Airteagal 84 Litearthacht sláinte digití agus rochtain ar an tsláinte dhigiteach

1.   Déanfaidh na Ballstáit litearthacht sláinte digití agus forbairt inniúlachtaí agus scileanna ábhartha le haghaidh othar a chur chun cinn agus tacú leis an litearthacht sláinte digití agus le forbairt na n-inniúlachtaí agus na scileanna sin. Tacóidh an Coimisiún leis na Ballstáit ina leith sin. Beidh sé mar aidhm le feachtais nó cláir múscailte feasachta go háirithe othair agus an pobal i gcoitinne a chur ar an eolas faoi úsáid phríomhúil agus úsáid thánaisteach faoi chuimsiú EHDS, lena n-áirítear na cearta a eascraíonn as, chomh maith leis na buntáistí, na rioscaí agus na gnóthachain fhéideartha don eolaíocht agus don tsochaí a bhaineann le húsáid phríomhúil agus úsáid thánaisteach.

2.   Déanfar na feachtais agus cláir múscailte feasachta dá dtagraítear i mír 1 a chur in oiriúint do riachtanais grúpaí sonracha agus déanfar iad a fhorbairt, a athbhreithniú, agus i gcás inar gá, a nuashonrú.

3.   Cuirfidh na Ballstáit rochtain ar an mbonneagar is gá chun cinn chun bainistiú éifeachtach a dhéanamh ar sonraí leictreonacha sláinte daoine nádúrtha, le haghaidh úsáid phríomhúil agus úsáid thánaisteach araon.