Artikolu 84 Litteriżmu diġitali fis-saħħa u aċċess għas-saħħa diġitali

1.   L-Istati Membri għandhom jippromwovu u jappoġġaw il-litteriżmu diġitali fis-saħħa u l-iżvillup ta’ kompetenzi u l-ħiliet rilevanti għall-pazjenti. Il-Kummissjoni għandha tappoġġa lill-Istati Membri f’dan ir-rigward. Il-kampanji jew il-programmi ta’ sensibilizzazzjoni għandu jkollhom l-għan, b’mod partikolari, li jinfurmaw lill-pazjenti u lill-pubbliku inġenerali dwar l-użu primarju u użu sekondarju fil-qafas tal-EHDS, inkluż id-drittijiet li jirriżultaw minnu, kif ukoll il-vantaġġi, ir-riskji u l-kisbiet potenzjali għax-xjenza u għas-soċjetà tal-użu primarju u użu sekondarju.

2.   Il-kampanji u l-programmi ta’ sensibilizzazzjoni msemmija fil-paragrafu 1 għandhom jitfasslu skont il-ħtiġijiet ta’ gruppi speċifiċi u għandhom jiġu żviluppati, riveduti u, fejn meħtieġ, aġġornati.

3.   L-Istati Membri għandhom jippromwovu l-aċċess għall-infrastruttura meħtieġa għall-ġestjoni effettiva tad-data elettronika dwar is-saħħa tal-persuni fiżiċi kemm għall-użu primarju kif ukoll għall-użu sekondarju.