Artikolu 16 Ġestjoni tal-identifikazzjoni

1.   Meta persuni fiżiċi jużaw servizzi tal-aċċess għad-data elettronika dwar is-saħħa msemmija fl-Artikolu 4, dawk il-persuni fiżiċi għandu jkollhom d-dritt li jidentifikaw lilhom infushom b’mod elettroniku bl-użu ta’ kwalunkwe mezz ta’ identifikazzjoni elettronika li huwa rikonoxxut skont l-Artikolu 6 tar-Regolament (UE) Nru 910/2014. L-Istati Membri jistgħu jipprovdu mekkaniżmi komplementari biex jiżguraw tqabbil xieraq tal-identità f’sitwazzjonijiet transkonfinalia.

2.   Il-Kummissjoni għandha, permezz ta’ atti ta’ implimentazzjoni, tiddetermina r-rekwiżiti għall-mekkaniżmu interoperabbli u transkonfinali ta’ identifikazzjoni u awtentikazzjoni għall-persuni fiżiċi u għall-professjonisti tas-saħħa, f’konformità mar-Regolament (UE) Nru 910/2014. Dak il-mekkaniżmu għandu jiffaċilita t-trasferibbiltà tad-data elettronika personali dwar is-saħħa f’kuntest transkonfinali. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).

3.   Il-Kummissjoni, f’kooperazzjoni mal-Istati Membri, għandha timplimenta s-servizzi meħtieġa mill-mekkaniżmu ta’ identifikazzjoni u awtentikazzjoni interoperabbli u transkonfinali msemmi fil-paragrafu 2 ta’ dan l-Artikolu fil-livell tal-Unjoni, bħala parti mill-infrastruttura transkonfinali msemmija fl-Artikolu 23.

4.   L-awtoritajiet tas-saħħa kompetenti tal-Istati Membri u l-Kummissjoni għandhom jimplimentaw il-mekkaniżmu interoperabbli ta’ identifikazzjoni u awtentikazzjoni transkonfinali fil-livell tal-Istati Membri u tal-Unjoni, rispettivament.