Airteagal 66 Íoslaghdú sonraí agus teorannú críche

1.   I gcás ina bhfaigheann comhlachtaí rochtana sonraí sláinte iarratas ar rochtain ar shonraí sláinte, áiritheoidh siad nach soláthrófar rochtain ach ar shonraí leictreonacha sláinte atá leormhaith, ábhartha agus teoranta don mhéid is gá maidir le críoch na próiseála arna sonrú san iarratas ar rochtain ar shonraí sláinte ag an úsáideoir sonraí sláinte agus i gcomhréir leis an gcead sonraí arna eisiúint de bhun Airteagal 68.

2.   Cuirfidh comhlachtaí rochtana sonraí sláinte sonraí leictreonacha sláinte ar fáil i bhformáid anaithnidithe, i gcás inar féidir leis an úsáideoir sonraí sláinte críoch na próiseála sonraí a bhaint amach lena leithéid de shonraí, agus an fhaisnéis arna soláthar ag an úsáideoir sonraí sláinte á cur san áireamh.

3.   I gcás ina mbeidh sé léirithe go leordhóthanach ag an úsáideoir sonraí sláinte nach féidir críoch na próiseála a bhaint amach le sonraí anaithnidithe i gcomhréir le hAirteagal 68(1), pointe (c), soláthróidh comhlachtaí rochtana sonraí sláinte rochtain ar shonraí leictreonacha sláinte i bhformáid ina bhfuil ainm bréige curtha i bhfeidhm. Is ag an gcomhlacht rochtana sonraí sláinte amháin a bheidh an fhaisnéis is gá chun an t-ainm bréige a aisiompú nó ag eintiteas a ghníomhaíonn mar thríú páirtí iontaofa i gcomhréir leis an dlí náisiúnta.