Artikolu 7 Prinċipji komuni għall-monitoraġġ u r-rappurtar

1.   F’konformità mal-Artikoli 8, 9 u 10, għal kull bastiment tagħhom, il-kumpaniji għandhom jimmonitorjaw u jirrappurtaw dwar id-data rilevanti matul perjodu ta’ rappurtar. Huma għandhom iwettqu l-monitoraġġ u r-rappurtar fil-portijiet kollha fil-ġuriżdizzjoni ta’ Stat Membru u għal kwalunkwe vjaġġ imsemmi fl-Artikolu 2(1).

2.   Il-monitoraġġ u r-rappurtar għandhom ikunu kompleti u għandhom ikopru l-enerġija użata abbord mill-bastimenti fil-ħinijiet kollha, kemm meta jkunu qed ibaħħru kif ukoll meta jkunu rmiġġati. Il-kumpaniji għandhom japplikaw miżuri xierqa biex jevitaw kull lakuna fid-data fil-perjodu ta’ rappurtar.

3.   Il-monitoraġġ u r-rappurtar għandhom ikunu konsistenti u kumparabbli tul iż-żmien. Għal dak il-għan, il-kumpaniji għandhom jużaw l-istess metodoloġiji ta’ monitoraġġ u l-istess settijiet ta’ data, soġġett għal modifiki vvalutati mill-verifikatur. Il-kumpaniji għandhom jippermettu aċċertament raġonevoli tal-integrità tad-data li għandha tiġi mmonitorjata u rrappurtata.

4.   Il-kumpaniji għandhom jiksbu, janalizzaw u jaħżnu, għal mill-inqas ħames snin, id-data u d-dokumentazzjoni kollha tal-monitoraġġ, inkluż is-suppożizzjonijiet, ir-referenzi, il-fatturi ta’ emissjoni, in-noti ta’ kunsinna tal-bunker kif ikkomplementati f’konformità mal-Anness I u d-data dwar l-attivitajiet, u kwalunkwe informazzjoni oħra meħtieġa biex tiġi vverifikata l-konformità ma’ dan ir-Regolament, b’mod trasparenti u preċiż, fuq karta jew f’forma elettronika, sabiex il-verifikatur ikun jista’ jiddetermina l-intensità tal-gassijiet serra tal-enerġija użata abbord mill-bastimenti.

5.   Fit-twettiq tal-attivitajiet ta’ monitoraġġ u rappurtar stipulati fl-Artikoli 8, 9, 10 u 15 ta’ dan ir-Regolament, għandhom jintużaw fejn xieraq l-informazzjoni u d-data miġbura għall-finijiet tar-Regolament (UE) 2015/757.