Artikolu 3 1.

Il-missjoni tal-Impriża Konġunta għandha tkun li tiżviluppa, timplimenta, testendi u żżomm fl-Unjoni ekosistema tal-infrastruttura tas-supercomputing, tal-computing kwantistiku, tas-servizzi u d-data, li hija minn ta’ quddiem fid-dinja, federata, sigura, interoperabbli u iperkonnessa. Hija għandha tappoġġa l-iżvilupp u l-adozzjoni ta’ sistemi tas-supercomputing u sistemi u teknoloġiji kwantistiċi innovattivi u kompetittivi orjentati lejn id-domanda u mmexxija mill-utent u l-iżvilupp ta’ firxa wiesgħa ta’ applikazzjonijiet ottimizzati għal dawk is-sistemi. Dan għandu jkun ibbażat kemm jista’ jkun fuq katina tal-provvista Ewropea sabiex jiġi limitat ir-riskju ta’ tfixkil u dipendenzi u jissaħħu l-awtonomija strateġika u s-sovranità teknoloġika tal-Unjoni, filwaqt li jiġi żgurat l-użu tal-aħjar komponenti, teknoloġiji u għarfien. Barra minn hekk, hija għandha twessa’ l-użu ta’ dik l-ekosistema tal-infrastruttura għal għadd kbir ta’ utenti pubbliċi u privati u tappoġġa t-tranżizzjoni doppja u l-iżvilupp tal-ħiliet ewlenin għall-forza tax-xogħol Ewropea fix-xjenza u l-industrija.