Artikolu 46 Organizzazzjoni b'kompetenza fil-qasam tar-responsabbiltà tal-produtturi

1.   Il-produtturi jistgħu jinkarigaw organizzazzjoni b'kompetenza fil-qasam tar-responsabbiltà tal-produtturi awtorizzata f'konformità mal-Artikolu 47 bit-twettiq tal-obbligi tar-responsabbiltà estiża tal-produttur f'isimhom. L-Istati Membri jistgħu jadottaw miżuri biex jobbligaw l-inkarigu ta' organizzazzjoni b'kompetenza fil-qasam tar-responsabbiltà tal-produtturi bl-obbligi tar-responsabbiltà estiża tal-produttur.

2.   Meta, fit-territorju ta' Stat Membru, organizzazzjoni b'kompetenza fil-qasam tar-responsabbiltà tal-produtturi, waħda jew aktar, ikunu awtorizzati jissodisfaw l-obbligi tar-responsabbiltà estiża tal-produttur f'isem il-produtturi, l-Istat Membru għandu jiżgura li l-organizzazzjoni jew l-organizzazzjonijiet b'kompetenza fil-qasam tar-responsabbiltà tal-produtturi u l-produtturi li ma jkunux inkarigaw organizzazzjoni b'kompetenza fil-qasam tar-responsabbiltà tal-produtturi bit-twettiq tal-obbligi tar-responsabbiltà estiża tal-produttur, meta jitqiesu flimkien, ikopru t-territorju kollu tal-Istat Membru fir-rigward tal-attivitajiet f'konformità mal-Artikolu 47(3) u l-Artikoli 48 u 50. L-Istati Membri għandhom jaħtru parti terza indipendenti biex tissorvelja t-twettiq tal-obbligi tar-responsabbiltà estiża tal-produttur mill-organizzazzjonijiet b'kompetenza fil-qasam tar-responsabbiltà tal-produtturi b'mod ikkoordinat jew għandhom jinkarigaw lill-awtorità kompetenti b'tali sorveljanza.

3.   L-organizzazzjonijiet b'kompetenza fil-qasam tar-responsabbiltà tal-produtturi għandhom jiżguraw il-kunfidenzjalità tad-data fil-pussess tagħhom fir-rigward tal-informazzjoni proprjetarja jew tal-informazzjoni direttament attribwibbli lill-produtturi individwali jew lir-rappreżentanti awtorizzati tagħhom.

4.   Minbarra l-informazzjoni msemmija fl-Artikolu 8a(3), il-punt (e), tad-Direttiva 2008/98/KE, l-organizzazzjonijiet b'kompetenza fil-qasam tar-responsabbiltà tal-produtturi għandhom jippubblikaw fuq is-siti web tagħhom, mill-inqas darba fis-sena, informazzjoni dwar il-kwantità tal-imballaġġ, inkluż imballaġġ ta' prodotti fl-imballaġġ, li tqiegħdu għad-dispożizzjoni għall-ewwel darba fit-territorju ta' Stat Membru, jew spakkjati minn produttur mingħajr ma jkun l-utent finali, u dwar il-livelli tal-materjali rkuprati u riċiklati fir-rigward tal-kwantità tal-imballaġġ li għalih kienu qegħdin iwettqu l-obbligi tar-responsabbiltà tal-produttur.

L-Istati Membri jistgħu jipprevedu li l-awtoritajiet pubbliċi li huma responsabbli għall-organizzazzjoni tal-immaniġġar tal-iskart mill-imballaġġ għandhom jippubblikaw fuq is-siti web tagħhom, mill-inqas darba fis-sena, informazzjoni dwar il-livelli tal-materjali rkuprati u riċiklati fir-rigward tal-kwantità ta' skart mill-imballaġġ iġġenerat fit-territorju tagħhom.

5.   L-organizzazzjonijiet b'kompetenza fil-qasam tar-responsabbiltà tal-produtturi għandhom jiżguraw trattament ugwali tal-produtturi irrispettivament mill-oriġini jew mid-daqs tagħhom, mingħajr ma jqiegħdu piż sproporzjonat fuq il-produtturi ta' kwantitajiet żgħar ta' imballaġġ, inkluż imballaġġ ta’ prodotti fl-imballaġġ, inkluż intrapriżi żgħar u ta' daqs medju.