Airteagal 33 Oibleagáid maidir le tairiscint athúsáide i gcás na hearnála beir leat

1.   Faoin 12 Feabhra 2028, déanfaidh dáileoirí deiridh, a dhéanann a ngníomhaíocht ghnó in earnáil HORECA agus a chuireann ar fáil ar chríoch Bhallstáit, deochanna fuara nó te nó bia réamhullmhaithe i bpacáistíocht beir leat an rogha a thabhairt do thomhaltóirí na táirgí a fháil i bpacáistíocht in-athúsáidte laistigh de chóras athúsáide.

2.   Cuirfidh na dáileoirí deiridh in iúl do na tomhaltóirí ag an díolphointe, trí bhíthin cláir faisnéise nó comharthaí sofheicthe agus inléite, gur féidir na hearraí a fháil i bpacáistíocht in-athúsáide.

3.   Tairgfidh na dáileoirí deiridh na táirgí a líontar isteach i bpacáistíocht in-athúsáidte ar phraghas nach airde agus faoi dhálaí nach lú fabhar ná san aonad díolacháin ina bhfuil an táirge céanna agus pacáistíocht aon úsáide.

4.   Beidh na dáileoirí deiridh díolmhaithe ó fheidhmiú an Airteagail seo i gcás ina dtagann siad faoin sainmhíniú ar mhicrifhiontar a leagtar amach i Moladh 2003/361/CE, de réir mar is infheidhme an 11 Feabhra 2025.

5.   Ó 2030 ar aghaidh, féachfaidh na dáileoirí deiridh le 10 % de tháirgí a thairiscint lena ndíol i bhformáid phacáistíochta in-athúsáidte.

6.   Faoi na coinníollacha a leagtar amach in Airteagal 51, féadfaidh na Ballstáit spriocanna a leagan síos d’oibreoirí eacnamaíocha, spriocanna a théann níos faide ná an sprioc íosta a leagtar amach i mír 5 den Airteagal seo a mhéid atá na spriocanna níos airde riachtanach don Bhallstát chun ceann amháin nó níos mó de na spriocanna a leagtar amach in Airteagal 43 a bhaint amach.