12 Nósanna imeachta inmheánacha foláirimh

Ba cheart do ghnólachtaí infheistíochta beartais agus nósanna imeachta inmheánacha iomchuí foláirimh a bhunú agus a choimeád ar bun ionas gur féidir leis an bhfoireann sáruithe féideartha nó iarbhír ar Rialachán (AE) Uimh. 2033/2019 agus ar fhorálacha náisiúnta lena dtrasuítear Treoir (AE) 2019/2034 a thuairisciú ar bhealach sonrach, neamhspleách agus féinrialaithe. Níor cheart go mbeadh sé riachtanach go mbeadh fianaise ar shárú ag an bhfoireann tuairiscithe; ba cheart, áfach, go mbeadh leibhéal leordhóthanach cinnteachta acu arb ionann é agus cúis leordhóthanach chun imscrúdú a sheoladh. Chomh maith leis sin, ba cheart do ghnólachtaí infheistíochta próisis agus nósanna imeachta iomchuí a chur chun feidhme a áirithíonn go bhfuil a gcuid oibleagáidí á gcomhlíonadh acu faoi chur chun feidhme náisiúnta Threoir (AE) 2019/1937 ó Pharlaimint na hEorpa agus ón gComhairle an 23 Deireadh Fómhair 2019 maidir le daoine a thuairiscíonn sáruithe ar dhlí an Aontais a chosaint.

Chun coinbhleachtaí leasa a sheachaint, ba cheart go mbeadh an fhoireann in ann sáruithe a thuairisciú lasmuigh de línte tuairiscithe rialta (e.g. tríd an bhfeidhm chomhlíonta, tríd an bhfeidhm iniúchóireachta inmheánaí nó trí nós imeachta neamhspleách inmheánach sceithireachta). Ba cheart go n-áiritheofaí sna nósanna imeachta foláirimh go gcosnófaí sonraí pearsanta an duine a thuairiscíonn an sárú agus an duine nádúrtha a líomhnaítear atá freagrach as an sárú de réir Rialachán (AE) 2016/679²⁶ (RGCS).

²⁶ Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus le saorghluaiseacht sonraí den sórt sin, agus lena n-aisghairtear Treoir 95/46/CE (an Rialachán Ginearálta maidir le Cosaint Sonraí)

Ba cheart na nósanna imeachta foláirimh a chur ar fáil do gach comhalta foirne laistigh de ghnólacht infheistíochta.

Más iomchuí, ba cheart faisnéis a sholáthraíonn comhaltaí foirne trí na nósanna imeachta foláirimh a chur ar fáil don chomhlacht bainistíochta agus d’fheidhmeanna freagracha eile arna sainiú sa bheartas foláirimh inmheánach. I gcás ina n-éilíonn an comhalta foirne a bhfuil sárú á thuairisciú aige nó aici, ba cheart an fhaisnéis a chur ar fáil don chomhlacht bainistíochta agus d’fheidhmeanna freagracha eile ar bhealach anaithnid. Féadfaidh gnólachtaí infheistíochta foráil a dhéanamh freisin le haghaidh próiseas sceithireachta lenar féidir faisnéis a chur isteach ar bhealach anaithnid.

Ba cheart do ghnólachtaí infheistíochta a áirithiú go bhfuil an duine a thuairiscíonn an sárú cosanta go hiomchuí ó aon tionchar diúltach, e.g. frithbheart, idirdhealú nó cineálacha eile de chóir éagórach. Ba cheart don ghnólacht infheistíochta a áirithiú nach rachaidh aon duine atá á rialú ag an ngnólacht infheistíochta i mbun íospartha duine a thuairiscigh sárú agus ba cheart dó bearta iomchuí a dhéanamh in aghaidh na ndaoine atá freagrach as aon íospairt den sórt sin.

Ba cheart do ghnólachtaí infheistíochta daoine a tuairiscíodh a chosaint ó aon éifeachtaí diúltacha i gcás nach bhfuil aon fhianaise san imscrúdú lena dtugtar bonn cirt do bhearta a dhéanamh i gcoinne an duine sin. Má dhéantar bearta, ba cheart do na gnólachtaí infheistíochta iad a dhéanamh ar bhealach a bhfuil sé mar aidhm leo an duine lena mbaineann a chosaint ar éifeachtaí diúltacha neamhbheartaithe a sháraíonn cuspóir an bhirt a rinneadh.

Go háirithe, ba cheart go mbeadh an méid seo a leanas á dhéanamh i ndáil le nósanna imeachta inmheánacha foláirimh:

• a. ba cheart go mbeadh na nósanna imeachta á ndoiciméadú (e.g. lámhleabhair foirne);
• b. ba cheart rialacha soiléire a chur ar fáil lena n-áiritheofar go ndéileálfar le faisnéis faoin tuairisciú agus faoi na daoine a thuairiscítear agus faoin sárú faoi rún, i gcomhréir le Rialachán (AE) 2016/679, ach amháin má cheanglaítear an nochtadh faoin dlí náisiúnta i gcomhthéacs imscrúduithe breise nó imeachtaí breithiúnacha ina dhiaidh sin;
• c. ba cheart cosaint a thabhairt do chomhaltaí foirne a chuireann ábhair imní in iúl ó bheith á n-íospairt de bhrí go bhfuil sáruithe intuairiscithe nochta acu;
• d. ba cheart a áirithiú go ndéanfar na sáruithe féideartha nó iarbhír a dtagraítear dóibh a mheasúnú agus a ghéarú, lena n-áirítear de réir mar is iomchuí don údarás inniúil ábhartha nó don ghníomhaireacht forfheidhmithe dlí;
• e. a áirithiú, i gcás inar féidir, go soláthrófar dearbhú maidir le faisnéis a fháil don fhoireann a bhfuil sáruithe féideartha nó iarbhír tuairiscithe acu;
• f. a áirithiú go ndéanfar toradh imscrúdaithe ar shárú tuairiscithe a rianú; agus
• g. coimeád taifead oiriúnach a áirithiú.