Airteagal 57 Íocaíochtaí pionósacha tréimhsiúla

1.   Áiritheoidh na Ballstáit, i gcás ina dteipfidh ar eintitis faoi oibleagáid bearta riaracháin arna gcur i bhfeidhm ag an maoirseoir de bhun Airteagal 56(2), pointí (b), (d), (e) agus (g) a chomhlíonadh laistigh de na sprioc-amanna is infheidhme a leagtar síos, go mbeidh maoirseoirí in ann íocaíochtaí pionósacha tréimhsiúla a fhorchur chun iallach a chur orthu na bearta riaracháin sin a chomhlíonadh.

2.   Beidh na híocaíochtaí pionósacha tréimhsiúla éifeachtach comhréireach. Forchuirfear na híocaíochtaí pionósacha tréimhsiúla go dtí go gcomhlíonfaidh an t-eintiteas faoi oibleagáid nó an duine lena mbaineann na bearta riaracháin ábhartha.

3.   D’ainneoin mhír 2, i gcás daoine dlítheanacha, ní bheidh méid na híocaíochta pionósaí tréimhsiúla níos mó ná 3 % dá meánláimhdeachas laethúil sa bhliain ghnó roimhe sin nó, i gcás daoine nádúrtha, ní bheidh an méid sin níos mó ná 2 % dá meánioncam laethúil sa bhliain féilire roimhe sin.

4.   Ní fhorchuirfear íocaíochtaí pionósacha tréimhsiúla ach amháin ar feadh tréimhse nach faide ná 6 mhí tar éis chinneadh an mhaoirseora. I gcás an beart riaracháin gan a bheith comhlíonta ag an eintiteas faoi oibleagáid agus an tréimhse sin dulta in éag, áiritheoidh na Ballstáit gur féidir le maoirseoirí íocaíochtaí pionósacha tréimhsiúla a fhorchur ar feadh tréimhse bhreise nach faide ná sé mhí.

5.   Áiritheoidh na Ballstáit gur féidir cinneadh a dhéanamh lena bhforchuirfear íocaíocht phionósach thréimhsiúil ón dáta a gcuirfear an beart riaracháin i bhfeidhm.

Beidh feidhm ag an íocaíocht phionósach thréimhsiúil ón dáta a ndéanfar an cinneadh sin.