Airteagal 1 Ábhar agus raon feidhme

1.   Is é cuspóir an Rialacháin seo cur in úsáid buanaistrithe carbóin, feirmeoireachta carbóin agus stórála carbóin i dtáirgí a éascú d’oibreoirí nó grúpaí oibreoirí agus iad a spreagadh na nithe sin a chur in úsáid, mar chomhlánú ar laghduithe inbhuanaithe astaíochtaí ar fud na n-earnálacha uile chun na cuspóirí agus na spriocanna a leagtar síos i Rialachán (AE) 2021/1119 a bhaint amach. Chuige sin, leis an Rialachán seo bunaítear creat deonach de chuid an Aontais chun aistrithe carbóin agus laghduithe astaíochtaí ithreach a dheimhniú trí na nithe seo a leanas a leagan síos:

2.   Is é is aidhm don Rialachán seo tacú le cuspóirí an Aontais faoi Chomhaontú Pháras a bhaint amach, go háirithe cuspóir na haeráidneodrachta a leagtar síos i Rialachán (AE) 2021/1119 a bhaint amach ar bhonn comhchoiteann faoi 2050 ar a dhéanaí. Dá réir sin, le gach aistriú carbóin agus gach laghdú astaíochtaí ithreach a ghintear faoin Rialachán seo, rannchuideofar le NDC an Aontais agus a chuspóirí aeráide a bhaint amach agus ní rannchuideofar le NDCanna tríú páirtí ná le scéimeanna comhlíontachta idirnáisiúnta.

3.   Níl feidhm ag an Rialachán seo maidir le hastaíochtaí a thagann faoi raon feidhme Threoir 2003/87/CE, cé is moite de ghabháil agus stóráil astaíochtaí CO2 ó bhithbhreoslaí, bithleachtanna agus breoslaí bithmhaise a chomhlíonann na critéir maidir le hinbhuanaitheacht agus maidir le laghdú ar astaíochtaí gás ceaptha teasa a bhunaítear faoi Airteagal 29 de Threoir (AE) 2018/2001, maille le haon choigeartuithe is gá maidir le cur i bhfeidhm faoi Threoir 2003/87/CE, mar a leagtar amach sna gníomhartha cur chun feidhme dá dtagraítear in Airteagal 14 de Threoir 2003/87/CE, i gcomhréir le hIarscríbhinn IV a ghabhann le Treoir 2003/87/CE.