Airteagal 9 Cistiú an Chórais Eorpaigh um Rabhadh Cibearshlándála

Tar éis glao ar léirithe spéise do Bhallstáit a bhfuil sé beartaithe acu a bheith rannpháirteach sa Chóras Eorpach um Rabhadh Cibearshlándála, roghnóidh ECCC na Ballstáit chun páirt a ghlacadh le ECCC i soláthar comhpháirteach uirlisí, bonneagair nó seirbhísí, chun Cibearmhoil Náisiúnta a chur ar bun nó chun feabhas a chur ar chumais na gCibearmhol Náisiúnta a ainmnítear agus a bhunaítear de bhun Airteagal 4(1). Féadfaidh ECCC deontais a dhámhachtain ar na Ballstáit roghnaithe chun oibriú na n-uirlisí, an bhonneagair nó na seirbhísí sin a chistiú. Leis an ranníocaíocht airgeadais ón Aontas, cumhdófar suas le 50 % de chostais fála na n-uirlisí, an bhonneagair nó na seirbhísí, agus suas le 50 % de na costais oibriúcháin. Déanfaidh na Ballstáit roghnaithe na costais eile a chumhdach. Sula seolfar an nós imeachta chun na huirlisí, an bonneagar nó na seirbhísí a fháil, tabharfaidh ECCC agus na Ballstáit roghnaithe comhaontú i gcrích maidir le hóstáil agus úsáid lena rialófar úsáid na n-uirlisí, an bhonneagair nó na seirbhísí.

I gcás nach bhfuil Cibearmhol Náisiúnta Ballstáit rannpháirteach i gCibearmhol Trasteorann laistigh de 2 bhliain ón dáta a fuarthas na huirlisí, an bonneagar nó na seirbhísí, nó a fuair sé cistiú deontais, cibé acu is túisce a tharla, ní bheidh an Ballstát incháilithe le haghaidh tacaíocht bhreise ón Aontas faoin gCaibidil seo go dtí go mbeidh sé tar éis dul isteach i gCibearmhol Trasteorann.

Tar éis glao ar léirithe spéise, roghnóidh ECCC Cuibhreannas Óstach chun páirt a ghlacadh i soláthar comhpháirteach uirlisí, bonneagair nó seirbhísí in éineacht le ECCC. Féadfaidh ECCC deontas a dhámhachtain ar an gCuibhreannas Óstach chun oibriú na n-uirlisí, an bhonneagair nó na seirbhísí sin a chistiú. Leis an ranníocaíocht airgeadais ón Aontas, cumhdófar suas le 75 % de chostais fála na n-uirlisí, an bhonneagair nó na seirbhísí, agus suas le 50 % de na costais oibriúcháin. Déanfaidh an Cuibhreannas Óstach na costais eile a chumhdach. Sula seolfar an nós imeachta chun uirlisí, bonneagar nó seirbhísí a fháil, tabharfaidh ECCC agus an Cuibhreannas Óstach comhaontú i gcrích maidir le hóstáil agus úsáid lena rialófar úsáid na n-uirlisí, an bhonneagair nó na seirbhísí.

Ullmhóidh ECCC, gach dhá bhliain ar a laghad, mapáil ar na huirlisí, an bonneagar nó na seirbhísí is gá agus ar cháilíocht leormhaith chun Cibearmhoil Náisiúnta agus Cibearmhoil Trasteorann a bhunú nó cumas na Cibearmhol sin agus a n-infhaighteacht a fheabhsú, lena n-áirítear ó eintitis dhlítheanacha atá bunaithe nó a mheastar a bheith bunaithe sna Ballstáit agus atá faoi rialú ag na Ballstáit nó ag náisiúnaigh de chuid na mBallstát. Agus an mhapáil á hullmhú aige, rachaidh ECCC i gcomhairle le líonra CSIRTanna, le haon Chibearmhoil Trasteorann atá ann cheana, le ENISA agus leis an gCoimisiún.