Airteagal 2 Sainmhínithe

ciallaíonn “díchoimisiúnú” bearta riaracháin agus teicniúla i gcomhréir leis an dlí náisiúnta lena gceadaítear roinnt de na rialuithe rialála nó iad go léir a bhaint ó shaoráid núicléach agus arb é is aidhm leo a áirithiú go ndéanfar cosaint fhadtéarmach ar an bpobal agus ar an gcomhshaol, lena n-áirítear laghdú ar leibhéil radanúiclídí iarmharacha sna hábhair agus ar shuíomh na saoráide;

ciallaíonn “plean díchoimisiúnúcháin” doiciméad ina bhfuil faisnéis mhionsonraithe maidir leis an díchoimisiúnú beartaithe agus lena gcumhdaítear an méid seo a leanas: an straitéis díchoimisiúnaithe roghnaithe; sceideal, cineál agus seicheamh na ngníomhaíochtaí díchoimisiúnúcháin; an straitéis bainistithe dramhaíola a chuirtear i bhfeidhm, lena n-áirítear imréiteach; an staid deiridh atá beartaithe; stóráil agus diúscairt na dramhaíola ó dhíchoimisiúnú; an t-amchlár le haghaidh an díchoimisiúnaithe; na meastacháin chostais chun díchoimisiúnú a thabhairt i gcrích; agus na cuspóirí, na torthaí a bhfuiltear ag súil leo, na garspriocanna, na spriocdhátaí, chomh maith leis na heochairtháscairí feidhmíochta comhfhreagracha, lena n-áirítear, de réir mar is iomchuí, na táscairí luachbhunaithe tuillte. Is é sealbhóir ceadúnais na saoráide núicléiche a ullmhaíonn an plean díchoimisiúnúcháin agus léirítear é sin i gcláir oibre ilbhliantúla an Chláir;

ciallaíonn “clár Kozloduy” an chuid sin den Chlár a bhaineann le díchoimisiúnú núicléach Aonaid 1go 4 ag Gléasra Cumhachta Núicléiche Kozloduy, atá lonnaithe in Kozloduy, sa Bhulgáir;

ciallaíonn “clár Bohunice” an chuid sin den Chlár a bhaineann le díchoimisiúnú núicléach Aonaid 1 agus 2 ag Gléasra Cumhachta Núicléiche Bohunice V1, atá lonnaithe in Jaslovské Bohunice, sa tSlóvaic;

ciallaíonn “clár JRC um dhíchoimisiúnú agus um bhainistiú dramhaíola” an chuid sin den Chlár a bhaineann le díchoimisiúnú núicléach agus bainistiú dramhaíola radaighníomhaí ar shuiteálacha núicléacha an Choimisiúin ag suíomhanna JRC, eadhon JRC-Geel sa Bheilg, JRC-Karlsruhe sa Ghearmáin, JRC-Ispra san Iodáil agus JRC-Petten san Ísiltír.