Artikolu 33 L-obbligu tal-offerta ta' użu mill-ġdid għas-settur tat-takeaway

1.   Sat-12 ta’ Frar 2028, id-distributuri finali li jwettqu l-attività kummerċjali tagħhom fis-settur tal-HORECA u li jqiegħdu għad-dispożizzjoni fit-territorju ta' Stat Membru xorb sħun jew kiesaħ jew ikel ippreparat u lest f’imballaġġ tat-takeaway għandhom jagħtu lill-konsumaturi l-għażla li jiksbu l-prodotti f'imballaġġ riutilizzabbli f'sistema għall-użu mill-ġdid.

2.   Id-distributuri finali għandhom jinfurmaw lill-konsumaturi fil-punt tal-bejgħ, permezz ta' tabelli jew sinjali li jidhru b'mod ċar u li jistgħu jinqraw, dwar il-possibbiltà li jiksbu l-prodotti f'imballaġġ riutilizzabbli.

3.   Id-distributuri finali għandhom joffru l-prodotti mimlija f'imballaġġ riutilizzabbli mingħajr kost ogħla, u taħt kundizzjonijiet mhux anqas favorevoli minn unità tal-bejgħ li tikkonsisti mill-istess prodott u imballaġġ li jintuża darba biss.

4.   Id-distributuri finali għandhom ikunu eżentati mill-applikazzjoni ta' dan l-Artikolu jekk koperti mid-definizzjoni ta' mikrointrapriża stabbilita fir-Rakkomandazzjoni 2003/361/KE kif applikabbli fil-11 ta’ Frar 2025.

5.   Mill-2030, id-distributuri finali għandhom jagħmlu ħilithom biex joffri 10 % tal-prodotti għall-bejgħ f'format ta' imballaġġ riutilizzabbli.

6.   Skont il-kundizzjonijiet stabbiliti fl-Artikolu 51, l-Istati Membri jistgħu jistabbilixxu miri għall-operaturi ekonomiċi li jmorru lil hinn mill-mira minima stabbilita’ fil-paragrafu 5 ta' dan l-Artikolu sa fejn dawk il-miri ogħla jkunu meħtieġa għall-Istat Membru biex jilħaq waħda jew aktar mill-miri stabbiliti fl-Artikolu 43.