill (31). Għal dak il-għan, il-fornituri ta’ pjattaformi online kkonċernati jenħtieġ li jagħmlu l-almu tagħhom biex jivvalutaw jekk il-kummerċjanti li jużaw is-servizzi tagħhom tellgħux l-informazzjoni kompleta fuq l-interfaċċi online tagħhom, f'konformità mal-liġi tal-Unjoni applikabbli rilevanti. Il-fornituri ta’ pjattaformi online jenħtieġ li jiżguraw li l-prodotti jew is-servizzi ma jiġux offruti sakemm tali informazzjoni ma tkunx kompleta. Dan jenħtieġ li ma jikkostitwix obbligu għall-fornituri ta’pjattaformi online kkonċernati li jimmonitorjaw b'mod ġenerali l-prodotti jew is-servizzi offruti mill-kummerċjanti permezz tas-servizzi tagħhom u lanqas obbligu ġenerali ta' ġbir ta' informazzjoni, b'mod partikolari biex jivvalutaw l-eżattezza tal-informazzjoni pprovduta mill-kummerċjanti. L-interfaċċi online jenħtieġ li jkunu faċli għall-utent u aċċessibbli faċilment għall-kummerċjanti u l-konsumaturi. Barra minn hekk, u wara li jippermettu l-offerta tal-prodott jew tas-servizz mill-kummerċjant, il-fornituri ta’ pjattaformi online kkonċernati jenħtieġ li jagħmlu sforzi raġonevoli biex jivverifikaw b'mod aleatorju jekk il-prodotti jew is-servizzi offruti ġewx identifikati bħala illegali fi kwalunkwe bażi tad-data online jew interfaċċa online uffiċjali, aċċessibbli mingħajr ħlas u li tinqara minn magna disponibbli fi Stat Membru jew fl-Unjoni. Jenħtieġ li l-Kummissjoni tħeġġeġ ukoll it-traċċabbiltà tal-prodotti permezz ta' soluzzjonijiet teknoloġiċi bħal kodiċijiet ta' Rispons Rapidu ffirmati diġitalment (jew "kodiċijiet QR") jew tokens mhux funġibbli. Jenħtieġ li l-Kummissjoni tippromwovi l-iżvilupp ta' standards u, fin-nuqqas tagħhom, ta' soluzzjonijiet immexxija mis-suq li jistgħu jkunu aċċettabbli għall-partijiet ikkonċernati.

(75)

Minħabba l-importanza tal-pjattaformi online kbar ħafna, dovuta għall-ilħuq tagħhom, b'mod partikolari espress fl-għadd ta' riċevituri tas-servizz, fil-faċilitazzjoni tad-dibattitu pubbliku, tat-tranżazzjonijiet ekonomiċi u tad-disseminazzjoni lill-pubbliku ta' informazzjoni, opinjonijiet u ideat u minħabba li jinfluwenzaw il-mod ta' kif ir-riċevituri jiksbu u jikkomunikaw l-informazzjoni online, huwa meħtieġ li jiġu imposti obbligi speċifiċi fuq il-fornituri ta' dawk il-pjattaformi, minbarra l-obbligi applikabbli għall-pjattaformi online kollha. Minħabba r-rwol kritiku tagħhom fil-lokalizzazzjoni u fl-irkupru tal-informazzjoni online, huwa meħtieġ ukoll li dawk l-obbligi jiġu imposti, sa fejn dawn ikunu applikabbli, fuq il-fornituri tal-magni tat-tiftix online kbar ħafna. Dawk l-obbligi addizzjonali fuq il-fornituri ta’ pjattaformi online kbar ħafna u tal-magni tat-tiftix online kbar ħafna huma meħtieġa biex jiġi indirizzat dak it-tħassib tal-politika pubblika, peress li ma jeżistu l-ebda miżuri alternattivi u inqas restrittivi li jistgħu jiksbu l-istess riżultat b'mod effettiv.

(76)

Il-pjattaformi online kbar ħafna u l-magni tat-tiftix online kbar ħafna jistgħu jikkawżaw riskji soċjetali, differenti fl-ambitu u fl-impatt tagħhom minn dawk ikkawżati minn pjattaformi iżgħar. Għalhekk, il-fornituri ta' tali pjattaformi online kbar ħafna u ta’ magni tat-tiftix online kbar ħafna jenħtieġ li jkollhom l-ogħla standard ta' obbligi ta' diliġenza dovuta, b'mod proporzjonat għall-impatt soċjetali tagħhom. Ladarba l-għadd ta' riċevituri attivi ta' pjattaforma jew ta' riċevituri attivi ta’ magna tat-tiftix online, ikkalkulat bħala medja fuq perjodu ta' sitt xhur, jilħaq sehem sinifikanti tal-popolazzjoni tal-Unjoni, ir-riskji sistemiċi li toħloq il-pjattaforma online jew il-magna tat-tiftix online jista' jkollhom impatt sproporzjonat fl-Unjoni. Tali ilħuq sinifikanti jenħtieġ li jitqies li jeżisti meta tali għadd jaqbeż livell limitu operattiv stabbilit għal 45 miljun, jiġifieri, numru ekwivalenti għal 10 % tal-popolazzjoni tal-Unjoni. Dan il-livell limitu operattiv jenħtieġ li jinżamm aġġornat u għalhekk il-Kummissjoni jenħtieġ li tingħata s-setgħa li tissupplimenta d-dispożizzjonijiet f’dan ir-Regolament billi tadotta atti delegati, fejn meħtieġ.

(77)

Sabiex jiġi ddeterminat l-ilħuq ta' pjattaforma online jew magna tat-tiftix online partikolari, jeħtieġ li jiġi stabbilit l-għadd medju ta' riċevituri attivi ta' kull servizz b'mod individwali. Għaldaqstant, l-għadd ta' riċevituri medji fix-xahar ta' pjattaforma online jenħtieġ li jirrifletti r-riċevituri kollha li fil-fatt jużaw is-servizz mill-inqas darba f'perjodu ta' żmien partikolari, billi jkunu esposti għal informazzjoni disseminata fuq l-interfaċċa tal-pjattaforma online, bħal li jarawha jew jisimgħuha jew billi jipprovdu informazzjoni, bħall-kummerċjanti f'pjattaformi online li jippermettu lill-konsumaturi jikkonkludi kuntratti ma’ kummerċjanti.

Għall-finijiet ta' dan ir-Regolament, l-involviment mhuwiex limitat għall-interazzjoni mal-informazzjoni billi wieħed jikklikkja fuq, jikkummenta, jillinkja, jikkondividi, jixtri jew iwettaq tranżazzjonijiet fuq pjattaforma online. Konsegwentement, il-kunċett ta' riċevitur attiv tas-servizz mhux neċessarjament jikkoinċidi ma' dak ta' utent irreġistrat ta' servizz. Fir-rigward tal-magni tat-tiftix online, il-kunċett ta' riċevituri attivi tas-servizz jenħtieġ li jkopri lil dawk li jaraw l-informazzjoni fl-interfaċċa online tagħhom, iżda mhux, pereżempju, is-sidien tas-siti web indiċjati minn magna tat-tiftix online, peress li dawn ma jinvolvux ruħhom b'mod attiv mas-servizz. L-għadd ta' riċevituri attivi ta' servizz jenħtieġ li jinkludi r-riċevituri uniċi kollha tas-servizz li jużaw is-servizz speċifiku. Għal dan il-għan, riċevitur tas-servizz li juża interfaċċi online differenti, bħal siti web jew applikazzjonijiet, inkluż meta s-servizzi jiġu aċċessati permezz ta' lokalizzaturi uniformi tar-riżorsi (URLs) jew ismijiet ta' dominji differenti, jenħtieġ li, fejn possibbli, jingħadd darba biss. Madankollu, il-kunċett ta' riċevitur attiv tas-servizz jenħtieġ li ma jinkludix l-użu inċidentali tas-servizz minn riċevituri ta' fornituri ta’ servizzi intermedjarji online oħra li indirettament jagħmlu disponibbli informazzjoni ospitata mill-fornitur ta’ pjattaforma online permezz ta' llinkjar jew indiċjar minn fornitur ta' magna tat-tiftix online. Barra minn hekk, dan ir-Regolament ma jirrikjedix li l-fornituri ta’ pjattaformi online jew tal-magni tat-tiftix online jwettqu traċċar speċifiku ta' individwi online. Fejn tali fornituri jkunu jistgħu jeskludu lill-utenti awtomatizzati bħall-bots jew l-iscrapers mingħajr ipproċessar ulterjuri tad-data personali u traċċar, jistgħu jagħmlu dan. Id-determinazzjoni tal-għadd ta' riċevituri tas-servizz attivi tista' tiġi influwenzata minn żviluppi tas-suq u tekniċi u għalhekk il-Kummissjoni jenħtieġ li tingħata s-setgħa li tissupplementa d-dispożizzjonijiet ta' dan ir-Regolament billi tadotta atti delegati li jistabbilixxu l-metodoloġija biex jiġu ddeterminati r-riċevituri attivi ta' pjattaforma online jew magna tat-tiftix online, fejn meħtieġ, li tirrifletti n-natura tas-servizz u l-mod kif ir-riċevituri tas-servizz jinteraġixxu miegħu.

(78)

Fid-dawl tal-effetti tan-network li jikkaratterizzaw l-ekonomija tal-pjattaformi, il-bażi tal-utenti ta' pjattaforma online jew ta’ magna ta’ tiftix online tista' tespandi malajr u tilħaq id-dimensjoni ta' pjattaforma online kbira ħafna jew magna ta’ tiftix online kbira ħafna, bl-impatt relatat fuq is-suq intern. Dan jista' jseħħ fil-każ ta' tkabbir esponenzjali li jiġi esperjenzat f'perjodi qosra ta' żmien, jew minn preżenza u fatturat dinjija kbar li jippermettu lill-pjattaforma online jew lill-magna ta’ tiftix online tisfrutta bis-sħiħ l-effetti tan-network u l-ekonomiji ta' skala u ta' firxa. Fatturat annwali għoli jew kapitalizzazzjoni tas-suq jistgħu, b'mod partikolari, ikunu indikazzjoni ta' skalabbiltà rapida f'termini ta' lħuq tal-utenti. F'dawk il-każijiet, jenħtieġ li l-Koordinatur tas-Servizzi Diġitali tal-istabbiliment jew il-Kummissjoni jkunu jistgħu jitolbu rappurtar aktar frekwenti mill-fornitur tal-pjattaforma online jew tal-magna ta’ tiftix online dwar l-għadd ta' riċevituri attivi tas-servizz biex ikunu jistgħu jidentifikaw fil-ħin il-mument meta l-pjattaforma jew dik il-magna ta’ tiftix jenħtieġ li tiġi ddeżinjata bħala pjattaforma online kbira ħafna jew magna ta’ tiftix online kbira ħafna, rispettivament, għall-finijiet ta' dan ir-Regolament.

(79)

Pjattaformi online kbar ħafna u magni tat-tiftix online kbar ħafna jistgħu jintużaw b'mod li jinfluwenza b'mod qawwi s-sikurezza online, l-iffurmar tal-opinjoni u tad-diskors pubbliċi, kif ukoll il-kummerċ online. Il-mod kif ifasslu s-servizzi tagħhom ġeneralment jiġi ottimizzat biex jibbenefika l-mudelli kummerċjali tagħhom li ta' spiss huma xprunati mir-reklamar u li dan jista' jikkawża tħassib soċjetali. Regolamentazzjoni u infurzar effettivi huma meħtieġa sabiex jidentifikaw u jimmitigaw b'mod effettiv ir-riskji u d-dannu soċjetali u ekonomiku li jistgħu jinħolqu. Għalhekk, skont dan ir-Regolament, il-fornituri ta’ pjattaformi online kbar ħafna u tal-magni tat-tiftix online kbar ħafna jenħtieġ li jivvalutaw ir-riskji sistemiċi li jirriżultaw mid-diżinn, mill-funzjonament u mill-użu tas-servizz tagħhom, kif ukoll mill-użu ħażin potenzjali tar-riċevituri tas-servizz, u jenħtieġ li jieħdu miżuri ta' mitigazzjoni xierqa b'rispett tad-drittijiet tal-bniedem. Fid-determinazzjoni tas-sinifikat tal-effetti u l-impatti negattivi potenzjali, il-fornituri jenħtieġ li jikkunsidraw is-severità tal-impatt potenzjali u l-probabbiltà ta' tali riskji sistemiċi kollha. Pereżempju, jistgħu jivvalutaw jekk l-impatt negattiv potenzjali jistax jaffettwa għadd kbir ta' persuni, l-irriversibbiltà potenzjali tiegħu, jew kemm huwa diffiċli li tiġi rimedjata u restawrata s-sitwazzjoni prevalenti qabel l-impatt potenzjali.

(80)

Jenħtieġ li jiġu vvalutati fil-fond erba' kategoriji ta' riskji sistemiċi mill-fornituri ta’ pjattaformi online kbar ħafna u ta’ magni tat-tiftix online kbar ħafna. Kategorija waħda tikkonċerna r-riskji assoċjati mad-disseminazzjoni ta' kontenut illegali, bħal pereżempju d-disseminazzjoni ta' materjal ta' abbuż sesswali tat-tfal jew diskors ta' mibegħda illegali jew tipi oħra ta' użu ħażin tas-servizzi tagħhom għal reati kriminali, u permezz tat-twettiq ta' attivitajiet illegali, bħal pereżempju l-bejgħ ta' prodotti jew ta' servizzi projbiti mil-liġi tal-Unjoni jew mil-liġi nazzjonali, inkluż il-prodotti perikolużi jew kontrafatti, jew il-kummerċ illegali tal-annimali. Pereżempju, tali disseminazzjoni jew attivitajiet jistgħu jikkostitwixxu riskju sistemiku sinifikanti fejn l-aċċess għal kontenut illegali jista' jinfirex malajr u b'mod wiesa' permezz ta' kontijiet bi lħuq partikolarment wiesa' jew mezzi oħra ta' amplifikazzjoni. Il-fornituri ta’ pjattaformi online kbar ħafna u ta’ magni tat-tiftix online kbar ħafna jenħtieġ li jivvalutaw ir-riskju tad-disseminazzjoni ta' kontenut illegali irrispettivament minn jekk l-informazzjoni hijiex ukoll inkompatibbli mat-termini u l-kondizzjonijiet tagħhom. Din il-valutazzjoni hija mingħajr preġudizzju għar-responsabbiltà personali tar-riċevitur tas-servizz ta' pjattaformi online kbar ħafna jew tas-sidien ta' siti web indiċjati minn magni tat-tiftix online kbar ħafna għall-illegalità possibbli tal-attività tagħhom skont il-liġi applikabbli.

(81)

It-tieni kategorija tikkonċerna l-impatt reali jew prevedibbli tas-servizz fuq l-eżerċizzju tad-drittijiet fundamentali, kif protetti mill-Karta, inkluż iżda mhux limitat għal, id-dinjità tal-bniedem, il-libertà tal-espressjoni u tal-informazzjoni, inkluż il-libertà u l-pluraliżmu tal-midja, id-dritt għal ħajja privata, il-protezzjoni tad-data, id-dritt ta' nondiskriminazzjoni, id-drittijiet tat-tfal u l-protezzjoni tal-konsumatur. Tali riskji jistgħu jinħolqu, pereżempju, b'rabta mat-tfassil tas-sistemi algoritmiċi użati mill-pjattaforma online kbira ħafna jew mill-magna tat-tiftix online kbira ħafna jew l-użu ħażin tas-servizz tagħhom permezz tas-sottomissjoni ta' avviżi abbużivi jew metodi oħra biex jitwaqqaf id-diskors jew biex tiġi ostakolata l-kompetizzjoni. Meta jivvalutaw ir-riskji għad-drittijiet tat-tfal, il-fornituri ta’ pjattaformi online kbar ħafna u ta’ magni tat-tiftix online kbar ħafna jenħtieġ li jikkunsidraw, pereżempju, kemm huwa faċli għall-minorenni li jifhmu d-diżinn u l-funzjonament tas-servizz, kif ukoll kif il-minorenni jistgħu jiġu esposti permezz tas-servizz tagħhom għal kontenut li jista' jfixkel l-iżvilupp tas-saħħa, fiżiku, mentali u morali tal-minorenni. Tali riskji jistgħu jinħolqu, pereżempju, b'rabta mad-diżinn ta' interfaċċi online li intenzjonalment jew mhux intenzjonalment jisfruttaw id-dgħufijiet u l-inesperjenza tal-minorenni jew li jistgħu jikkawżaw imġiba ta' dipendenza.

(82)

It-tielet kategorija ta' riskji tikkonċerna l-effetti negattivi reali jew prevedibbli fuq il-proċessi demokratiċi, id-diskors ċiviku u l-proċessi elettorali, kif ukoll fuq is-sigurtà pubblika.

(83)

Ir-raba' kategorija ta' riskji toriġina minn tħassib simili relatat mad-diżinn, il-funzjonament jew l-użu, inkluż permezz tal-manipulazzjoni, ta’ pjattaformi online kbar ħafna jew ta’ magni tat-tiftix online kbar ħafna, b'effett negattiv reali jew prevedibbli fuq il-protezzjoni tas-saħħa pubblika, il-minorenni u konsegwenzi negattivi serji għall-benesseri fiżiku u mentali tal-persuna, jew fuq il-vjolenza abbażi tal-ġeneru. Tali riskji jistgħu joriġinaw ukoll minn kampanji koordinati ta' diżinformazzjoni relatati mas-saħħa pubblika, jew minn diżinn tal-interfaċċa online li jista' jistimula dipendenzi komportamentali tar-riċevituri tas-servizz.

(84)

Meta jivvalutaw tali riskji sistemiċi, il-fornituri ta’ pjattaformi online kbar ħafna u ta’ magni tat-tiftix kbar online ħafna jenħtieġ li jiffukaw fuq is-sistemi jew elementi oħra li jistgħu jikkontribwixxu għar-riskji, inklużi s-sistemi algoritmiċi kollha li jistgħu jkunu rilevanti, b'mod partikolari s-sistemi ta' rakkomandazzjoni u s-sistemi ta' reklamar tagħhom, filwaqt li jagħtu attenzjoni lill-prattiki relatati tal-ġbir u l-użu tad-data. Jenħtieġ li jivvalutaw ukoll jekk it-termini u l-kondizzjonijiet tagħhom u l-infurzar tagħhom humiex xierqa, kif ukoll il-proċessi ta' moderazzjoni tal-kontenut, l-għodod tekniċi u r-riżorsi allokati tagħhom. Meta jivvalutaw ir-riskji sistemiċi identifikati f'dan ir-Regolament, dawk il-fornituri jenħtieġ li jiffukaw ukoll fuq l-informazzjoni li mhijiex illegali, iżda li tikkontribwixxi għar-riskji sistemiċi identifikati f'dan ir-Regolament. Għalhekk, tali fornituri jenħtieġ li jagħtu attenzjoni partikolari lil kif is-servizzi tagħhom jintużaw biex jiddisseminaw jew jamplifikaw kontenut li jiżgwida jew qarrieqi, inkluża d-diżinformazzjoni. Fejn l-amplifikazzjoni algoritmika tal-informazzjoni tikkontribwixxi għar-riskji sistemiċi, jenħtieġ li dawk il-fornituri jirriflettu dan kif xieraq fil-valutazzjonijiet tar-riskju tagħhom. Fejn ir-riskji jiġu lokalizzati jew ikun hemm differenzi lingwistiċi, il-fornituri jenħtieġ li jqisu dan ukoll fil-valutazzjonijiet tar-riskju tagħhom. Il-fornituri ta’ pjattaformi online kbar ħafna u ta’ magni tat-tiftix online kbar ħafna jenħtieġ li, b'mod partikolari, jivvalutaw kif id-diżinn u l-funzjonament tas-servizz tagħhom, kif ukoll il-manipulazzjoni u l-użu intenzjonali u, ħafna drabi, ikkoordinati tas-servizzi tagħhom, jew il-ksur sistemiku tat-termini tas-servizz tagħhom, jikkontribwixxu għal tali riskji. Tali riskji jistgħu jinħolqu, pereżempju, permezz tal-użu mhux awtentiku tas-servizz, bħall-ħolqien ta' kontijiet foloz, l-użu ta' bots jew l-użu qarrieqi ta' servizz, u mġiba awtomatika jew parzjalment awtomatika oħra, li jistgħu jwasslu għad-disseminazzjoni rapida u mifruxa ta' informazzjoni lill-pubbliku li hija kontenut illegali jew inkompatibbli mat-termini u l-kondizzjonijiet ta' pjattaforma online jew ta' magna tat-tiftix online u li tikkontribwixxi għal kampanji ta' diżinformazzjoni.

(85)

Sabiex ikun possibbli li l-valutazzjonijiet tar-riskju sussegwenti jibnu fuq xulxin u juru l-evoluzzjoni tar-riskji identifikati, kif ukoll biex jiġu ffaċilitati l-investigazzjonijiet u l-azzjonijiet ta' infurzar, il-fornituri ta’ pjattaformi online kbar ħafna u ta’ magni tat-tiftix online kbar ħafna jenħtieġ li jippreservaw id-dokumenti ġustifikattivi kollha relatati mal-valutazzjonijiet tar-riskju li wettqu, bħall-informazzjoni dwar it-tħejjija tagħhom, id-data sottostanti u d-data dwar l-ittestjar tas-sistemi algoritmiċi tagħhom.

(86)

Il-fornituri ta’ pjattaformi online kbar ħafna u tal-magni tat-tiftix online kbar ħafna jenħtieġ li jużaw il-mezzi meħtieġa biex jimmitigaw b'mod diliġenti r-riskji sistemiċi identifikati fil-valutazzjonijiet tar-riskji, b'rispett tad-drittijiet fundamentali. Kwalunkwe miżura adottata jenħtieġ li tirrispetta r-rekwiżiti ta' diliġenza dovuta ta' dan ir-Regolament u tkun raġonevoli u effettiva fil-mitigazzjoni tar-riskji sistemiċi speċifiċi identifikati. Jenħtieġ li tkun proporzjonata fid-dawl tal-kapaċità ekonomika tal-fornitur tal-pjattaforma online kbira ħafna jew tal-magna tat-tiftix online kbira ħafna u tal-ħtieġa li jiġu evitati restrizzjonijiet bla bżonn fuq l-użu tas-servizz tagħhom, filwaqt li tqis kif xieraq l-effetti negattivi potenzjali fuq dawk id-drittijiet fundamentali. Jenħtieġ li dawk il-fornituri jagħtu kunsiderazzjoni partikolari lill-impatt fuq il-libertà tal-espressjoni.

(87)

Għal dawn il-miżuri ta' mitigazzjoni, il-fornituri ta’ pjattaformi online kbar ħafna u tal-magni tat-tiftix online kbar ħafna jenħtieġ li jqisu, pereżempju, l-adattament ta' kwalunkwe diżinn, karatteristika jew funzjonament tas-servizz tagħhom, bħad-diżinn tal-interfaċċa online. Jenħtieġ li jadattaw u japplikaw it-termini u l-kondizzjonijiet tagħhom, kif meħtieġ, u f'konformità mar-regoli ta' dan ir-Regolament dwar it-termini u l-kondizzjonijiet. Miżuri xierqa oħra jistgħu jinkludu l-adattament tas-sistemi tal-moderazzjoni tal-kontenut u l-proċessi interni tagħhom jew l-adattament tal-proċessi u r-riżorsi tat-teħid tad-deċiżjonijiet tagħhom, inkluż il-persunal tal-moderazzjoni tal-kontenut, it-taħriġ u l-għarfien espert lokali tagħhom. Dan jikkonċerna b'mod partikolari l-ħeffa u l-kwalità tal-ipproċessar tal-avviżi. F'dan ir-rigward, pereżempju, il-Kodiċi ta' Kondotta dwar il-ġlieda kontra d-diskors ta' mibegħda online illegali tal-2016 jistabbilixxi parametru referenzjarju għall-ipproċessar ta' notifiki validi għat-tneħħija ta' diskors ta' mibegħda illegali f'inqas minn 24 siegħa. Il-fornituri ta’ pjattaformi online kbar ħafna, b'mod partikolari dawk użati primarjament għad-disseminazzjoni lill-pubbliku ta' kontenut pornografiku, jenħtieġ li jissodisfaw b'mod diliġenti l-obbligi kollha tagħhom skont dan ir-Regolament fir-rigward ta' kontenut illegali li jikkostitwixxi vjolenza ċibernetika, inkluż kontenut pornografiku illegali, speċjalment fir-rigward tal-iżgurar li l-vittmi jkunu jistgħu jeżerċitaw id-drittijiet tagħhom b'mod effettiv fir-rigward ta' kontenut li jirrappreżenta kondiviżjoni mhux kunsenswali ta' materjal intimu jew manipulat permezz tal-ipproċessar rapidu ta' avviżi u t-tneħħija ta' tali kontenut mingħajr dewmien żejjed. Tipi oħra ta' kontenut illegali jistgħu jirrikjedu perjodi ta' żmien itwal jew iqsar għall-ipproċessar tal-avviżi, li jiddependu mill-fatti, iċ-ċirkostanzi u t-tipi ta' kontenut illegali inkwistjoni. Dawk il-fornituri jistgħu wkoll jibdew jew iżidu l-kooperazzjoni mas-sinjalaturi fdati u jorganizzaw sessjonijiet ta' taħriġ u skambji mal-organizzazzjonijiet tas-sinjalaturi fdati.

(88)

Il-fornituri ta' pjattaformi online kbar ħafna u ta' magni tat-tiftix online kbar ħafna jenħtieġ li jkunu wkoll diliġenti fil-miżuri li jieħdu biex jittestjaw u, fejn meħtieġ, jadattaw is-sistemi algoritmiċi tagħhom, mhux l-inqas is-sistemi ta' rakkomandazzjoni tagħhom. Jista' jkun li jkollhom bżonn jimmitigaw l-effetti negattivi tar-rakkomandazzjonijiet personalizzati u jikkoreġu l-kriterji użati fir-rakkomandazzjonijiet tagħhom. Is-sistemi tar-reklamar użati mill-fornituri ta' pjattaformi online kbar ħafna u ta' magni tat-tiftix online kbar ħafna jistgħu jkunu wkoll katalizzatur għar-riskji sistemiċi. Dawk il-fornituri jenħtieġ li jqisu miżuri korrettivi, bħal pereżempju d-diskontinwità tad-dħul mir-reklamar għal informazzjoni speċifika, jew azzjonijiet oħrajn, bħat-titjib tal-viżibbiltà tas-sorsi ta' informazzjoni awtorevoli, jew l-adattament aktar strutturali tas-sistemi ta' reklamar tagħhom. Il-fornituri ta' pjattaformi online kbar ħafna u ta' magni tat-tiftix online kbar ħafna jista' jkollhom bżonn isaħħu l-proċessi interni tagħhom jew is-superviżjoni ta' xi waħda mill-attivitajiet tagħhom, b'mod partikolari fir-rigward tad-detezzjoni ta' riskji sistemiċi, u jwettqu valutazzjonijiet tar-riskju aktar frekwenti jew immirati relatati ma' funzjonalitajiet ġodda. B'mod partikolari, meta r-riskji jiġu kondiviżi bejn pjattaformi online jew magni tat-tiftix online differenti, jenħtieġ li huma jikkooperaw ma' fornituri tas-servizzi oħrajn, inkluż billi jibdew jew jingħaqdu mal-kodiċijiet ta' kondotta eżistenti jew miżuri awtoregolatorji oħra. Jenħtieġ li jikkunsidraw ukoll azzjonijiet ta' sensibilizzazzjoni, b'mod partikolari meta r-riskji jkunu relatati ma' kampanji ta' diżinformazzjoni.

(89)

Il-fornituri ta' pjattaformi online kbar ħafna u ta' magni tat-tiftix online kbar ħafna jenħtieġ li jqisu l-aħjar interessi tal-minorenni fit-teħid ta' miżuri bħall-adattament tat-tfassil tas-servizz tagħhom u tal-interfaċċa online tagħhom, speċjalment meta s-servizzi tagħhom ikunu mmirati lejn il-minorenni jew użati l-aktar minnhom. Huma jenħtieġ li jiżguraw li s-servizzi tagħhom ikunu organizzati b'mod li jippermetti lill-minorenni jaċċessaw faċilment il-mekkaniżmi previsti f'dan ir-Regolament, fejn applikabbli, inklużi mekkaniżmi ta' avviż u azzjoni u ta' lment. Huma jenħtieġ li jieħdu wkoll miżuri biex jipproteġu lill-minorenni minn kontenut li jista' jfixkel l-iżvilupp fiżiku, mentali jew morali tagħhom u jipprovdu għodod li jippermettu aċċess kundizzjonali għal tali informazzjoni. Fl-għażla tal-miżuri ta' mitigazzjoni xierqa, il-fornituri jistgħu jikkunsidraw, fejn xieraq, l-aħjar prattiki tal-industrija, inkluż kif stabbilit permezz ta' kooperazzjoni awtoregolatorja, bħal kodiċijiet ta' kondotta, u jenħtieġ li jqisu l-linji gwida mill-Kummissjoni.

(90)

Il-fornituri ta' pjattaformi online kbar ħafna u ta' magni tat-tiftix online kbar ħafna jenħtieġ li jiżguraw li l-approċċ tagħhom għall-valutazzjoni u l-mitigazzjoni tar-riskju jkun ibbażat fuq l-aħjar informazzjoni u għarfien xjentifiku disponibbli u li jittestjaw is-suppożizzjonijiet tagħhom mal-gruppi l-aktar milquta mir-riskji u l-miżuri li jieħdu. Għal dan il-għan, jenħtieġ li huma jwettqu l-valutazzjonijiet tar-riskji tagħhom u jfasslu l-miżuri ta' mitigazzjoni tar-riskji tagħhom bl-involviment tar-rappreżentanti tar-riċevituri tas-servizz, tar-rappreżentanti tal-gruppi potenzjalment milquta mis-servizzi tagħhom, ta' esperti indipendenti u ta' organizzazzjonijiet tas-soċjetà ċivili. Jenħtieġ li huma jfittxu li jinkorporaw tali konsultazzjonijiet fil-metodoloġiji tagħhom għall-valutazzjoni tar-riskji u għat-tfassil ta' miżuri ta' mitigazzjoni, inklużi, kif xieraq, stħarriġ, gruppi fokali, diskussjonijiet madwar mejda, u metodi oħra ta' konsultazzjoni u disinn. Fil-valutazzjoni dwar jekk miżura hijiex raġonevoli, proporzjonata u effettiva, jenħtieġ li tingħata kunsiderazzjoni speċjali lid-dritt għal-libertà tal-espressjoni.

(91)

Fi żminijiet ta' kriżi, jista' jkun hemm il-ħtieġa li jittieħdu ċerti miżuri speċifiċi b'mod urġenti mill-fornituri ta' pjattaformi online kbar ħafna, minbarra l-miżuri li jkunu qed jieħdu fid-dawl tal-obbligi l-oħra tagħhom skont dan ir-Regolament. F'dak ir-rigward, jenħtieġ li kriżi titqies li sseħħ meta jseħħu ċirkostanzi straordinarji li jistgħu jwasslu għal theddida serja għas-sigurtà pubblika jew għas-saħħa pubblika fl-Unjoni jew f'partijiet sinifikanti minnha. Kriżijiet bħal dawn jistgħu jirriżultaw minn kunflitti armati jew atti ta' terroriżmu, inklużi kunflitti emerġenti jew atti ta' terroriżmu, diżastri naturali bħal terremoti u uragani, kif ukoll minn pandemiji u theddid transfruntier serju ieħor għas-saħħa pubblika. Il-Kummissjoni jenħtieġ li tkun tista' titlob, fuq rakkomandazzjoni mill-Bord Ewropew għas-Servizzi Diġitali (il-Bord), il-fornituri ta’ pjattaformi online kbar ħafna u ta’ magni tat-tiftix online kbar ħafna jniedu rispons għall-kriżijiet bħala kwistjoni ta' urġenza. Il-miżuri li dawk il-fornituri jistgħu jidentifikaw u jikkunsidraw li japplikaw jistgħu jinkludu, pereżempju, l-adattament tal-proċessi ta' moderazzjoni tal-kontenut u ż-żieda tar-riżorsi ddedikati għall-moderazzjoni tal-kontenut, l-adattament tat-termini u l-kondizzjonijiet, is-sistemi algoritmiċi rilevanti u s-sistemi ta' reklamar, l-intensifikazzjoni ulterjuri tal-kooperazzjoni ma' sinjalaturi fdati, it-teħid ta' miżuri ta' sensibilizzazzjoni u l-promozzjoni ta' informazzjoni affidabbli u l-adattament tad-disinn tal-interfaċċi online tagħhom. Jenħtieġ li jiġu previsti r-rekwiżiti meħtieġa biex jiġi żgurat li tali miżuri jittieħdu f'perjodu ta' żmien qasir ħafna u li l-mekkaniżmu ta' rispons għall-kriżijiet jintuża biss meta, u sal-punt li, dan ikun strettament meħtieġ u kwalunkwe miżura meħuda fl-ambitu ta' dan il-mekkaniżmu tkun effettiva u proporzjonata, filwaqt li jitqiesu d-drittijiet u l-interessi leġittimi tal-partijiet ikkonċernati kollha. L-użu tal-mekkaniżmu jenħtieġ li jkun mingħajr preġudizzju għad-dispożizzjonijiet l-oħra ta' dan ir-Regolament, bħal dawk dwar il-valutazzjonijiet tar-riskju u l-miżuri ta' mitigazzjoni u l-infurzar tagħhom u dawk dwar il-protokolli ta' kriżi.

(92)

Minħabba l-ħtieġa li tiġi żgurata l-verifika minn esperti indipendenti, jenħtieġ li l-fornituri ta' pjattaformi online kbar ħafna u ta' magni tat-tiftix online kbar ħafna jkunu akkontabbli, permezz ta' awditjar indipendenti, għall-konformità mal-obbligi stabbiliti f'dan ir-Regolament u, fejn rilevanti, ma' kwalunkwe impenn komplementari meħud skont il-kodiċijiet ta' kondotta u l-protokolli ta' kriżi. Sabiex jiġi żgurat li l-awditi jitwettqu b'mod effettiv, effiċjenti u f'waqtu, il-fornituri ta' pjattaformi online kbar ħafna u ta' magni tat-tiftix online kbar ħafna jenħtieġ li jipprovdu l-kooperazzjoni u l-assistenza meħtieġa lill-organizzazzjonijiet li jwettqu l-awditi, inkluż billi jagħtu aċċess lill-awditur għall-bini u għad-data rilevanti kollha meħtieġa għat-twettiq tal-awditu kif suppost, inkluż, fejn xieraq, għal data relatata ma' sistemi algoritmiċi, u billi jwieġbu mistoqsijiet orali jew bil-miktub. Jenħtieġ ukoll li l-awdituri jkunu jistgħu jużaw sorsi oħrajn ta' informazzjoni oġġettiva, inklużi studji minn riċerkaturi verifikati. Jenħtieġ li l-fornituri ta' pjattaformi online kbar ħafna u ta' magni tat-tiftix online kbar ħafna ma jdgħajfux il-prestazzjoni tal-awditu. Jenħtieġ li l-awditi jitwettqu skont l-aħjar prattiki tal-industrija u b'etika u oġġettività professjonali għolja, b'kont debitu, kif xieraq, tal-istandards tal-awditjar u l-kodiċijiet ta' prattika. Jenħtieġ li l-awdituri jiggarantixxu l-kunfidenzjalità, is-sigurtà u l-integrità tal-informazzjoni, bħal pereżempju s-sigrieti kummerċjali, li jiksbu meta jkunu qed iwettqu l-kompiti tagħhom. Jenħtieġ li din il-garanzija ma tkunx mezz biex tiġi evitata l-applikabbiltà tal-obbligi tal-awditjar li jinsabu f'dan ir-Regolament. Jenħtieġ li l-awdituri jkollhom l-għarfien espert neċessarju fil-qasam tal-ġestjoni tar-riskju u l-kompetenza teknika biex jaditjaw l-algoritmi. Jenħtieġ li jkunu indipendenti, sabiex ikunu jistgħu jwettqu l-kompiti tagħhom b'mod xieraq u affidabbli. Jenħtieġ li huma jikkonformaw mar-rekwiżiti ewlenin ta' indipendenza għal servizzi mhux tal-awditjar ipprojbiti, rotazzjoni tad-ditti u tariffi mhux kontinġenti. Jekk ikun hemm dubju dwar l-indipendenza u l-kompetenza teknika tagħhom, jenħtieġ li jirriżenjaw jew jastjenu mill-impenn ta' awditu.

(93)

Jenħtieġ li r-rapport dwar l-awditu jkun sostanzjat, sabiex jingħata rendikont sinifikattiv tal-attivitajiet imwettqa u l-konklużjonijiet misluta. Jenħtieġ li dan jgħin biex jinforma, u fejn xieraq jissuġġerixxi titjib fil-miżuri meħuda mill-fornituri tal-pjattaforma online kbira ħafna u tal-magna tat-tiftix online kbira ħafna biex jikkonformaw mal-obbligi tagħhom skont dan ir-Regolament. Ir-rapport dwar l-awditu jenħtieġ li jiġi trażmess lill-Koordinatur tas-Servizzi Diġitali tal-istabbiliment, lill-Kummissjoni u lill-Bord wara l-wasla tar-rapport tal-awditu. Jenħtieġ ukoll li l-fornituri jittrażmettu mat-tlestija mingħajr dewmien żejjed ta' kull wieħed mir-rapporti dwar il-valutazzjoni tar-riskju u l-miżuri ta' mitigazzjoni, kif ukoll ir-rapport ta' implimentazzjoni tal-awditjar tal-fornitur tal-pjattaforma online kbira ħafna jew tal-magna tat-tiftix online kbira ħafna li juri kif indirizzaw ir-rakkomandazzjonijiet tal-awditu. Ir-rapport dwar l-awditu jenħtieġ ikun jinkludi opinjoni tal-awditu bbażata fuq il-konklużjonijiet misluta mill-evidenza tal-awditu miksuba. Jenħtieġ li tingħata ‘opinjoni pożittiva’ meta l-evidenza kollha turi li l-fornitur tal-pjattaforma online kbira ħafna jew tal-magna tat-tiftix online kbira ħafna tikkonforma mal-obbligi stabbiliti f'dan ir-Regolament jew, fejn applikabbli, ma' kwalunkwe impenji li tkun ħadet skont kodiċi ta' kondotta jew protokoll għall-kriżijiet, b'mod partikolari billi tidentifika, tevalwa u timmitiga r-riskji sistemiċi maħluqa mis-sistema u mis-servizzi tagħha. Meta l-awditur ikun jixtieq jinkludi rimarki li ma għandhomx effett sostanzjali fuq l-eżitu tal-awditu, jenħtieġ li ‘opinjoni pożittiva’ tkun akkumpanjata minn kummenti. Jenħtieġ li tingħata ‘opinjoni negattiva’ meta l-awditur iqis li l-fornitur tal-pjattaforma online kbira ħafna jew tal-magna tat-tiftix online kbira ħafna ma tikkonformax ma' dan ir-Regolament jew mal-impenji meħuda. Meta l-opinjoni tal-awditu ma setgħetx tasal għal konklużjoni għal elementi speċifiċi li jaqgħu fil-kamp ta' applikazzjoni tal-awditu, jenħtieġ li fl-opinjoni tal-awditu tiġi inkluża spjegazzjoni tar-raġunijiet għan-nuqqas li tintlaħaq tali konklużjoni. Fejn applikabbli, ir-rapport jenħtieġ li jinkludi deskrizzjoni ta' elementi speċifiċi li ma setgħux jiġu awditjati, u spjegazzjoni tar-raġuni għaliex dawn ma setgħux jiġu awditjati.

(94)

L-obbligi dwar il-valutazzjoni u l-mitigazzjoni tar-riskji jenħtieġ li jiskattaw, fuq bażi ta' każ b'każ, il-ħtieġa li fornituri ta' pjattaformi online kbar ħafna u ta' magni tat-tiftix online kbar ħafna jivvalutaw u, fejn meħtieġ, jaġġustaw it-tfassil tas-sistemi ta' rakkomandazzjoni tagħhom, pereżempju billi jieħdu miżuri biex jipprevjenu jew jimminimizzaw il-preġudizzji li jwasslu għad-diskriminazzjoni ta' persuni f'sitwazzjonijiet vulnerabbli, b'mod partikolari meta tali aġġustament ikun f'konformità mal-liġi dwar il-protezzjoni tad-data u meta l-informazzjoni tkun personalizzata abbażi ta' kategoriji speċjali ta' data personali msemmija fl-Artikolu 9 tar-Regolament (UE) 2016/679. Barra minn hekk, u filwaqt li jikkomplementaw l-obbligi ta' trasparenza applikabbli għall-pjattaformi online fir-rigward tas-sistemi ta' rakkomandazzjoni tagħhom, il-fornituri ta' pjattaformi online kbar ħafna u ta' magni tat-tiftix online kbar ħafna jenħtieġ li jiżguraw b'mod konsistenti li r-riċevituri tas-servizz tagħhom igawdu minn għażliet alternattivi li ma jkunux ibbażati fuq it-tfassil ta' profili, skont it-tifsira tar-Regolament (UE) 2016/679, għall-parametri ewlenin tas-sistemi ta' rakkomandazzjoni tagħhom. Jenħtieġ li tali għażliet ikunu direttament aċċessibbli mill-interfaċċa online meta jiġu ppreżentati r-rakkomandazzjonijiet.

(95)

Is-sistemi tar-reklamar użati mill-pjattaformi online kbar ħafna u mill-magni tat-tiftix online kbar ħafna joħolqu riskji partikolari u jirrikjedu superviżjoni pubblika u regolatorja ulterjuri minħabba l-iskala tagħhom u l-kapaċità tagħhom li jimmiraw u jilħqu r-riċevituri tas-servizz abbażi tal-imġiba tagħhom fi ħdan u barra mill-interfaċċa online ta' dik il-pjattaforma jew magna tat-tiftix. Jenħtieġ li l-pjattaformi online kbar ħafna jew il-magni tat-tiftix online kbar ħafna jiżguraw l-aċċess pubbliku għar-repożitorji tar-reklami li jiġu ppreżentati fuq l-interfaċċi online tagħhom biex jiffaċilitaw is-superviżjoni u r-riċerka dwar ir-riskji emerġenti maħluqa mid-distribuzzjoni tar-reklamar online, pereżempju b'rabta mar-reklami illegali jew mat-tekniki manipulattivi u d-diżinformazzjoni b'impatt negattiv reali u prevedibbli fuq is-saħħa pubblika, is-sigurtà pubblika, id-diskors ċivili, il-parteċipazzjoni politika u l-ugwaljanza. Ir-repożitorji jenħtieġ li jinkludu l-kontenut tar-reklami, inklużi l-isem tal-prodott, is-servizz jew il-marka kummerċjali u s-suġġett tar-reklam, u d-data relatata dwar ir-reklamatur u, jekk differenti, il-persuna fiżika jew ġuridika li ħallset għar-reklam, u t-twassil tar-reklam, b'mod partikolari meta jkun ikkonċernat ir-reklamar immirat. Din l-informazzjoni jenħtieġ li tinkludi informazzjoni kemm dwar il-kriterji tal-immirar kif ukoll dwar il-kriterji tat-twassil, b'mod partikolari meta r-reklami jitwasslu lil persuni f'sitwazzjonijiet vulnerabbli, bħall-minuri.

(96)

Sabiex tiġi mmonitorjata u vvalutata b'mod xieraq il-konformità tal-pjattaformi online kbar ħafna u tal-magni tat-tiftix online kbar ħafna mal-obbligi stabbiliti f'dan ir-Regolament, il-Koordinatur tas-Servizzi Diġitali tal-istabbiliment jew il-Kummissjoni jistgħu jirrikjedu l-aċċess għal data speċifika jew rappurtar dwarha, inkluża data relatata mal-algoritmi. Tali rekwiżit jista' jinkludi, pereżempju, id-data meħtieġa biex jiġu vvalutati r-riskji u d-danni possibbli maħluqa mis-sistemi tal-pjattaforma online kbira ħafna jew tal-magna tat-tiftix online kbira ħafna, data dwar l-akkuratezza, il-funzjonament u l-ittestjar tas-sistemi algoritmiċi għall-moderazzjoni tal-kontenut, tas-sistemi ta' rakkomandazzjoni jew tas-sistemi tar-reklamar, inklużi, fejn xieraq, algoritmi u data għat-taħriġ, jew data dwar il-proċessi u l-outputs tal-moderazzjoni tal-kontenut jew tas-sistemi interni għall-immaniġġjar tal-ilmenti skont it-tifsira ta' dan ir-Regolament. Tali talbiet għal aċċess għad-data ma jinkludux talbiet biex tiġi prodotta informazzjoni speċifika dwar riċevituri individwali tas-servizz għall-fini tad-determinazzjoni tal-konformità ta’ tali r-riċevituri ma' liġi oħra applikabbli tal-Unjoni jew nazzjonali. L-investigazzjonijiet tar-riċerkaturi dwar l-evoluzzjoni u s-severità tar-riskji sistemiċi online huma partikolarment importanti biex jitnaqqsu l-asimmetriji tal-informazzjoni u biex tiġi stabbilita sistema reżiljenti għall-mitigazzjoni tar-riskji, biex jiġu infurmati l-fornituri tal-pjattaformi online, il-fornitri tal-magni tat-tiftix online, il-Koordinaturi tas-Servizzi Diġitali, awtoritajiet kompetenti oħra, il-Kummissjoni u l-pubbliku.

(97)

Għalhekk, dan ir-Regolament jipprevedi qafas li jobbliga l-għoti ta' aċċess għad-data minn pjattaformi online kbar ħafna u magni tat-tiftix online kbar ħafna lir-riċerkaturi verifikati affiljati ma' organizzazzjonijiet tar-riċerka skont it-tifsira tal-Artikolu 2 tad-Direttiva (UE) 2019/790, li jistgħu jinkludu, għall-fini ta' dan ir-Regolament, organizzazzjonijiet tas-soċjetà ċivili li jkunu qed iwettqu riċerka xjentifika bil-għan primarju li jappoġġaw il-missjoni ta' interess pubbliku tagħhom. It-talbiet kollha għall-aċċess għad-data skont dak il-qafas jenħtieġ li jkunu proporzjonati u jipproteġu b'mod xieraq id-drittijiet u l-interessi leġittimi, inklużi l-protezzjoni tad-data personali, is-sigrieti kummerċjali u informazzjoni kunfidenzjali oħra, tal-pjattaforma online kbira ħafna jew tal-magna tat-tiftix online kbira ħafna u ta' kwalunkwe parti oħra kkonċernata, inklużi r-riċevituri tas-servizz. Madankollu, sabiex jiġi żgurat li jintlaħaq l-objettiv ta' dan ir-Regolament, jenħtieġ li l-kunsiderazzjoni tal-interessi kummerċjali tal-fornituri ma twassalx għal rifjut li jiġi pprovdut aċċess għad-data meħtieġa għall-objettiv speċifiku tar-riċerka skont talba skont dan ir-Regolament. F'dan ir-rigward, u mingħajr preġudizzju għad-Direttiva (UE) 2016/943 tal-Parlament Ewropew u tal-Kunsill (32), jenħtieġ li l-fornituri jiżguraw aċċess xieraq lir-riċerkaturi, inkluż, fejn meħtieġ, billi jieħdu protezzjonijiet tekniċi bħal permezz tad-data vaults. It-talbiet għal aċċess għad-data jistgħu jkopru, pereżempju, in-numru ta' żjarat jew, meta rilevanti, tipi oħra ta' aċċess għall-kontenut minn riċevituri tas-servizz qabel it-tneħħija tiegħu mill-fornituri ta’ pjattaformi online kbar ħafna jew ta’ magni tat-tiftix online kbar ħafna.

(98)

Barra minn hekk, meta d-data tkun aċċessibbli għall-pubbliku, jenħtieġ li tali fornituri ma jipprevjenux lir-riċerkaturi li jissodisfaw subsett xieraq ta' kriterji milli jużaw din id-data għal finijiet ta' riċerka li jikkontribwixxu għad-detezzjoni, l-identifikazzjoni u l-fehim tar-riskji sistemiċi. Jenħtieġ li huma jipprovdu aċċess lil tali riċerkaturi inkluż, meta dan ikun teknikament possibbli, f'ħin reali, għad-data aċċessibbli għall-pubbliku, pereżempju dwar interazzjonijiet aggregati ma' kontenut minn paġni pubbliċi, gruppi pubbliċi, jew personalitajiet pubbliċi, inkluża data dwar l-impressjoni u l-involviment bħan-numru ta' reazzjonijiet, shares jew kummenti mir-riċevituri tas-servizz. Jenħtieġ li l-fornituri ta’ pjattaformi online kbar ħafna jew ta’ magni tat-tiftix online kbar ħafna jiġu mħeġġa jikkooperaw mar-riċerkaturi u jipprovdu aċċess usa' għad-data biex isir monitoraġġ tat-tħassib soċjetali permezz ta' sforzi volontarji, inkluż permezz ta' impenji u proċeduri miftiehma fl-ambitu ta' kodiċijiet ta' kondotta jew protokolli ta' kriżi. Jenħtieġ li dawk il-fornituri u r-riċerkaturi jagħtu attenzjoni partikolari lill-protezzjoni tad-data personali, u jiżguraw li kwalunkwe pproċessar ta' data personali jikkonforma mar-Regolament (UE) 2016/679. Jenħtieġ li l-fornituri janonimizzaw jew jippsewdonimizzaw id-data personali ħlief f'dawk il-każijiet fejn dan jagħmilha impossibbli li jintlaħaq l-iskop tar-riċerka inkwistjoni.

(99)

Minħabba l-kumplessità tal-funzjonament tas-sistemi użati u r-riskji sistemiċi li joħolqu lis-soċjetà, jenħtieġ li l-fornituri ta' pjattaformi online kbar ħafna u ta' magni tat-tiftix online kbar ħafna jistabbilixxu funzjoni ta' verifika tal-konformità, li jenħtieġ li tkun indipendenti mill-funzjonijiet operazzjonali ta’ dawk il-fornituri. Il-kap tal-funzjoni ta' verifika tal-konformità jenħtieġ li jirrapporta direttament lill-korp maniġerjali ta’ dawk il-fornituri, inkluż rigward tħassib ta' nuqqas ta' konformità ma' dan ir-Regolament. L-uffiċjali għall-konformità li jagħmlu parti mill-funzjoni ta' verifika tal-konformità jenħtieġ li jkollhom il-kwalifiki, l-għarfien, l-esperjenza u l-kapaċità meħtieġa biex jagħmlu l-miżuri operattivi u jimmonitorjaw il-konformità ma' dan ir-Regolament fi ħdan l-organizzazzjoni tal-fornituri ta' pjattaforma online kbira ħafna jew ta' magna tat-tiftix online kbira ħafna. Il-fornituri ta' pjattaformi online kbar ħafna u ta' magni tat-tiftix online kbar ħafna jenħtieġ li jiżguraw li l-funzjoni ta' verifika tal-konformità tkun involuta, kif xieraq u b'tempestività, fil-kwistjonijiet kollha relatati ma' dan ir-Regolament inkluż fil-valutazzjoni tar-riskju u l-istrateġija ta' mitigazzjoni u miżuri speċifiċi, kif ukoll il-valutazzjoni tal-konformità, fejn applikabbli, mal-impenji meħuda minn dawk il-fornituriskont il-kodiċijiet ta' kondotta u l-protokolli ta’ kriżi li jkunu ssottoskrivew għalihom.

(100)

Fid-dawl tar-riskji addizzjonali relatati mal-attivitajiet tagħhom u l-obbligi addizzjonali tagħhom skont dan ir-Regolament, jenħtieġ li japplikaw rekwiżiti addizzjonali ta' trasparenza speċifikament għal pjattaformi online kbar ħafna u magni tat-tiftix online kbar ħafna, b'mod partikolari biex jirrapportaw b'mod komprensiv dwar il-valutazzjonijiet tar-riskju mwettqa u dwar il-miżuri sussegwenti adottati kif previst b'dan ir-Regolament.

(101)

Jenħtieġ li l-Kummissjoni jkollha r-riżorsi kollha meħtieġa, f'termini ta' persunal, għarfien espert u mezzi finanzjarji, biex twettaq il-kompiti kollha tagħha skont dan ir-Regolament. Sabiex tiġi żgurata d-disponibbiltà tar-riżorsi meħtieġa għas-superviżjoni adegwata fil-livell tal-Unjoni skont dan ir-Regolament, u meta jitqies li l-Istati Membri jenħtieġ li jkunu intitolati jiċċarġjaw lill-fornituri stabbiliti fit-territorju tagħhom tariffa superviżorja fir-rigward tal-kompiti superviżorji u ta' infurzar eżerċitati mill-awtoritajiet tagħhom, jenħtieġ li l-Kummissjoni timponi tariffa superviżorja, li l-livell tagħha jenħtieġ li jiġi stabbilit fuq bażi annwali, fuq pjattaformi online kbar ħafna u magni tat-tiftix online kbar ħafna. Jenħtieġ li l-ammont globali tat-tariffi superviżorji annwali imposti jiġi stabbilit abbażi tal-ammont globali tal-ispejjeż imġarrba mill-Kummissjoni biex teżerċita l-kompiti superviżorji tagħha skont dan ir-Regolament, kif raġonevolment stmat minn qabel. Tali ammont jenħtieġ li jinkludi l-kostijiet relatati mal-eżerċizzju tas-setgħat u l-kompiti speċifiċi ta’ superviżjoni, investigazzjoni, infurzar u monitoraġġ fir-rigward tal-fornituri ta’ pjattaformi online kbar ħafna u ta’ magni tat-tiftix online kbar ħafna, inklużi l-kostijiet relatati mad-deżinjazzjoni ta' pjattaformi online kbar ħafna u ta’ magni tat-tiftix online kbar ħafna jew mal-istabbiliment, mal-manutenzjoni u mat-tħaddim tal-bażijiet tad-data previsti skont dan ir-Regolament.

Dan jenħtieġ li jinkludi wkoll il-kostijiet relatati mal-istabbiliment, il-manutenzjoni u l-operat tal-infrastruttura istituzzjonali u ta' informazzjoni bażika għall-kooperazzjoni fost il-Koordinaturi tas-Servizzi Diġitali, il-Bord u l-Kummissjoni, filwaqt li jitqies il-fatt li fid-dawl tad-daqs u r-reach tagħhom il-pjattaformi online kbar ħafna u l-magni tat-tiftix online kbar ħafna għandhom impatt sinifikanti fuq ir-riżorsi meħtieġa biex jappoġġaw din l-infrastruttura. Jenħtieġ li l-istima tal-kostijiet kumplessivi tqis il-kostijiet superviżorji mġarrba fis-sena preċedenti inklużi, fejn applikabbli, dawk il-kostijiet li jaqbżu t-tariffa superviżorja annwali individwali imposta fis-sena preċedenti. Id-dħul assenjat estern li jirriżulta mit-tariffa superviżorja annwali jista' jintuża biex jiffinanzja riżorsi umani addizzjonali, bħal aġenti kuntrattwali u esperti nazzjonali sekondati, u nefqa oħra relatata mat-twettiq tal-kompiti fdati lill-Kummissjoni b'dan ir-Regolament. Jenħtieġ li t-tariffa superviżorja annwali li trid tiġi imposta fuq il-fornituri ta' pjattaformi online kbar ħafna u ta’ magni tat-tiftix online kbar ħafna tkun proporzjonata mad-daqs tas-servizz kif rifless min-numru ta' riċevituri attivi tas-servizz tiegħu fl-Unjoni. Barra minn hekk, jenħtieġ li t-tariffa superviżorja annwali individwali ma taqbiżx limitu massimu ġenerali għal kull fornitur ta' pjattaformi online kbar ħafna u ta’ magna tat-tiftix online kbira ħafna filwaqt li titqies il-kapaċità ekonomika tal-fornitur tas-servizz jew tas-servizzi deżinjati.

(102)

Biex tiġi ffaċilitata l-applikazzjoni effettiva u konsistenti tal-obbligi f'dan ir-Regolament li jistgħu jirrikjedu implimentazzjoni permezz ta' mezzi teknoloġiċi, huwa importanti li jiġu promossi standards volontarji li jkopru ċerti proċeduri tekniċi, fejn l-industrija tista' tgħin biex jiġu żviluppati mezzi standardizzati biex il-fornituri ta' servizzi intermedjarji jiġu appoġġati biex jikkonformaw ma' dan ir-Regolament, bħal pereżempju billi jippermettu s-sottomissjoni ta' avviżi, inkluż permezz ta' interfaċċi għall-ipprogrammar tal-applikazzjonijiet, jew standards relatati ma' termini u kondizzjonijiet jew standards relatati mal-awditi, jew standards relatati mal-interoperabbiltà tar-repożitorji tar-reklamar. Barra minn hekk, tali standards jistgħu jinkludu standards relatati mar-reklamar online, is-sistemi ta' rakkomandazzjoni, l-aċċessibbiltà u l-protezzjoni tal-minuri online. Il-fornituri ta' servizzi intermedjarji huma liberi li jadottaw l-istandards, iżda l-adozzjoni tagħhom ma tippreżumix il-konformità ma' dan ir-Regolament. Fl-istess ħin, billi jipprovdu l-aħjar prattiki, tali standards jistgħu b'mod partikolari jkunu utli għal fornituri relattivament żgħar tas-servizzi intermedjarji. L-istandards jistgħu jiddistingwu bejn tipi differenti ta' kontenut illegali jew tipi differenti ta' servizzi intermedjarji, kif xieraq.

(103)

Il-Kummissjoni u l-Bord jenħtieġ li jinkoraġġixxu t-tfassil ta' kodiċijiet ta' kondotta volontarji kif ukoll l-implimentazzjoni tad-dispożizzjonijiet ta' dawk il-kodiċijiet biex jikkontribwixxu għall-applikazzjoni ta' dan ir-Regolament. Jenħtieġ li l-Kummissjoni u l-Bord jimmiraw li l-kodiċijiet ta' kondotta jiddefinixxu b'mod ċar in-natura tal-objettivi ta' interess pubbliku li jkunu qed jiġu indirizzati, li dawn ikun fihom mekkaniżmi għall-evalwazzjoni indipendenti tal-kisba ta' dawk l-objettivi u li r-rwol tal-awtoritajiet rilevanti jkun definit b'mod ċar. Jenħtieġ li tingħata attenzjoni partikolari rigward l-evitar tal-effetti negattivi fuq is-sigurtà, il-protezzjoni tal-privatezza u tad-data personali, kif ukoll il-projbizzjoni fuq l-impożizzjoni ta' obbligi ġenerali ta' monitoraġġ. Filwaqt li l-implimentazzjoni tal-kodiċijiet ta' kondotta jenħtieġ li tkun tista' titkejjel u tkun soġġetta għas-sorveljanza pubblika, dan jenħtieġ li ma jtellifx in-natura volontarja ta' tali kodiċijiet u l-libertà tal-partijiet interessati li jiddeċiedu jekk iridux jipparteċipaw. F'ċerti ċirkostanzi, huwa importanti li l-pjattaformi online kbar ħafna jikkooperaw fit-tfassil u jaderixxu ma' kodiċijiet speċifiċi ta' kondotta. L-ebda ħaġa f'dan ir-Regolament ma tipprevjeni lil fornituri oħra tas-servizz milli jaderixxu mal-istess standards ta' diliġenza dovuta, milli jadottaw l-aqwa prattiki u milli jibbenefikaw mill-linji gwida pprovduti mill-Kummissjoni u mill-Bord, billi jipparteċipaw fl-istess kodiċijiet ta' kondotta.

(104)

Huwa xieraq li dan ir-Regolament jidentifika ċerti oqsma ta' kunsiderazzjoni għal tali kodiċijiet ta' kondotta. B'mod partikolari, il-miżuri ta' mitigazzjoni tar-riskji dwar tipi speċifiċi ta' kontenut illegali jenħtieġ li jiġu eżaminati permezz ta' ftehimiet awtoregolatorji u koregolatorji. Qasam ieħor li jrid jiġi kkunsidrat huwa l-impatti negattivi possibbli tar-riskji sistemiċi fuq is-soċjetà u fuq id-demokrazija, bħal pereżempju d-diżinformazzjoni jew l-attivitajiet manipulattivi u abbużivi jew kwalunkwe effett avvers fuq il-minuri. Dan jinkludi operazzjonijiet koordinati bil-mira li jamplifikaw l-informazzjoni, inkluża d-diżinformazzjoni, bħal pereżempju l-użu ta' bots jew kontijiet foloz għall-ħolqien ta' informazzjoni intenzjonalment mhux preċiża jew qarrieqa, xi kultant bl-iskop li jinkiseb gwadann ekonomiku, li huma partikolarment dannużi għar-riċevituri vulnerabbli tas-servizz, bħal pereżempju l-minuri. B'rabta ma' tali oqsma, l-aderenza u l-konformità ma' kodiċi ta' kondotta speċifiku minn pjattaforma online kbira ħafna jew magna tat-tiftix online kbira ħafna jistgħu jitqiesu bħala miżura xierqa għall-mitigazzjoni tar-riskji. Ir-rifjut mingħajr spjegazzjonijiet xierqa minn fornitur ta' pjattaforma online jew ta' magna tat-tiftix online tat-talba tal-Kummissjoni biex jipparteċipa fl-applikazzjoni ta' tali kodiċi ta' kondotta jista' jitqies, fejn rilevanti, meta jkun qed jiġi determinat jekk il-pjattaforma online jew il-magna tat-tiftix online tkunx kisret l-obbligi stipulati f'dan ir-Regolament. Is-sempliċi fatt li wieħed jipparteċipa f'kodiċi ta' kondotta partikolari jew jimplimentah jenħtieġ li fih innifsu ma jiġix preżunt awtomatikament bħala konformità ma' dan ir-Regolament.

(105)

Il-kodiċijiet tal-kondotta jenħtieġ li jiffaċilitaw l-aċċessibbiltà tal-pjattaformi online kbar ħafna u l-magni tat-tiftix online kbar ħafna, f'konformità mal-liġi tal-Unjoni u dik nazzjonali, sabiex jiffaċilitaw l-użu prevedibbli tagħhom minn persuni b'diżabilità. B'mod partikolari, il-kodiċijiet ta' kondotta jistgħu jiżguraw li l-informazzjoni tiġi ppreżentata b'tali mod li tkun perċettibbli, operabbli, tinftiehem u robusta u li l-formoli u l-miżuri pprovduti skont dan ir-Regolament ikunu disponibbli b'tali mod li jkunu faċli biex jinstabu u aċċessibbli għall-persuni b'diżabilità.

(106)

Ir-regoli dwar il-kodiċijiet ta' kondotta skont dan ir-Regolament jistgħu jservu bħala bażi għal sforzi awtoregolatorji diġà stabbiliti fil-livell tal-Unjoni, inklużi l-Wegħda dwar is-Sikurezza tal-Prodott, il-Memorandum ta' Qbil dwar il-bejgħ ta’ oġġetti kontrafatti fuq l-internet, il-Kodiċi ta' kondotta kontra d-diskors ta' mibegħda illegali online kif ukoll il-Kodiċi ta' prattika dwar id-diżinformazzjoni. B'mod partikolari għal dan tal-aħħar, b’segwitu għallgwida tal-Kummissjoni, il-Kodiċi ta' prattika dwar id-diżinformazzjoni ġie msaħħaħ kif imħabbar fil-Pjan ta' Azzjoni għad-Demokrazija Ewropea.

(107)

Il-provvista ta' reklamar online ġeneralment tinvolvi bosta atturi, inklużi servizzi intermedjarji li jikkollegaw il-pubblikaturi tar-reklamar mar-reklamaturi. Jenħtieġ li l-kodiċijiet ta' kondotta jappoġġaw u jikkomplementaw l-obbligi ta' trasparenza relatati mar-reklamar għall-fornituri ta' pjattaformi online, ta' pjattaformi online kbar ħafna u ta' magni tat-tiftix online kbar ħafna stipulati f'dan ir-Regolament biex jiġu previsti mekkaniżmi flessibbli u effettivi biex tiġi ffaċilitata u msaħħa l-konformità ma' dawn l-obbligi, b'mod partikolari fir-rigward tal-modalitajiet tat-trażmissjoni tal-informazzjoni rilevanti. Dan jenħtieġ li jinkludi l-iffaċilitar tat-trażmissjoni tal-informazzjoni dwar ir-reklamatur li jħallas għar-reklam meta dan ikun differenti mill-persuna fiżika jew ġuridika li f'isimha jiġi ppreżentat ir-reklam fuq l-interfaċċa online ta' pjattaforma online. Il-kodiċijiet ta' kondotta jenħtieġ li jinkludu wkoll miżuri li jiżguraw li informazzjoni sinifikanti dwar il-monetizzazzjoni tad-data tiġi kondiviża b'mod xieraq tul il-katina tal-valur kollha. L-involviment ta' firxa wiesgħa ta' partijiet ikkonċernati jenħtieġ li jiżgura li dawk il-kodiċijiet ta' kondotta jiġu appoġġati b'mod mifrux, ikunu teknikament sodi, effettivi u joffru l-ogħla livelli ta' faċilità tal-użu għall-utent biex jiġi żgurat li l-obbligi ta' trasparenza jiksbu l-objettivi tagħhom. Sabiex tiġi żgurata l-effettività tal-kodiċijiet ta' kondotta, jenħtieġ li l-Kummissjoni tinkludi mekkaniżmi ta' evalwazzjoni fit-tfassil tal-kodiċijiet ta' kondotta. Fejn xieraq, il-Kummissjoni tista' tistieden lill-Aġenzija għad-Drittijiet Fundamentali jew lill-Kontrollur Ewropew għall-Protezzjoni tad-Data biex jesprimu l-opinjonijiet tagħhom dwar il-kodiċi ta' kondotta rispettiv.

(108)

Minbarra l-mekkaniżmu ta' rispons għall-kriżijiet għall-pjattaformi online kbar ħafna u l-magni tat-tiftix online kbar ħafna, il-Kummissjoni tista' tagħti bidu għat-tfassil ta' protokolli volontarji għall-kriżijiet biex tikkoordina rispons rapidu, kollettiv u transfruntier fl-ambjent online. Dan jista' jkun il-każ, pereżempju, meta l-pjattaformi online jintużaw ħażin għad-disseminazzjoni rapida ta' kontenut illegali jew diżinformazzjoni jew meta tinqala' l-ħtieġa ta' disseminazzjoni rapida ta' informazzjoni affidabbli. Fid-dawl tar-rwol importanti tal-pjattaformi online kbar ħafna fid-disseminazzjoni ta' informazzjoni fis-soċjetajiet tagħna u bejn il-fruntieri, il-fornituri ta' tali pjattaformi jenħtieġ li jitħeġġu biex ifasslu u japplikaw protokolli speċifiċi għall-kriżijiet. Tali protokolli għall-kriżijiet jenħtieġ li jiġu attivati għal perjodu limitat ta' żmien biss u l-miżuri adottati jenħtieġ li jkunu limitati wkoll għal dak li huwa strettament meħtieġ biex tiġi indirizzata ċ-ċirkostanza straordinarja. Dawk il-miżuri jenħtieġ li jkunu konsistenti ma' dan ir-Regolament, u jenħtieġ li ma jammontawx għal obbligu ġenerali għall-fornituri ta' pjattaformi online kbar ħafna u ta' magni tat-tiftix online kbar ħafna parteċipanti biex jimmonitorjaw l-informazzjoni li jittrażmettu jew li jaħżnu, u lanqas biex ifittxu attivament fatti jew ċirkostanzi li jindikaw kontenut illegali.

(109)

Sabiex jiġu żgurati sorveljanza u infurzar adegwati tal-obbligi stipulati f'dan ir-Regolament, jenħtieġ li l-Istati Membri jaħtru mill-inqas awtorità waħda bil-kompitu li tissorvelja l-applikazzjoni u tinforza dan ir-Regolament, mingħajr preġudizzju għall-possibbiltà li tinħatar awtorità eżistenti u għall-forma ġuridika tagħha f'konformità mal-liġi nazzjonali. Madankollu, l-Istati Membri jenħtieġ li jkunu jistgħu jinkarigaw aktar minn awtorità kompetenti waħda, b'kompiti speċifiċi ta' sorveljanza jew ta' infurzar u b'kompetenzi dwar l-applikazzjoni ta' dan ir-Regolament, pereżempju għal setturi speċifiċi fejn jistgħu jinkarigaw ukoll awtoritajiet eżistenti, bħar-regolaturi tal-komunikazzjonijiet elettroniċi, ir-regolaturi tal-midja jew l-awtoritajiet tal-protezzjoni tal-konsumatur, filwaqt li jirriflettu l-istruttura domestika kostituzzjonali, organizzattiva u amministrattiva tagħhom. Fl-eżerċizzju tal-kompiti tagħhom, l-awtoritajiet kompetenti kollha jenħtieġ li jikkontribwixxu għall-kisba tal-objettivi ta' dan ir-Regolament, jiġifieri għall-funzjonament tajjeb tas-suq intern għas-servizzi intermedjarji fejn ir-regoli armonizzati għal ambjent online sikur, prevedibbli u affidabbli li jiffaċilita l-innovazzjoni, u b'mod partikolari l-obbligi ta' diliġenza dovuta applikabbli għal kategoriji differenti ta' fornituri ta' servizzi intermedjarji, ikunu sorveljati u infurzati b'mod effettiv, bil-ħsieb li jiġi żgurat li d-drittijiet fundamentali, kif minquxa fil-Karta, inkluż il-prinċipju tal-protezzjoni tal-konsumatur, ikunu protetti b'mod effettiv. Dan ir-Regolament ma jirrikjedix li l-Istati Membri jagħtu lill-awtoritajiet kompetenti l-kompitu li jiddeċiedu dwar il-legalità ta' punti speċifiċi ta' kontenut.

(110)

Minħabba n-natura transfruntiera tas-servizzi inkwistjoni u l-firxa orizzontali tal-obbligi introdotti b'dan ir-Regolament, awtorità waħda maħtura bil-kompitu li tissorvelja l-applikazzjoni u, fejn meħtieġ, tinforza dan ir-Regolament jenħtieġ li tiġi identifikata bħala Koordinatur tas-Servizzi Diġitali f'kull Stat Membru. Meta tinħatar aktar minn awtorità kompetenti waħda biex tissorvelja l-applikazzjoni ta’, u tinforza, dan ir-Regolament, jenħtieġ li awtorità waħda biss f'dak l-Istat Membru tiġi deżinjata bħala Koordinatur tas-Servizzi Diġitali. Il-Koordinatur tas-Servizzi Diġitali jenħtieġ li jaġixxi bħala l-punt uniku ta' kuntatt fir-rigward tal-kwistjonijiet kollha relatati mal-applikazzjoni ta' dan ir-Regolament għall-Kummissjoni, għall-Bord, għall-Koordinaturi tas-Servizzi Diġitali ta' Stati Membri oħra, kif ukoll għal awtoritajiet kompetenti oħra tal-Istat Membru inkwistjoni. B'mod partikolari, meta diversi awtoritajiet kompetenti jiġu inkarigati b'kompiti skont dan ir-Regolament fi Stat Membru speċifiku, il-Koordinatur tas-Servizzi Diġitali jenħtieġ li jikkoordina u jikkoopera ma' dawk l-awtoritajiet f'konformità mal-liġi nazzjonali li tistabbilixxi l-kompiti rispettivi tagħhom u mingħajr preġudizzju għall-valutazzjoni indipendenti tal-awtoritajiet kompetenti l-oħra. Filwaqt li ma jinvolvi l-ebda supraordinazzjoni ġerarkika fuq awtoritajiet kompetenti oħra fl-eżerċizzju tal-kompiti tagħhom, jenħtieġ li l-Koordinatur tas-Servizzi Diġitali jiżgura involviment effettiv tal-awtoritajiet kompetenti rilevanti kollha u jenħtieġ li jirrapporta fil-ħin il-valutazzjoni tagħhom fil-kuntest tal-kooperazzjoni dwar is-superviżjoni u l-infurzar fil-livell tal-Unjoni. Barra minn hekk, minbarra l-mekkaniżmi speċifiċi previsti f'dan ir-Regolament fir-rigward tal-kooperazzjoni fil-livell tal-Unjoni, jenħtieġ li l-Istati Membri jiżguraw ukoll il-kooperazzjoni bejn il-Koordinatur tas-Servizzi Diġitali u awtoritajiet kompetenti deżinjati oħra fil-livell nazzjonali, fejn applikabbli, permezz ta' għodod xierqa, bħal pereżempju l-ġbir flimkien ta' riżorsi, task forces konġunti, investigazzjonijiet konġunti u mekkaniżmi ta' assistenza reċiproka.

(111)

Il-Koordinatur tas-Servizzi Diġitali, kif ukoll awtoritajiet kompetenti oħra deżinjati skont dan ir-Regolament, jaqdu rwol kruċjali fl-iżgurar tal-effettività tad-drittijiet u tal-obbligi stabbiliti f'dan ir-Regolament u fil-kisba tal-objettivi tiegħu. Għaldaqstant, huwa meħtieġ li jiġi żgurat li dawk l-awtoritajiet ikollhom il-mezzi meħtieġa, inklużi r-riżorsi finanzjarji u umani, biex jissorveljaw il-fornituri kollha tas-servizzi intermedjarji li jaqgħu fl-ambitu tal-kompetenza tagħhom, fl-interess taċ-ċittadini kollha tal-Unjoni. Minħabba l-varjetà ta' fornituri ta' servizzi intermedjarji u l-użu tagħhom ta' teknoloġija avvanzata fil-provvista tas-servizzi tagħhom, huwa essenzjali wkoll li l-Koordinatur tas-Servizzi Diġitali u l-awtoritajiet kompetenti rilevanti jkunu mgħammra bl-għadd meħtieġ ta' persunal u esperti b'ħiliet speċjalizzati u mezzi tekniċi avvanzati, u li jimmaniġġjaw b'mod awtonomu r-riżorsi finanzjarji biex iwettqu l-kompiti tagħhom. Barra minn hekk, il-livell tar-riżorsi jenħtieġ li jqis id-daqs, il-kumplessità u l-impatt potenzjali fuq is-soċjetà tal-fornituri ta’ servizzi intermedjarji li jaqgħu fl-ambitu tal-kompetenza tagħhom, kif ukoll il-portata tas-servizzi tagħhom madwar l-Unjoni. Dan ir-Regolament huwa mingħajr preġudizzju għall-possibbiltà li l-Istati Membri jistabbilixxu mekkaniżmi ta' finanzjament ibbażati fuq tariffa superviżorja imposta għall-fornituri tas-servizzi intermedjarji skont il-liġi nazzjonali f'konformità mal-liġi tal-Unjoni, diment li din tiġi imposta fuq il-fornituri ta’ servizzi intermedjarji li jkollhom l-istabbiliment ewlieni tagħhom fl-Istat Membru inkwistjoni u tkun strettament limitata għal dak li jkun meħtieġ u proporzjonat biex tkopri l-ispejjeż għat-twettiq tal-kompiti mogħtija lill-awtoritajiet kompetenti skont dan ir-Regolament, bl-esklużjoni tal-kompiti mogħtija lill-Kummissjoni, u li tiġi żgurata trasparenza adegwata fir-rigward tal-impożizzjoni u l-użu ta' tali tariffi superviżorji.

(112)

L-awtoritajiet kompetenti deżinjati skont dan ir-Regolament jenħtieġ li jaġixxu wkoll b'indipendenza sħiħa mill-korpi privati u pubbliċi, mingħajr l-obbligu jew il-possibbiltà li jfittxu jew li jirċievu struzzjonijiet, inkluż mill-gvern, mingħajr preġudizzju għad-dmirijiet speċifiċi li jikkooperaw ma' awtoritajiet kompetenti oħra, mal-Koordinaturi tas-Servizzi Diġitali, mal-Bord u mal-Kummissjoni. Min-naħa l-oħra, jenħtieġ li l-indipendenza ta' dawn l-awtoritajiet ma tkunx tfisser li ma jistgħux ikunu soġġetti, f'konformità mal-kostituzzjonijiet nazzjonali u mingħajr ma tiġi pperikolata l-kisba tal-objettivi ta' dan ir-Regolament, għal mekkaniżmi ta' obbligu ta' rendikont proporzjonati rigward l-attivitajiet ġenerali tal-Koordinaturi tas-Servizzi Diġitali, bħan-nefqa finanzjarja tagħhom jew ir-rappurtar tagħhom lill-parlamenti nazzjonali. Jenħtieġ ukoll li r-rekwiżit ta' indipendenza ma jipprevjenix l-eżerċizzju ta' stħarriġ ġudizzjarju, jew il-possibbiltà li jiġu kkonsultati jew skambjati regolarment fehmiet ma' awtoritajiet nazzjonali oħra, inklużi awtoritajiet tal-infurzar tal-liġi, awtoritajiet tal-ġestjoni tal-kriżijiet jew awtoritajiet tal-protezzjoni tal-konsumatur, fejn xieraq, sabiex jinfurmaw lil xulxin dwar l-investigazzjonijiet li jkunu għaddejjin, mingħajr ma jaffettwaw l-eżerċizzju tas-setgħat rispettivi tagħhom.

(113)

L-Istati Membri jistgħu jiddeżinjaw awtorità nazzjonali eżistenti bil-funzjoni tal-Koordinatur tas-Servizzi Diġitali, jew b'kompiti speċifiċi biex tissorvelja l-applikazzjoni u tinforza dan ir-Regolament, diment li kwalunkwe awtorità maħtura bħal din tikkonforma mar-rekwiżiti stipulati f'dan ir-Regolament, bħal pereżempju fir-rigward tal-indipendenza tagħha. Barra minn hekk, fil-prinċipju, l-Istati Membri mhumiex preklużi milli jamalgamaw il-funzjonijiet fi ħdan awtorità eżistenti, f'konformità mal-liġi tal-Unjoni. Il-miżuri għal dak il-għan jistgħu jinkludu, inter alia, il-preklużjoni li jitkeċċa l-president jew membru tal-bord ta' korp kolleġġjali ta' awtorità eżistenti qabel l-iskadenza tal-mandat tagħhom, għall-unika raġuni li twettqet riforma istituzzjonali li tinvolvi l-amalgamazzjoni ta' funzjonijiet differenti fi ħdan awtorità waħda, fin-nuqqas ta' kwalunkwe regoli li jiggarantixxu li tali tkeċċija ma tipperikolax l-indipendenza u l-imparzjalità ta' tali membri.

(114)

Jenħtieġ li l-Istati Membri jipprovdu lill-Koordinatur tas-Servizzi Diġitali, u lil kwalunkwe awtorità kompetenti oħra deżinjata skont dan ir-Regolament, setgħat u mezzi suffiċjenti biex jiżguraw investigazzjoni u infurzar effettivi, f'konformità mal-kompiti konferiti lilhom. Dan jinkludi s-setgħa tal-awtoritajiet kompetenti li jadottaw miżuri interim f'konformità mal-liġi nazzjonali f'każ ta' riskju ta' dannu serju. Tali miżuri interim, li jistgħu jinkludu ordnijiet biex jintemm jew jiġi rrimedjat ksur allegat partikolari, jenħtieġ li ma jmorrux lil hinn minn dak li huwa meħtieġ biex jiġi żgurat li jiġi evitat dannu serju sakemm tittieħed id-deċiżjoni finali. B'mod partikolari jenħtieġ li l-Koordinaturi tas-Servizzi Diġitali jkunu jistgħu jfittxu u jiksbu informazzjoni li tinsab fit-territorju tagħhom, inkluż fil-kuntest ta' investigazzjonijiet konġunti, b'kunsiderazzjoni dovuta għall-fatt li l-miżuri ta' sorveljanza u ta' infurzar rigward fornitur taħt il-ġuriżdizzjoni ta' Stat Membru ieħor jew tal-Kummissjoni jenħtieġ li jiġu adottati mill-Koordinatur tas-Servizzi Diġitali ta' dak l-Istat Membru l-ieħor, fejn rilevanti f'konformità mal-proċeduri relatati mal-kooperazzjoni transfruntiera, jew, fejn applikabbli, mill-Kummissjoni.

(115)

Jenħtieġ li fil-liġi nazzjonali tagħhom, f'konformità mal-liġi tal-Unjoni u b'mod partikolari dan ir-Regolament u l-Karta, l-Istati Membri jistabbilixxu l-kondizzjonijiet u l-limiti dettaljati għall-eżerċizzju tas-setgħat ta' investigazzjoni u ta' infurzar tal-Koordinaturi tas-Servizzi Diġitali tagħhom, u ta' awtoritajiet kompetenti oħra fejn rilevanti, skont dan ir-Regolament.

(116)

Matul l-eżerċizzju ta' dawk is-setgħat, jenħtieġ li l-awtoritajiet kompetenti jikkonformaw mar-regoli nazzjonali applikabbli dwar il-proċeduri u kwistjonijiet bħal pereżempju l-ħtieġa għal awtorizzazzjoni ġudizzjarja minn qabel biex wieħed jidħol f'ċertu bini u l-privileġġ professjonali legali. B'mod partikolari jenħtieġ li dawk id-dispożizzjonijiet jiżguraw ir-rispett għad-drittijiet fundamentali għal rimedju effettiv u għal proċess imparzjali, inklużi d-drittijiet ta' difiża, u d-dritt għar-rispett tal-ħajja privata. F'dan ir-rigward, il-garanziji previsti b'rabta mal-proċedimenti tal-Kummissjoni skont dan ir-Regolament jistgħu jservu bħala punt ta' referenza xieraq. Jenħtieġ li proċedura minn qabel, ġusta u imparzjali tkun garantita qabel ma tittieħed kwalunkwe deċiżjoni finali, inkluż id-dritt ta' smigħ tal-persuni kkonċernati, u d-dritt li jkollhom aċċess għall-fajl, filwaqt li jiġu rispettati l-kunfidenzjalità u s-sigrieti professjonali u kummerċjali, kif ukoll l-obbligu li jingħataw raġunijiet sinifikattivi għad-deċiżjonijiet. Madankollu, dan jenħtieġ li ma jipprekludix it-teħid ta' miżuri f'każijiet ta' urġenza sostanzjati kif dovut u soġġett għal kondizzjonijiet u arranġamenti proċedurali xierqa. Jenħtieġ li l-eżerċizzju tas-setgħat ikun ukoll proporzjonat għal, inter alia, in-natura u d-dannu ġenerali reali jew potenzjali kkawżat mill-ksur jew mill-ksur issuspettat. Jenħtieġ li l-awtoritajiet kompetenti jqisu l-fatti u ċ-ċirkostanzi rilevanti kollha tal-każ, inkluża l-informazzjoni miġbura mill-awtoritajiet kompetenti fi Stati Membri oħra.

(117)

Jenħtieġ li l-Istati Membri jiżguraw li l-ksur tal-obbligi stabbiliti f'dan ir-Regolament ikunu jistgħu jiġu sanzjonati b'mod li jkun effettiv, proporzjonat u dissważiv, filwaqt li jitqiesu n-natura, is-serjetà, ir-rikorrenza u t-tul tal-ksur, fid-dawl tal-interess pubbliku segwit, l-ambitu u t-tip ta' attivitajiet imwettqa, kif ukoll il-kapaċità ekonomika tal-kontraventur. B'mod partikolari, jenħtieġ li l-penali jqisu jekk il-fornituri tas-servizzi intermedjarji kkonċernat jonqosx sistematikament jew b'mod rikorrenti milli jikkonforma mal-obbligi tiegħu li jirriżultaw minn dan ir-Regolament, kif ukoll, fejn rilevanti, l-għadd ta' riċevituri tas-servizz affettwati, il-karattru intenzjonali jew negliġenti tal-ksur u jekk il-fornitur huwiex attiv f'bosta Stati Membri. Fejn dan ir-Regolament jipprevedi ammont massimu ta' multi jew ta' pagament perjodiku ta' penali, jenħtieġ li dan l-ammont massimu japplika għal kull ksur ta' dan ir-Regolament u mingħajr preġudizzju għall-modulazzjoni tal-multi jew il-pagamenti perjodiċi ta' penali għal ksur speċifiku. Jenħtieġ li l-Istati Membri jiżguraw li l-impożizzjoni ta' multi jew pagamenti perjodiċi ta' penali fir-rigward ta' ksur f'kull każ individwali tkun effettiva, proporzjonata u dissważiva billi jiġu stipulati regoli u proċeduri nazzjonali f'konformità ma' dan ir-Regolament, filwaqt li jitqiesu l-kriterji kollha li jikkonċernaw il-kondizzjonijiet ġenerali għall-impożizzjoni tal-multi jew tal-pagamenti perjodiċi ta' penali.

(118)

Biex jiġi żgurat infurzar effettiv tal-obbligi stipulati f'dan ir-Regolament, jenħtieġ li l-individwi jew l-organizzazzjonijiet rappreżentattivi jkunu jistgħu jressqu kwalunkwe lment relatat mal-konformità ma' dawk l-obbligi lill-Koordinatur tas-Servizzi Diġitali fit-territorju fejn ikunu rċevew is-servizz, mingħajr preġudizzju għar-regoli dwar l-allokazzjoni tal-kompetenzi u għar-regoli applikabbli dwar it-trattament tal-ilmenti f'konformità mal-prinċipji nazzjonali ta' amministrazzjoni tajba. L-ilmenti jistgħu jipprovdu ħarsa ġenerali preċiża tat-tħassib relatat mal-konformità ta' fornitur partikolari tas-servizzi intermedjarji u jistgħu wkoll jinfurmaw lill-Koordinatur tas-Servizzi Diġitali dwar kwistjonijiet trasversali oħrajn. Il-Koordinatur tas-Servizzi Diġitali jenħtieġ li jinvolvi awtoritajiet nazzjonali kompetenti oħra kif ukoll il-Koordinatur tas-Servizzi Diġitali ta' Stat Membru ieħor, u b'mod partikolari dak tal-Istat Membru fejn ikun stabbilit il-fornitur tas-servizzi intermedjarji kkonċernat, jekk il-kwistjoni tirrikjedi kooperazzjoni transfruntiera.

(119)

Jenħtieġ li l-Istati Membri jiżguraw li l-Koordinaturi tas-Servizzi Diġitali jkunu jistgħu jieħdu miżuri li jkunu effettivi fl-indirizzar ta' ċertu ksur partikolarment serju u persistenti ta' dan ir-Regolament u proporzjonati għal tali ksur. Speċjalment meta dawk il-miżuri jistgħu jaffettwaw id-drittijiet u l-interessi tal-partijiet terzi, kif jista' jkun il-każ b'mod partikolari meta l-aċċess għall-interfaċċi online jkun ristrett, huwa xieraq li jkun meħtieġ li l-miżuri jkunu soġġetti għal salvagwardji addizzjonali. B'mod partikolari, jenħtieġ li l-partijiet terzi potenzjalment affettwati jingħataw l-opportunità li jinstemgħu u tali ordnijiet jenħtieġ li jinħarġu biss meta s-setgħat biex jittieħdu tali miżuri kif previst minn atti oħra tal-liġi tal-Unjoni u mil-liġi nazzjonali, pereżempju biex jiġu protetti l-interessi kollettivi tal-konsumaturi, biex tiġi żgurata t-tneħħija immedjata ta' paġni web li fihom jew ixerrdu l-pornografija tat-tfal, jew biex jiġi diżattivat l-aċċess għas-servizzi li qed jintużaw minn parti terza biex tikser dritt ta' proprjetà intellettwali, ma jkunux disponibbli b'mod raġonevoli.

(120)

Tali ordni biex jiġi ristrett l-aċċess jenħtieġ li ma tmurx lil hinn minn dak li jkun meħtieġ biex jintlaħaq l-objettiv tagħha. Għal dak l-iskop, jenħtieġ li din tkun temporanja u tiġi indirizzata fil-prinċipju lil fornitur tas-servizzi intermedjarji, bħal pereżempju l-fornitur ta' servizzi ta' hosting rilevanti, il-fornitur tas-servizz tal-internet jew ir-reġistru jew ir-reġistratur tad-dominju, li jkun f'pożizzjoni raġonevoli biex jikseb dak l-objettiv mingħajr ma jirrestrinġi bla bżonn l-aċċess għall-informazzjoni legali.

(121)

Mingħajr preġudizzju għad-dispożizzjonijiet dwar l-eżenzjoni mir-responsabbiltà, previsti f'dan ir-Regolament fir-rigward tal-informazzjoni trażmessa jew maħżuna fuq talba ta' riċevitur tas-servizz, fornitur tas-servizzi intermedjarji jenħtieġ li jkun responsabbli għad-danni mġarrba mir-riċevituri tas-servizz li jkunu kkawżati minn ksur tal-obbligi stabbiliti f'dan ir-Regolament minn dak il-fornitur. Tali kumpens jenħtieġ li jkun f'konformità mar-regoli u l-proċeduri stabbiliti fil-liġi nazzjonali applikabbli u mingħajr preġudizzju għal possibbiltajiet oħra ta' rimedju disponibbli skont ir-regoli tal-protezzjoni tal-konsumatur.

(122)

Jenħtieġ li l-Koordinatur tas-Servizzi Diġitali jippubblika b'mod regolari, pereżempju fuq is-sit web tiegħu, rapport dwar l-attivitajiet imwettqa skont dan ir-Regolament. B'mod partikolari, ir-rapport jenħtieġ li jiġi ppubblikat f'format li jinqara mill-magni u jinkludi ħarsa ġenerali tal-ilmenti li jaslu u tas-segwitu tagħhom, bħan-numru kumplessiv ta' lmenti li jaslu u n-numru ta' lmenti li wasslu għall-ftuħ ta' investigazzjoni formali jew għat-trażmissjoni lil Koordinaturi oħra tas-Servizzi Diġitali, mingħajr ma ssir referenza għal kwalunkwe data personali. Minħabba li l-Koordinatur tas-Servizzi Diġitali jiġi mgħarraf ukoll dwar l-ordnijiet biex tittieħed azzjoni kontra kontenut illegali jew biex tiġi pprovduta informazzjoni, kif regolati minn dan ir-Regolament, bis-sistema ta' kondiviżjoni tal-informazzjoni, jenħtieġ li fir-rapport annwali tiegħu l-Koordinatur tas-Servizzi Diġitali jinkludi l-għadd u l-kategoriji ta' tali ordnijiet indirizzati lill-fornituri tas-servizzi intermedjarji maħruġa mill-awtoritajiet ġudizzjarji u amministrattivi fl-Istat Membru tiegħu.

(123)

Fl-interess taċ-ċarezza, is-sempliċità u l-effettività, is-setgħat għas-superviżjoni u l-infurzar tal-obbligi skont dan ir-Regolament jenħtieġ li tingħata lill-awtoritajiet kompetenti fl-Istat Membru fejn ikun jinsab l-istabbiliment ewlieni tal-fornitur tas-servizzi intermedjarji, jiġifieri, fejn il-fornitur ikollu l-uffiċċju prinċipali jew l-uffiċċju rreġistrat tiegħu li fih jiġu eżerċitati l-funzjonijiet finanzjarji ewlenin u l-kontroll operazzjonali. Fir-rigward tal-fornituri li mhumiex stabbiliti fl-Unjoni, iżda li joffru servizzi fl-Unjoni u għalhekk jaqgħu fil-kamp ta' applikazzjoni ta' dan ir-Regolament, l-Istat Membru fejn dawk il-fornituri jkunu ħatru r-rappreżentant legali tagħhom jenħtieġ li jkollu l-kompetenza, filwaqt li titqies il-funzjoni tar-rappreżentanti legali skont dan ir-Regolament. Madankollu, fl-interess tal-applikazzjoni effettiva ta' dan ir-Regolament jenħtieġ li, fejn applikabbli, l-Istati Membri kollha jew il-Kummissjoni jkollhom il-kompetenza fir-rigward tal-fornituri li jkunu naqsu milli jiddeżinjaw rappreżentant legali. Dik il-kompetenza tista' tiġi eżerċitata minn kwalunkwe waħda mill-awtoritajiet kompetenti jew mill-Kummissjoni, diment li l-fornitur ma jkunx soġġett għal proċedimenti ta' infurzar għall-istess fatti minn awtorità kompetenti oħra jew mill-Kummissjoni. Sabiex jiġi żgurat li l-prinċipju ta' ne bis in idem jiġi rispettat, u b'mod partikolari biex jiġi evitat li l-istess ksur tal-obbligi stabbiliti f'dan ir-Regolament jiġi sanzjonat aktar minn darba, jenħtieġ li kull Stat Membru li jkollu l-ħsieb li jeżerċita l-kompetenza tiegħu fir-rigward ta' tali fornituri, mingħajr dewmien żejjed, jinforma lill-awtoritajiet l-oħra kollha, inkluża l-Kummissjoni, permezz tas-sistema ta' kondiviżjoni tal-informazzjoni stabbilita għall-fini ta' dan ir-Regolament.

(124)

Fid-dawl tal-impatt potenzjali tagħhom u l-isfidi involuti fis-superviżjoni effettiva tagħhom, huma meħtieġa regoli speċjali dwar is-superviżjoni u l-infurzar fir-rigward tal-fornituri ta' pjattaformi online kbar ħafna u ta' magni tat-tiftix online kbar ħafna. Jenħtieġ li l-Kummissjoni tkun responsabbli, bl-appoġġ tal-awtoritajiet kompetenti nazzjonali fejn rilevanti, għas-sorveljanza u l-infurzar pubbliku ta' kwistjonijiet sistemiċi, bħal kwistjonijiet b'impatt wiesa' fuq l-interessi kollettivi tar-riċevituri tas-servizz. Għalhekk, jenħtieġ li l-Kummissjoni jkollha setgħat esklużivi ta' superviżjoni u infurzar tal-obbligi addizzjonali biex timmaniġġja r-riskji sistemiċi imposti fuq il-fornituri ta' pjattaformi online kbar ħafna u ta' magni tat-tiftix online kbar ħafna minn dan ir-Regolament. Is-setgħat esklużivi tal-Kummissjoni jenħtieġ li jkunu mingħajr preġudizzju għal ċerti kompiti amministrattivi assenjati minn dan ir-Regolament lill-awtoritajiet kompetenti tal-Istat Membru tal-istabbiliment, bħall-verifika tar-riċerkaturi.

(125)

Is-setgħat ta' superviżjoni u infurzar tal-obbligi ta' diliġenza dovuta, għajr għall-obbligi addizzjonali biex jiġu mmaniġġjati r-riskji sistemiċi imposti fuq il-fornituri ta' pjattaformi online kbar ħafna u ta' magni tat-tiftix online kbar ħafna minn dan ir-Regolament, jenħtieġ li jiġu kondiviżi mill-Kummissjoni u mill-awtoritajiet kompetenti nazzjonali. Minn naħa waħda, il-Kummissjoni tista' f'ħafna każijiet tkun f'pożizzjoni aħjar biex tindirizza ksur sistemiku mwettaq minn dawk il-fornituri, bħal dawk li jaffettwaw diversi Stati Membri jew ksur serju ripetut jew li jikkonċernaw nuqqas ta' stabbiliment ta' mekkaniżmi effettivi meħtieġa minn dan ir-Regolament. Min-naħa l-oħra, l-awtoritajiet kompetenti fl-Istat Membru fejn jinsab l-istabbiliment ewlieni ta' fornitur ta' pjattaforma online kbira ħafna jew ta' magna tat-tiftix online kbira ħafna jistgħu jkunu f'pożizzjoni aħjar biex jindirizzaw ksur individwali mwettaq minn dawk il-fornituri, li ma jqajjem l-ebda kwistjoni sistemika jew transfruntiera. Fl-interess tal-effiċjenza, biex tiġi evitata d-duplikazzjoni u biex tiġi żgurata l-konformità mal-prinċipju ne bis in idem, jenħtieġ li tkun il-Kummissjoni li tivvaluta jekk tqisx xieraq li teżerċita dawk il-kompetenzi kondiviżi f'każ partikolari u, ladarba tkun bdiet il-proċedimenti, jenħtieġ li l-Istati Membri ma jibqax ikollhom il-kapaċità li jagħmlu dan. Jenħtieġ li l-Istati Membri jikkooperaw mill-qrib kemm bejniethom kif ukoll mal-Kummissjoni, u jenħtieġ li l-Kummissjoni tikkoopera mill-qrib mal-Istati Membri, sabiex tiżgura li s-sistema ta' superviżjoni u infurzar stabbilita permezz ta' dan ir-Regolament tiffunzjona mingħajr xkiel u b'mod effettiv.

(126)

Ir-regoli ta' dan ir-Regolament dwar l-allokazzjoni tal-kompetenza jenħtieġ li jkunu mingħajr preġudizzju għad-dispożizzjonijiet tal-liġi tal-Unjoni u r-regoli nazzjonali dwar l-liġi internazzjonali privata dwar il-ġurisdizzjoni u l-liġi applikabbli f'materji ċivili u kummerċjali, bħall-proċedimenti mressqa mill-konsumaturi fil-qrati tal-Istat Membru fejn ikunu domiċiljati f'konformità mad-dispożizzjonijiet rilevanti tal-liġi tal-Unjoni. Fir-rigward tal-obbligi imposti permezz ta' dan ir-Regolament fuq il-fornituri tas-servizzi intermedjarji biex jinfurmaw lill-awtorità emittenti bl-effett mogħti lill-ordnijiet għal azzjoni kontra kontenut illegali u ordnijiet biex tiġi pprovduta informazzjoni, ir-regoli dwar l-allokazzjoni tal-kompetenza jenħtieġ li japplikaw biss għas-superviżjoni tal-infurzar ta' dawk l-obbligi, iżda mhux għal kwistjonijiet oħra relatati mal-ordni, bħall-kompetenza biex tinħareġ l-ordni.

(127)

Minħabba r-rilevanza transfruntiera u transsettorjali tas-servizzi intermedjarji, huwa meħtieġ livell għoli ta' kooperazzjoni biex tiġi żgurata l-applikazzjoni konsistenti ta' dan ir-Regolament u d-disponibbiltà ta' informazzjoni rilevanti għall-eżerċizzju ta' kompiti ta' infurzar permezz tas-sistema ta' kondiviżjoni tal-informazzjoni. Il-kooperazzjoni tista' tieħu forom differenti skont il-kwistjonijiet involuti, mingħajr preġudizzju għal eżerċizzji speċifiċi ta' investigazzjoni konġunta. Fi kwalunkwe każ huwa meħtieġ li l-Koordinatur tas-Servizzi Diġitali tal-istabbiliment ta' fornitur tas-servizzi intermedjarji jinforma lil Koordinaturi oħra tas-Servizzi Diġitali dwar kwistjonijiet, investigazzjonijiet u azzjonijiet li se jittieħdu fil-konfront ta' tali fornitur. Barra minn hekk, meta awtorità kompetenti fi Stat Membru jkollha informazzjoni rilevanti għal investigazzjoni mwettqa mill-awtoritajiet kompetenti fl-Istat Membru tal-istabbiliment, jew tkun tista' tiġbor tali informazzjoni li tinsab fit-territorju tagħha li l-awtoritajiet kompetenti fl-Istat Membru tal-istabbiliment ma jkollhomx aċċess għaliha, il-Koordinatur tas-Servizzi Diġitali tad-destinazzjoni jenħtieġ li jassisti lill-Koordinatur tas-Servizzi Diġitali tal-istabbiliment b'mod f'waqtu, inkluż permezz tal-eżerċizzju tas-setgħat ta' investigazzjoni tiegħu f'konformità mal-proċeduri nazzjonali applikabbli u l-Karta. Id-destinatarju ta' tali miżuri investigattivi jenħtieġ li jikkonforma magħhom u jkun responsabbli f'każ ta' nuqqas ta' konformità, u jenħtieġ li l-awtoritajiet kompetenti fl-Istat Membru tal-istabbiliment ikunu jistgħu jiddependu fuq l-informazzjoni miġbura permezz ta' assistenza reċiproka, sabiex jiżguraw il-konformità ma' dan ir-Regolament.

(128)

Il-Koordinatur tas-Servizzi Diġitali tad-destinazzjoni, b'mod partikolari abbażi tal-ilmenti li jkunu waslu jew tal-kontribut ta' awtoritajiet kompetenti nazzjonali oħra fejn xieraq, jew il-Bord f'każ ta' kwistjonijiet li jinvolvu mill-inqas tliet Stati Membri, jenħtieġ li jkun jista' jitlob lill-Koordinatur tas-Servizzi Diġitali tal-istabbiliment jieħu azzjonijiet investigattivi jew ta' infurzar fir-rigward ta' fornitur taħt il-kompetenza tiegħu. Tali talbiet għal azzjoni jenħtieġ li jkunu bbażati fuq evidenza sostanzjata sew li turi l-eżistenza ta' ksur allegat b'impatt negattiv fuq l-interessi kollettivi tar-riċevituri tas-servizz fl-Istat Membru tiegħu jew li jkollu impatt negattiv fuq is-soċjetà. Jenħtieġ li l-Koordinatur tas-Servizzi Diġitali tal-istabbiliment ikun jista' jiddependi fuq l-assistenza reċiproka jew jistieden lill-Koordinatur tas-Servizzi Diġitali rikjedenti għal investigazzjoni konġunta f'każ li tkun meħtieġa aktar informazzjoni biex tittieħed deċiżjoni, mingħajr preġudizzju għall-possibbiltà li l-Kummissjoni tintalab tivvaluta l-kwistjoni jekk ikollha raġuni biex tissuspetta li jista' jkun hemm riskju ta' ksur sistemiku minn pjattaforma online kbira ħafna jew minn magna tat-tiftix online kbira ħafna.

(129)

Jenħtieġ li l-Bord ikun jista' jirreferi l-kwistjoni lill-Kummissjoni f'każ ta' kwalunkwe nuqqas ta' qbil fir-rigward tal-valutazzjonijiet jew tal-miżuri meħuda jew li ġew proposti jew f'każ ta' nuqqas li jiġu adottati xi miżuri f'konformità ma' dan ir-Regolament b'segwitu għal talba ta' kooperazzjoni transfruntiera jew investigazzjoni konġunta. Meta l-Kummissjoni, abbażi tal-informazzjoni magħmula disponibbli mill-awtoritajiet ikkonċernati, tqis li l-miżuri proposti, inkluż il-livell propost ta' multi, ma jistgħux jiżguraw l-infurzar effettiv tal-obbligi stipulati f'dan ir-Regolament, jenħtieġ li tkun tista' għalhekk tesprimi d-dubji serji tagħha u titlob lill-Koordinatur tas-Servizzi Diġitali kompetenti jivvaluta mill-ġdid il-kwistjoni u jieħu l-miżuri meħtieġa biex tiġi żgurata l-konformità ma' dan ir-Regolament f'perjodu definit. Din il-possibbiltà hija mingħajr preġudizzju għad-dmir ġenerali tal-Kummissjoni li tissorvelja l-applikazzjoni tal-liġi tal-Unjoni fil-kontroll tal-Qorti tal-Ġustizzja tal-Unjoni Ewropea f'konformità mat-Trattati, u fejn meħtieġ tinfurzaha.

(130)

Sabiex jiġu ffaċilitati l-investigazzjonijiet u s-superviżjoni transfruntiera tal-obbligi stipulati f'dan ir-Regolament li jinvolvu bosta Stati Membri, jenħtieġ li l-Koordinaturi tas-Servizzi Diġitali tal-istabbiliment ikunu jistgħu, permezz tas-sistema ta' kondiviżjoni tal-informazzjoni, jistiednu Koordinaturi oħra tas-Servizzi Diġitali għal investigazzjoni konġunta dwar ksur allegat ta' dan ir-Regolament. Jenħtieġ li Koordinaturi oħra tas-Servizzi Diġitali, u fejn xieraq, awtoritajiet kompetenti oħra, ikunu jistgħu jingħaqdu fl-investigazzjoni proposta mill-Koordinatur tas-Servizzi Diġitali tal-istabbiliment, sakemm dan tal-aħħar ma jqisx li għadd eċċessiv ta' awtoritajiet parteċipanti jista' jaffettwa l-effettività tal-investigazzjoni b'kont meħud tal-karatteristiċi tal-ksur allegat u n-nuqqas ta' effetti diretti fuq ir-riċevituri tas-servizz f'dawk l-Istati Membri. L-attivitajiet ta' investigazzjoni konġunta jistgħu jinkludu varjetà ta' azzjonijiet li għandhom jiġu kkoordinati mill-Koordinatur tas-Servizzi Diġitali tal-istabbiliment f'konformità mad-disponibbiltajiet tal-awtoritajiet parteċipanti, bħal eżerċizzji kkoordinati ta' ġbir ta' data, akkomunament ta' riżorsi, task forces, talbiet koordinati għal informazzjoni jew spezzjonijiet komuni fl-istabbilimenti. L-awtoritajiet kompetenti kollha li jipparteċipaw f'investigazzjoni konġunta jenħtieġ li jikkooperaw mal-Koordinatur tas-Servizzi Diġitali tal-istabbiliment, inkluż billi jeżerċitaw is-setgħat ta' investigazzjoni tagħhom fit-territorju tagħhom, f'konformità mal-proċeduri nazzjonali applikabbli. L-investigazzjoni konġunta jenħtieġ li tiġi konkluża f'perjodu ta' żmien partikolari b'rapport finali li jqis il-kontribut tal-awtoritajiet kompetenti parteċipanti kollha. Barra minn hekk, il-Bord, fuq talba ta' mill-inqas tliet Koordinaturi tas-Servizzi Diġitali tad-destinazzjoni, jista' jirrakkomanda lil Koordinatur tas-Servizzi Diġitali tal-istabbiliment biex iniedi tali investigazzjoni konġunta u jagħti indikazzjonijiet dwar l-organizzazzjoni tagħha. Sabiex jiġi evitat l-istaġnar, jenħtieġ li l-Bord ikun jista' jirreferi l-kwistjoni lill-Kummissjoni f'każijiet speċifiċi, inkluż meta l-Koordinatur tas-Servizzi Diġitali tal-istabbiliment jirrifjuta li jniedi l-investigazzjoni u l-Bord ma jaqbilx mal-ġustifikazzjoni mogħtija.

(131)

Biex tiġi żgurata applikazzjoni konsistenti ta' dan ir-Regolament, huwa meħtieġ li jiġi stabbilit grupp konsultattiv indipendenti fil-livell tal-Unjoni, Bord Ewropew għas-Servizzi Diġitali, li jappoġġa lill-Kummissjoni u jgħin fil-koordinazzjoni tal-azzjonijiet tal-Koordinaturi tas-Servizzi Diġitali. Jenħtieġ li l-Bord ikun jikkonsisti mill-Koordinaturi tas-Servizzi Diġitali, meta dawn ikunu ġew maħtura, mingħajr preġudizzju għall-possibbiltà li l-Koordinaturi tas-Servizzi Diġitali fil-laqgħat tiegħu jistiednu jew jaħtru delegati ad hoc minn awtoritajiet kompetenti oħra inkarigati b'kompiti speċifiċi skont dan ir-Regolament, meta dak ikun meħtieġ skont l-allokazzjoni nazzjonali tagħhom tal-kompiti u tal-kompetenzi. Fil-każ ta' parteċipanti multipli minn Stat Membru wieħed, jenħtieġ li d-dritt tal-vot jibqa' limitat għal rappreżentant wieħed għal kull Stat Membru.

(132)

Jenħtieġ li l-Bord jikkontribwixxi għall-kisba ta' perspettiva komuni tal-Unjoni dwar l-applikazzjoni konsistenti ta' dan ir-Regolament u għall-kooperazzjoni fost l-awtoritajiet kompetenti, inkluż billi jagħti parir lill-Kummissjoni u lill-Koordinaturi tas-Servizzi Diġitali dwar miżuri xierqa ta' investigazzjoni u ta' infurzar, b'mod partikolari fir-rigward tal-fornituri ta' pjattaformi online kbar ħafna jew ta’ magni tat-tiftix online kbar ħafna u filwaqt li jqis, b'mod partikolari, il-libertà tal-fornituri tas-servizzi intermedjarji li jipprovdu servizzi madwar l-Unjoni. Jenħtieġ li l-Bord jikkontribwixxi wkoll għat-tfassil ta' kodiċijiet ta' kondotta u mudelli rilevanti u għall-analiżi tax-xejriet ġenerali emerġenti fl-iżvilupp tas-servizzi diġitali fl-Unjoni, inkluż billi joħroġ opinjonijiet jew rakkomandazzjonijiet dwar kwistjonijiet relatati mal-istandards.

(133)

Għal dak il-għan, jenħtieġ li l-Bord ikun jista' jadotta opinjonijiet, talbiet u rakkomandazzjonijiet indirizzati lill-Koordinaturi tas-Servizzi Diġitali jew lil awtoritajiet kompetenti oħra. Għalkemm dawn mhumiex legalment vinkolanti, id-deċiżjoni ta' deroga minnhom jenħtieġ li tkun spjegata sew u tkun tista' titqies mill-Kummissjoni fil-valutazzjoni tal-konformità tal-Istat Membru kkonċernat b'dan ir-Regolament.

(134)

Jenħtieġ li l-Bord jiġbor flimkien ir-rappreżentanti tal-Koordinaturi tas-Servizzi Diġitali u ta' awtoritajiet kompetenti oħra possibbli taħt il-presidenza tal-Kummissjoni, bil-għan li jiżgura valutazzjoni tal-kwistjonijiet sottomessi lilu f'dimensjoni kompletament Ewropea. Fid-dawl ta' elementi trasversali possibbli li jistgħu jkunu ta' rilevanza għal oqfsa regolatorji oħra fil-livell tal-Unjoni, jenħtieġ li l-Bord jitħalla jikkoopera ma' korpi, uffiċċji, aġenziji u gruppi konsultattivi oħra tal-Unjoni b'responsabbiltajiet f'oqsma bħal pereżempju l-ugwaljanza, inkluża l-ugwaljanza bejn il-ġeneri, u n-nondiskriminazzjoni, il-protezzjoni tad-data, il-komunikazzjonijiet elettroniċi, is-servizzi awdjoviżivi, id-detezzjoni u l-investigazzjoni tal-frodi kontra l-baġit tal-Unjoni fir-rigward tad-dazji doganali, jew il-liġi tal-kompetizzjoni, kif meħtieġ għat-twettiq tal-kompiti tiegħu.

(135)

Il-Kummissjoni, permezz tal-President, jenħtieġ li tipparteċipa fil-Bord mingħajr drittijiet tal-vot. Permezz tal-President, il-Kummissjoni jenħtieġ li tiżgura li l-aġenda tal-laqgħat tiġi stabbilita f'konformità mat-talbiet tal-membri tal-Bord kif stipulat fir-regoli ta' proċedura u f'konformità mal-kompiti tal-Bord stabbiliti f'dan ir-Regolament.

(136)

Fid-dawl tal-ħtieġa li jiġi żgurat appoġġ għall-attivitajiet tal-Bord, jenħtieġ li l-Bord ikun jista' jiddependu fuq l-għarfien espert u r-riżorsi umani tal-Kummissjoni u tal-awtoritajiet nazzjonali kompetenti. L-arranġamenti operattivi speċifiċi għall-funzjonament intern tal-Bord jenħtieġ li jiġu speċifikati ulterjorment fir-regoli ta' proċedura tal-Bord.

(137)

Minħabba l-importanza tal-pjattaformi online kbar ħafna jew il-magni tat-tiftix online kbar ħafna, fid-dawl tal-ilħuq u tal-impatt tagħhom, in-nuqqas tagħhom li jikkonformaw mal-obbligi speċifiċi applikabbli għalihom jista' jaffettwa għadd sostanzjali ta' riċevituri tas-servizzi fi Stati Membri differenti u jista' jikkawża danni soċjetali kbar, filwaqt li tali nuqqas jista' jkun partikolarment kumpless biex jiġi identifikat u indirizzat. Għal din ir-raġuni, jenħtieġ li l-Kummissjoni, f'kooperazzjoni mal-Koordinaturi tas-Servizzi Diġitali u l-Bord, tiżviluppa l-għarfien espert u l-kapaċitajiet tal-Unjoni fir-rigward tas-superviżjoni ta' pjattaformi online kbar ħafna jew magni tat-tiftix online kbar ħafna. Għalhekk, jenħtieġ li l-Kummissjoni tkun tista' tikkoordina u sserraħ fuq l-għarfien espert u r-riżorsi ta' dawn l-awtoritajiet, pereżempju billi tanalizza, fuq bażi permanenti jew temporanja, xejriet jew kwistjonijiet speċifiċi emerġenti fir-rigward ta' pjattaforma online kbira ħafna waħda jew aktar jew magna tat-tiftix online kbira ħafna waħda jew aktar. Jenħtieġ li l-Istati Membri jikkooperaw mal-Kummissjoni fl-iżvilupp ta' tali kapaċitajiet, inkluż permezz tas-sekondar ta' persunal fejn xieraq, u fil-kontribut għall-ħolqien ta' kapaċità superviżorja komuni tal-Unjoni. Sabiex tiżviluppa l-għarfien espert u l-kapaċitajiet tal-Unjoni, il-Kummissjoni tista' tuża wkoll l-għarfien espert u l-kapaċitajiet tal-Osservatorju dwar l-Ekonomija tal-Pjattaformi Online kif stabbilit fid-Deċiżjoni tal-Kummissjoni tas-26 ta' April 2018 dwar l-istabbiliment ta' grupp ta' esperti għall-Osservatorju dwar l-Ekonomija tal-Pjattaformi Onlajn, il-korpi ta' esperti rilevanti, kif ukoll iċ-ċentri ta' eċċellenza. Il-Kummissjoni tista' tistieden esperti b'għarfien espert speċifiku, inkluż b'mod partikolari riċerkaturi verifikati, rappreżentanti tal-aġenziji u l-korpi tal-Unjoni, rappreżentanti tal-industrija, assoċjazzjonijiet li jirrappreżentaw l-utenti jew is-soċjetà ċivili, organizzazzjonijiet internazzjonali, esperti mis-settur privat, kif ukoll partijiet ikkonċernati oħra.

(138)

Jenħtieġ li l-Kummissjoni tkun tista' tinvestiga ksur fuq inizjattiva proprja f'konformità mas-setgħat previsti f'dan ir-Regolament, inkluż billi titlob aċċess għad-data, billi titlob informazzjoni jew billi twettaq spezzjonijiet, kif ukoll billi sserraħ fuq l-appoġġ tal-Koordinaturi tas-Servizzi Diġitali. Meta s-superviżjoni mill-awtoritajiet nazzjonali kompetenti ta' ksur allegat individwali minn fornituri ta' pjattaformi online kbar ħafna jew ta' magni tat-tiftix online kbar ħafna tindika kwistjonijiet sistemiċi, bħal kwistjonijiet b'impatt wiesa' fuq l-interessi kollettivi tar-riċevituri tas-servizz, jenħtieġ li l-Koordinaturi tas-Servizzi Diġitali jkunu jistgħu, abbażi ta' talba debitament motivata, jirreferu dawn il-kwistjonijiet lill-Kummissjoni. Talba bħal din jenħtieġ li tinkludi, mill-inqas, il-fatti u ċ-ċirkostanzi kollha meħtieġa li jsostnu l-ksur allegat u n-natura sistemika tiegħu. Skont l-eżitu tal-valutazzjoni proprja, jenħtieġ li l-Kummissjoni tkun tista' tieħu l-miżuri investigattivi u ta' infurzar meħtieġa skont dan ir-Regolament, inklużi, fejn rilevanti, it-tnedija ta' investigazzjoni jew l-adozzjoni ta' miżuri interim.

(139)

Sabiex twettaq il-kompiti tagħha b'mod effettiv, jenħtieġ li l-Kummissjoni żżomm marġni ta' diskrezzjoni fir-rigward tad-deċiżjoni li jinbdew proċedimenti kontra fornituri ta' pjattaformi online kbar ħafna jew ta' magni tat-tiftix online kbar ħafna. Ladarba l-Kummissjoni tkun tat bidu għall-proċedimenti, il-Koordinaturi tas-Servizzi Diġitali tal-istabbiliment ikkonċernati jenħtieġ li jiġu preklużi milli jeżerċitaw is-setgħat ta’ investigazzjoni u ta' infurzar tagħhom fir-rigward tal-kondotta kkonċernata tal-fornitur tal-pjattaforma online kbira ħafna jew ta' magna tat-tiftix online kbira ħafna, sabiex jiġu evitati l-irduppjar, l-inkonsistenzi u r-riskji mill-perspettiva tal-prinċipju ne bis in idem. Madankollu, jenħtieġ li l-Kummissjoni tkun tista' titlob il-kontribut individwali jew konġunt tal-Koordinaturi tas-Servizzi Diġitali għall-investigazzjoni. F'konformità mad-dmir ta' kooperazzjoni sinċiera, il-Koordinatur tas-Servizzi Diġitali jenħtieġ li jagħmel l-aħjar sforzi tiegħu biex jissodisfa talbiet ġustifikati u proporzjonati mill-Kummissjoni fil-kuntest ta' investigazzjoni. Barra minn hekk, jenħtieġ li l-Koordinatur tas-Servizzi Diġitali tal-istabbiliment, kif ukoll il-Bord u kwalunkwe Koordinatur tas-Servizzi Diġitali ieħor fejn rilevanti, jipprovdu lill-Kummissjoni l-informazzjoni u l-assistenza kollha meħtieġa biex tkun tista' twettaq il-kompiti tagħha b'mod effettiv, inkluża informazzjoni miġbura fil-kuntest ta' eżerċizzji ta' ġbir ta' data jew ta' aċċess għad-data, sakemm dan ma jkunx prekluż mill-bażi legali li skontha tkun inġabret l-informazzjoni. Min-naħa l-oħra, jenħtieġ li l-Kummissjoni żżomm lill-Koordinatur tas-Servizzi Diġitali tal-istabbiliment u lill-Bord infurmati dwar l-eżerċizzju tas-setgħat tagħha u b'mod partikolari meta jkollha l-ħsieb li tibda l-proċediment u teżerċita s-setgħat ta’ investigazzjoni tagħha. Barra minn hekk, meta l-Kummissjoni tikkomunika s-sejbiet preliminari tagħha, inkluż kwalunkwe kwistjoni li toġġezzjona għaliha, lill-fornituri ta' pjattaformi online kbar ħafna jew ta' magni tat-tiftix online kbar ħafna kkonċernati, jenħtieġ li hija tikkomunikahom ukoll lill-Bord. Jenħtieġ li l-Bord jipprovdi l-fehmiet tiegħu dwar l-oġġezzjonijiet u l-valutazzjoni magħmula mill-Kummissjoni, li jenħtieġ li tqis din l-opinjoni fir-raġunament li jirfed id-deċiżjoni finali tagħha.

(140)

Fid-dawl tal-isfidi partikolari li jistgħu jinqalgħu fl-isforz li tiġi żgurata l-konformità mill-fornituri ta' pjattaformi online kbar ħafna jew ta' magni tat-tiftix online kbar ħafna u l-importanza li dan isir b'mod effettiv, meta jitqiesu d-daqs u l-impatt tagħhom u d-danni li jistgħu jikkawżaw, jenħtieġ li l-Kummissjoni jkollha setgħat qawwijin ta' investigazzjoni u ta' infurzar biex tkun tista' tinvestiga, tinforza u timmonitorja l-konformità mar-regoli stabbiliti f'dan ir-Regolament, b'rispett sħiħ tad-dritt fundamentali li wieħed jinstema' u li jingħata aċċess għall-fajl fil-kuntest tal-proċedimenti tal-infurzar, tal-prinċipju tal-proporzjonalità u d-drittijiet u l-interessi tal-partijiet affettwati.

(141)

Jenħtieġ li l-Kummissjoni tkun tista' titlob l-informazzjoni meħtieġa għall-fini li tiżgura l-implimentazzjoni effettiva tal-obbligi stipulati f'dan ir-Regolament u l-konformità magħhom, fl-Unjoni kollha. B'mod partikolari, jenħtieġ li l-Kummissjoni jkollha aċċess għal kwalunkwe dokumenti, data u informazzjoni rilevanti meħtieġa biex tiftaħ u twettaq investigazzjoni u biex timmonitorja l-konformità mal-obbligi rilevanti stabbiliti f'dan ir-Regolament, irrispettivament minn min ikollu d-dokumenti, id-data jew l-informazzjoni inkwistjoni, u irrispettivament mill-forma jew mill-format tagħhom, mill-mezz tal-ħżin tagħhom jew mill-post preċiż fejn jinħażnu. Jenħtieġ li l-Kummissjoni tkun tista' titlob direttament permezz ta' talba għal informazzjoni debitament motivata li l-fornitur ikkonċernat tal-pjattaforma online kbira ħafna jew tal-magna tat-tiftix online kbira ħafna kif ukoll kwalunkwe persuna fiżika jew ġuridika oħra li taġixxi għal finijiet relatati mal-kummerċ, in-negozju, is-sengħa jew il-professjoni tagħha li tista' b'mod raġonevoli tkun konxja ta' informazzjoni relatata mal-ksur issuspettat jew il-ksur, kif applikabbli, jipprovdu kwalunkwe evidenza, data u informazzjoni rilevanti. Barra minn hekk, jenħtieġ li l-Kummissjoni tkun tista' titlob kwalunkwe informazzjoni rilevanti mingħand kwalunkwe awtorità pubblika, korp jew aġenzija fl-Istat Membru għall-finijiet ta' dan ir-Regolament. Jenħtieġ li l-Kummissjoni tkun tista' titlob aċċess, u spjegazzjonijiet permezz tal-eżerċizzju ta' setgħat ta’ investigazzjoni, bħal talbiet għal informazzjoni jew intervisti relatati ma' dokumenti, data, informazzjoni, bażijiet tad-data u algoritmi tal-persuni rilevanti, u li tintervista, bil-kunsens tagħha, kwalunkwe persuna fiżika jew ġuridika li jista' jkollha informazzjoni utli u li tirreġistra d-dikjarazzjonijiet li jsiru bi kwalunkwe mezz tekniku. Jenħtieġ ukoll li l-Kummissjoni tingħata s-setgħa li twettaq tali verifiki li jkunu meħtieġa biex tinforza d-dispożizzjonijiet rilevanti ta' dan ir-Regolament. Dawk is-setgħat ta' investigazzjoni għandhom l-għan li jikkomplementaw il-possibbiltà tal-Kummissjoni li titlob assistenza mill-Koordinaturi tas-Servizzi Diġitali u minn awtoritajiet oħra tal-Istati Membri assistenza, pereżempju billi jipprovdu informazzjoni jew fl-eżerċizzju ta' dawk is-setgħat.

(142)

Il-miżuri interim jistgħu jkunu għodda importanti biex jiġi żgurat li, filwaqt li tkun għaddejja investigazzjoni, il-ksur li jkun qed jiġi investigat ma jwassalx għar-riskju ta' dannu serju għar-riċevituri tas-servizz. Din l-għodda hija importanti biex jiġu evitati żviluppi li jistgħu jkunu diffiċli ħafna li jitreġġgħu lura b'deċiżjoni meħuda mill-Kummissjoni fi tmiem il-proċedimenti. Għalhekk, jenħtieġ li l-Kummissjoni jkollha s-setgħa li timponi miżuri interim permezz ta' deċiżjoni fil-kuntest ta' proċedimenti miftuħa bil-ħsieb tal-adozzjoni possibbli ta' deċiżjoni ta' nonkonformità. Jenħtieġ li din is-setgħa tapplika f'każijiet fejn il-Kummissjoni tkun għamlet sejba prima facie ta' ksur tal-obbligi skont dan ir-Regolament mill-fornitur ta' pjattaforma online kbira ħafna jew ta' magna tat-tiftix online kbira ħafna. Jenħtieġ li deċiżjoni li jiġu imposti miżuri interim tkun tapplika biss għal perjodu speċifikat, jew sakemm il-proċedimenti mill-Kummissjoni jiġu konklużi, inkella għal perjodu ta' żmien fiss li jista' jiġġedded diment li dan ikun neċessarju u xieraq.

(143)

Jenħtieġ li l-Kummissjoni tkun tista' tieħu l-azzjonijiet meħtieġa biex tissorvelja l-implimentazzjoni effettiva tal-obbligi stipulati f'dan ir-Regolament u l-konformità magħhom. Jenħtieġ li dawn l-azzjonijiet jinkludu l-abbiltà li taħtar esperti esterni indipendenti, u awdituri biex jassistuha f'dan il-proċess, inkluż, fejn applikabbli, minn awtoritajiet kompetenti tal-Istati Membri, bħalma huma l-awtoritajiet tal-protezzjoni tad-data jew tal-konsumatur. Meta taħtar l-awdituri, jenħtieġ li l-Kummissjoni tiżgura rotazzjoni suffiċjenti.

(144)

Il-konformità mal-obbligi rilevanti imposti skont dan ir-Regolament jenħtieġ li tkun tista' tiġi infurzata permezz ta' multi u pagamenti perjodiċi ta' penali. Għal dak il-għan, jenħtieġ li jiġu stipulati wkoll livelli xierqa ta' multi u pagamenti perjodiċi ta' penali għan-nuqqas ta' konformità mal-obbligi u għall-ksur tar-regoli proċedurali, soġġetti għal perjodi ta' limitazzjoni xierqa f'konformità mal-prinċipji ta' proporzjonalità u ta' ne bis in idem. Jenħtieġ li l-Kummissjoni u l-awtoritajiet nazzjonali rilevanti jikkoordinaw l-isforzi ta' infurzar tagħhom sabiex jiżguraw li dawk il-prinċipji jiġu rispettati. B'mod partikolari, jenħtieġ li l-Kummissjoni tqis kwalunkwe multa u penali imposti fuq l-istess persuna ġuridika għall-istess fatti permezz ta' deċiżjoni finali fi proċedimenti relatati ma' ksur ta' regoli oħra tal-Unjoni jew nazzjonali, sabiex tiżgura li l-multi u l-penali globali imposti jkunu proporzjonati u jikkorrispondu għas-serjetà tal-ksur imwettaq. Id-deċiżjonijiet kollha meħuda mill-Kummissjoni skont dan ir-Regolament huma soġġetti għal rieżami mill-Qorti tal-Ġustizzja tal-Unjoni Ewropea f'konformità mat-TFUE. Jenħtieġ li l-Qorti tal-Ġustizzja tal-Unjoni Ewropea jkollha ġuriżdizzjoni bla limitu fir-rigward tal-multi u l-pagamenti ta' penali skont l-Artikolu 261 tat-TFUE.

(145)

Minħabba l-effetti sinifikanti potenzjali fuq is-soċjetà ta' ksur tal-obbligi addizzjonali għall-ġestjoni ta’ riskju sistematiċi li japplikaw biss għal pjattaformi online kbar ħafna u magni tat-tiftix online kbar ħafna u sabiex jiġi indirizzat dak it-tħassib dwar l-ordni pubbliku, huwa meħtieġ li tiġi prevista sistema ta' superviżjoni msaħħa ta' kwalunkwe azzjoni meħuda biex ittemm u tirrimedja b'mod effettiv il-ksur ta' dan ir-Regolament. Għalhekk, ladarba ksur ta' waħda mid-dispożizzjonijiet ta' dan ir-Regolament li japplikaw biss għal pjattaformi online kbar ħafna jew għal magni tat-tiftix online kbar ħafna jkun ġie aċċertat u, fejn meħtieġ, sanzjonat, jenħtieġ li l-Kummissjoni titlob lill-fornitur ta' tali pjattaforma jew ta' tali magna tat-tiftix ifassal pjan ta' azzjoni dettaljat biex jirrimedja kwalunkwe effett tal-ksur għall-futur u jikkomunika dan il-pjan ta' azzjoni fi skeda ta' żmien stabbilita mill-Kummissjoni, lill-Koordinaturi tas-Servizzi Diġitali, lill-Kummissjoni u lill-Bord. Jenħtieġ li l-Kummissjoni, filwaqt li tqis l-opinjoni tal-Bord, tistabbilixxi jekk il-miżuri inklużi fil-pjan ta' azzjoni humiex biżżejjed biex jindirizzaw il-ksur, filwaqt li tqis ukoll jekk l-aderenza mal-kodiċi ta' kondotta rilevanti hijiex inkluża fost il-miżuri proposti. Jenħtieġ li l-Kummissjoni timmonitorja wkoll kwalunkwe miżura sussegwenti meħuda mill-fornitur ikkonċernat ta' pjattaforma online kbira ħafna jew ta' magni tat-tiftix online kbira ħafna kif stipulat fil-pjan ta' azzjoni tiegħu, filwaqt li tqis ukoll awditu indipendenti tal-fornitur. Jekk wara l-implimentazzjoni tal-pjan ta' azzjoni l-Kummissjoni xorta tqis li l-ksur ma ġiex rimedjat kompletament, jew jekk il-pjan ta' azzjoni ma ġiex ipprovdut jew jitqies mhux xieraq, jenħtieġ li hija tkun tista' tuża kwalunkwe setgħa ta’ investigazzjoni jew ta' infurzar skont dan ir-Regolament, inkluż is-setgħa li timponi pagamenti perjodiċi ta' penali u li tagħti bidu għall-proċedura biex jiġi diżattivat l-aċċess għas-servizz li jkun qed iwettaq il-ksur.

(146)

Il-fornitur ikkonċernat tal-pjattaforma online kbira ħafna jew tal-magna tat-tiftix online kbira ħafna u persuni oħra soġġetti għall-eżerċizzju tas-setgħat tal-Kummissjoni li l-interessi tagħhom jistgħu jiġu affettwati minn deċiżjoni, jenħtieġ li jingħataw l-opportunità li jissottomettu l-osservazzjonijiet tagħhom minn qabel, u d-deċiżjonijiet meħuda jenħtieġ li jiġu ppubblikati b'mod mifrux. Filwaqt li jiġu żgurati d-drittijiet ta' difiża tal-partijiet ikkonċernati, b'mod partikolari d-dritt ta' aċċess għall-fajl, huwa essenzjali li tiġi protetta l-informazzjoni kunfidenzjali. Barra minn hekk, filwaqt li tiġi rispettata l-kunfidenzjalità tal-informazzjoni, jenħtieġ li l-Kummissjoni tiżgura li kwalunkwe informazzjoni li tkun użat biex tieħu d-deċiżjoni tagħha tiġi żvelata sal-punt li jippermetti d-destinatarju tad-deċiżjoni jifhem il-fatti u l-kunsiderazzjonijiet li wasslu għad-deċiżjoni.

(147)

Sabiex jiġu salvagwardati l-applikazzjoni u l-infurzar armonizzati ta' dan ir-Regolament, huwa importanti li jiġi żgurat li l-awtoritajiet nazzjonali, inklużi l-qrati nazzjonali, ikollhom l-informazzjoni kollha meħtieġa biex jiżguraw li d-deċiżjonijiet tagħhom ma jmorrux kontra deċiżjoni adottata mill-Kummissjoni skont dan ir-Regolament. Dan huwa mingħajr preġudizzju għall-Artikolu 267 tat-TFUE.

(148)

L-infurzar u l-monitoraġġ effettivi ta' dan ir-Regolament jirrikjedu skambju ta' informazzjoni bla xkiel u f'ħin reali fost il-Koordinaturi tas-Servizzi Diġitali, il-Bord u l-Kummissjoni, abbażi tal-flussi ta' informazzjoni u l-proċeduri stabbiliti f'dan ir-Regolament. Dan, fejn xieraq, jista' wkoll jiġġustifika aċċess għal din is-sistema minn awtoritajiet kompetenti oħra. Fl-istess ħin, minħabba li l-informazzjoni skambjata tista' tkun kunfidenzjali jew tinvolvi data personali, jenħtieġ li tibqa' protetta minn aċċess mhux awtorizzat, f'konformità mal-finijiet li għalihom tkun inġabret l-informazzjoni. Għal din ir-raġuni, il-komunikazzjonijiet kollha bejn dawk l-awtoritajiet jenħtieġ li jsiru abbażi ta' sistema affidabbli u sigura ta' kondiviżjoni ta' informazzjoni, li d-dettalji tagħha jenħtieġ li jiġu stipulati f'att ta' implimentazzjoni. Is-sistema ta' kondiviżjoni tal-informazzjoni tista' tkun ibbażata fuq għodod eżistenti tas-suq intern, sal-punt li dawn ikunu jistgħu jilħqu l-objettivi ta' dan ir-Regolament b'mod kosteffettiv.

(149)

Mingħajr preġudizzju għad-drittijiet tar-riċevituri tas-servizzi li jirrikorru għal rappreżentant f'konformità mad-Direttiva (UE) 2020/1828 tal-Parlament Ewropew u tal-Kunsill (33) jew għal kwalunkwe tip ta' rappreżentanza skont il-liġi nazzjonali, ir-riċevituri tas-servizzi jenħtieġ li jkollhom ukoll id-dritt li jagħtu mandat lil persuna ġuridika jew lil korp pubbliku biex jeżerċitaw id-drittijiet tagħhom previsti f'dan ir-Regolament. Tali drittijiet jistgħu jinkludu d-drittijiet ta' servizzi relatati mas-sottomissjoni ta' avviżi, il-kontestazzjoni tad-deċiżjonijiet meħuda mill-fornituri tas-servizzi intermedjarji, u t-tressiq ta' lmenti kontra l-fornituri għall-ksur ta' dan ir-Regolament. Ċerti korpi, organizzazzjonijiet u assoċjazzjonijiet għandhom għarfien espert u kompetenza partikolari fil-kxif u s-senjalar ta' deċiżjonijiet żbaljati jew mhux ġustifikati dwar il-moderazzjoni tal-kontenut, u l-ilmenti tagħhom f'isem ir-riċevituri tas-servizz jista' jkollhom impatt pożittiv fuq il-libertà tal-espressjoni u tal-informazzjoni b'mod ġenerali, u għalhekk, jenħtieġ li l-fornituri ta’ pjattaformi online jittrattaw dawk l-ilmenti mingħajr dewmien żejjed.

(150)

Fl-interess tal-effettività u tal-effiċjenza, jenħtieġ li l-Kummissjoni twettaq evalwazzjoni ġenerali ta’ dan ir-Regolament. B'mod partikolari, jenħtieġ li dik l-evalwazzjoni ġenerali tindirizza, fost l-oħrajn, il-kamp ta' applikazzjoni tas-servizzi koperti minn dan ir-Regolament, l-interazzjoni ma' atti legali oħra, l-impatt ta' dan ir-Regolament fuq il-funzjonament tas-suq intern, b'mod partikolari fir-rigward tas-servizzi diġitali, l-implimentazzjoni ta’ kodiċijit ta’ kondotta, l-obbligu li jiġi ddeżinjat rappreżentant legali stabbilit fl-Unjoni, l-effett tal-obbligi fuq l-intrapriżi żgħar u mikro, l-effettività tal-mekkaniżmu ta' superviżjoni u ta' infurzar u l-impatt fuq id-dritt għal-libertà tal-espressjoni u tal-informazzjoni. Barra minn hekk, biex tevita piżijiet sproporzjonati u tiżgura l-effettività kontinwa ta' dan ir-Regolament, jenħtieġ li l-Kummissjoni twettaq evalwazzjoni tal-impatt tal-obbligi stabbiliti f’dan ir-Regolament fuq l-intrapriżi żgħar u ta' daqs medju fi żmien tliet snin mill-bidu tal-applikazzjoni tiegħu u evalwazzjoni tal-kamp ta' applikazzjoni tas-servizzi koperti minn dan ir-Regolament, b'mod partikolari għal pjattaformi online kbar ħafna u għal magni tat-tiftix online kbar ħafna, u l-interazzjoni ma' atti legali oħra fi żmien tliet snin mid-dħul fis-seħħ tiegħu.

(151)

Sabiex ikunu żgurati kondizzjonijiet uniformi għall-implimentazzjoni ta' dan ir-Regolament, jenħtieġ li jingħataw setgħat ta' implimentazzjoni lill-Kummissjoni biex tistabbilixxi mudelli dwar il-forma, il-kontenut u dettalji oħra' ta’ rapporti dwar il-moderazzjoni tal-kontenut biex jiġi stabbilit l-ammont tat-tariffa superviżorja annwali imposta fuq fornituri ta’ pjattaformi online kbar ħafna u ta’ magni tat-tiftix online kbar ħafna, biex jiġu stabbiliti l-arranġamenti prattiċi għall-proċedimenti, is-seduti ta’ smigħ, l-iżvelar negozjat tal-informazzjoni mwettaq fil-kuntest tas-superviżjoni, l-investigazzjoni, l-infurzar u l-monitoraġġ fir-rigward tal-fornituri ta’ pjattaformi online kbar ħafna u ta’ magni tat-tiftix online kbar ħafna, kif ukoll biex jiġu stabbiliti l-arranġamenti prattiċi u operazzjonali għall-funzjonament tas-sistema ta’ kondiviżjoni ta’ informazzjoni u l-interoperabbiltà tagħha ma’ sistemi rilevanti oħra. Jenħtieġ li dawk is-setgħat ikunu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (34).

(152)

Biex jiġu ssodisfati l-objettivi ta' dan ir-Regolament, jenħtieġ li tiġi ddelata lill-Kummissjoni s-setgħa li tadotta atti skont l-Artikolu 290 tat-TFUE tiġi delegata lill-Kummissjoni biex tissupplimenta dan ir-Regolamentfir-rigward tal-kriterji għall-identifikazzjoni ta’ pjattaformi online kbar ħafna u ta’ magni tat-tiftix online kbar ħafna, il-passi, il-metodoloġiji u l-mudelli tar-rapportar għall-awditi, u l-ispeċifikazzjonijiet tekniċi għat-talbiet ta' aċċess u l-metodoloġiji u l-proċeduri dettaljati għall-istabbiliment tat-tariffa superviżorja. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol ta’ tħejjija tagħha, ukoll fil-livell ta’ esperti, u li dawk il-konsultazzjonijiet jiġu mwettqa f'konformità mal-prinċipji stabbiliti fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (35). B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(153)

Dan ir-Regolament jirrispetta d-drittijiet fundamentali rikonoxxuti mill-Karta u d-drittijiet fundamentali li jikkostitwixxu l-prinċipji ġenerali tal-liġi tal-Unjoni. Għaldaqstant, jenħtieġ li dan ir-Regolament jiġi interpretat u applikat f'konformità ma' dawk id-drittijiet fundamentali, inklużi l-libertà tal-espressjoni u tal-informazzjoni, kif ukoll il-libertà u l-pluraliżmu tal-media. Meta jeżerċitaw is-setgħat stabbiliti f'dan ir-Regolament, l-awtoritajiet pubbliċi kollha involuti jenħtieġ li jiksbu, f'sitwazzjonijiet fejn id-drittijiet fundamentali rilevanti jinsabu f'kunflitt, bilanċ ġust bejn id-drittijiet ikkonċernati, f'konformità mal-prinċipju tal-proporzjonalità.

(154)

Minħabba l-ambitu u l-impatt tar-riskji fuq is-soċjetà li jistgħu jiġu kkawżati minn pjattaformi online kbar ħafna u magni tat-tiftix kbr afna, il-ħtieġa li jiġu indirizzati dawk ir-riskji bħala kwistjoni ta’ prijorità u l-kapaċità li jieħdu l-miżuri neċessarji, huwa ġustifikat li jkun limitat il-perjodu li warajh jibda japplika dan ir-Regolament lill-fornituri ta’ dawk is-servizzi.

(155)

Minħabba li l-objettiv ta' dan ir-Regolament, jiġifieri l-funzjonament tajjeb tas-suq intern u l-iżgurar ta' ambjent online sikur, prevedibbli u affidabbli li fih id-drittijiet fundamentali mnaqqxa fil-Karta jkunu protetti kif dovut, ma jistax jinkiseb b'mod suffiċjenti mill-Istati Membri minħabba li ma jistgħux jiksbu l-armonizzazzjoni u l-kooperazzjoni meħtieġa jekk jaġixxu waħedhom, iżda, minħabba l-kamp ta' applikazzjoni territorjali u personali tiegħu, jista' jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju tal-proporzjonalità kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv.

(156)

Il-Kontrollur Ewropew għall-Protezzjoni tad-Data ġie kkonsultat skont l-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (36) u ta l-opinjoni tiegħu fl-10 ta' Frar 2021 (37).