Airteagal 9 Creidiúnú na ndeimhnitheoirí

beidh an deimhnitheoir bunaithe faoi dhlí Ballstáit agus beidh pearsantacht dhlítheanach aige;

is é a bheidh sa deimhnitheoir comhlacht tríú páirtí a bheidh neamhspleách ar an oibreoir eacnamaíoch;

an deimhnitheoir, a lucht bainistíochta sinsearaí agus an pearsanra atá freagrach as an measúnú comhréireachta a dhéanamh, ní rachaidh siad i mbun aon ghníomhaíocht a d’fhéadfadh a bheith i gcoinbhleacht lena neamhspleáchas breithiúnais ná lena n-ionracas i ndáil leis na gníomhaíochtaí deimhniúcháin;

oibreoidh an deimhnitheoir agus a phearsanra ar bhealach neamh-idirdhealaitheach agus déanfaidh siad a ngníomhaíochtaí de réir an leibhéil is airde ionracais ghairmiúil agus de réir na hinniúlachta teicniúla is gá agus beidh siad saor ó gach brú agus mealladh, lena n-áirítear ó thaobh airgid de, a d’fhéadfadh tionchar a imirt ar a mbreithiúnas nó ar thorthaí a ngníomhaíochtaí deimhniúcháin, go háirithe a mhéid a bhaineann le daoine nó grúpaí daoine a bhfuil leas acu i dtorthaí na ngníomhaíochtaí sin. Ráthófar neamhchlaontacht na ndeimhnitheoirí, a lucht bainistíochta sinsearaí agus an phearsanra atá freagrach as an deimhniúchán agus na cúraimí a dhéanamh;

beidh an saineolas, an trealamh agus an bonneagar is gá ag an deimhnitheoir chun an measúnú comhréireachta a bhfuil sé creidiúnaithe ina leith a dhéanamh;

beidh líon leordhóthanach pearsanra ag an deimhnitheoir a bhfuil na cáilíochtaí cuí agus an taithí chuí aige, a bheidh freagrach as cúraimí an mheasúnaithe comhréireachta a dhéanamh;

gan dochar do chumhachtaí na n-údarás inniúil faoi Airteagal 16(3), pointe (b), déanfaidh pearsanra deimhnitheora rúndacht ghairmiúil a urramú maidir leis an bhfaisnéis uile a fhaightear agus cúraimí an mheasúnaithe comhréireachta á ndéanamh aige;

i gcás ina ndéanfaidh deimhnitheoir cúraimí sonracha a bhaineann le deimhniú a ligean ar fochonradh nó ina rachaidh sé ar iontaoibh fochuideachta, glacfaidh sé freagracht iomlán as na cúraimí a dhéanann na fochonraitheoirí nó na fochuideachtaí agus déanfaidh sé measúnú agus faireachán ar cháilíochtaí an fhochonraitheora nó na fochuideachta agus ar an obair a dhéanann sé nó sí. Ní fhéadfaidh ach fochonraitheoirí nó fochuideachtaí na cúraimí a thagann faoi raon feidhme chreidiúnú an deimhnitheora a dhéanamh. Áiritheoidh na deimhnitheoirí nach ndéanfaidh gníomhaíochtaí a bhfochonraitheoirí nó a bhfochuideachtaí difear do rúndacht, d’oibiachtúlacht nó do neamhchlaontacht a ngníomhaíochtaí deimhniúcháin.