3.1. Informazzjoni pprovduta mill-awtorità kompetenti

Skont l-Artikolu 27(2) tad-Direttiva 2014/59/UE, l-awtorità kompetenti hija mitluba li tgħarraf lill-awtorità tar-riżoluzzjoni dwar id-determinazzjoni li l-kundizzjonijiet għall-applikazzjoni tal-miżuri ta’ intervent bikri ġew issodisfati. Barra minn hekk, skont l-Artikolu 81(2) tad-Direttiva 2014/59/UE, l-awtorità kompetenti għandha tgħarraf lill-awtorità tar-riżoluzzjoni dwar kwalunkwe miżuri ta’ prevenzjoni ta’ kriżi (definiti fil-punt (101) tal-Artikolu 2(1) tad-Direttiva 2014/59/UE), jew kwalunkwe azzjonijiet imsemmija fl-Artikolu 104 tad-Direttiva 2013/36/UE li istituzzjoni jkollha bżonn tieħu.

Sabiex tiffaċilita l-iskambji ta’ informazzjoni, l-awtorità kompetenti għandha tipprovdi wkoll lill-awtorità tar-riżoluzzjoni bl-eżiti tal-SREP, mill-inqas kull darba li l-awtorità kompetenti tassenja punteġġ globali tal-SREP ta’ ‘4’ jew ‘F’ abbażi tal-eżiti tal-SREP. B’mod partikolari, l-awtorità kompetenti għandha tinnotifika lill-awtorità tar-riżoluzzjoni u tipprovdilha l-informazzjoni li ġejja fir-rigward tal-istituzzjoni speċifika:

• a. sommarju tal-valutazzjoni globali tal-SREP flimkien mal-punteġġi kollha tal-SREP;
• b. is-sett komplet ta’ indikaturi użati fil-monitoraġġ regolari tal-indikaturi ewlenin li jappoġġjaw lill-SREP, kif stipulat fil-Linji Gwida dwar l-SREP;
• c. id-dettalji kollha dwar il-miżuri superviżorji applikati (skont l-Artikoli 104 u 105 tad-Direttiva 2013/36/UE) u l-miżuri ta’ intervent bikri (skont l-Artikolu 27(1) tad-Direttiva 2014/59/UE), kif ukoll deskrizzjoni tal-konformità tal-istituzzjoni magħhom; u
• d. id-dettalji dwar l-għażliet ta’ rkupru applikati mill-istituzzjoni, fejn rilevanti.