Airteagal 3 1.

Is é a bheidh mar mhisean ag an gComhghnóthas seirbhís sár-ríomhaireachta agus ríomhaireachta candamaí agus éiceachóras bonneagar sonraí den chéad scoth a bheidh cónasctha, slán, idir-inoibritheach agus hipearnasctha a fhorbairt, a chur chun úsáide, a leathnú agus a chothú san Aontas. Tacófar leis le forbairt agus glacadh córas sár-ríomhaireachta nuálach iomaíoch atá dírithe ar éileamh agus faoi stiúir an úsáideora agus teicneolaíochtaí agus córas candamach agus le forbairt raon leathan feidhmchlár a bheidh barrfheabhsaithe le haghaidh na gcóras sin. Beidh sé bunaithe a mhéid is féidir ar shlabhra soláthair Eorpach chun an riosca suaite agus spleáchais a theorannú agus chun uathriail straitéiseach agus ceannasacht theicneolaíoch an Aontais a threisiú, agus úsáid na gcomhpháirteanna, na dteicneolaíochtaí agus an eolais is fearr á háirithiú ag an am céanna. Thairis sin, déanfaidh sé úsáid an éiceachórais bonneagair sin a leathnú amach chuig raon leathan úsáideoirí poiblí agus príobháideacha agus tacóidh sé leis an aistriú glas agus leis an aistriú digiteach agus le príomhscileanna a fhorbairt do lucht saothair na hEorpa san eolaíocht agus sa tionsclaíocht.