Airteagal 24 Seirbhísí agus bonneagair sláinte digití trasteorann bhreise

1.   Féadfaidh na Ballstáit seirbhísí forlíontacha a chur ar fáil trí MoShláinte@AE (MyHealth@EU) a éascaíonn teilileigheas, sláinte mhóibíleach, rochtain ag daoine nádúrtha ar aistriúcháin a sonraí sláinte atá ann cheana, teastais sláinte a mhalartú nó a fhíorú, lena n-áirítear seirbhísí maidir le cártaí vacsaínithe, seirbhísí a thacaíonn le sláinte phoiblí agus le faireachán ar shláinte phoiblí nó ar chórais sláinte digití, seirbhísí agus feidhmeanna idir-inoibritheacha, d’fhonn ardleibhéal muiníne agus slándála a bhaint amach, leanúnachas cúraim a fheabhsú agus rochtain ar chúram sláinte atá sábháilte agus ar ardchaighdeán a áirithiú. Déanfaidh an Coimisiún, trí bhíthin gníomhartha cur chun feidhme, gnéithe teicniúla na seirbhísí forlíontacha sin a leagan amach. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 98(2).

2.   Féadfaidh an Coimisiún agus na Ballstáit malartú sonraí leictreonacha pearsanta sláinte le bonneagair eile a éascú, amhail an Córas Bainistíochta Othar Cliniciúil nó seirbhísí nó bonneagair eile i réimse na sláinte, an chúraim nó na slándála sóisialta, a d’fhéadfadh a bheith ina rannpháirtithe údaraithe in MoShláinte@AE (MyHealth@EU). Déanfaidh an Coimisiún, trí bhíthin gníomhartha cur chun feidhme, gnéithe teicniúla na malartuithe sin a leagan amach. Glacfar na gníomhartha cur chun feidhme sin i gcomhréir leis an nós imeachta scrúdúcháin dá dtagraítear in Airteagal 98(2).

Beidh nascadh bonneagair eile leis an ardán lárnach um shláinte dhigiteach agus dínascadh bonneagair eile uaidh faoi réir cinneadh ón gCoimisiún arna ghlacadh trí bhíthin gníomh cur chun feidhme, bunaithe ar thoradh na seiceálacha comhlíontachta ar ghnéithe teicniúla na malartuithe dá dtagraítear sa chéad fhomhír den mhír seo. Déanfar an gníomh cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 98(2).

3.   Féadfaidh pointe teagmhála náisiúnta do shláinte dhigiteach de chuid tríú tír nó córas a arna mbunú ar an leibhéal idirnáisiúnta ag eagraíocht idirnáisiúnta a bheith ina rannpháirtí údaraithe in MoShláinte@AE (MyHealth@EU), ar choinníoll go gcomhlíontar leis ceanglais MoShláinte@AE (MyHealth@EU) chun críocha an mhalartaithe sonraí leictreonacha pearsanta sláinte dá dtagraítear in Airteagal 23, go gcomhlíonann an t-aistriú a eascraíonn as an nasc le MoShláinte@AE (MyHealth@EU) na rialacha i gCaibidil V de Rialachán (AE) 2016/679, agus go bhfuil na ceanglais a bhaineann le bearta dlíthiúla, eagraíochtúla, oibríochtúla, séimeantacha, teicniúla agus cibearshlándála coibhéiseach leis na ceanglais is infheidhme maidir leis na Ballstáit agus seirbhísí MoShláinte@AE (MyHealth@EU) á n-oibriú acu. Déanfaidh an Coimisiún na ceanglais sin a fhíorú trí sheiceálacha comhlíontachta.

Bunaithe ar thoradh na seiceálacha comhlíontachta dá dtagraítear sa chéad fhomhír den mhír seo, féadfaidh an Coimisiún, trí bhíthin gníomhartha cur chun feidhme, cinneadh a dhéanamh pointe teagmhála náisiúnta do shláinte dhigiteach de chuid an tríú tír nó an chórais arna bhunú ar an leibhéal idirnáisiúnta ag eagraíocht idirnáisiúnta, de réir mar is infheidhme, a nascadh le MoShláinte@AE (MyHealth@EU) agus a dhínascadh uaidh. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 98(2).

Bunóidh agus coinneoidh an Coimisiún liosta de phointí teagmhála náisiúnta do shláinte dhigiteach de chuid tríú tíortha nó córas arna mbunú ar an leibhéal idirnáisiúnta ag eagraíocht idirnáisiúnta atá nasctha le MoShláinte@AE (MyHealth@EU) de bhun na míre seo agus cuirfidh sé an liosta sin ar fáil don phobal.