Airteagal 16 Bainistiú sainaitheantais

1.   I gcás ina n-úsáideann daoine nádúrtha seirbhísí rochtana sonraí leictreonacha sláinte dá dtagraítear in Airteagal 4, beidh sé de cheart ag na daoine nádúrtha sin iad féin a shainaithint go leictreonach trí úsáid a bhaint as aon mhodh ríomh-shainaitheantais a aithnítear de bhun Airteagal 6 de Rialachán (AE) Uimh. 910/2014. Féadfaidh na Ballstáit sásraí comhlántacha a sholáthar chun meaitseáil chéannachta iomchuí a áirithiú i gcásanna trasteorann.

2.   Cinnfidh an Coimisiún, trí bhíthin gníomhartha cur chun feidhme, na ceanglais maidir leis an sásra idir-inoibritheach trasteorann sainaitheantais agus fíordheimhniúcháin do dhaoine nádúrtha agus do ghairmithe sláinte, i gcomhréir le Rialachán (AE) Uimh. 910/2014. Éascóidh an sásra sin inaistritheacht na sonraí leictreonacha pearsanta sláinte i gcomhthéacs trasteorann. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 98(2).

3.   Maidir leis na seirbhísí a cheanglaítear leis an sásra idir-inoibritheach trasteorann sainaitheantais agus fíordheimhniúcháin dá dtagraítear i mír 2 den Airteagal seo, cuirfidh an Coimisiún, i gcomhar leis na Ballstáit, na seirbhísí sin chun feidhme ar leibhéal an Aontais, mar chuid den bhonneagar trasteorann dá dtagraítear in Airteagal 23(3).

4.   Cuirfidh údaráis inniúla na mBallstát agus an Coimisiún an sásra idir-inoibritheach trasteorann sainaitheantais agus fíordheimhniúcháin chun feidhme ar leibhéal an Bhallstáit agus ar leibhéal an Aontais, faoi seach.