Artikolu 9 Imballaġġ kompostabbli

1.   B'deroga mill-Artikolu 6(1), sat-12 ta’ Frar 2028, meta l-imballaġġ imsemmi fl-Artikolu 3(1), il-punt (1)(f), u tikketti li jwaħħlu mwaħħla mal-frott u l-ħxejjex jitqiegħdu fis-suq, dak l-imballaġġ u tikketti li jwaħħlu għandhom ikunu kompatibbli mal-istandard għall-ikkompostjar f'kundizzjonijiet ikkontrollati industrijalment f'faċilitajiet tat-trattament tal-bijoskart u għandhom ikunu kompatibbli, meta meħtieġ mill-Istati Membri, mal-istandards tal-ikkompostjar domestiku msemmija fil-paragrafu 6 ta' dan l-Artikolu.

2.   B'deroga mill-Artikolu 6(1), meta l-Istati Membri jippermettu li l-iskart bi proprjetajiet simili ta' bijodegradabbiltà u kompostabbiltà bħall-bijoskart skont l-Artikolu 22(1) tad-Direttiva 2008/98/KE jinġabar flimkien mal-bijoskart u jkunu disponibbli skemi xierqa ta' ġbir tal-iskart u infrastruttura għat-trattament tal-iskart biex jiġi żgurat li l-imballaġġ kompostabbli jidħol fil-fluss tal-immaniġġar tal-bijoiskart, l-Istati Membri jistgħu jirrikjedu li l-imballaġġ li ġej għandu jitqiegħed għad-dispożizzjoni fit-territorju tagħhom għall-ewwel darba biss jekk l-imballaġġ ikun kompostabbli:

3.   Sat-12 ta’ Frar 2028, l-imballaġġ għajr dak imsemmi fil-paragrafi 1 u 2, inkluż l-imballaġġ magħmul minn polimeri tal-plastik bijodegradabbli u minn materjali bijodegradabbli oħra, għandu jkun diżinjat għar-riċiklaġġ tal-materjal f'konformità mal-Artikolu 6 mingħajr ma tiġi affettwata r-riċiklabbiltà ta' flussi oħra tal-iskart.

4.   Il-konformità mar-rekwiżiti stabbiliti fil-paragrafi 1, 2 u 3, ta’ dan l-Artikolu għandha tintwera fl-informazzjoni teknika dwar l-imballaġġ imsemmi fl-Anness VII.

5.   Il-Kummissjoni tista' tanalizza jekk għandux jiġi inkluż imballaġġ ieħor fil-paragrafu 1 jew fil-paragrafu 2, il-punt (a), ta’ dan l-Artikolu jekk ġustifikat u xieraq minħabba l-iżviluppi teknoloġiċi u regolatorji li jaffettwaw l-eliminazzjoni tal-imballaġġ kompostabbli u fil-kundizzjonijiet stabbiliti fl-Anness III, u fejn xieraq, tippreżenta proposta leġiżlattiva.

6.   Sat-12 ta’ Frar 2026, il-Kummissjoni għandha titlob lill-organizzazzjonijiet Ewropej tal-istandardizzazzjoni biex iħejju jew jaġġornaw l-istandards armonizzati li jistabbilixxu l-ispeċifikazzjonijiet tekniċi dettaljati tar-rekwiżiti dwar l-imballaġġ kompostabbli. Meta tagħmel dan, il-Kummissjoni għandha titlob li, f'konformità mal-aħħar żviluppi xjentifiċi u teknoloġiċi, jitqiesu parametri bħall-ħinijiet ta' żamma, it-temperaturi u t-tħawwid, li jirriflettu l-kundizzjonijiet reali fil-kompost fid-dar u fil-faċilitajiet tat-trattament tal-bijoskart, inkluż il-proċessi ta' diġestjoni anaerobika. Il-Kummissjoni għandha titlob li dawk l-istandards jinkludu verifika li l-imballaġġ kompostabbli f'dekompożizzjoni bijoloġika soġġetta għall-parametri speċifikati fl-aħħar jirriżulta f'konverżjoni għal diossidu tal-karbonju jew, fin-nuqqas ta' ossiġenu, għal metan, u mluħa minerali, bijomassa u ilma.

Sat-12 ta’ Frar 2026, il-Kummissjoni għandha wkoll titlob lill-organizzazzjonijiet Ewropej tal-istandardizzazzjoni biex iħejju standards armonizzati li jistabbilixxu l-ispeċifikazzjonijiet tekniċi dettaljati tar-rekwiżiti dwar l-kompostabblita’ domestika tal-imballaġġ imsemmi fil-paragrafu 1.