Artikolu 24 Servizzi u infrastrutturi tas-saħħa diġitali transkonfinali supplimentari

1.   L-Istati Membri jistgħu jipprovdu servizzi supplimentari permezz ta’ Saħħti@UE (MyHealth@EU) li jiffaċilitaw it-telemediċina, is-saħħa mobbli, l-aċċess minn persuni fiżiċi għat-traduzzjonijiet eżistenti tad-data tas-saħħa tagħhom, l-iskambju jew il-verifika ta’ ċertifikati relatati mas-saħħa, inkluż servizzi ta’ kard tat-tilqim li jappoġġaw is-saħħa pubblika u l-monitoraġġ tas-saħħa pubblika jew sistemi, servizzi u applikazzjonijiet interoperabbli tas-saħħa diġitali, bil-ħsieb li jinkiseb livell għoli ta’ fiduċja u sigurtà, tissaħħaħ il-kontinwità tal-kura u jiġi żgurat l-aċċess għal kura tas-saħħa sikura u ta’ kwalità għolja. Il-Kummissjoni għandha tistabbilixxi l-aspetti tekniċi ta’ tali servizzi supplimentari permezz ta’ atti ta’ implimentazzjoni. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).

2.   Il-Kummissjoni u l-Istati Membri jistgħu jiffaċilitaw l-iskambju ta’ data personalielettronika dwar is-saħħa ma’ infrastrutturi oħrajn, bħas-Sistema ta’ Ġestjoni Klinika tal-Pazjenti jew servizzi jew infrastrutturi oħrajn fl-oqsma tas-saħħa, tal-kura jew tas-sigurtà soċjali li jistgħu jsiru parteċipanti awtorizzati f’Saħħti@UE (MyHealth@EU).Il-Kummissjoni għandha tistabbilixxi l-aspetti tekniċi ta’ tali skambji permezz ta’ atti ta’ implimentazzjoni. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).

Il-konnessjoni u l-iskonnessjoni ta’ infrastruttura oħra mal-pjattaforma ċentrali għas-saħħa diġitali jew minnha, għandha tkun suġġetta għal deċiżjoni tal-Kummissjoni permezz ta’ atti ta’ implimentazzjoni, ibbażata fuq ir-riżultat ta’ verifiki tal-konformità tal-aspetti tekniċi ta’ skambji kif imsemmi fl-ewwel subparagrafu ta’ dan il-paragrafu. Dak l-att ta’ implimentazzjoni għandu jiġu adottat f’konformità mal-proċedura ta’ eżami msemmija fl-Artikolu 98(2).

3.   Punt ta’ kuntatt nazzjonali għas-saħħa diġitali ta’ pajjiż terz jew sistema stabbilita fil-livell internazzjonali minn organizzazjoni internazzjonali jista’ jsir parteċipant awtorizzat ta’ Saħħti@UE (MyHealth@EU), dment li jissodisfa r-rekwiżiti ta’ Saħħti@UE (MyHealth@EU) għall-finijiet tal-iskambju ta’ data personali elettronika dwar is-saħħa kif imsemmi fl-Artikolu 23, li t-trasferiment li jirriżulta mill-konnessjoni ma’ MyHealth@EU jikkonforma mar-regoli fil-Kapitolu V tar-Regolament (UE) 2016/679, u li r-rekwiżiti dwar il-miżuri legali, organizzattivi, operazzjonali, semantiċi, tekniċi u taċ-ċibersigurtà huma ekwivalenti għal dawk applikabbli għall-Istati Membri fit-tħaddim tas-servizzi Saħħti@UE (MyHealth@EU). Dawk ir-rekwiżiti għandhom jiġu vverifikati mill-Kummissjoni permezz ta’ kontrolli tal-konformità.

Abbażi tal-eżitu tal-kontroll tal-konformità msemmija fl-ewwel subparagrafu ta’ dan il-paragrafu, il-Kummissjoni tista’, permezz ta’ atti ta’ implimentazzjoni, tiddeċiedi li tikkonnettja jew tiskonnettja l-punt ta’ kuntatt nazzjonali għas-saħħa diġitali tal-pajjiż terz jew is-sistema stabbilita f’livell internazzjonali minn organizzazjoni internazzjonali, kif applikabbli, ma’ jew minnSaħħti@UE (MyHealth@EU). Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).

Il-Kummissjoni għandha tistabbilixxi u żżomm lista ta’ kuntatti nazzjonali għas-saħħa diġitali ta’ pajjiżi terzi jew ta’ sistemi stabbiliti f’livell internazzjonali minn organizzazzjonijiet internazzjonali li jkunu konnessi ma’ Saħħti@UE (MyHealth@EU) aġġornata skont dan il-paragrafu u għandha tagħmel dik il-lista disponibbli għall-pubbliku.