Airteagal 46 Eagraíocht um fhreagracht táirgeora

1.   Féadfaidh táirgeoirí a chur ar iontaoibh eagraíochta um fhreagracht táirgeora arna húdarú i gcomhréir le hAirteagal 47 na hoibleagáidí faoin bhfreagracht leathnaithe táirgeora a chomhlíonadh thar a gceann. Féadfaidh na Ballstáit bearta a ghlacadh chun go mbeidh sé sainordaitheach na hoibleagáidí faoin bhfreagracht leathnaithe táirgeora a chur ar iontaoibh eagraíochta um fhreagracht táirgeoirí.

2.   Más rud é, ar chríoch Bhallstáit, go bhfuil eagraíocht amháin nó an iliomad eagraíochtaí um fhreagracht táirgeoirí údaraithe chun oibleagáidí faoin bhfreagracht leathnaithe táirgeora a chomhlíonadh thar ceann táirgeoirí, áiritheoidh an Ballstát go gcumhdóidh an eagraíocht nó na heagraíochtaí um fhreagracht táirgeora agus na táirgeoirí nár chuir na hoibleagáidí faoin bhfreagracht leathnaithe táirgeora ar iontaoibh eagraíochta um fhreagracht táirgeora, agus iad á nglacadh le chéile, críoch iomlán an Bhallstáit a mhéid a bhaineann leis na gníomhaíochtaí i gcomhréir le hAirteagal 47(3) agus Airteagal 48 agus 50. Ceapfaidh na Ballstáit tríú páirtí neamhspleách chun formhaoirseacht a dhéanamh ar chur i gcrích na n-oibleagáidí faoin bhfreagracht leathnaithe táirgeora ag na heagraíochtaí um fhreagracht táirgeora ar bhealach comhordaithe nó cuirfidh siad an fhormhaoirseacht sin ar iontaoibh an údaráis inniúil.

3.   Áiritheoidh eagraíochtaí um fhreagracht táirgeoirí rúndacht na sonraí ina seilbh a mhéid a bhaineann le faisnéis dílseánaigh nó faisnéis is inchurtha go díreach i leith táirgeoirí aonair nó a n-ionadaithe údaraithe.

4.   Le cois na faisnéise dá dtagraítear in Airteagal 8a(3), pointe (e) de Threoir 2008/98/CE, foilseoidh eagraíochtaí um fhreagracht táirgeoirí an fhaisnéis seo a leanas ar a láithreáin gréasáin uair amháin in aghaidh na bliana ar a laghad, faisnéis faoin méid pacáistíochta, lena n-áirítear pacáistíocht táirgí pacáistithe, atá curtha ar fáil den chéad uair ar mhargadh Ballstáit, nó a dhéanann táirgeoirí a dhíphacáil gan bheith ina n-úsáideoirí deiridh, agus faisnéis maidir le líon na n-ábhar athchúrsáilte agus athshlánaithe i ndáil le méid na pacáistíochta a raibh oibleagáidí faoin bhfreagracht táirgeora á gcur i gcrích acu.

Féadfaidh na Ballstáit a fhoráil, go bhfoilseoidh na húdaráis phoiblí atá freagrach as bainistiú na dramhaíola ó phacáistíocht a eagrú, ar a suíomhanna gréasáin, uair amháin sa bhliain ar a laghad, faisnéis faoi leibhéil na n-ábhar a aisghabhadh agus a athchúrsáladh i ndáil leis an méid dramhaíola ó phacáistíocht a gineadh ar a gcríoch.

5.   Áiritheoidh eagraíochtaí um fhreagracht táirgeoirí go gcuirfear cóir chomhionann ar tháirgeoirí beag beann ar a dtionscnamh nó ar a méid, gan ualach díréireach a chur ar tháirgeoirí cainníochtaí beaga pacáistíochta, lena n-áirítear pacáistíocht táirgí pacáistithe, lena n-áirítear fiontair bheaga agus mheánmhéide.