Airteagal 3 Rochtain ar fhánaíocht mhórdhíola

1.   Freastalóidh oibreoirí líonraí soghluaiste ar na hiarrataí réasúnacha uile ar rochtain ar fhánaíocht mhórdhíola, go háirithe ar bhealach a ligeann do sholáthraí na seirbhísí fánaíochta na seirbhísí soghluaiste miondíola a thairgtear sa bhaile a mhacasamhlú i gcás inarb indéanta go teicniúil ar an líonra a bhfuil cuairt á tabhairt air.

2.   Ní fhéadfaidh oibreoirí líonraí soghluaiste diúltú d’iarrataí ar rochtain ar fhánaíocht mhórdhíola ach amháin ar bhonn critéir oibiachtúla, amhail indéantacht theicniúil agus sláine líonra. Ní bheidh breithnithe tráchtála ina bhforais chun diúltú d’iarrataí ar rochtain ar fhánaíocht mhórdhíola chun soláthar seirbhísí fánaíochta iomaíocha a theorannú.

3.   Cumhdófar le rochtain ar fhánaíocht mhórdhíola rochtain ar na heilimintí líonra agus na saoráidí gaolmhara uile agus ar na seirbhísí, bogearraí agus córais faisnéise ábhartha uile is gá chun seirbhísí fánaíochta rialáilte a sholáthar do chustaiméirí, agus cumhdófar léi na teicneolaíochtaí líonra uile atá ar fáil agus na glúnta líonra uile atá ar fáil.

4.   Beidh feidhm ag na rialacha faoi mhuirir ar fhánaíocht mhórdhíola rialáilte a leagtar síos in Airteagal 9, Airteagal 10 agus Airteagal 11 maidir le rochtain a sholáthar ar chomhpháirteanna uile na rochtana ar fhánaíocht mhórdhíola dá dtagraítear i mír 3 den Airteagal seo, mura n-aontóidh an dá pháirtí sa chomhaontú fánaíochta mórdhíola go sainráite nach mbeidh aon mheánmhuirear fánaíochta mórdhíola de thoradh chur i bhfeidhm an chomhaontaithe faoi réir an mhuirir uasta fánaíochta mórdhíola rialáilte ar feadh thréimhse bhailíochta an chomhaontaithe.

Gan dochar don chéad fhomhír den mhír seo, i gcás rochtain ar fhánaíocht mhórdhíola lena hathdhíol, féadfaidh oibreoirí líonraí soghluaiste praghsanna córa agus réasúnacha a mhuirearú ar chomhpháirteanna nach gcumhdaítear le mír 3.

5.   Foilseoidh oibreoirí líonraí soghluaiste tairiscint tagartha, agus treoirlínte BEREC dá dtagraítear i mír 8 á gcur san áireamh acu, agus cuirfidh siad an tairiscint sin ar fáil do ghnóthas a bhfuil rochtain ar fhánaíocht mhórdhíola á hiarraidh aige. Déanfaidh oibreoirí líonraí soghluaiste dréachtchomhaontú fánaíochta mórdhíola a sholáthar, i gcomhréir leis an Airteagal seo, don ghnóthas a bhfuil rochtain á hiarraidh aige i dtaca leis an rochtain sin 1 mhí ar a dhéanaí tar éis d’oibreoir an líonra shoghluaiste an iarraidh a fháil den chéad uair. Deonófar an rochtain ar fhánaíocht mhórdhíola laistigh de thréimhse réasúnach ama nach rachaidh thar 3 mhí ón tráth a thabharfar an comhaontú fánaíochta mórdhíola i gcrích. Maidir le hoibreoirí na líonraí soghluaiste a fhaigheann iarraidh ar rochtain ar fhánaíocht mhórdhíola agus maidir leis na gnóthais a mbeidh rochtain á hiarraidh acu, rachaidh siad i mbun caibidlíochta de mheon macánta.

6.   Déanfar an tairiscint tagartha dá dtagraítear i mír 5 a mhionsonrú go leordhóthanach agus áireofar inti na comhpháirteanna uile is gá le haghaidh rochtain ar fhánaíocht mhórdhíola amhail dá dtagraítear i mír 3, agus tabharfar tuairisc inti ar na tairiscintí ábhartha maidir le rochtain dhíreach ar fhánaíocht mhórdhíola agus maidir le rochtain ar fhánaíocht mhórdhíola lena hathdhíol, agus ar na téarmaí agus na coinníollacha gaolmhara. Beidh sa tairiscint tagartha an fhaisnéis uile is gá ionas go mbeidh an soláthraí seirbhísí fánaíochta in ann a áirithiú go mbeidh rochtain saor in aisce ag a chustaiméirí ar sheirbhísí éigeandála tríd an gcumarsáid éigeandála leis an PFGÉ is iomchuí agus ionas go mbeifear in ann faisnéis faoi shuíomh an ghlaoiteora a tharchur, saor in aisce, chuig an PFGÉ is iomchuí agus seirbhísí fánaíochta á n-úsáid ag na custaiméirí.

Féadfar coinníollacha a áireamh sa tairiscint tagartha sin chun cosc a chur le buanfhánaíocht nó le húsáid aimhrialta nó mí-úsáid a bheith á baint as an rochtain ar fhánaíocht mhórdhíola, chun críoch eile seachas chun seirbhísí fánaíochta rialáilte a sholáthar do chustaiméirí soláthraithe seirbhísí fánaíochta fad atá na custaiméirí sin ag taisteal laistigh den Aontas ar bhonn tréimhsiúil. I gcás ina sonrófar amhlaidh i dtairiscint tagartha, áireofar sna coinníollacha sin na bearta sonracha a fhéadfaidh oibreoir an líonra a bhfuil cuairt á tabhairt air a dhéanamh chun buanfhánaíocht nó úsáid aimhrialta nó mí-úsáid rochtana ar fhánaíocht mhórdhíola a chosc, chomh maith leis na critéir oibiachtúla ar ar a mbonn a fhéadfar na bearta sin a dhéanamh. Féadfaidh na critéir sin a bheith ag tagairt d’fhaisnéis chomhiomlán tráchta fánaíochta. Ní thagróidh siad d’fhaisnéis shonrach a bhaineann le trácht aonair chustaiméirí an tsoláthraí seirbhísí fánaíochta.

Féadfar foráil a dhéanamh leis an tairiscint tagartha, inter alia, i gcás ina mbeidh forais réasúnacha ag oibreoir an líonra a bhfuil cuairt á tabhairt air a mheas go bhfuil buanfhánaíocht nó úsáid aimhrialta nó mí-úsáid rochtana ar fhánaíocht mhórdhíola ar bun ag sciar suntasach de chustaiméirí an tsoláthraí seirbhísí fánaíochta, go bhféadfaidh oibreoir an líonra a bhfuil cuairt á tabhairt air a cheangal ar an soláthraí seirbhísí fánaíochta, gan dochar do dhlí an Aontais ná do cheanglais náisiúnta cosanta sonraí, faisnéis a sholáthar lena lamháiltear a chinneadh an bhfuil sciar suntasach de chustaiméirí an tsoláthraí seirbhísí fánaíochta i staid bhuanfhánaíochta, nó an bhfuil úsáid aimhrialta nó mí-úsáid á baint as rochtain ar fhánaíocht mhórdhíola ar líonra an oibreora a bhfuil cuairt á tabhairt air, amhail faisnéis ar sciar na gcustaiméirí ar suíodh gur ann do riosca ina leith maidir le húsáid aimhrialta nó mí-úsáid a bheith á baint as seirbhísí fánaíochta miondíola rialáilte arna soláthar ar an bpraghas miondíola baile is infheidhme, ar riosca é sin a suíodh ar bhonn táscairí oibiachtúla i gcomhréir leis na gníomhartha tarmligthe maidir le cur i bhfeidhm beartas maidir le húsáid chóir arna nglacadh de bhun Airteagal 7.

Féadfar foráil a dhéanamh leis an tairiscint tagartha, mar rogha dheireanach, i gcás ina mbeidh teipthe ar bhearta níos boige díriú ar an staid, maidir le comhaontú fánaíochta mórdhíola a fhoirceannadh i gcás ina mbeidh oibreoir an líonra a bhfuil cuairt á tabhairt air tar éis a dheimhniú, bunaithe ar chritéir oibiachtúla, go bhfuil buanfhánaíocht ar bun ag sciar suntasach de chustaiméirí an tsoláthraí seirbhísí fánaíochta nó go bhfuil úsáid aimhrialta nó mí-úsáid á baint as rochtain ar fhánaíocht mhórdhíola agus i gcás inár cuireadh oibreoir an líonra baile ar an eolas dá réir sin.

Ní fhéadfaidh oibreoir an líonra a bhfuil cuairt á tabhairt air an comhaontú fánaíochta mórdhíola a fhoirceannadh go haontaobhach ar fhorais go bhfuil buanfhánaíocht ar bun nó go bhfuil úsáid aimhrialta nó mí-úsáid á baint as rochtain ar fhánaíocht mhórdhíola ach amháin ar réamhúdarú a fháil ó údarás rialála náisiúnta oibreoir an líonra a bhfuil cuairt á tabhairt air.

Déanfaidh údarás rialála náisiúnta oibreoir an líonra a bhfuil cuairt á tabhairt air, laistigh de 3 mhí tar éis dó iarraidh ar údarú a fháil ó oibreoir an líonra a bhfuil cuairt á tabhairt air maidir le foirceannadh an chomhaontaithe fánaíochta mórdhíola, agus tar éis dó dul i gcomhairle le húdarás rialála náisiúnta oibreoir an líonra baile, cinneadh a dhéanamh an t-údarú sin a dheonú nó a dhiúltú agus cuirfidh sé an Coimisiún ar an eolas dá réir sin.

Féadfaidh údaráis rialála náisiúnta oibreoir an líonra a bhfuil cuairt á tabhairt air agus údaráis rialála náisiúnta oibreoir an líonra baile araon a iarraidh ar BEREC tuairim a ghlacadh i dtaobh na gníomhaíochta a bheidh le glacadh i gcomhréir leis an Rialachán seo. Glacfaidh BEREC a thuairim laistigh de 1 mhí tar éis dó an iarraidh sin a fháil.

I gcás ina ndeachthas i gcomhairle le BEREC, fanfaidh údarás rialála náisiúnta oibreoir an líonra a bhfuil cuairt á tabhairt air le tuairim BEREC agus tabharfaidh sé an-aird ar an tuairim sin sula ndéanfaidh sé cinneadh, faoi réir na sprice 3 mhí dá dtagraítear sa séú fomhír, an t-údarú maidir le foirceannadh an chomhaontaithe fánaíochta mórdhíola a dheonú nó a dhiúltú.

Cuirfidh údarás rialála náisiúnta oibreoir an líonra a bhfuil cuairt á tabhairt air faisnéis maidir leis na húdaruithe chun comhaontuithe fánaíochta mórdhíola a fhoirceannadh ar fáil don phobal faoi réir rúndacht gnó.

Ní dochar an cúigiú fomhír go dtí an naoú fomhír den mhír seo do chumhacht údaráis rialála náisiúnta a cheangal go scoirfear láithreach de shárú ar na hoibleagáidí a leagtar amach sa Rialachán seo de bhun Airteagal 17(7) ná do cheart oibreoir an líonra a bhfuil cuairt á tabhairt air bearta leormhaithe a chur i bhfeidhm chun calaois a chomhrac.

Más gá, forchuirfidh údaráis rialála náisiúnta athruithe ar thairiscintí tagartha, lena n-áirítear maidir leis na bearta sonracha a fhéadfaidh oibreoir an líonra a bhfuil cuairt á tabhairt air a ghlacadh chun buanfhánaíocht nó úsáid aimhrialta nó mí-úsáid rochtana ar fhánaíocht mhórdhíola a chosc, agus na critéir oibiachtúla ar ar a mbonn a fhéadfaidh oibreoir an líonra a bhfuil cuairt á tabhairt air na bearta sin a dhéanamh, chun éifeacht a thabhairt d’oibleagáidí a leagtar síos san Airteagal seo.

7.   I gcás inar mian leis an ngnóthas a bhfuil an rochtain á hiarraidh aige dul i mbun caibidlíocht tráchtála chun comhpháirteanna nach gcumhdaítear leis an tairiscint tagartha a áireamh, tabharfaidh oibreoirí na líonraí soghluaiste freagra ar an iarraidh sin laistigh de thréimhse réasúnach nach rachaidh thar 2 mhí ón uair a fuarthas an iarraidh den chéad uair. Chun críocha na míre seo, ní bheidh feidhm ag mír 2 ná mír 5.

8.   Faoin 5 Deireadh Fómhair 2022, déanfaidh BEREC, chun rannchuidiú le cur i bhfeidhm comhsheasmhach an Airteagail seo, agus tar éis dó dul i gcomhairle le geallsealbhóirí agus i ndlúthchomhar leis an gCoimisiún, na treoirlínte maidir le rochtain ar fhánaíocht mhórdhíola a leagtar síos i gcomhréir le hAirteagal 3(8) de Rialachán (AE) Uimh. 531/2012 a nuashonrú.