2. Determinazzjoni magħmula mill-awtorità tar-riżoluzzjoni

Meta l-awtorità tar-riżoluzzjoni tiġi inkarigata biex tiddetermina jekk istituzzjoni hijiex qiegħda tfalli jew huwiex probabbli li tfalli, hija għandha tikkunsidra l-elementi oġġettivi pprovduti fit-Titolu II ta’ dawn il-Linji Gwida fir-rigward tal-pożizzjoni kapitali u l-pożizzjoni tal-likwidità tal-istituzzjoni u aspetti oħrajn fir-rigward tar-rekwiżiti għat-tkomplija tal-awtorizzazzjoni abbażi tal-informazzjoni li jkollha għad-dispożizzjoni tagħha l-awtorità tar-riżoluzzjoni.

L-elementi oġġettivi elenkati fit-Titolu II ta’ dawn il-Linji Gwida għandhom jittieħdu f’kunsiderazzjoni wkoll meta jiġu analizzati l-eżiti rilevanti tal-SREP imwettaq mill-awtorità kompetenti li jiġu pprovduti lill-awtorità tar-riżoluzzjoni skont il-paragrafu 40.

Waqt li tkun qiegħda tiddetermina li istituzzjoni qiegħda tfalli jew x’aktarx li tfalli, l-awtorità tar-riżoluzzjoni għandha tikkunsidra wkoll, bħala element oġġettiv, in-notifika riċevuta mingħand l-awtorità kompetenti, li tiddikjara li kien assenjat punteġġ globali tal-SREP ta’ ‘4’ lil istituzzjoni abbażi tal-kunsiderazzjonijiet stipulati fil-Linji Gwida dwar l-SREP; u li l-istituzzjoni naqset milli tikkonforma mal-miżuri superviżorji applikati b’konformità mal-Artikoli 104 u 105 tad-Direttiva 2013/36/UE jew mal-miżuri ta’ intervent bikri applikati b’konformità mal-Artikolu 27(1) tad-Direttiva 2014/59/UE.