Airteagal 9 Pacáistíocht inmhúirínithe

1.   De mhaolú ar Airteagal 6(1), faoin 12 Feabhra 2028, i gcás ina gcuirtear pacáistíocht dá dtagraítear in Airteagal 3(1), pointe (1)(f) agus lipéid ghreamaitheacha atá greamaithe de thorthaí agus glasraí ar an margadh, beidh an phacáistíocht agus na lipéid ghreamaitheacha sin comhoiriúnach leis an gcaighdeán le haghaidh múiríniú i ndálaí a rialaítear go tionsclaíoch i saoráidí cóireála bithdhramhaíola agus beidh siad comhoiriúnach, i gcás ina gceanglaíonn na Ballstáit sin, leis na caighdeáin mhúirínithe baile dá dtagraítear i mír 6 den Airteagal seo.

2.   De mhaolú ar Airteagal 6(1), i gcás ina gceadóidh na Ballstáit dramhaíl ag a bhfuil airíonna in-bhithdhíghrádaitheachta agus inmhúirínitheachta comhchosúla le bithdhramhaíl de bhun Airteagal 22(1) de Threoir 2008/98/CE a bhailiú in éineacht le bithdhramhaíl agus go bhfuil scéimeanna bailithe dramhaíola agus bonneagar cóireála dramhaíola iomchuí ar fáil chun a áirithiú go rachaidh pacáistíocht inmhúirínithe isteach sa sruth bainistithe bithdhramhaíola, féadfaidh na Ballstáit a éileamh nach gcuirfear an phacáistíocht seo a leanas ar fáil ar a gcríoch den chéad uair ach amháin má tá an phacáistíocht inmhúirínithe:

3.   Faoin 12 Feabhra 2028, déanfar pacáistíocht seachas an phacáistíocht dá dtagraítear i míreanna 1 agus 2, lena n-áirítear pacáistíocht de pholaiméir phlaisteacha in-bhithdhíghrádaithe agus d’ábhair in-bhithdhíghrádaithe eile, a dhearadh le haghaidh athchúrsáil ábhar i gcomhréir le hAirteagal 6 gan difear a dhéanamh d’in-athchúrsáilteacht sruthanna dramhaíola eile.

4.   Léireofar comhlíonadh na gceanglas a leagtar amach i míreanna 1, 2 agus 3, den Airteagal seo san fhaisnéis theicniúil a bhaineann leis an bpacáistíocht dá dtagraítear in Iarscríbhinn VII.

5.   Féadfaidh an Coimisiún anailís a dhéanamh an ceart pacáistíocht eile a áireamh i mír 1 nó mír 2, pointe (a), den Airteagal seo má tá údar cuí leis sin agus nuair is iomchuí i ngeall ar fhorbairtí teicneolaíochta agus rialála a dhéanann difear do dhíothú na pacáistíochta inmhúirínithe agus faoi na coinníollacha a bhunaítear in Iarscríbhinn III, agus, i gcás inarb iomchuí, féadfaidh sé togra reachtach a thíolacadh.

6.   Faoin 12 Feabhra 2026, iarrfaidh an Coimisiún ar na heagraíochtaí Eorpacha um chaighdeánú, caighdeáin chomhchuibhithe a ullmhú nó a thabhairt cothrom le dáta, lena leagfar síos sonraíochtaí teicniúla mionsonraithe na gceanglas maidir le pacáistíocht inmhúirínithe. Agus é sin á dhéanamh aige, ba cheart don Choimisiún a iarraidh, i gcomhréir leis na forbairtí eolaíocha agus teicneolaíocha is déanaí, go ndéanfaí paraiméadair amhail agaí coinneála, teochtaí agus corraitheacha, a léiríonn na dálaí iarbhír i múirín baile agus i saoráidí cóireála bithdhramhaíola, lena n-áirítear próisis díleá anaeróbaigh, a chur san áireamh. Iarrfaidh an Coimisiún go n-áireofar sna caighdeáin sin freisin fíorú maidir leis an bpacáistíocht inmhúirínithe atá ag dul faoin dianscaoileadh bitheolaíoch faoi réir na bparaiméadar sonraithe go mbeidh mar thoradh deiridh air, tiontú go dé-ocsaíd charbóin nó, in éagmais ocsaigine, tiontú go meatáin, agus salainn mhianracha, bithmhais agus uisce.

Faoin 12 Feabhra 2026 iarrfaidh an Coimisiún ar na heagraíochtaí Eorpacha um chaighdeánú, caighdeáin chomhchuibhithe a ullmhú freisin, lena leagfar síos sonraíochtaí teicniúla mionsonraithe na gceanglas maidir le hinmhúirínitheacht bhaile na pacáistíochta dá dtagraítear i mír 1.