Airteagal 34 Málaí siopadóireachta plaisteacha

1.   Déanfaidh na Ballstáit bearta chun laghdú marthanach a bhaint amach ar thomhaltas málaí siopadóireachta plaisteacha éadroma ar a gcríoch.

Meastar go bhfuil laghdú marthanach bainte amach mura mó an tomhaltas bliantúil ná 40 mála siopadóireachta plaisteach éadrom per capita, nó an sprioc chomhionann de réir meáchain, faoin 31 Nollaig 2025 agus dá éis sin faoin 31 Nollaig gach bliain ina dhiaidh sin.

2.   Leis na bearta a dhéanfaidh na Ballstáit chun an sprioc a leagtar amach i mír 1 a bhaint amach cuirfear san áireamh tionchar na málaí siopadóireachta plaisteacha éadroma ar an gcomhshaol nuair a dhéantar iad a tháirgeadh, a athchúrsáil nó a dhiúscairt, agus a n-airíonna múirínithe, a marthanacht nó an úsáid shonrach a bheartaítear dóibh. Féadfaidh a áireamh leis na bearta sin, de mhaolú ar Airteagal 4, srianta margaidh, ar choinníoll go bhfuil siad comhréireach agus neamh-idirdhealaitheach.

3.   I dteannta na mbeart faoi mhíreanna 1 agus 2 den Airteagal seo, féadfaidh na Ballstáit bearta a dhéanamh, amhail ionstraimí eacnamaíocha agus spriocanna laghdaithe náisiúnta, a mhéid a bhaineann le haon chineál de mhálaí siopadóireachta plaisteacha éadroma, gan beann ar a dtiús balla, i gcomhréir leis na hoibleagáidí a eascraíonn as CFAE.

4.   Féadfaidh na Ballstáit málaí siopadóireachta plaisteacha an-éadrom, atá riachtanach chun críoch sláinteachais nó a chuirtear ar fáil mar phacáistíocht díolacháin do bhia scaoilte chun cur amú bia a chosc, a eisiamh ó na hoibleagáidí a leagtar amach i mír 1.

5.   Faoin 12 Feabhra 2032, ullmhóidh an Coimisiún tuarascáil maidir le hábhair phacáistíochta, seachas na hábhair sin dá dtagraítear i míreanna 1 agus 2, ar dócha go mbeidh tionchar níos díobhálaí acu ar an gcomhshaol ná málaí siopadóireachta plaisteacha éadroma agus, i gcás inarb iomchuí, tíolacfaidh sé togra reachtach ina leagfar amach spriocanna laghdaithe agus bearta chun na spriocanna sin a bhaint amach.