Suġġett, kamp ta’ applikazzjoni u definizzjonijiet

Dawn il-linji gwida japplikaw għall-applikazzjoni tajba tal-kriterji speċifikati fl-Artikolu 3(2) tad-Direttiva 2014/92/UE li għandhom jintużaw mill-awtoritajiet kompetenti meta tiġi stabbilita lista provviżorja tas-servizzi l-aktar rappreżentattivi marbutin ma' kont tal-pagamenti u soġġetti għal tariffa.

Destinatarji

Dawn il-linji gwida huma indirizzati lill-awtoritajiet kompetenti kif imsemmi fil-Premessa 17 tad-Direttiva 2014/92/UE.

Definizzjonijiet

Sakemm ma jkunx speċifikat mod ieħor, it-termini użati u ddefiniti fid-Direttiva 2014/92/UE għandhom l-istess tifsira fil-linji gwida.

B’mod partikolari: ‘servizzi marbutin mal-kont tal-pagamenti’ huma ddefiniti fil-punt (6) tal-Artikolu 2 tad-Direttiva 2014/92/UE bħala s-servizzi kollha relatati mal-ftuħ, it-tħaddim u l-għeluq ta' kont tal-pagamenti, inkluż is-servizzi ta' ħlas u t-tranżazzjonijiet ta' pagament li jaqgħu fi ħdan il-kamp ta' applikazzjoni tal-punt (g) tal-Artikolu 3 tad-Direttiva 2007/64/KE u l-faċilitajiet ta' overdraft u overrunning.