Artikolu 7 Pjattaforma ta’ Informazzjoni għall-Monitoraġġ tas-Sustanzi Kimiċi

1.   L-ECHA għandha topera u żżomm l-IPCHEM li fiha data tal-okkorrenza dwar is-sustanzi kimiċi f’media differenti, inklużi l-ilma, il-ħamrija, l-arja ta’ ġewwa, l-arja ta’ barra, il-bijota, l-ikel u l-għalf, il-bnedmin u l-prodotti bħala parti mill-pjattaforma komuni tad-data.

2.   Sat-2 ta’ Jannar 2029, il-Kummissjoni għandha tittrasferixxi d-data dwar sustanzi kimiċi li jkun hemm fl-IPCHEM lill-ECHA għall-inkorporazzjoni fil-pjattaforma komuni tad-data.

3.   Sat-2 ta’ Jannar 2029, il-Kummissjoni għandha tittrasferixxi d-data dwar sustanzi kimiċi li jkun hemm fl-IPCHEM lill-ECHA, lill-EEA jew lill-EFSA biex tiġi ospitata f’konformità mal-mandat tal-aġenzija rispettiva u f’konformità mal-Artikolu 5.

4.   Wara t-tlestija tat-trasferiment imsemmi fil-paragrafu 3, fejn il-Kummissjoni jew waħda mill-Aġenziji tospita jew ikollha data tal-okkorrenza dwar is-sustanzi kimiċi u data dwar sustanzi kimiċi relatata, hija għandha tagħmel dik id-data disponibbli għall-ECHA mingħajr dewmien biex tiġi inkorporata fl-IPCHEM.

5.   Il-Kummissjoni u l-Aġenziji għandhom jikkooperaw fil-livell tekniku mal-ECHA biex jippermettu tali d-data tal-okkorrenza dwar is-sustanzi kimiċi u d-data dwar sustanzi kimiċi relatata li jospitaw jew li jkollhom tiġi inkorporata fil-pjattaforma komuni tad-data u ppublikata fuqha.

6.   L-ECHA għandha tiżgura li d-data li tinsab fl-IPCHEM tkun tista’ tinqara mill-magni u tkun tista’ titniżżel.