Airteagal 24 Nochtaí d’úsáideoirí rátálacha ESG, do mhíreanna rátáilte agus d’eisitheoirí míreanna rátáilte

1.   Déanfaidh soláthraithe rátála ESG an fhaisnéis dá dtagraítear i bpointe 2 d’Iarscríbhinn III, ar a laghad, a nochtadh d’úsáideoirí rátálacha ESG, do mhíreanna rátáilte agus d’eisitheoirí míreanna rátáilte ar bhonn leanúnach.

2.   Áiritheoidh soláthraí rátála ESG, nuair a údaróidh sé d’úsáideoir rátálacha ESG rátáil ESG a nochtadh, go mbeidh nasc chuig an bhfaisnéis dá dtagraítear i bpointe 1 d’Iarscríbhinn III ceangailte leis an rátáil ESG.

3.   Forbróidh ESMA dréachtchaighdeáin theicniúla rialála chun na heilimintí atá le nochtadh i gcomhréir le mír 1 a shonrú tuilleadh. Ní áireofar sna heilimintí sin aon cheanglais bhreise maidir le nochtadh seachas na ceanglais sin a liostaítear i bpointe 2 d’Iarscríbhinn III.

Cuirfidh ESMA na dréachtchaighdeáin theicniúla rialála dá dtagraítear sa chéad fhomhír faoi bhráid an Choimisiúin faoin 2 Deireadh Fómhair 2025.

Tugtar an chumhacht don Choimisiún an Rialachán seo a fhorlíonadh trí na caighdeáin theicniúla rialála dá dtagraítear sa chéad fhomhír den mhír seo a ghlacadh i gcomhréir leis an nós imeachta a leagtar síos in Airteagail 10 go 14 de Rialachán (AE) Uimh. 1095/2010.

4.   Féadfaidh ESMA dréachtchaighdeáin theicniúla cur chun feidhme a fhorbairt chun na caighdeáin sonraí, na formáidí agus na teimpléid a shonrú a úsáidfidh soláthraithe rátála ESG chun an fhaisnéis dá dtagraítear i mír 1 a chur i láthair.

Déanfaidh ESMA na dréachtchaighdeáin theicniúla rialála cur chun feidhme dá dtagraítear sa chéad fhomhír den mhír seo a chur faoi bhráid an Choimisiúin.

Tugtar an chumhacht don Choimisiún chun na caighdeáin theicniúla cur chun feidhme dá dtagraítear sa chéad fhomhír den mhír seo a ghlacadh i gcomhréir leis an nós imeachta a leagtar síos in Airteagal 15 de Rialachán (AE) Uimh. 1095/2010.