Artikolu 24 Divulgazzjonijiet lill-utenti tal-klassifikazzjonijiet ESG, lill-elementi kklassifikati u l-emittenti ta’ elementi kklassifikati

1.   Il-fornituri ta’ klassifikazzjonijiet ESG għandhom jiddivulga bħala minimu, l-informazzjoni msemmija fil-punt 2 tal-Anness III lill-utenti tal-klassifikazzjonijiet ESG, lill-elementi kklassifikati u l-emittenti ta’ elementi kklassifikati fuq bażi kontinwa.

2.   Fornitur ta’ klassifikazzjonijiet ESG għandu jiżgura li meta jawtorizza utent tal-klassifikazzjonijiet ESG jiddivulga klassifikazzjoni ESG, link għall-informazzjoni msemmija fil-punt 1 tal-Anness III tkun mehmuża mal-klassifikazzjoni ESG.

3.   L-ESMA għandha tiżviluppa abbozz ta’ standards tekniċi regolatorji li jispeċifikaw aktar l-elementi li għandhom jiġu ddivulgati f’konformità mal-paragrafu 1. Dawk l-elementi ma għandhom jinkludu l-ebda rekwiżit ta’ divulgazzjoni addizzjonali minbarra dawk elenkati fil-punt 2 tal-Anness III.

L-ESMA għandha tissottometti l-abbozzi ta’ standards tekniċi regolatorji msemmija fl-ewwel subparagrafu lill-Kummissjoni sat-2 ta’ Ottubru 2025.

Il-Kummissjoni għandha s-setgħa li tissuplimenta dan ir-Regolament billi tadotta l-istandards tekniċi regolatorji msemmija fl-ewwel subparagrafu ta’ dan il-paragrafu f’konformità mal-proċedura stabbilita fl-Artikoli minn 10 sa 14 tar-Regolament (UE) Nru 1095/2010.

4.   L-ESMA tista’ tiżviluppa abbozzi ta’ standards tekniċi ta’ implimentazzjoni biex tispeċifika l-istandards, il-formati u l-mudelli tad-data li l-fornituri ta’ klassifikazzjonijiet ESG jeħtieġ li jużaw biex jippreżentaw l-informazzjoni msemmija fil-paragrafu 1.

L-ESMA għandha tissottometti l-abbozz ta’ standards tekniċi ta’ implimentazzjoni msemmija fl-ewwel subparagrafu ta’ dan il-paragrafu lill-Kummissjoni.

Il-Kummissjoni hija mogħtija s-setgħa li tadotta l-istandards regolatorji ta’ implimentazzjoni msemmija fl-ewwel subparagrafu ta’ dan il-paragrafu skont il-proċedura stabbilita fl-Artikolu 15 tar-Regolament (UE) Nru 1095/2010.