Artikolu 66 Minimizzazzjoni tad-data u limitazzjoni tal-għan

1.   Fejn il-korpi tal-aċċess għad-data dwar is-saħħa jirċievu applikazzjoni għall-aċċess għad-data, huma għandhom jiżguraw li l-aċċess jiġi pprovdut biss għad-data elettronika dwar is-saħħa li hija adegwata, rilevanti u limitata għal dak li huwa neċessarju fir-rigward tal-għan tal-ipproċessar indikat fl-applikazzjoni għall-aċċess għad-data dwar is-saħħa mill-utent tad-data dwar is-saħħa u f’konformità mal-permess tad-data maħruġ skont l-Artikolu 68.

2.   Il-korpi tal-aċċess għad-data dwar is-saħħa għandhom jipprovdu data elettronika dwar is-saħħa f’format anonimizzat, meta l-għan tal-ipproċessar mill-utent tad-data dwar is-saħħa jista’ jinkiseb b’tali data, waqt li titqies l-informazzjoni pprovduta mill-utent tad-data dwar is-saħħa.

3.   Meta l-utent tad-data dwar is-saħħa jkun wera b’mod suffiċjenti li l-għan tal-ipproċessar ma jkunx jista’ jinkiseb b’data anonimizzata, f’konformità mal-Artikolu 68(1), il-punt (c), korpi tal-aċċess għad-data dwar is-saħħa għandhom jipprovdu aċċess għad-data elettronika dwar is-saħħa f’format psewdonimizzat. L-informazzjoni meħtieġa biex titreġġa’ lura l-psewdonimizzazzjoni għandha tkun disponibbli biss għall-korp tal-aċċess għad-data dwar is-saħħa jew għal entità li taġixxi bħala parti terza affidabbli f’konformità mal-liġi nazzjonali.