Airteagal 27i Fógra a thabhairt faoin gcumasc nó faoin deighilt agus measúnú a dhéanamh air nó uirthi

Chun críocha na chéad fhomhíre den mhír seo, i gcás inarb é atá san oibríocht atá á beartú deighilt, is é an t-údarás inniúil atá i gceannas ar mhaoirseacht a dhéanamh ar an eintiteas a dhéanann an oibríocht atá á beartú an t-údarás inniúil a bhfuil fógra le tabhairt dó agus atá i gceannas ar an measúnú dá bhforáiltear in Airteagal 27j(1).

I gcás nach mbaineann an oibríocht atá á beartú ach le geallsealbhóirí airgeadais ón ngrúpa céanna, beidh 60 lá oibre ag an údarás inniúil ón dáta a admhaítear i scríbhinn go bhfuarthas an fógra agus ó na doiciméid uile a fháil a éilíonn an Ballstát a chur leis an bhfógra i gcomhréir le hAirteagal 27j(5) (“an tréimhse mheasúnaithe”), chun an measúnú dá bhforáiltear in Airteagal 27j(1) a dhéanamh.

Cuirfidh an t-údarás inniúil na geallsealbhóirí airgeadais ar an eolas faoi dháta éaga na tréimhse measúnaithe tráth a admhaíonn sé go bhfuil an fógra faighte.

I gcás nach mbaineann an oibríocht atá á beartú ach le geallsealbhóirí airgeadais ón ngrúpa céanna, féadfaidh an t-údarás inniúil faisnéis bhreise a iarraidh tráth nach déanaí ná an 50ú lá oibre sa tréimhse mheasúnaithe.

Cuirfear an tréimhse mheasúnaithe ar fionraí idir an dáta a iarrann an t-údarás inniúil an fhaisnéis bhreise agus an dáta a fhaightear freagra ó na geallsealbhóirí airgeadais ar an iarraidh, lena soláthraítear an fhaisnéis ar fad a iarradh. Ní bheidh an fhionraí sin níos faide ná 20 lá oibre. Beidh sé de rogha ag an údarás inniúil iarrataí breise a dhéanamh ar chomhlánú nó soiléiriú na faisnéise a soláthraíodh ach ní chuirfear an tréimhse mheasúnaithe ar fionraí dá mbarr.