Artikolu 34 Basktijiet tal-plastik

1.   L-Istati Membri għandhom jieħdu miżuri biex jiksbu tnaqqis sostnut fil-konsum tal-basktijiet tal-plastik ħfief fuq it-territorju tagħhom.

Tnaqqis sostnut jitqies miksub jekk il-konsum annwali ma jaqbiżx l-40 basket tal-plastik ħafif per capita, jew il-mira ekwivalenti fil-piż, sal-31 ta' Diċembru 2025 u sussegwentement sal-31 ta' Diċembru ta' kull sena minn hemm 'il quddiem.

2.   Il-miżuri li għandhom jittieħdu mill-Istati Membri biex jilħqu l-mira stabbilita fil-paragrafu 1 għandhom iqisu l-impatt ambjentali tal-basktijiet tal-plastik ħfief meta jiġu mmanifatturati, irriċiklati jew mormija, u l-proprjetajiet tal-ikkompostjar tagħhom, id-durabbiltà jew l-użu maħsub speċifiku. Miżuri bħal dawn jistgħu, permezz ta' deroga mill-Artikolu 4, jinkludu restrizzjonijiet fuq il-kummerċjalizzazzjoni, dment li jkunu proporzjonati u nondiskriminatorji.

3.   Minbarra l-miżuri fil-paragrafi 1 u 2 ta' dan l-Artikolu, l-Istati Membri jistgħu jieħdu miżuri, bħal strumenti ekonomiċi, u miri nazzjonali ta' tnaqqis, fir-rigward ta' kwalunkwe tip ta' basket tal-plastik, irrispettivament mill-ħxuna tiegħu, f'konformità mal-obbligi li jirriżultaw mit-TFUE.

4.   L-Istati Membri jistgħu jeskludu mill-obbligi stabbiliti fil-paragrafu 1 il-basktijiet tal-plastik ħfief ħafna li huma meħtieġa għall-finijiet tal-iġjene jew ipprovduti bħala imballaġġ għall-bejgħ għall-ikel waħdu biex tiġi pprevenuta l-ħela tal-ikel.

5.   Sat-12 ta’ Frar 2032, il-Kummissjoni għandha tħejji rapport dwar il-materjali tal-imballaġġ, għajr dawk imsemmija fil-paragrafi 1 u 2, li x'aktarx ikollhom impatt aktar negattiv fuq l-ambjent milli basktijiet tal-plastik ħfief ħafna u, fejn xieraq, tippreżenta proposta leġiżlattiva li tistabbilixxi miri ta' tnaqqis u miżuri biex jintlaħqu dawk il-miri.