Airteagal 29 Cumhachtaí údaráis inniúil

(a)

an fhaisnéis riachtanach agus na doiciméid riachtanacha uile a fháil, tráth ar bith, ó oibreoir SIPS chun measúnú a dhéanamh ar chomhlíonadh na gceanglas faoin Rialachán seo nó chun oibriú rianúil na gcóras íocaíochta ar an leibhéal sistéamach a chur chun cinn. Déanfaidh an t-oibreoir SIPS an fhaisnéis ábhartha a thuairisciú don údarás inniúil gan moill mhíchuí;

(b)

a cheangal ar oibreoir SIPS saineolaí neamhspleách a cheapadh chun imscrúdú nó athbhreithniú neamhspleách a dhéanamh ar oibriú an SIPS. Féadfaidh an t-údarás inniúil ceanglais a fhorchur maidir leis an gcineál saineolaí atá le ceapadh, ábhar agus raon feidhme na tuarascála atá le cur ar fáil, láimhseáil na tuarascála, lena n-áirítear nochtadh agus foilsiú codanna áirithe, agus uainiú tháirgeadh na tuarascála. Cuirfidh oibreoir SIPS an t-údarás inniúil ar an eolas faoin gcaoi ar comhlíonadh na ceanglais a forchuireadh;

(c)

cigireachtaí ar an láthair a dhéanamh nó cigireachtaí ar an láthair a tharmligean. Féadfaidh an t-údarás inniúil cigireacht a dhéanamh gan fógra a thabhairt roimh ré más gá sin ar mhaithe leis an gcigireacht a dhéanamh go cuí agus go héifeachtúil.