5.1 General requirements specific to PD estimation

Sabiex jiġu assenjati debituri għal grad ta’ debituri bħala parti mill-proċess tal-approvazzjoni tal-kreditu, skont l-Artikolu 172(1)(a) tar-Regolament (UE) Nru 575/2013, kif ukoll sabiex issir reviżjoni ta’ dawk l-assenjazzjonijiet, skont l-Artikolu 173(1)(b) ta’ dak ir-Regolament, jenħtieġ li l-istituzzjonijiet jiżguraw li kull persuna fiżika jew ġuridika li għaliha teżisti skopertura tal-IRB tiġi klassifikata mill-istituzzjoni bil-mudell approvat li għandu jintuża fuq tip ta’ skoperturi partikolari. Dan il-mudell jenħtieġ li jkun addattat għad-debitur oriġinali uniku fi ħdan is-sistema ta’ klassifikazzjoni applikabbli, inklużi skoperturi garantiti minn protezzjoni ta’ kreditu mhux iffinanzjata, kif imsemmi fl-Artikolu 161(3) ta’ dak ir-Regolament.

Sabiex jiġu assenjati skoperturi fil-livell tal-konsumatur għal grad jew aggregazzjoni bħala parti mill-proċess tal-approvazzjoni tal-kreditu, skont l-Artikolu 172(2) tar-Regolament (UE) Nru 575/2013, kif ukoll sabiex issir reviżjoni ta’ dawk l-assenjazzjonijiet, skont l-Artikolu 173(2) ta’ dak ir-Regolament, jenħtieġ li l-istituzzjonijiet jiżguraw li kull skopertura tal-IRB tiġi klassifikata mill-istituzzjoni bil-mudell approvat li għandu jintuża fuq tip ta’ skoperturi partikolari. Dan il-mudell jenħtieġ li jkun addattat għad-debitur jew l-iskopertura oriġinali uniku/a fi ħdan is-sistema ta’ klassifikazzjoni applikabbli, inklużi skoperturi garantiti minn protezzjoni ta’ kreditu mhux iffinanzjata, kif imsemmi fl-Artikolu 164(2) ta’ dak ir-Regolament.

Mudell tal-PD jista’ jinkludi diversi metodi differenti għall-klassifikazzjoni tad-debituri jew l-iskoperturi, kif ukoll diversi segmenti ta’ kalibrazzjoni.