Airteagal 7 Ardán Faisnéise maidir le Faireachán ar Cheimiceáin

1.   Déanfaidh ECHA IPCHEM a oibriú agus a choinneáil ar bun, ar ardán é ina bhfuil sonraí maidir le teagmhais i ndáil le ceimiceáin i meáin éagsúla, lena n-áirítear an t-uisce, an ithir, an t-aer laistigh, an t-aer lasmuigh, bithra, bia agus beatha, daoine, agus táirgí mar chuid den ardán sonraí comhchoiteann.

2.   Faoin 2 Eanáir 2029, aistreoidh an Coimisiún na sonraí ceimiceán atá in IPCHEM chuig ECHA lena n-ionchorprú san ardán sonraí comhchoiteann.

3.   Faoin 2 Eanáir 2029, aistreoidh an Coimisiún na sonraí ceimiceán atá in IPCHEM chuig ECHA, EEA nó EFSA lena n-óstáil i gcomhréir le sainordú na gníomhaireachta faoi seach agus i gcomhréir le hAirteagal 5.

4.   Tar éis an t-aistriú dá dtagraítear i mír 3 a chur i gcrích, i gcás ina bhfuil sonraí maidir le teagmhais agus sonraí gaolmhara ceimiceán á n-óstáil ag an gCoimisiún nó ag ceann de na Gníomhaireachtaí nó ina seilbh acu, cuirfidh sé na sonraí sin ar fáil do ECHA gan mhoill lena n-ionchorprú in IPCHEM.

5.   Oibreoidh an Coimisiún agus na Gníomhaireachtaí i gcomhar le ECHA ar an leibhéal teicniúil chun gur féidir sonraí maidir le teagmhais agus sonraí gaolmhara ceimiceán atá á n-óstáil acu nó a bhfuil seilbh acu orthu a ionchorprú san ardán sonraí comhchoiteann agus a fhoilsiú tríd an ardán sonraí comhchoiteann.

6.   Áiritheoidh ECHA go bhfuil na sonraí atá in IPCHEM inléite ag meaisín agus in-íoslódáilte.