Airteagal 17 2.

léireoidh an soláthraí go sealbhaíonn a phearsanra an leibhéal is airde ionracais ghairmiúil, neamhspleáchais agus freagrachta agus an inniúlacht theicniúil is gá chun na gníomhaíochtaí a dhéanamh ina réimse sonrach, agus go n-áirithítear buaine agus leanúnachas an tsaineolais chomh maith leis na hacmhainní teicniúla is gá;

comhlíonfaidh an soláthraí, agus aon fhochuideachtaí agus fochonraitheoirí ábhartha, na rialacha is infheidhme maidir le cosaint faisnéise rúnaicmithe agus beidh bearta iomchuí i bhfeidhm acu, lena n-áirítear, i gcás inarb ábhartha, comhaontuithe eatarthu, chun faisnéis rúnda a bhaineann leis an tseirbhís a chosaint, agus go háirithe fianaise, torthaí agus tuarascálacha;

cuirfidh an soláthraí cruthúnas leordhóthanach ar fáil go bhfuil a struchtúr rialaithe trédhearcach, nach dócha go gcuirfeadh sé isteach ar a neamhchlaontacht agus ar cháilíocht a sheirbhísí nó go mbeadh sé ina chúis le coinbhleachtaí leasa;

beidh imréiteach slándála iomchuí ag an soláthraí, ar a laghad i gcás an phearsanra atá beartaithe chun na seirbhísí a chur in úsáid, i gcás ina n-éileoidh Ballstát sin;

beidh an leibhéal ábhartha slándála ag an soláthraí le haghaidh a chóras TF;

beidh na crua-earraí agus na bogearraí is gá chun tacú leis an tseirbhís iarrtha ag an soláthraí, ar crua-earraí agus bogearraí iad nach mbeidh leochaileachtaí iontu arb eol go bhféadfaí teacht i dtír orthu, lena n-áireofar na nuashonruithe slándála is déanaí agus lena gcomhlíonfar, in aon chás, aon fhoráil is infheidhme de Rialachán (AE) 2024/2847 ó Pharlaimint na hEorpa agus ón gComhairle ( 2 );

beidh an soláthraí in ann a léiriú go bhfuil taithí aige ar sheirbhísí comhchosúla a sholáthar d’údaráis náisiúnta ábhartha, d’eintitis a oibríonn in earnálacha ardchriticiúlachta nó d’eintitis a oibríonn in earnálacha criticiúla eile;

beidh an soláthraí in ann an tseirbhís a sholáthar laistigh de thréimhse ama ghearr sna Ballstáit inar féidir leis an tseirbhís a sholáthar;

beidh an soláthraí in ann an tseirbhís a sholáthar i gceann amháin nó níos mó de theangacha oifigiúla institiúidí an Aontais nó de chuid Ballstáit de réir mar a éilítear, i gcás inarb infheidhme, ag na Ballstáit nó ag na húsáideoirí dá dtagraítear in Airteagal 14(3), pointí (b) agus (c), i gcás inar féidir leis an soláthraí an tseirbhís a sholáthar;

nuair a bheidh scéim Eorpach um dheimhniú cibearshlándála do sheirbhísí slándála bainistithe de bhun Rialachán (AE) 2019/881 i bhfeidhm, déanfar an soláthraí a dheimhniú i gcomhréir leis an scéim sin laistigh de thréimhse 2 bhliain ó dháta theacht i bhfeidhm na scéime;

áireoidh an soláthraí sa tairiscint na coinníollacha tiontaithe le haghaidh aon seirbhísí freagartha ar theagmhais nár úsáideadh agus a d’fhéadfaí a thiontú ina seirbhísí ullmhachta a bhaineann go dlúth le freagairt ar theagmhais, amhail cleachtaí nó oiliúint.