Artikolu 9 Finanzjament tas-Sistema Ewropea ta’ Allert għaċ-Ċibersigurtà

Wara sejħa għal espressjonijiet ta’ interess, għal Stati Membri li bi ħsiebhom jipparteċipaw fis-Sistema Ewropea ta’ Allert għaċ-Ċibersigurtà, l-ECCC għandu jagħżel Stati Membri biex jieħdu sehem mal-ECCC fl-akkwist konġunt ta’ għodod, infrastrutturi jew servizzi mal-ECCC, bil-għan li jinħolqu Ċentri Ċibernetiċi Nazzjonali maħtura jew stabbiliti skont l-Artikolu 4(1), jew issaħħu l-kapaċitajiet tagħhom. L-ECCC jista’ jagħti għotjiet lill-Istati Membri magħżula biex jiffinanzjaw il-funzjonament ta’ tali għodod, infrastruttura jew servizzi. Il-kontribuzzjoni finanzjarja tal-Unjoni għandha tkopri sa 50 % tal-kostijiet tal-akkwist tal-għodod, l-infrastrutturi jew is-servizzi, u sa 50 % tal-kostijiet tal-funzjonament. L-Istati Membri magħżula għandhom ikopru l-ispejjeż li jifdal. Qabel ma titnieda l-proċedura għall-akkwist ta’ għodod, infrastruttura jew servizzi, l-ECCC u l-Istati Membri magħżula għandhom jikkonkludu ftehim tal-hosting u tal-użu li jirregola l-użu tal-għodod, l-infrastruttura u s-servizzi.

Jekk Ċentru Ċibernetiku Nazzjonali ta’ Stat Membru mhuwiex parteċipant f’Ċentru Ċibernetiku Transfruntier fi żmien sentejn mid-data li fiha l-għodod, l-infrastruttura u s-servizzi jkunu ġew akkwistati, jew li fiha jkun irċieva l-finanzjament f’għotja, skont liema miż-żewġ każijiet seħħ l-ewwel, l-Istat Membru ma għandux ikun eliġibbli għal appoġġ addizzjonali tal-Unjoni fl-ambitu ta’ dan il-Kapitolu sakemm jingħaqad maċ-Ċentru Ċibernetiku Transfruntier.

Wara sejħa għal espressjonijiet ta’ interess, Konsorzju tal-Hosting għandu jintgħażel mill-ECCC biex jipparteċipa f’akkwist konġunt ta’ għodod, infrastrutturi jew servizzi mal-ECCC. L-ECCC jista’ jagħti għotja lill-Konsorzju tal-Hosting biex jiffinanzja l-funzjonament tal-għodod, l-infrastruttura jew is-servizzi. Il-kontribuzzjoni finanzjarja tal-Unjoni għandha tkopri sa 75 % tal-kostijiet tal-akkwist tal-għodod, l-infrastrutturi u s-servizzi, u sa 50 % tal-kostijiet tal-funzjonament. Il-Konsorzju tal-Hosting għandu jkopri l-kostijiet li jifdal. Qabel ma titnieda l-proċedura għall-akkwist ta’ għodod, infrastrutturi u servizzi, l-ECCC u l-Konsorzju tal-Hosting għandhom jikkonkludu ftehim tal-hosting u tal-użu li jirregola l-użu tal-għodod, l-infrastrutturi u s-servizzi.

L-ECCC għandu jħejji, mill-anqas kull sentejn, immappjar tal-għodod, l-infrastruttura u s-servizzi neċessarji u ta’ kwalità adegwata biex jiġu stabbiliti ċ-Ċentri Ċibernetiċi Nazzjonali u ċ-Ċentri Ċibernetiċi Transfruntieri, jew imsaħħa l-kapaċitajiet tagħhom, u d-disponibbiltà tagħhom, inklużi mill-entitajiet ġuridiċi stabbiliti jew meqjusa li huma stabbiliti fl-Istati Membri u kkontrollati mill-Istati Membri jew minn ċittadini tal-Istati Membri. Huwa u jħejji l-immappjar, l-ECCC għandu jikkonsulta lin-network tas-CSIRTs, lil kwalunkwe Ċentru Ċibernetiku Transfruntier eżistenti, lill-ENISA u lill-Kummissjoni.