Artikolu 57 Pagamenti perjodiċi ta' penali

1.   L-Istati Membri għandhom jiżguraw li, meta l-entitajiet marbutin b'obbligu jonqsu milli jikkonformaw mal-miżuri amministrattivi applikati mis-superviżur skont l-Artikolu 56(2), il-punti (b), (d), (e) u (g), sal-iskadenzi applikabbli, s-superviżuri jkunu jistgħu jimponu pagamenti perjodiċi ta' penali sabiex iġiegħlu l-konformità ma' dawk il-miżuri amministrattivi.

2.   Il-pagamenti perjodiċi ta' penali għandhom ikunu effettivi u proporzjonati. Il-pagamenti perjodiċi ta' penali għandhom jiġu imposti sakemm l-entità marbuta b'obbligu jew il-persuna kkonċernata tikkonforma mal-miżuri amministrattivi rilevanti.

3.   Minkejja l-paragrafu 2, fil-każ ta’ persuni ġuridiċi, l-ammont tal-pagament perjodiku ta' penali ma għandux jaqbeż it-3 % tal-fatturat medju ta' kuljum tagħhom fis-sena kontabilistika preċedenti jew, fil-każ ta' persuni fiżiċi, dak l-ammont ma għandux jaqbeż it-2 % tal-introjtu medju ta' kuljum tagħhom fis-sena kalendarja preċedenti.

4.   Il-ħlasijiet perjodiċi ta' penali għandhom jiġu imposti biss għal perjodu ta' mhux aktar minn sitt xhur mid-deċiżjoni tas-superviżur. Meta, mal-iskadenza ta' dak il-perjodu, l-entità marbuta b'obbligu tkun għadha ma kkonformatx mal-miżura amministrattiva, l-Istati Membri għandhom jiżguraw li s-superviżuri jkunu jistgħu jimponu pagamenti perjodiċi ta' penali għal perjodu addizzjonali ta' mhux aktar minn sitt xhur.

5.   L-Istati Membri għandhom jiżguraw li deċiżjoni li timponi pagament perjodiku ta' penali tkun tista' tittieħed mid-data tal-applikazzjoni tal-miżura amministrattiva.

Il-pagament perjodiku ta' penali għandu japplika mid-data meta tittieħed dik id-deċiżjoni.